Qimmatli qogʻozlar bozorida kasbiy faoliyat turlarini litsenziyalashni tartibga solish maqsadida hamda “Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonuniga muvofiq Vazirlar Mahkamasi qaror qiladi:

1. Qimmatli qogʻozlar bozorida kasbiy faoliyatni (investitsiya institutlarining qimmatli qogʻozlar bozoridagi faoliyatini) litsenziyalash toʻgʻrisidagi Nizom 1-ilovaga muvofiq tasdiqlansin.

2. Oʻzbekiston Respublikasi Davlat mulki qoʻmitasi huzuridagi Qimmatli qogʻozlar bozori faoliyatini muvofiqlashtirish va nazorat qilish markazi:

litsenziyalar berish yoki litsenziyalar berishni rad etish toʻgʻrisida xulosalar tayyorlash boʻyicha ekspert komissiyasi tarkibini va komissiya toʻgʻrisidagi nizomni ikki hafta muddatda tasdiqlasin;

oʻz idoraviy normativ hujjatlarini mazkur qarorga muvofiqlashtirsin.

3. Vazirlar Mahkamasining “Investitsiya va Xususiylashtirish investitsiya fondlari faoliyatini takomillashtirish chora-tadbirlari toʻgʻrisida” 1998-yil 25-sentabrdagi 410-son qaroriga, 2-ilovaga muvofiq oʻzgartirishlar kiritilsin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S.Azimov zimmasiga yuklansin.

1. Mazkur Nizom Qimmatli qogʻozlar bozorida kasbiy faoliyat (investitsiya institutlarining qimmatli qogʻozlar bozoridagi faoliyati) turlarini litsenziyalash tartibini belgilaydi.

2. Qimmatli qogʻozlar bozorida kasbiy faoliyatni (investitsiya institutlarining qimmatli qogʻozlar bozoridagi faoliyatini) litsenziyalash Oʻzbekiston Respublikasi Davlat mulki qoʻmitasi huzuridagi Qimmatli qogʻozlar bozori faoliyatini muvofiqlashtirish va nazorat qilish markazi (keyingi oʻrinlarda litsenziyalovchi organ deb yuritiladi) tomonidan amalga oshiriladi.

3. Qimmatli qogʻozlar bozorida kasbiy faoliyatni yuridik shaxslar amalga oshirishlari mumkin, jismoniy shaxslar tomonidan ham amalga oshirilishi mumkin boʻlgan investitsiya vositachisi va investitsiya maslahatchisining kasbiy faoliyati bundan mustasno.

Banklar va boshqa kredit tashkilotlarining qimmatli qogʻozlar bozoridagi kasbiy faoliyati litsenziyalovchi organ tomonidan beriladigan litsenziya asosida amalga oshiriladi.

4. Qimmatli qogʻozlar bozoridagi kasbiy faoliyat turlarini amalga oshirish uchun litsenziya amal qilish muddati cheklanmasdan beriladi.

5. Qimmatli qogʻozlar bozoridagi kasbiy faoliyat turlarini amalga oshirishga namunaviy (oddiy) litsenziyalar beriladi.

6. Litsenziyalar qimmatli qogʻozlar bozoridagi kasbiy faoliyatning quyidagi turlariga beriladi:

investitsiya vositachisi;

investitsiya maslahatchisi;

investitsiya kompaniyasi;

investitsiya fondi;

boshqaruvchi kompaniya;

depozitariy;

hisob-kitob-kliring tashkiloti (palatalar);

qimmatli qogʻozlar egalari reyestrini saqlovchi;

qimmatli qogʻozlarning nominal saqlovchisi;

qimmatli qogʻozlar bilan birjadan tashqari savdolar tashkilotchisi.

Qimmatli qogʻozlar bozoridagi kasbiy faoliyat yuridik yoki jismoniy shaxs tomonidan faqat litsenziyada koʻrsatilgan faoliyat turi boʻyicha amalga oshirilishi mumkin.

Litsenziyani yoki uning boʻyicha huquqlarni boshqa shaxslarga berish taqiqlanadi.

