Oʻzbekiston Respublikasi Vazirlar Mahkamasining 2003-yil 20-avgustdagi 357-son “Tadbirkorlik faoliyatini tashkil etish uchun roʻyxatdan oʻtkazish tartibotlari tizimini tubdan takomillashtirish toʻgʻrisida”gi qaroriga muvofiq Oʻzbekiston Respublikasi Adliya vazirligi va Iqtisodiyot vazirligi qaror qiladi:

1. Shahar va tuman hokimliklari huzuridagi tadbirkorlik subyektlarini roʻyxatdan oʻtkazish inspeksiyalari toʻgʻrisida namunaviy nizom ilovaga muvofiq tasdiqlansin.

2. Mazkur qaror rasmiy eʼlon qilingan kundan eʼtiboran kuchga kiradi.

Mazkur Nizom Oʻzbekiston Respublikasi Vazirlar Mahkamasining 2003-yil 20-avgustdagi 357-sonli “Tadbirkorlik faoliyatini tashkil etish uchun roʻyxatdan oʻtkazish tartibotlari tizimini tubdan takomillashtirish toʻgʻrisida”gi qarorining 7-bandiga muvofiq tadbirkorlik subyektlarini roʻyxatdan oʻtkazish inspeksiyalari faoliyatining yagona tartibini belgilaydi.

1. Shaharlar (tumanlar) hokimliklari huzurida tegishli shahar (tuman) hokimliklariga va adliya organlariga hisob beradigan tadbirkorlik subyektlarini roʻyxatdan oʻtkazish inspeksiyalari (bundan buyon matnda Inspeksiya deb yuritiladi) tashkil etilgan.

Inspeksiya shahar (tuman) hokimligi tuzilmasiga kiradi va yuridik shaxs hisoblanmaydi, oʻz mulkida, xoʻjalik yuritishida yoki operativ boshqaruvida alohida mol-mulkka ega boʻlmaydi, tadbirkorlik faoliyatini amalga oshirishga va boshqa shaxslar bilan oʻz nomidan fuqarolik-huquqiy munosabatlarga kirishishiga haqli emas.

2. Inspeksiya oʻz faoliyatida Oʻzbekiston Respublikasi Konstitutsiyasiga, qonunlariga, Oliy Majlis palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlariga va mazkur Nizomga amal qiladi.

3. Yuridik va jismoniy shaxslar (bundan buyon matnda ariza beruvchi deb yuritiladi) Inspeksiyaga quyidagi masalalar boʻyicha murojaat etishlari mumkin:

tadbirkorlik subyektini davlat roʻyxatidan oʻtkazish bilan bir vaqtda ruxsat beruvchi hujjatlarni rasmiylashtirish uchun;

tadbirkorlik subyektiga ruxsat beruvchi hujjatlarni rasmiylashtirmasdan davlat roʻyxatidan oʻtkazish uchun;

kompleks tadbirkorlik litsenziyasi (franshizing) shartnomalarini davlat roʻyxatidan oʻtkazish uchun;

turar joylarni noturar joy binolar toifasiga oʻtkazish va noturar joy binolarni turar joy binolar toifasiga oʻtkazish uchun;

yer uchastkasiga, bino va inshootga boʻlgan huquqlarni davlat roʻyxatidan oʻtkazish uchun.

4. Ruxsat beruvchi hujjatlarni rasmiylashtirish uchun Inspeksiyaga avval roʻyxatdan oʻtgan tadbirkorlik subyektlari (ruxsat beruvchi hujjatlarni rasmiylashtirgan va rasmiylashtirmagan), xabardor qilish tartibida roʻyxatdan oʻtkazilgan, shuningdek Oʻzbekiston Respublikasi Adliya vazirligida, Qoraqalpogʻiston Respublikasi Adliya vazirligida, viloyatlar adliya boshqarmalarida roʻyxatdan oʻtgan tadbirkorlik subyektlari murojaat etishlari mumkin.

