Mehnatga layoqatli yoshdagi aholini, ayniqsa yoshlar va xotin-qizlarni ish bilan taʼminlash borasida faol siyosatni oʻtkazish, sanoat, qurilish, qishloq xoʻjaligi, bozor hamda ijtimoiy infratuzilma, kichik biznes va xususiy tadbirkorlikni, shuningdek xalq xoʻjaligining alohida ahamiyatga molik boʻlgan boshqa sohalarini rivojlantirish hisobiga bandlikni oshirish va shu orqali aholining iqtisodiy ahvolini yanada yuksaltirishga qaratilgan chora-tadbirlarni amalga oshirish hamda Oʻzbekiston Respublikasi Vazirlar Mahkamasining 1993-yil 24-iyundagi 310-sonli “Aholi bandligini taʼminlash dasturini ishlab chiqish va amalga oshirish tartibini tasdiqlash toʻgʻrisida”gi qarori hamda 2013-yil 24-oktabrdagi “2014-yilda ish oʻrinlari tashkil etish va aholini ish bilan taʼminlash dasturi loyihasi toʻgʻrisida”gi 6-son yigʻilish bayoni ijrosini taʼminlash hamda Oʻzbekiston Respublikasining “Mahalliy davlat hokimiyati toʻgʻrisida”gi Qonunining 6-moddasiga asosan qaror qiladi:

1. Oʻzbekiston Respublikasi Vazirlar Mahkamasining 2013-yil 24-oktabrdagi “2014-yilda ish oʻrinlari tashkil etish va aholini ish bilan taʼminlash dasturi loyihasi toʻgʻrisida”gi 6-son yigʻilish bayoni maʼlumot va ijro uchun qabul qilinsin.

2. Jarqoʻrgʻon tumanining “2014-yilda ish oʻrinlari tashkil etish va aholi bandligini taʼminlash dasturi” ilovaga* muvofiq tasdiqlansin.

3. Xalq deputatlari Jarqoʻrgʻon tuman Kengashi, Jarqoʻrgʻon tuman xotin-qizlar qoʻmitasi, bandlikka koʻmaklashish va aholini ijtimoiy muhofaza qilish markazi, tuman iqtisodiyot va statistika boʻlimlari, tuman Davlat soliq inspeksiyasi hamda boshqa mutasaddi korxonalar va tashkilotlarning eʼtibori “2014-yilda ish oʻrinlari tashkil etish va aholi bandligini taʼminlash dasturi”ga muvofiq yangi ish oʻrinlari yaratishga qaratilsin.

Bunda:

yangi korxonalarni ishga tushirish, ishlab chiqarish quvvatlaridan foydalanish darajasini oshirish, faoliyat yuritayotgan korxonalarni kengaytirish, qayta taʼmirlash va modernizatsiyalash;

kichik korxonalar va mikrofirmalarni tashkil etish, xususiy tadbirkorlikni rivojlantirish, mikrokreditlash tizimini qoʻllab-quvvatlash;

uy mehnatining barcha shakllarini, shu jumladan korxonalar bilan mehnat shartnomalariga binoan kooperatsiya asosida kasanachilikni tashkil etish, milliy hunarmandchilik va oilaviy tadbirkorlikni rivojlantirish;

yengil va oziq-ovqat sanoatlarining mahalliy xomashyolarni qayta ishlash va tayyor raqobatbardosh mahsulotlar ishlab chiqarishga moʻljallangan, koʻp mehnat talab qiladigan sohalarini tezkor rivojlantirish;

xizmat koʻrsatish va servisni rivojlantirish;

ixtisoslashgan dehqon va fermer xoʻjaliklarida chorvachilik, parrandachilik, baliqchilik, asalarichilik mahsulotlarini ishlab chiqarish, barcha joylarda issiqxonalarni tashkil etish;

zamonaviy ishlab chiqarish, ijtimoiy va bozor infrastrukturasini rivojlantirish;

norasmiy tarzda tadbirkorlik faoliyati bilan shugʻullanayotgan fuqarolarni aniqlab, ularni rasmiylashtirish va yangidan tadbirkorlik faoliyatini tashkil etadigan fuqarolarni har tomonlama qoʻllab-quvvatlash;

joylarda qabul qilingan “Bandlik” dasturlarini hududlarning ijtimoiy-iqtisodiy rivojlantirish boʻyicha istiqbolli dasturlari bilan mutanosibligini taʼminlash, har chorakda tahlil qilib tegishli oʻzgartirishlarni kiritish hamda muhokama qilib borish yuklatilsin.

4. Tuman davlat soliq inspeksiyasi (O. Yoqubov)ga:

davlat roʻyxatidan oʻtmasdan noqonuniy ravishda faoliyat yuritayotgan tadbirkorlarni aniqlash va davlat roʻyxatidan oʻtkazish topshirilsin.

5. Tuman statistika boʻlimi (I. Xushboqov) “2014-yilda ish oʻrinlarini tashkil etish va aholi bandligini taʼminlash dasturi”ga asosan yaratiladigan ish oʻrinlarining toʻliq statistik hisobi yuritilishini taʼminlasin.

6. Tumandagi tijorat banklari rahbarlariga:

tasdiqlangan rejaga muvofiq tijorat banklari tomonidan 2014-yilda yangi ish joylari yaratish uchun kreditlarning belgilangan muddatlarda ajratilishini qatʼiy nazoratga olish, mablagʻlar ajratilishini tadbirkorlar ishtirokida muhokama etib, zarur choralarni koʻrish tavsiya etilsin.

7. Tuman bandlikka koʻmaklashish va aholini ijtimoiy muhofaza qilish markazi (U. Razzoqov), tuman iqtisodiyot boʻlimi (A. Yarmatov) bilan birgalikda “2014-yilda ish oʻrinlari tashkil eitsh va aholi bandligini taʼminlash dasturi”ga asosan yaratilayotgan ish oʻrinlarining doimiy monitoringini olib borish, dastur koʻrsatkichlarini bajarishda ortda qolayotgan yoʻnalishlar boʻyicha tuman hokimiga har oyda hisobot va takliflar taqdim qilish hamda Kengashga yil yakuniga koʻra dasturning bajarilishi yuzasidan hisobot taqdim qilish yuklatilsin.

8. Ushbu qarorning bajarilishini nazorat qilish Xalq deputatlari tuman Kengashining mahalliy budjetni shakllantirish va ijro etish, iqtisodiy islohotlarni amalga oshirish va tadbirkorlikni rivojlantirish masalalari boʻyicha doimiy komissiyasi raisi A. Irgashev hamda tuman hokimining oʻrinbosari S. Toshboyev zimmalariga yuklatilsin.

9. Ushbu qaror rasmiy nashrda eʼlon qilingan kundan kuchga kiradi.