7. Quyidagilar qimmatli qogʻozlar bozoridagi kasbiy faoliyatni amalga oshirishning litsenziya talablari va shartlari hisoblanadi:

a) litsenziat tomonidan qimmatli qogʻozlar bozori toʻgʻrisidagi Oʻzbekiston Respublikasi qonun hujjatlariga, litsenziyalovchi organning normativ-huquqiy hujjatlariga, shuningdek mazkur Nizomga majburiy rioya qilinishi;

b) litsenziatning oʻz mablagʻlari (sarmoyasi) va boshqa moliyaviy koʻrsatkichlarining yetarliligini va litsenziyalovchi organ tomonidan belgilangan majburiy normativlarga muvofiqligini taʼminlash;

v) litsenziyalovchi organ tomonidan belgilangan dasturiy-texnik kompleksga qoʻyiladigan talablarning dasturiy taʼminoti va texnik vositalari muvofiqligi hamda investitsiya institutlari va fond birjalari bilan oʻzaro elektron aloqaga tayyorligi;

g) qimmatli qogʻozlar bozorida kasbiy faoliyatni amalga oshiruvchi litsenziatda qimmatli qogʻozlar bilan operatsiyalarning ichki hisobini yuritish vazifasiga kiruvchi kamida bitta xodimning boʻlishi;

d) quyidagi shaxslar jismoniy shaxs — litsenziat yoxud yuridik shaxs — litsenziatning yakka holda ijro etuvchi organi boʻlishlari mumkin emas:

moliya-iqtisod, yuridik, matematika yoki axborot texnologiyalari mutaxassisliklaridan kamida bittasi boʻyicha oliy maʼlumotli boʻlmagan shaxslar;

investitsiya institutlarida, fond birjalarida yoxud iqtisodiy, moliyaviy va yuridik faoliyat sohalaridagi yoki koʻrsatib oʻtilgan yoʻnalishlar boʻyicha davlat boshqaruv organlaridagi ishda kamida ikki yillik ish stajiga ega boʻlmagan shaxslar;

yakka holda ijro etuvchi organ funksiyalarini bajargan, kollegial ijro etuvchi organ tarkibiga kirgan yoki ushbu shaxslarning aybi bilan yoʻl qoʻyilgan litsenziya talablari va shartlari buzilganligi uchun koʻrsatib oʻtilgan tashkilotlarda faoliyatning tegishli turlarini amalga oshirishga berilgan litsenziyalarning amal qilishi toʻxtagan paytda, agar bunday toʻxtash paytidan boshlab uch yildan kam vaqt oʻtgan boʻlsa, investitsiya instituti, fond birjasi, kredit, sugʻurta yoki auditorlik tashkilotining muassislari boʻlgan shaxslar;

iqtisodiyot sohasidagi jinoyat uchun yoki boshqaruv tartibiga qarshi jinoyat uchun olib tashlanmagan sudlanganlikka ega boʻlgan shaxslar;

yuridik shaxs bankrot deb eʼtirof etilgan paytda va eʼtirof etilgan paytdan boshlab ikki yil oʻtmagan boʻlsa, yakka holda ijro etuvchi organ funksiyalarini bajargan yoki kollegial ijro etuvchi organ tarkibiga kirgan shaxslar;

e) litsenziatning mutaxassislari, mansabdor shaxslari va nazoratchisining litsenziyalovchi organ tomonidan tasdiqlangan malaka talablariga muvofiqligi.

Ushbu bandning “b” va “g” kichik bandlari talablari jismoniy shaxs boʻlgan litsenziatlarga joriy etilmaydi.

8. Qimmatli qogʻozlar bozorida kasbiy faoliyatning ikki va undan ortiq turlariga litsenziya olishda litsenziya talabgoriga quyidagi talablar qoʻyiladi:

qonun hujjatlariga muvofiq qimmatli qogʻozlar bozorida asosiy faoliyatning qoʻshimcha (qoʻshib olib boriladigan) turi qimmatli qogʻozlar bozorida kasbiy faoliyatning amalga oshirilgan turiga muvofiq boʻlishi kerak;

qimmatli qogʻozlar bozorida qoʻshimcha faoliyatni amalga oshirish niyatida boʻlgan litsenziya talabgori yoki litsenziat litsenziyalovchi organga mazkur Nizomda koʻrsatilgan litsenziyalanadigan faoliyatning tegishli turiga hujjatlarni taqdim etishi va kasbiy faoliyatning qoʻshib olib boriladigan turlaridan biri uchun eng koʻp darajada belgilangan oʻz mablagʻlari (sarmoya)ning yetarli miqdoriga ega boʻlishi kerak.

Litsenziyalovchi organning normativ-huquqiy hujjatlarida litsenziya talabgorining tarkibiy boʻlinmasi yoki litsenziya talablari va shartlari unga ham joriy etiladigan litsenziatning qoʻshib olib boriladigan kasbiy faoliyatni amalga oshirishiga qoʻyiladigan talablar va uning tartibi nazarda tutilishi mumkin.