Tadbirkorlik subyektlari ruxsat beruvchi hujjatlarni rasmiylashtirish uchun avval Inspeksiyaga murojaat etganidan qatʼi nazar, zarurat yuzasidan tegishli ruxsat beruvchi hujjatlarni rasmiylashtirish uchun murojaat etadilar.

Qonun hujjatlarida nazarda tutilgan hollarda Inspeksiyaga tadbirkorlik subyektlari boʻlmagan shaxslar murojaat etishlari mumkin.

5. Inspeksiyaga shahar (tuman) hokimi tomonidan lavozimga tayinlanadigan va ozod etiladigan boshliq boshchilik qiladi. Inspeksiya xodimlari ham shahar (tuman) hokimi tomonidan lavozimga tayinlanadi va ozod etiladi.

Inspeksiya boshligʻi va xodimlari davlat xizmatchilari hisoblanadi va mehnatga haq toʻlash shartlari boʻyicha hokimlikning tegishli mustaqil boʻlimlari xodimlariga tenglashtiriladi.

6. Inspeksiya xodimlarining mansab yoʻriqnomalari shahar (tuman) hokimi tomonidan tasdiqlanadi, ularda Inspeksiya xodimlarining funksiyalari, vazifalari va shaxsiy javobgarligi belgilanadi. Inspeksiya boshligʻi Inspeksiya ishining samarali tashkil etilishi uchun shaxsan javobgardir.

7. Inspeksiya quyidagilardan iborat:

bittadan uchtagacha shtat birligi doirasida davlat roʻyxatidan oʻtkazish va hisobga qoʻyish boʻyicha boʻlim (mutaxassis);

ikkitadan beshtagacha shtat birligi doirasida ruxsat beruvchi hujjatlarni rasmiylashtirish boʻyicha boʻlim (sektor);

ikkitadan toʻrttagacha shtat birligi doirasida vakolatli organlarda yakka tartibda uy-joy qurish (rekonstruksiya qilish)ni amalga oshirish uchun ruxsatnomalarni rasmiylashtirish, loyihalarni kelishish boʻyicha boʻlim (sektor).

Inspeksiyaning shtat jadvali tegishli shahar (tuman) hokimi tomonidan tegishli boʻlimlarning (sektorlarning) ish hajmiga qarab shtat birliklari doirasida tasdiqlanadi.

8. Tadbirkorlik subyektlarini roʻyxatdan oʻtkazish va ruxsat beruvchi hujjatlarni rasmiylashtirish boʻyicha Inspeksiyadan farq qiluvchi qoʻshimcha tuzilmalar tashkil etishga yoʻl qoʻyilmaydi.

9. Quyidagilar Inspeksiyaning asosiy vazifalari hisoblanadi:

ariza beruvchining hujjatlarini qabul qilish hamda qonun hujjatlarida nazarda tutilgan hollarda hujjatlarni va zarur boʻlgan asoslarni ekspertizadan oʻtkazish;

tadbirkorlik faoliyatini amalga oshirish maqsadida muhandislik kommunikatsiyalariga (gaz bilan taʼminlash, energiya bilan taʼminlash, suv bilan taʼminlash, kanalizatsiya, issiqlik bilan taʼminlash, telefon aloqasi tarmoqlari) ulanish uchun texnik shartlarni, turar joylarni noturar joy binolar toifasiga oʻtkazish, noturar joy binolarni turar joy binolar toifasiga oʻtkazish, obyektlarni qayta ixtisoslashtirish va rekonstruksiya qilishga ruxsat berish, bino va inshootning tashqi koʻrinishini oʻzgartirishni (fasadni taʼmirlashni) kelishish uchun ularning vakolatlari doirasida majburiy tartibda kelishiladigan va ruxsat olinadigan tegishli tashkilotlarni aniqlash;

ruxsat beruvchi hujjatlarni rasmiylashtirishni hisobga olgan holda tadbirkorlik subyektlarini davlat roʻyxatidan oʻtkazish, reyestrni yuritish, shuningdek, ularni soliq va statistika organlarida hisobga qoʻyish;

