Oʻzbekiston Respublikasi Oliy Majlisi Qonunchilik palatasining 2013-yil 20-noyabrdagi “2014-yilda ish oʻrinlari tashkil etish va aholi bandligini taʼminlash dasturi toʻgʻrisida”gi 774-II-sonli qarori (Oʻzbekiston Respublikasi Oliy Majlisi palatalarining Axborotnomasi 2013-yil., 11-son, 305-modda) va Oʻzbekiston Respublikasi Oliy Majlisi Senatining 2013-yil 12-dekabrdagi “2014-yilda ish oʻrinlari tashkil etish va aholi bandligini taʼminlash dasturi toʻgʻrisida”gi SQ-401-II-sonli qarori ijrosini taʼminlash maqsadida tumanda 2014-yilda ish oʻrinlari tashkil etish va aholi bandligini taʼminlash hududiy dasturiga koʻra 1710 ta ish oʻrinlari yaratilishi belgilanganligini muhokama qilib, xalq deputatlari Zafarobod tumani Kengashi qaror qiladi:

1. Oʻzbekiston Respublikasi Oliy Majlisi Qonunchilik palatasining 2013-yil 20-noyabrdagi 774-II-sonli qarori va Oʻzbekiston Respublikasi Oliy Majlisi Senatining 2013-yil 12-dekabrdagi SQ-401-II-sonli qarori ijro uchun qabul qilinsin.

2. 2014-yilda ish oʻrinlari tashkil etish va aholi bandligini taʼminlash borasida ishlab chiqilgan tuman Dasturi ilovaga* muvofiq tasdiqlansin.

3. Tuman hokimining oʻrinbosarlari, mutasaddi boshqarma, tashkilotlar hamda shaharcha va qishloq fuqarolar yigʻini raislari:

2014-yilda ish oʻrinlari tashkil etish va aholi bandligini taʼminlash dasturini bajarish yuzasidan 1710 ta ish oʻrinlari yaratilishi boʻyicha amaliy chora-tadbirlar koʻrsin;

Investitsiya dasturiga, ishlab chiqarishni mahalliylashtirish, modernizatsiya qilish va texnologik jihatdan qayta jihozlash dasturlariga, tarmoqlarni rivojlantirishning hududiy dasturlariga muvofiq tumanning iqtisodiyot tarmoqlari va hududlarini rivojlantirish boʻyicha 2014-yilda nazarda tutilgan tadbirlar soʻzsiz bajarilishini taʼminlasin.

4. Shaharcha va qishloq fuqarolar yigʻinlari raislari, suvdan foydalanuvchilar uyushmasi rahbarlari va mutasaddi korxona, tashkilot rahbarlari:

2014-yilda ish oʻrinlari tashkil etish va aholi bandligini taʼminlash dasturining prognoz parametrlari tegishli hududlarda samarali bajarilishini taʼminlagan holda, kichik biznes va xususiy tadbirkorlik sohasida, shu jumladan oilaviy biznes sohasida, shuningdek yangi obyektlarni ishga tushirish, mavjud ishlab chiqarish quvvatlarini rekonstruksiya qilish va kengaytirish, ishlab chiqarish va ijtimoiy hamda bozor infratuzilmasini, fermer xoʻjaliklarini rivojlantirish, kasanachilikni, kosibchilikni va xalq hunarmandchiligini tashkil etish, qurilishda pudrat ishlarini kengaytirish, jumladan, qishloq joylarda kengaytirish hisobiga ish oʻrinlari sonini koʻpaytirish boʻyicha zarur chora-tadbirlar koʻrishga alohida eʼtibor qaratsin.

5. Xalq deputatlari tuman Kengashi doimiy komissiyalari:

2014-yilda ish oʻrinlari tashkil etish va aholi bandligini taʼminlash dasturining ish oʻrinlari tashkil etishning tegishli hududiy koʻrsatkichlari ijrosiga doir qismini bajarishning borishini muntazam ravishda tuman majlislarida, sessiyalarida muhokama qilsin;

belgilangan parametrlardan orqada qolingan taqdirda ish oʻrinlari tashkil etishning prognoz koʻrsatkichlarini soʻzsiz taʼminlashga yoʻnaltirilgan qoʻshimcha chora-tadbirlarni belgilasin.

6. Ushbu qaror “Zafar yoʻlidan” gazetasida eʼlon qilinsin.

7. Mazkur qarorning ijrosini nazorat qilish xalq deputatlari tuman Kengashining ijtimoiy-madaniy rivojlanish, yoshlar siyosati va sogʻlom avlodni tarbiyalash masalalari boʻyicha doimiy komissiyasi hamda tuman hokimining oʻrinbosari S. Bolqiboyev zimmasiga yuklatilsin.