9. Litsenziya olish uchun litsenziya talabgori litsenziyalovchi organga quyidagi hujjatlarni taqdim etadi:

a) litsenziya berish toʻgʻrisida quyidagilar koʻrsatilgan holdagi ariza:

yuridik shaxs uchun — yuridik shaxsning nomi va tashkiliy-huquqiy shakli, uning joylashgan joyi (pochta manzili), bank muassasasining nomi va bank muassasasida talab qilib olinadigan depozit hisob raqamining tartib raqami;

jismoniy shaxs uchun — familiyasi, ismi, otasining ismi, fuqaroning shaxsini tasdiqlovchi hujjatdagi maʼlumotlar;

litsenziya talabgori amalga oshirish niyatida boʻlgan faoliyatning litsenziyalanadigan turi;

b) yuridik shaxs uchun – yuridik shaxsning davlat roʻyxatidan oʻtkazilganligi toʻgʻrisidagi guvohnomaning notarial tasdiqlangan nusxasi; jismoniy shaxs uchun – yakka tartibdagi tadbirkorning davlat roʻyxatidan oʻtkazilganligi toʻgʻrisidagi guvohnomaning notarial tasdiqlangan nusxasi;

v) litsenziya talabgorining arizasi litsenziyalovchi organ tomonidan koʻrib chiqilganligi uchun litsenziya talabgori tomonidan yigʻim toʻlanganligini tasdiqlovchi hujjat;

g) roʻyxatdan oʻtkazilgan barcha oʻzgartirish va qoʻshimchalar bilan birga taʼsis hujjatlarining notarial tasdiqlangan nusxalari;

d) soliq organining belgisi va oxirgi hisobot sanasiga moliyaviy natijalar toʻgʻrisidagi hisobot bilan birgalikda buxgalteriya balansi nusxasi (talabgor oxirgi hisobot sanasidan keyin tashkil etilgan hollardan tashqari);

e) litsenziyalovchi organ tomonidan tasdiqlanadigan tartibga muvofiq oxirgi hisobot sanasiga oʻz mablagʻlari (sarmoyasi) miqdori hisob-kitobi;

j) litsenziya talabgori boʻlgan jismoniy shaxsning yoxud litsenziya talabgori boʻlgan yuridik shaxsning (investitsiya fondlaridan tashqari) rahbari va xodimlarining litsenziyalovchi organning malaka talablariga muvofiqligini tasdiqlovchi hujjatlarning nusxalari, shu jumladan litsenziya talabgori boʻlgan yuridik shaxsning ular doimiy asosda ishga qabul qilinganligi toʻgʻrisidagi hujjatlarning nusxalari, shuningdek yakka holda ijro etuvchi organ funksiyasini amalga oshiruvchi shaxslarning mehnat stajini tasdiqlovchi hujjatlarning nusxalari;

z) axborotni saqlash, muhofaza qilish va tiklash tartibi, shu jumladan talabgor tomonidan tasdiqlangan xizmat axborotidan nohuquqiy foydalanishga qaratilgan chora-tadbirlar roʻyxati;

i) qimmatli qogʻozlar bozorida kasbiy faoliyatning alohida turlarini litsenziyalash uchun talab etiladigan mazkur Nizomning 10—15-bandlarida sanab oʻtilgan boshqa hujjatlar.

Ushbu bandning “g”, “d”, “e”, “z” kichik bandlari talablari jismoniy shaxslar boʻlgan litsenziya talabgorlariga joriy etilmaydi.

10. Investitsiya vositachisi, investitsiya maslahatchisi, boshqaruvchi kompaniya va investitsiya kompaniyasi kasbiy faoliyatini amalga oshirishga litsenziya olish uchun litsenziya talabgori qoʻshimcha ravishda quyidagi hujjatlarni taqdim etadi:

talabgor tomonidan tasdiqlangan Qimmatli qogʻozlar bilan operatsiyalarni ichki hisobga olish qoidalari nusxasi;

talabgor tomonidan tasdiqlangan Mijozning manfaatlari bilan nizo kelib chiqqanda investitsiya vositachisi (investitsiya maslahatchisi, boshqaruvchi kompaniya, investitsiya kompaniyasi)ning xatti-harakatlari tartibi nusxasi.