ariza beruvchiga barcha ruxsat beruvchi hujjatlar bilan uning tadbirkorlik subyekti sifatida davlat roʻyxatidan oʻtkazilganligi toʻgʻrisida guvohnoma berish;

yangidan tashkil etilayotgan tadbirkorlik subyektlarini Tekshirishlarni roʻyxatga olish kitoblari bilan taʼminlashda adliya organlari bilan birgalikda ish olib borish;

uy-joyni qurish va rekonstruksiya qilishni boshlash uchun dastlabki ruxsat beruvchi (loyiha) hujjatlarini tayyorlashni tashkil etish;

uy-joyni ekspluatatsiyaga qabul qilishni tashkil etish;

“Yergeodezkadastr” davlat qoʻmitasining tuman (shahar) yer tuzish va koʻchmas mulk kadastri davlat korxonalarida koʻchmas mulkka boʻlgan huquqlarni davlat roʻyxatidan oʻtkazishni tashkil etish;

kompleks tadbirkorlik litsenziyasi (franshizing) shartnomalarini davlat roʻyxatidan oʻtkazish.

10. Inspeksiya yuklatilgan vazifalarni bajarish maqsadida quyidagi funksiyalarni amalga oshiradi:

davlat roʻyxatidan oʻtkazish uchun shu jumladan, taʼsis hujjatlaridagi oʻzgartirish va qoʻshimchalarni davlat roʻyxatidan oʻtkazish uchun, shuningdek tugatilishi munosabati bilan davlat reyestridan chiqarish uchun taqdim etilgan hujjatlarni qabul qilish;

tadbirkorlik subyektlarining davlat reyestrini yuritish;

tadbirkorlik subyektlarini soliq va statistika organlarida hisobga qoʻyishni tashkil etish;

statistika kodlari va soliq toʻlovchining identifikatsiya raqamini koʻrsatgan holda davlat roʻyxatidan oʻtkazilganlik toʻgʻrisidagi guvohnomani, shuningdek Inspeksiya tomonidan tasdiqlangan muhr va shtamp eskizini tadbirkorlik subyektlariga berish;

yilning har choragida roʻyxatdan oʻtkazilgan va hisobda turgan roʻyxatdan oʻtkazilgan tadbirkorlik subyektlari sonini soliq va statistika organlari bilan solishtirish;

vakolatli organlarda va foydalanish tashkilotlarida loyihalashdan oldingi ruxsat beruvchi (boshlangʻich ruxsatnomalar) hujjatlarni, shuningdek, obyektlarni qayta ixtisoslashtirish va rekonstruksiyalashga zarur boʻlgan muhandislik kommunikatsiyalariga (gaz bilan taʼminlash, energiya bilan taʼminlash, suv bilan taʼminlash, kanalizatsiya, issiqlik bilan taʼminlash, telefon aloqasi tarmoqlari) ulanish uchun texnik shartlar, arxitektura-rejalashtirish topshiriqlarini rasmiylashtirish;

obyektni qayta ixtisoslashtirish va rekonstruksiyalashga tegishli ruxsatnomalarni olishni taʼminlash, bino va inshootning tashqi koʻrinishini oʻzgartirishni (fasadni taʼmirlashni) kelishish;

turar joylarni noturar joy toifasiga, shuningdek noturar joylarni turar joy toifasiga oʻtkazish uchun ruxsat beruvchi hujjatlarni operativ rasmiylashtirish;

“bir darcha” tamoyili boʻyicha vakolatli organlarda yakka tartibda uy-joy qurish (rekonstruksiya qilish)ni amalga oshirish uchun ruxsatnomalarni rasmiylashtirish va loyihalarni kelishish;

yangidan tashkil qilinayotgan tadbirkorlik subyektlarini Tekshirishlarni roʻyxatga olish kitobi bilan taʼminlash;

franshizing toʻgʻrisidagi shartnomalar (ularni tuzishni, ularga muhim oʻzgartirishlar, qoʻshimchalar yoki bekor qilish)ni davlat roʻyxatidan oʻtkazish jurnalini yuritish;

yuridik shaxsning firma nomini elektron talabnoma asosida Internet tarmogʻi orqali firma nomlarining markazlashtirilgan maʼlumotlar bazasida zaxiraga olishni amalga oshirish;

qonun hujjatlarida belgilangan boshqa funksiyalarni bajarish.

