Oʻzbekiston Respublikasi “Aholini ish bilan taʼminlash toʻgʻrisida”gi Qonunning 17-moddasi, Vazirlar Mahkamasining 2008-yil 20-avgustdagi “Ijtimoiy muhofazaga muhtoj va ish topishda qiynalayotgan shaxslarni ishga joylashtirish uchun ish oʻrinlarini band qilib qoʻyish tartibi toʻgʻrisidagi nizomni tasdiqlash haqida”gi 186-sonli qarori hamda Oʻzbekiston Respublikasi “Mahalliy davlat hokimiyati toʻgʻrisida”gi Qonunning 6, 25-moddalariga asosan qaror qilaman:

1. Tuman Bandlikka koʻmaklashish va aholini ijtimoiy muhofaza qilish markazining 2013-yil 15-avgustdagi 200-sonli xati maʼlumot uchun qabul qilinsin.

2. Tumandagi ijtimoiy muhofazaga muhtoj shaxslarni toifalari boʻyicha ishga joylashtirish hamda ishlovchilar soni 20 nafardan ortiq boʻlgan korxonalarda ijtimoiy muhofazaga muhtoj shaxslarga band qilib qoʻyiladigan ish oʻrinlari miqdori ilovaga* muvofiq tasdiqlansin.

3. Ijtimoiy muhofazaga muhtoj, ish topishga qiynalayotgan shaxslarni ishga joylashtirish uchun ish joylari quyidagicha band etilsin:

nogironlar uchun — 8 nafar;

oʻrta maxsus, kasb-hunar taʼlimi muassasalarini tamomlagan yoshlarga, shuningdek oliy oʻquv yurtlarining davlat grantlari asosida taʼlim olgan bitiruvchilar uchun — 194 nafar;

yolgʻiz ota, yolgʻiz ona hamda koʻp bolali ota-onalar uchun — 59 nafar;

Oʻzbekiston Respublikasi Qurolli Kuchlaridan muddatli xarbiy xizmatdan boʻshatilganlar uchun — 12 nafar;

jazoni oʻtash muassasalaridan ozod qilingan yoki sud qaroriga koʻra tibbiy yoʻsindagi majburlov choralariga tortilgan shaxslar uchun — 7 nafar;

ijtimoiy muhofazaga muhtoj va ish topishda qiynalayotgan shaxslarning boshqa toifalari uchun — 3 nafar;

pensiya yoshiga yaqinlashib qolganlar uchun —7 nafar;

“Odam savdosi”dan jabrlanganlar uchun — 1 nafar.

4. Tumandagi korxona, tashkilot va muassasalar rahbarlariga:

ijtimoiy muhofazaga muhtoj shaxslarning koʻrsatib oʻtilgan toifalari uchun ajratilgan ish joylarida sanitariya-gigiyena normalari va hodimlarning oʻz mehnat majburiyatlarini bemalol bajarilishini taʼminlaydigan mehnat sharoitlarini yaratish, mehnat qonunchiligi boʻyicha qisqartirilgan ish soatlari va qoʻshimcha mehnat taʼtillarini tashkil qilish;

ijtimoiy muhofazaga muhtoj shaxslar uchun band qilib qoʻyiladigan ish oʻrinlarining koʻrsatib oʻtilgan miqdorini Oʻzbekiston Respublikasi Vazirlar Mahkamasining 2008-yil 20-avgustdagi 186-sonli qarori bilan tasdiqlangan “Ijtimoiy muhofazaga muhtoj va ish topishda qiynalayotgan shaxslarni ishga joylashtirish uchun band qilib qoʻyish tartibi toʻgʻrisida”gi nizomda belgilangan muddatlarda va tartibda barpo etilishini (ajratilishini yoki band qilib qoʻyilishini) taʼminlash vazifalari yuklatilsin.

5. Tuman Bandlikka koʻmaklashish va aholini ijtimoiy muhofaza qilish markazi (M. Yulchiyev)ga bir hafta muddatda mazkur qarorning ilovasida koʻrsatilgan korxona, tashkilot va muassasalarga band qilib qoʻyilishi lozim boʻlgan ish oʻrinlari soni yuzasidan tuman hokimligiga axborot takdim etish vazifasi yuklatilsin.

6. Tuman Bandlikka koʻmaklashish va aholini ijtimoiy muhofaza qilish markazi (M. Yulchiyev), tuman tibbiyot birlashmasi (T. Davronov) xamda tuman Davlat sanitariya-epidemiologiya nazorat markazi (Q. Bakirov)larga tumandagi tashkilot, korxona va muassasalar rahbarlari tomonidan ijtimoiy muhofazaga muhtoj shaxslar uchun band qilib qoʻyiladigan ish joylarining mehnat sharoitlariga mos kelishi ustidan nazorat olib borish vazifasi yuklatilsin.

7. Ushbu qaror qabul qilinishi munosabati bilan tuman hokimining 2012-yil 28-sentabrdagi 324-Q-sonli qarori oʻz kuchini yoʻqotgan deb hisoblansin.

8. “Buloqboshi” gazetasi tahririyati (A. Gʻoziyev)ga mazkur qarorni gazeta sahifalari orqali keng ommaga yetkazish vazifasi topshirilsin.

9. Ushbu qaror bajarilishini nazorat qilish tuman Bandlikka koʻmaklashish va aholini ijtimoiy muhofaza qilish markazi direktori M. Yulchiyev va tuman hokimining oʻrinbosari I. Toʻraboyevlar zimmasiga yuklatilsin.