11. Investitsiya fondi kasbiy faoliyatini amalga oshirishga litsenziya olish uchun litsenziya talabgori qoʻshimcha ravishda quyidagi hujjatlarni taqdim etadi:

aksiyalar emissiyasi prospekti;

fondni boshqarish toʻgʻrisida investitsiya fondi bilan boshqaruvchi kompaniya oʻrtasida kontrakt tuzilganligi toʻgʻrisidagi dastlabki shartnomaning litsenziat tomonidan tasdiqlangan nusxasi;

investitsiya fondi bilan depozitariy oʻrtasida kontrakt tuzilganligi toʻgʻrisidagi dastlabki shartnomaning litsenziat tomonidan tasdiqlangan nusxasi.

12. Depozitar faoliyatni amalga oshirishga litsenziya talabgori qoʻshimcha ravishda quyidagi hujjatlarni taqdim etadi:

mijozlarga xizmat koʻrsatish tartibi;

litsenziyalovchi organning talablariga muvofiq boʻlgan depozitar faoliyatni amalga oshirishga qoʻyiladigan ichki tartib;

depozitar faoliyatni amalga oshirishga oʻz dasturiy vositasi mavjud boʻlgan taqdirda mualliflik huquqini tasdiqlovchi mazkur dasturiy vositani yoki guvohnoma nusxasini sotgan (bergan) tashkilot bilan tuzilgan depozitar faoliyatni amalga oshirish boʻyicha dasturiy vositadan tijorat maqsadida foydalanishga mualliflik litsenziya shartnomasi nusxasi;

depozitar faoliyatni amalga oshirish boʻyicha dasturiy taʼminotning texnik tavsifi;

depozitar faoliyatni amalga oshirish uchun foydalaniladigan texnik vositalarning tavsiflari koʻrsatilgan holdagi roʻyxati;

dasturiy taʼminot va texnik vositalarning depozitariylarning dasturiy–texnik komplekslariga qoʻyiladigan belgilangan talablarga muvofiqligi hamda investitsiya institutlari bilan elektron oʻzaro hamkorlikka tayyorligi toʻgʻrisida Markaziy depozitariyning xulosasi.

13. Qimmatli qogʻozlar bozorida hisob-kitob-kliring faoliyatini amalga oshirishga litsenziya olish uchun litsenziya talabgori qoʻshimcha ravishda quyidagi hujjatlarni taqdim etadi:

mazkur dasturiy vositani sotgan (bergan) tashkilot bilan tuzilgan hisob-kitob-kliring faoliyatini amalga oshirish boʻyicha dasturiy vositadan tijorat maqsadida foydalanishga mualliflik litsenziya shartnomasi nusxasi yoki hisob-kitob-kliring faoliyatini amalga oshirish boʻyicha oʻz dasturiy vositasi mavjud boʻlgan taqdirda mualliflik huquqini tasdiqlovchi guvohnoma nusxasi;

tegishli dasturiy taʼminotning texnik tavsifi;

Hisob-kitob va kliringni amalga oshirish (kliring xizmati koʻrsatish) qoidalari.

14. Qimmatli qogʻozlar egalari reyestrini yuritish boʻyicha faoliyatni amalga oshirishga litsenziya olish uchun litsenziya talabgori qoʻshimcha ravishda litsenziyalovchi organning normativ-huquqiy hujjatlariga muvofiq boʻlgan Qimmatli qogʻozlar egalari reyestrini yuritish qoidalarini taqdim etadi.

15. Qimmatli qogʻozlar bilan birjadan tashqari savdo tashkilotchisi faoliyatini amalga oshirishga litsenziya olish uchun litsenziya talabgori qoʻshimcha ravishda quyidagi hujjatlarni taqdim etadi:

mazkur dasturiy vositani sotgan (bergan) tashkilot bilan tuzilgan birjadan tashqari savdoni tashkil etish boʻyicha dasturiy vositadan tijorat maqsadida foydalanishga mualliflik litsenziya shartnomasi nusxasi yoki oʻz dasturiy vositasi mavjud boʻlgan taqdirda mualliflik huquqini tasdiqlovchi guvohnoma nusxasi;

tegishli dasturiy taʼminotning texnik tavsifi;

oʻz ichiga qimmatli qogʻozlarni muomalaga qoʻyish va muomaladan chiqarish tartib-qoidalari, qimmatli qogʻozlar narxlari kotirovkasi toʻgʻrisidagi qoidalarni oʻz ichiga oluvchi Qimmatli qogʻozlar savdosi qoidalari;

indekslar hisob-kitobi metodikasi;

qimmatli qogʻozlar bilan birjadan tashqari savdolar tashkilotchisining qatnashchilarni qoʻyish tartibi;

axborotni oshkor qilish tartibi;

narxlar bilan nayrang qilishning oldini olishga qaratilgan chora-tadbirlar roʻyxati;

16. Litsenziya talabgoridan mazkur Nizomda nazarda tutilmagan hujjatlar taqdim etilishi talab qilinishiga yoʻl qoʻyilmaydi.