11. Inspeksiyaga davlat roʻyxatidan oʻtkazish, tadbirkorlik subyektlarini davlat reyestrini yuritish, shuningdek ruxsat beruvchi hujjatlarni rasmiylashtirish bilan bogʻliq boʻlmagan funksiyalarni yuklanishiga yoʻl qoʻyilmaydi, qonun hujjatlarida nazarda tutilgan hollar bundan mustasno.

12. Inspeksiyaning majburiyatlarini ariza beruvchining zimmasiga yuklash qatʼiyan man etiladi.

13. Tadbirkorlik subyektlarini davlat roʻyxatidan oʻtkazish va ruxsat beruvchi hujjatlarni rasmiylashtirish uchun hujjatlarni topshirish ariza beruvchi tomonidan oʻz yashash joyidagi Inspeksiyaga kelgan holda, pochta aloqasi vositasida yoki Internet tarmogʻi orqali amalga oshiriladi.

Kompleks tadbirkorlik litsenziyasi (franshizing) shartnomalarini davlat roʻyxatidan oʻtkazish uchun hujjatlarni qabul qilish Oʻzbekiston Respublikasi Vazirlar Mahkamasining 2010-yil 4-noyabrdagi 244-son qarori bilan tasdiqlangan Kompleks tadbirkorlik litsenziyasi (franshizing) shartnomalarini davlat roʻyxatidan oʻtkazish tartibi toʻgʻrisidagi nizomga muvofiq amalga oshiriladi.

14. Tadbirkorlik subyektini davlat roʻyxatidan oʻtkazish Oʻzbekiston Respublikasi Prezidentining 2006-yil 24-maydagi PQ–357-son qarori bilan tasdiqlangan Tadbirkorlik subyektlarini davlat roʻyxatiga olish va hisobga qoʻyishning xabardor qilish tartibi toʻgʻrisidagi nizom va Oʻzbekiston Respublikasi Vazirlar Mahkamasining 2003-yil 20-avgustdagi 357-son qarori bilan tasdiqlangan Tadbirkorlik subyektlarini davlat roʻyxatidan oʻtkazish, hisobga qoʻyish va ruxsat beruvchi hujjatlarni rasmiylashtirish tartibi toʻgʻrisidagi nizomda nazarda tutilgan tartibda amalga oshiriladi.

Qonun hujjatlarida nazarda tutilmagan qoʻshimcha hujjatlar va maʼlumotlarni soʻrash taqiqlanadi.

15. Tushgan arizalar va unga ilova qilingan hujjatlar tuman (shahar) hokimlik devonxonasi tomonidan qabul qilinadi. Bunda, devonxona xodimi arizaning ikkinchi nusxasiga imzo qoʻyadi va unga qabul qilib olingan hujjatlarni hamda oʻz familiyasi, ismi va otasining ismini, shuningdek ular qabul qilib olingan sanani qayd qiladi.

Devonxona xodimi ariza beruvchi taqdim etgan hujjatlarni toʻliq ish kuni mobaynida qabul qilib olishi shart. Hujjatlarni qabul qilib olishda taqdim etilgan hujjatlarni ekspertizadan oʻtkazish yoki boshqacha tarzda tekshirish, shuningdek hujjatlar yoʻqligi (etishmasligi) tufayli yoki boshqa sabablarga koʻra hujjatlarni qabul qilishni rad etish taqiqlanadi.

