Bozor iqtisodiyotiga o‘tish, jahon hamjamiyatiga qo‘shilish sharoitida O‘zbekistonni rivojlantirishning ustuvor yo‘nalishlari va istiqbollarini aniqlashga doir taxmin va tahlil ishlarining yuqori darajada bo‘lishini ta’minlash, milliy hisob-kitoblar tizimini izchillik bilan joriy etish, xalqaro me’yorlar va andozalarga mos keladigan puxta va ishonchli statistika axborotini shakllantirish maqsadida:

1. O‘zbekiston Respublikasi Vazirlar Mahkamasi huzuridagi O‘zbekiston taraqqiyoti istiqbollarini belgilash komiteti bilan O‘zbekiston Respublikasi statistika davlat komiteti negizida O‘zbekiston Respublikasi Prezidenti huzuridagi Vazirlar Mahkamasining Istiqbolni belgilash va statistika davlat komiteti tashkil qilinsin.

2. Qoraqalpog‘iston Respublikasining Vazirlar Kengashi, viloyatlar Toshkent shahar hokimlari taraqqiyot istiqbolini belgilash va statistika hududiy bo‘linmalari negizida quyidagilarni tashkil qilsinlar:

Qoraqalpog‘iston Respublikasida — Iqtisodiyot va statistika vazirligi;

respublika viloyatlari va Toshkent shahrida — Istiqbolni belgilash va statistika boshqarmalari;

respublika shaharlari va rayonlarida —Iqtisodiyotni muvofiqlashtirish va statistika bo‘limlari.

Belgilab qo‘yilsinki, mazkur organlar tegishli ravishda Qoraqalpog‘iston Respublikasining Vazirlar Kengashiga, viloyatlar, shaharlar va rayonlarning hokimiyatlariga bo‘ysunadilar, Istiqbolni belgilash va statistika davlat komiteti esa uslubiy rahbarlik qilib, ularning faoliyatini muvofiqlashtirib turadi.

3. Istiqbolni belgilash va statistika davlat komiteti zimmasiga quyidagi vazifalar yuklansin;

O‘zbekistonni taraqqiy ettirish, uning ustuvor yo‘nalishlari va tashqi iqtisodiy aloqalari strategiyasini ishlab chiqish, jahon hamjamiyatiga kirishni, jahon bozoridagi ahvolni e’tiborga olgan holda respublika xalq xo‘jaligi majmuini samarali tarzda ixtisoslashtirish;

O‘zbekiston Respublikasi ijtimoiy-iqtisodiy taraqqiyotining konsepsiyalarini, qisqa muddatli va istiqboldagi rejalarini, katta iqtisodiy va ijtimoiy muammolarni hal qilish, xalq xo‘jaligining moddiy-moliyaviy mutanosibligi, tabiiy, mehnat zaxiralaridan, vujudga keltirilgan ishlab chiqarish quvvatlaridan samarali foydalanish borasidagi tarmoq dasturlarini ishlab chiqish;

respublikani iqtisodiy va ijtimoiy rivojlantirish ko‘rsatkichlarini belgilash va aniqlash sohasida respublikaning iqtisodiy organlari, vazirliklar, idoralar, konsernlar, uyushmalar, Qoraqalpog‘iston Respublikasi Vazirlar Kengashi, hokimiyatlar, korxonalar va tashkilotlar faoliyatini muvofiqlashtirish;

respublika aholisining moddiy farovonligini oshirish, uning eng nochor tabaqalari ijtimoiy muhofazasini mustahkamlashga oid takliflarni asoslab berish, xalqning turmush darajasini oshirish, ekologik vaziyatni sog‘lomlashtirish yo‘llari hamda yo‘nalishlarini belgilash;

bozor iqtisodiyotini shakllantirish jarayoniga tahliliy va taxminiy baho berish, xo‘jalik mexanizmlarini, boshqaruv shakllari va usullarini takomillashtirishga doir takliflarni ishlab chiqish;

xalq xo‘jaligi tuzilmasini qayta qurishga va mablag‘ sarflash siyosatini shakllantirishga raqobatga qodir tayyor mahsulot ishlab chiqaradigan korxonalarni ustun darajada rivojlantirishga, ishlab chiqaruvchi kuchlarni oqilona joylashtirishga, Qoraqalpog‘iston Respublikasini, viloyatlar, shaharlar va rayonlarni kompleks ravishda taraqqiy ettirishga doir takliflarni tayyorlash;

xorijiy mamlakatlar bilan iqtisodiy hamkorlikni kengaytirish, o‘zaro manfaatli tashqi iqtisodiy, savdo va ilmiy-texnikaviy aloqalarni rivojlantirish, chet el mablag‘laridan samarali foydalanish sohasidagi yo‘nalishlarni belgilash;

yagona statistika siyosatini o‘tkazish, xalq xo‘jaligi ishlarining tarkib topayotgan sharoitini, bozor munosabatlariga o‘tishni, narx-navo o‘zgarishini, xilma-xil mulkchilik shakllarining rivojlanishini, ma’lumotlarni yig‘ish, ularga ishlov berishning ilg‘or tizimlari joriy etilishini; kompyuterlar keng tadbiq qilinishini aks ettiruvchi hisobot ko‘rsatkichlarining ilmiy asoslangan tizimini joriy etish hamda respublika hisob markazining faoliyatini muvofiqlashtirish;

milliy hisob-kitob va xalq xo‘jaligi balansi tizimining uslubiyatini ishlab chiqish, butun statistikani bosqichma-bosqich zamonaviy xalqaro me’yorlar va andozalarga muvofiq holga keltirish.

4. Istiqbolni belgilash va statistika davlat komiteti o‘z vakolatlari doirasida qabul qilgan qarorlar vazirliklar, idoralar, konsernlar, uyushmalar, korxonalar (birlashmalar), muassasalar va tashkilotlar, mahalliy boshqaruv organlari, mansabdor shaxslar va fuqarolar tomonidan ijro ish uchun majburiy ekanligi belgilab qo‘yilsin.

5. O‘zbekiston Respublikasi Prezidenti huzuridagi Vazirlar Mahkamasi bir hafta muddat ichida Istiqbolni belgilash va statistika davlat komitetining faoliyatini tashkil etish to‘g‘risida qaror qabul qilib, komitetning nizomi va tuzilmasini tasdiqlasin.

6. “O‘zbekiston Respublikasi Vazirlar Mahkamasi huzuridagi O‘zbekiston Taraqqiyot istiqbolini belgilash komitetini tashkil etish to‘g‘risida” 1992-yil 13-fevralda chiqarilgan Farmon o‘z kuchini yo‘qotgan deb topilsin.