Matni bir varaqdan koʻp boʻlgan hujjatlar tartib raqami qoʻyilgan, ip oʻtkazib tikilgan, litsenziya talabgorining muhri bilan tasdiqlangan va litsenziya talabgorining vakolatli shaxsi imzosi bilan tasdiqlangan boʻlishi kerak.

17. Hujjatlar litsenziya talabgori tomonidan litsenziyalovchi organga bevosita yoxud olinganligi toʻgʻrisidagi bildirishnoma bilan birgalikda pochta aloqa vositalari orqali yetkazib beriladi.

Hujjatlar litsenziyalovchi organning masʼul shaxsi tomonidan roʻyxat boʻyicha qabul qilinadi, uning nusxasi hujjatlar qabul qilinganligi sanasi toʻgʻrisida belgi qoʻyilgan holda ariza beruvchiga yuboriladi (topshiriladi).

18. Ishonchsiz yoki buzilgan maʼlumotlar taqdim etilganligi uchun litsenziya talabgori qonun hujjatlariga muvofiq javob beradi.

19. Litsenziya talabgorining litsenziya berish toʻgʻrisidagi arizasi koʻrib chiqilganligi uchun eng kam oylik ish haqining ikki baravari miqdorida yigʻim undiriladi.

Ariza koʻrib chiqilganligi uchun yigʻim summasi litsenziyalovchi organning bank hisob raqamiga oʻtkaziladi. Litsenziya talabgori berilgan arizani rad etgan taqdirda toʻlangan yigʻim summasi qaytarilmaydi.

20. Qimmatli qogʻozlar bozorida kasbiy faoliyat turlarini litsenziyalash mazkur Nizomga ilova qilinadigan sxemaga muvofiq amalga oshiriladi.

21. Litsenziya berish yoki litsenziya berishni rad etish toʻgʻrisidagi qaror barcha zarur hujjatlar bilan birgalikda litsenziya talabgorining arizasi olingan kundan boshlab oʻttiz kundan ortiq boʻlmagan muddatda qabul qilinadi.

22. Litsenziyalar berish toʻgʻrisidagi hujjatlarni koʻrib chiqish, ular boʻyicha xulosalar tayyorlash uchun litsenziyalovchi organda ekspert komissiyasi tashkil etiladi. Ekspert komissiyasi tarkibi va uning toʻgʻrisidagi nizom litsenziyalovchi organ tomonidan tasdiqlanadi. Ekspert komissiyasi majlislari bir oyda kamida bir marta oʻtkaziladi.

Litsenziya talabgorining arizasi barcha zarur hujjatlar bilan birgalikda ular qabul qilinadigan kunda ekspert komissiyasining koʻrib chiqishi uchun kiritiladi.

Ekspert komissiyasi yigirma kundan ortiq boʻlmagan muddatda taqdim etilgan hujjatlarni koʻrib chiqadi va ular boʻyicha litsenziya berish yoki litsenziya berishni rad etish toʻgʻrisida ekspert xulosasi tayyorlaydi.

23. Litsenziyalovchi organ uch kun muddatda ekspert komissiyasining xulosasi asosida litsenziya berish yoki litsenziya berishni rad etish toʻgʻrisida qaror qabul qiladi.

Litsenziyalovchi organ tegishli qaror qabul qilingandan keyin uch kun muddatda litsenziya talabgorini qabul qilingan qarordan xabardor qiladi.

Litsenziya berishga qaror qilinganligi toʻgʻrisidagi bildirishnoma litsenziya talabgoriga bank hisob raqami rekvizitlari, davlat boji toʻlash muddati koʻrsatilgan holda yozma shaklda yuboriladi (topshiriladi).