16. Tadbirkorlik subyektlarini davlat roʻyxatidan oʻtkazish, shu jumladan, oʻzgartirishlar va qoʻshimchalar kiritish, davlat reyestridan chiqarish, shuningdek ruxsat beruvchi hujjatlarni rasmiylashtirish toʻgʻrisida tushgan arizalar mazkur Nizomning 1-ilovasiga muvofiq shakldagi kitobda roʻyxatga olinadi va shahar (tuman) hokimligi devonxonasining roʻyxatdan oʻtkazish shtampi qoʻyiladi. Kitob ip oʻtkazib bogʻlangan, raqamlangan va tuman (shahar) hokimligining gerbli muhri bilan tasdiqlangan boʻlishi kerak.

Tuman (shahar) hokimligi devonxonasida roʻyxatdan oʻtkazilmagan arizani Inspeksiyaga qabul qilish taqiqlanadi.

Devonxonada kompyuter va tegishli dasturiy taʼminot mavjud boʻlgan taqdirda kelib tushgan arizalarning kompyuterda qoʻshimcha hisobini yuritishga yoʻl qoʻyiladi.

17. Ariza va unga ilova qilingan hujjatlar tegishli kitobda roʻyxatga olingandan soʻng devonxona ularni Inspeksiyaning oʻziga belgilangan tartibda koʻrib chiqish uchun 15 daqiqa mobaynida beradi.

18. Davlat roʻyxatidan oʻtkazish toʻgʻrisida qaror davlat reyestriga davlat roʻyxatidan oʻtkazish toʻgʻrisidagi tegishli maʼlumotlarni kiritish yoʻli bilan rasmiylashtiriladi. Bunda, tadbirkorlik subyektlarini davlat roʻyxatidan oʻtkazishni rasmiylashtirish uchun tuman (shahar) hokimining qarorini chiqarish talab etilmaydi.

Davlat roʻyxatidan oʻtkazish rad etilgan hollarda ushbu rad etish Inspeksiya boshligʻi tomonidan imzolanadigan rad etish sabablari aniq koʻrsatilgan tegishli xat bilan rasmiylashtiriladi.

19. Davlat roʻyxatidan oʻtkazish rad etilgan hollarda tadbirkorlik subyektiga barcha taqdim etilgan hujjatlar qaytarib beriladi. Bunda, javob xati (rad etish toʻgʻrisidagi xat)ning nusxasiga ariza beruvchi xatni olganligi toʻgʻrisidagi yozuvni yozib qoʻyadi (shaxsan topshirilganda) yoki unga pochta aloqa boʻlimining kvitansiyasi (pochta orqali joʻnatilganda) ilova qilinadi.

Davlat roʻyxatidan oʻtkazish rad etilganda davlat boji qonun hujjatlariga muvofiq qaytarib beriladi.

20. Inspeksiyada quyidagi tadbirkorlik subyektlarining davlat reyestrlari yuritiladi:

Yuridik shaxslarning davlat reyestri;

Yakka tartibdagi tadbirkorlarning davlat reyestri;

Yuridik shaxs tashkil etmagan holdagi dehqon xoʻjaliklarining davlat reyestri;

Yuridik shaxs tashkil etmagan holdagi oilaviy tadbirkorlik subyektlarining davlat reyestri.

21. Davlat reyestrlari rasmiy hujjatlar hisoblanadi va qonun hujjatlarida belgilangan tartibda yuritiladi. Reyestrlar ip oʻtkazib tikiladi, raqamlanadi va tegishli hokimlikning gerbli muhri bilan tasdiqlangan boʻlishi lozim. Kompyutyerlar va tegishli dasturiy taʼminot mavjud boʻlgan taqdirda qoʻshimcha ravishda roʻyxatdan oʻtkazilgan tadbirkorlik subyektlariga oid maʼlumotlarning elektron bazasini yuritishga yoʻl qoʻyiladi.