24. Litsenziyalovchi organ va litsenziatning oʻzaro huquq va majburiyatlarini belgilovchi litsenziya bitimida quyidagilar boʻlishi kerak:

bitimni imzolagan shaxslarning familiyasi, ismi, otasining ismi, lavozimi;

tomonlarning rekvizitlari;

amalga oshirilishiga litsenziya berilayotgan qimmatbaho qogʻozlar bozoridagi faoliyat turi (turlari)ning nomi;

litsenziatga qoʻyiladigan litsenziya talablari va shartlari;

litsenziya bitimi talablari va shartlari buzilganligi uchun tomonlarning javobgarligi;

tomonlarning rekvizitlari oʻzgarganligi toʻgʻrisida xabardor qilish tartibi;

litsenziya talablari va shartlarining bir marta qoʻpol ravishda buzilishi sifatida eʼtirof etiladigan qimmatli qogʻozlar bozoridagi tartib buzishlar roʻyxati;

litsenziat tomonidan litsenziya talablari va shartlari bajarilishi ustidan litsenziyalovchi organning nazorat qilishi tartibi.

Litsenziya bitimi ikki nusxada — litsenziat va litsenziyalovchi organ uchun bittadan nusxada tuziladi.

25. Litsenziyalar maxsus blankalarda rasmiylashtiriladi. Litsenziyalar blankalari namunalari Oʻzbekiston Respublikasi Vazirlar Mahkamasining 2000-yil 20-dekabrdagi 488-son qaroriga muvofiq litsenziyalovchi organ tomonidan tasdiqlanadi.

Litsenziyalar blankalari qatʼiy hisobot beriladigan hujjatlar hisoblanadi, hisobga olish seriyasiga, tartib raqamiga va himoyalanganlik darajasiga ega boʻladi. Litsenziyalar blankalari litsenziyalovchi organning buyurtmasi boʻyicha “Davlat belgisi” davlat-ishlab chiqarish birlashmasida bosma usulda tayyorlanadi. Litsenziyalovchi organ rahbari litsenziyalar blankalarining hisobga olinishi, saqlanishi va ulardan maqsadli foydalanilishi uchun javob beradi.

Litsenziyalar litsenziya talabgori tomonidan davlat boji toʻlanganligini tasdiqlovchi hujjat taqdim etilgandan va u litsenziya bitimini imzolagandan keyin uch kun muddatda rasmiylashtiriladi va beriladi.

Boshqaruvchi kompaniya va depozitariy kasbiy faoliyatini amalga oshirishga litsenziyada ruxsat berilgan operatsiyalar (xizmatlar) roʻyxati koʻrsatiladi.

26. Agar litsenziat litsenziya berish toʻgʻrisida qaror qabul qilinganligi haqidagi bildirishnoma yuborilgan (topshirilgan) vaqtdan boshlab uch oy mobaynida litsenziyalovchi organga litsenziya berilganligi uchun davlat boji toʻlanganligini tasdiqlovchi hujjatni taqdim etmasa yoxud litsenziya bitimini imzolamasa, litsenziyalovchi organ litsenziyani bekor qilish toʻgʻrisida qaror qabul qilishga haqlidir.

27. Litsenziya berish “Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonunining 17-moddasida belgilangan asoslar boʻyicha rad etilishi mumkin.

Litsenziya talabgori litsenziya berish rad etilishi toʻgʻrisidagi qaror, shuningdek litsenziyalovchi organ mansabdor shaxsining xatti-harakati (harakatsizligi) yuzasidan qonun hujjatlarida belgilangan tartibda shikoyat qilish huquqiga egadir.

28. Litsenziya berish rad etilishi toʻgʻrisida qaror qabul qilingan taqdirda rad etish toʻgʻrisidagi bildirishnoma litsenziya talabgoriga rad etishning aniq sabablari va litsenziya talabgori koʻrsatib oʻtilgan sabablarni bartaraf etib hujjatlarni takroran koʻrib chiqishga taqdim etishi uchun yetarli boʻlgan muddat koʻrsatilgan holda yozma shaklda yuboriladi (topshiriladi).

29. Litsenziya talabgori tomonidan litsenziya berish rad etilishiga asos boʻlgan sabablar bartaraf etilgan taqdirda, hujjatlarni takroran koʻrib chiqish litsenziyalovchi organ tomonidan litsenziya talabgorining arizasi barcha zarur hujjatlar bilan birgalikda olingan kundan boshlab oʻn kundan ortiq boʻlmagan muddatda amalga oshiriladi.

Takroran taqdim etilgan hujjatlar ekspert komissiyasining koʻrib chiqishi uchun ular qabul qilinadigan kunda kiritiladi.

Ekspert komissiyasi olti kundan ortiq boʻlmagan muddatda taqdim etilgan hujjatlarni takroran koʻrib chiqadi va ular boʻyicha litsenziya berish yoki litsenziya berishni rad etish toʻgʻrisida ekspert xulosasi tayyorlaydi.

Litsenziyalovchi organ uch kun muddatda ekspert komissiyasi xulosasi asosida litsenziya berish yoki litsenziya berishni rad etish toʻgʻrisida qaror qabul qiladi.

30. Litsenziya talabgorining arizasi takroran koʻrib chiqilganligi uchun yigʻim undirilmaydi. Litsenziya berish rad etilganligi toʻgʻrisidagi bildirishnomada koʻrsatilgan muddat oʻtgandan keyin berilgan ariza yangidan berilgan ariza deb hisoblanadi.

31. Yuridik shaxs boʻlgan litsenziat qayta tashkil etilgan, uning nomi yoki joylashgan joyi (pochta manzili) oʻzgargan taqdirda, litsenziat yoki uning huquqiy vorisi qayta roʻyxatdan oʻtkazilgandan keyin bir hafta muddatda litsenziyalovchi organga koʻrsatib oʻtilgan maʼlumotlarni tasdiqlovchi tegishli hujjatlar ilova qilingan holda litsenziyani qayta rasmiylashtirish toʻgʻrisida ariza berishi shart.

Jismoniy shaxs boʻlgan litsenziatning familiyasi, ismi, otasining ismi yoki yashash joyi oʻzgargan taqdirda litsenziat qayta roʻyxatdan oʻtkazilgandan keyin bir hafta muddatda litsenziyalovchi organga koʻrsatib oʻtilgan maʼlumotlarni tasdiqlovchi tegishli hujjatlar ilova qilingan holda litsenziyani qayta rasmiylashtirish toʻgʻrisida ariza berishi shart.

32. Litsenziat litsenziya qayta rasmiylashtirilgunga qadar unda koʻrsatilgan faoliyatni ilgari berilgan litsenziya asosida amalga oshiradi.

33. Litsenziyalovchi organ litsenziyani qayta rasmiylashtirishda litsenziyalar reyestriga tegishli oʻzgartirishlar kiritadi. Litsenziyalarni qayta rasmiylashtirish litsenziyalovchi organ tomonidan tegishli hujjatlar ilova qilingan holda litsenziyalarni qayta rasmiylashtirish toʻgʻrisida ariza olingan kundan boshlab besh kun mobaynida amalga oshiriladi.

Litsenziyalarni qayta rasmiylashtirishda litsenziya talabgorining litsenziya berish toʻgʻrisidagi arizasi koʻrib chiqilganligi uchun toʻlangan summaning yarmi miqdorida yigʻim undiriladi. Yigʻim summasi litsenziyalovchi organning hisob raqamiga oʻtkaziladi.

35. Yoʻqolgan yoki yaroqsiz holga kelgan litsenziya oʻrniga litsenziatning arizasiga koʻra uning dublikati berilishi mumkin.

Litsenziya dublikatlarini berishda litsenziya talabgorining litsenziya berish toʻgʻrisidagi arizasi koʻrib chiqilganligi uchun toʻlanadigan summaning yarmi miqdorida yigʻim undiriladi.

36. Litsenziatning litsenziya talablari va shartlariga rioya etishini nazorat qilish qonun hujjatlarida belgilangan tartibda litsenziyalovchi organ tomonidan amalga oshiriladi.

37. Litsenziya talablari va shartlariga rioya etilishi ustidan nazoratini amalga oshirishda litsenziyalovchi organ oʻz vakolatlari doirasida quyidagi huquqlarga egadir:

litsenziat tomonidan litsenziya talablari va shartlariga rioya etilishini qonun hujjatlarida belgilangan tartibda rejali tekshirish;

litsenziya talablari va shartlari litsenziat tomonidan buzilganligidan dalolat beruvchi hollar mavjud boʻlgan taqdirda litsenziat tomonidan litsenziya talablari va shartlariga rioya etilishini qonunda belgilangan tartibda rejadan tashqari tekshirish;

litsenziya talablari va shartlariga rioya etilishini tekshirish chogʻida paydo boʻladigan masalalar yuzasidan litsenziatdan zarur axborotni soʻrash va olish;

tekshirishlar natijalari asosida, litsenziat tomonidan litsenziya talablari va shartlarining aniq buzilishlarini koʻrsatgan holda dalolatnomalar (maʼlumotnomalar) tuzish;

litsenziatga litsenziya talablari va shartlarining aniqlangan buzilishlarini bartaraf etish majburiyatini yuklovchi qarorlar chiqarish, bunday buzilishlarni bartaraf etish muddatlarini belgilash;

litsenziyaning amal qilishini toʻxtatib turish, toʻxtatish yoki uni bekor qilish toʻgʻrisida qaror qabul qilish.