22. Inspeksiya Oʻzbekiston Respublikasi Vazirlar Mahkamasining 2003-yil 20-avgustdagi 357-son qarori bilan tasdiqlangan Tadbirkorlik subyektlarini davlat roʻyxatidan oʻtkazish, hisobga qoʻyish va ruxsat beruvchi hujjatlarni rasmiylashtirish tartibi toʻgʻrisidagi nizomda belgilangan tartibda tegishli ruxsat beruvchi hujjatlarni rasmiylashtiradi.

23. Inspeksiya va shahar (tuman) soliq organlari hamda statistika organlari oʻrtasida tezkor hamkorlik qilish maqsadida hisobga olishni amalga oshirishda zarur boʻlgan tegishli maʼlumotlarni (davlat reyestridan maʼlumotlar, berilgan STIR va statistika kodlari toʻgʻrisida maʼlumotlar) ayirboshlash odatda ushbu maʼlumotlarni yuqorida koʻrsatilgan organlarning masʼul xodimlari tomonidan tegishli kuzatuv hujjatlarini rasmiylashtirmasdan tezkor ravishda amalga oshiriladi.

Tegishli texnik vositalar mavjud boʻlganda qonun hujjatlariga muvofiq rasmiylashtirilgan axborotlarni elektron pochta orqali ayirboshlashga yoʻl qoʻyiladi.

24. Shahar (tuman)lar hokimlari soliq organlari va statistika organlari tomonidan tegishli axborotlarni ayirboshlashda tezkor oʻzaro hamkorlikni taʼminlash boʻyicha zarur tashkiliy chora-tadbirlarni koʻrishlari shart.

25. Inspeksiya tomonidan mazkur Nizomning 2-ilovasiga muvofiq shaklda Hisobga qoʻyish boʻyicha hujjatlar aylanishini hisobga olish jurnali hamda mazkur Nizomning 3-ilovasiga muvofiq shaklda Ruxsat beruvchi hujjatlarni rasmiylashtirish boʻyicha hujjatlar aylanishini hisobga olish jurnali yuritiladi. Ushbu jurnallar ip bilan tikilgan, raqamlangan va tegishli shahar (tuman) hokimligining gerbli muhri bilan tasdiqlangan boʻlishi kerak.

26. Roʻyxatga olish va ruxsat berish boʻyicha zarur boʻlgan tartibotlar tugagandan soʻng Inspeksiya qonun hujjatlarida belgilangan muddatlarda tadbirkorlik subyektlariga davlat roʻyxatidan oʻtkazish va ruxsat beruvchi hujjatlarni rasmiylashtirish bilan bogʻliq boʻlgan tegishli hujjatlarni beradi.

27. Yangidan tashkil etilayotgan tadbirkorlik subyektlariga toʻlov asosida Tekshirishlarni roʻyxatga olish kitobi beriladi.

28. Davlat roʻyxatidan oʻtkazish toʻgʻrisidagi guvohnoma, shuningdek ruxsat beruvchi hujjatlarni rasmiylashtirish toʻgʻrisidagi guvohnoma Inspeksiya boshligʻi tomonidan imzolanadi va tegishli tuman (shahar) hokimligining gerbli muhri bilan tasdiqlanadi.

Muhr va shtamp eskizini tasdiqlashda Inspeksiya muhr va shtamplarni hisobga olish daftariga tegishli yozuv kiritiladi.

29. Inspeksiya roʻyxatdan oʻtkazilgan har bir tadbirkorlik subyekti boʻyicha quyidagi hujjatlar tikib qoʻyiladigan alohida jild yuritadi: davlat roʻyxatidan oʻtkazilganlik toʻgʻrisidagi guvohnomaning nusxasi; ariza va unga ilova qilingan hujjatlar; taʼsis hujjatlariga kiritilgan oʻzgartirish va qoʻshimchalarni roʻyxatdan oʻtkazish hamda tadbirkorlik subyektini tugatish bilan bogʻliq boʻlgan hujjatlar; statistika organlarining Korxonalar va tashkilotlarning yagona davlat registriga kiritilgan oʻzgartirishlar toʻgʻrisidagi yozma bildirishnomalari; tadbirkorlik subyektlarining pochta manzili oʻzgarganligi haqidagi va yakka tartibdagi tadbirkorlarning faoliyat joyi va turi oʻzgarganligi haqidagi yozma bildirishnomalari; Davlat reyestrida koʻrsatilgan tadbirkorlik subyekti toʻgʻrisidagi boshqa maʼlumotlarning oʻzgarishi bilan bogʻliq boʻlgan boshqa hujjatlar.

Ruxsat beruvchi hujjatlarni rasmiylashtirish uchun ham ariza berilgan holda tegishli hujjatlarga ruxsat beruvchi hujjatlarni rasmiylashtirish toʻgʻrisida guvohnomaning nusxasi va ruxsat beruvchi hujjatlarni rasmiylashtirish bilan bogʻliq boʻlgan boshqa hujjatlar qoʻshiladi.

Jildlar Inspeksiyada reyestr (tartib) raqami boʻyicha saqlanadi.

30. Inspeksiyaga kelib tushadigan boshqa hujjatlar (yozishmalar) boʻyicha ish yuritish belgilangan tartibda hokim tomonidan tasdiqlangan nomenklaturaga muvofiq olib boriladi.

31. Inspeksiya faoliyatni moliyalash uchun tuman (shahar) hokimligiga xizmat koʻrsatuvchi bankda quyidagi maxsus hisob raqamlar ochiladi:

Inspeksiya faoliyatini moliyalash uchun hokimlikning maxsus hisob raqami (bundan buyon matnda Inspeksiyani moliyalash boʻyicha hisob raqam deb yuritiladi);

ruxsat beruvchi hujjatlarni rasmiylashtirish boʻyicha xarajatlarni qoplash uchun maxsus hisob raqam (bundan buyon matnda xarajatlarni qoplash boʻyicha hisob raqam deb yuritiladi).

32. Inspeksiyani moliyalash boʻyicha hisob raqam mablagʻlari davlat roʻyxatidan oʻtkazish uchun tushadigan davlat bojining bir qismi hisobiga shakllanadi.

33. Inspeksiya faoliyatini moliyalash boʻyicha hisob raqamga tushgan mablagʻlar tadbirkorlik subyektlarini davlat roʻyxatidan oʻtkazish va hisobga qoʻyish, vakolatli organlarda dastlabki ruxsat beruvchi tegishli hujjatlarni rasmiylashtirish, Inspeksiyaning mehnatga haq toʻlash fondini shakllantirish, bank hisob raqamiga xizmat koʻrsatish boʻyicha bank xizmatlariga haq toʻlash, shuningdek Inspeksiya zimmasiga yuklatilgan boshqa vazifalarni amalga oshirishni moliyalashga sarflanadi.

Mablagʻlardan koʻrsatilgan maqsadlarda foydalanish tegishli shahar (tuman) hokimligining moliya-xoʻjalik boʻlinmasi tomonidan shahar (tuman) hokimligining moliya boʻlimi bilan birgalikda tushadigan davlat bojlari prognozi va rejalashtirilgan xarajatlardan kelib chiqqan holda belgilangan tartibda ishlab chiqilgan yillik smeta boʻyicha amalga oshiriladi. Xarajatlar smetasi va shtat jadvali shahar (tuman) hokimi tomonidan tasdiqlanadi va tegishli moliya boʻlimi bilan kelishiladi.

Davlat bojlaridan tushgan tushumlarning sarflanmagan qismi shahar (tuman) hokimining qarori boʻyicha yilning oxirida sarflanadi.

Shahar (tuman) hokimligining buxgalteriyasi har chorakda hisobot choragidan keyingi oyning 10-sanasiga qadar Inspeksiyani moliyalash boʻyicha hisob raqam mablagʻlarining sarflanishi toʻgʻrisidagi hisobotni tegishli moliya boʻlimlariga topshiradi.