38. Litsenziya talablari va shartlariga rioya etilishini tekshirishda litsenziyalovchi organning tekshiruvchi xodimlari tomonidan ikki nusxada dalolatnoma tuziladi, ularning bittasi litsenziatga beriladi, ikkinchi nusxasi litsenziyalovchi organda qoladi.

39. Litsenziyaning amal qilishini toʻxtatib turish va toʻxtatish, litsenziyani bekor qilish “Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonunining tegishli ravishda 22—24-moddalarida nazarda tutilgan hollarda va tartibda litsenziyalovchi organ tomonidan amalga oshiriladi.

Litsenziyalovchi organning litsenziyaning amal qilishini toʻxtatib turish va toʻxtatish, litsenziyani bekor qilish toʻgʻrisidagi qarori yuzasidan sudga shikoyat qilinishi mumkin. Litsenziyalovchi organ qarorining asossiz ekanligi sud tomonidan eʼtirof etilgan taqdirda litsenziyalovchi organ litsenziat koʻrgan zarar miqdorida uning oldida javob beradi.

40. Litsenziyalovchi organ qimmatli qogʻozlar bozorida kasbiy faoliyatning har bir turi uchun alohida litsenziyalar reyestri yuritadi.

Litsenziyalar reyestrida litsenziatlar toʻgʻrisidagi quyidagi asosiy maʼlumotlar:

yuridik shaxslar uchun – yuridik shaxsning nomi, uning tashkiliy-huquqiy shakli, pochta manzili, telefoni;

jismoniy shaxslar uchun – litsenziatning familiyasi, ismi va otasining ismi, uning pasportidagi maʼlumotlar, uy manzili, telefoni;

litsenziya berilgan sana va uning tartib raqami;

litsenziyalarning qayta rasmiylashtirilishi, amal qilishini toʻxtatib turish va amal qilishi tiklanishi asoslari va sanasi;

litsenziyalarning amal qilishini toʻxtatish asoslari va sanasi;

litsenziyalarni bekor qilish asoslari va sanasi;

dublikat berishning asoslari va sanasi koʻrsatilishi kerak.

41. Litsenziyalar reyestridagi maʼlumotlar yuridik va jismoniy shaxslarning ular bilan tanishishi uchun ochiq hisoblanadi, yuridik va jismoniy shaxslar toʻlov toʻlab litsenziyalovchi organdan litsenziyalar reyestridan muayyan litsenziatlar toʻgʻrisida koʻchirma tarzida maʼlumotlar olish huquqiga egadir.

Litsenziyalar reyestridan maʼlumot berilganligi uchun bitta eng kam oylik ish haqi miqdoridagi toʻlov litsenziyalovchi organning hisob raqamiga oʻtkaziladi.

Litsenziyalar reyestridan davlat hokimiyati va boshqaruv organlariga maʼlumotlar bepul beriladi.

42. Litsenziya berilganligi uchun eng kam oylik ish haqining toʻrt baravari miqdorida yoki qimmatli qogʻozlar bozorida kasbiy faoliyatning ikki va undan ortiq turiga bir vaqtda litsenziya berilganligi uchun eng kam oylik ish haqining besh baravari miqdorida davlat boji undiriladi.

1. 2-ilovada:

19-band quyidagi tahrirda bayon qilinsin:

“19. Investitsiya fondi faoliyatini litsenziyalash Oʻzbekiston Respublikasi Vazirlar Mahkamasi tomonidan belgilangan tartibda amalga oshiriladi”;

20—22-bandlar oʻz kuchini yoʻqotgan deb hisoblansin.

2. 3-ilovaning 12-bandi quyidagi tahrirda bayon qilinsin:

“12. Xususiylashtirish investitsiya fondi faoliyatini litsenziyalash Oʻzbekiston Respublikasi Vazirlar Mahkamasi tomonidan belgilangan tartibda amalga oshiriladi”.

3. 4-ilovaning IV-boʻlimi oʻz kuchini yoʻqotgan deb hisoblansin.