34. Ruxsat beruvchi hujjatlarni rasmiylashtirishda tegishli ruxsat beruvchi hujjatlarni berish uchun vakolatli organlarning xizmatiga haq toʻlash faqat Inspeksiya orqali amalga oshiriladi.

Davlat bojlari va qonun hujjatlarida belgilangan boshqa toʻlovlar ariza beruvchi tomonidan alohida toʻlov hujjatlari bilan amalga oshiriladi. Toʻlov hujjatlarida ruxsat beruvchi hujjatlar alohida koʻrsatiladi.

35. Yangidan tashkil etilayotgan tadbirkorlik subyektlariga beriladigan Tekshirishlarni roʻyxatga olish kitoblariga haq toʻlash hamda ruxsat beruvchi hujjatlarni rasmiylashtirish uchun zarur boʻlgan tegishli summalarni toʻlash xarajatlarni qoplash boʻyicha hisob raqamlar orqali amalga oshiriladi.

36. Ruxsat beruvchi tartibotlarni amalga oshirishda Inspeksiya tomonidan qonun hujjatlarida nazarda tutilmagan toʻlovlarni talab qilinishi man qilinadi.

Tegishli vakolatli organlar tomonidan ruxsat beruvchi hujjatlarni berish rad etilgan hollarda ariza beruvchi tomonidan toʻlangan mablagʻlar unga qaytariladi.

37. Vakolatli organlar xizmatlariga toʻlanadigan haqlarni ushbu organlarning hisob raqamlariga oʻtkazish Inspeksiya tomonidan tegishli hujjatlar rasmiylashtirilgandan soʻng yoki ularni rasmiylashtirish bilan bir vaqtda amalga oshiriladi.

Ariza beruvchi ruxsat beruvchi hujjatlarni rasmiylashtirishning turli bosqichlarida ushbu hujjatlarni rasmiylashtirishdan bosh tortish va toʻlangan mablagʻlarini qaytarilishini talab qilish huquqiga ega. Ushbu holatlarda ariza beruvchining mablagʻlari tegishli ariza asosida u berilgan kundan boshlab 3 kundan kechiktirmasdan qaytariladi.

38. Inspeksiyalarda ariza beruvchilarga tanishish qulay boʻlgan joylarda davlat bojlari miqdorlari, shuningdek vakolatli organlarning ruxsat beruvchi hujjatlarni rasmiylashtirish boʻyicha xizmatlariga toʻlanadigan haq miqdori toʻgʻrisida maʼlumotlar osib qoʻyilishi kerak.

39. Xarajatlarni qoplash boʻyicha hisob raqamning mablagʻlaridan tegishli maqsadlar uchun foydalanish Inspeksiya boshligʻi tomonidan amalga oshiriladi.

Xarajatlarni qoplash boʻyicha hisob raqamning mablagʻlarini boshqa maqsadlar uchun ishlatish qatʼiyan taqiqlanadi.

40. Xarajatlarni qoplash boʻyicha hisob raqamga tushgan mablagʻlarni va ularni sarflanishini hisobga olib berish uchun Inspeksiyada mazkur Nizomning 4-ilovasiga muvofiq shaklda Ruxsat beruvchi hujjatlarni rasmiylashtirish boʻyicha mablagʻlar sarflanishini hisobga olish jurnali yuritiladi. Ushbu jurnal raqamlangan, ip bilan tikilgan va shahar (tuman) hokimining gerbli muhri bilan tasdiqlangan boʻlishi kerak. Jurnal Inspeksiyaning masʼul xodimi tomonidan toʻldiriladi.

41. Xarajatlarni qoplash boʻyicha hisob raqam mablagʻlarini sarflanishi boʻyicha ichki nazorat shahar (tuman) hokimligining buxgalteriyasi tomonidan har chorakda kelib tushgan va sarflangan mablagʻlarni bank hisob raqamidan olingan koʻchirma bilan taqqoslash yoʻli orqali amalga oshiriladi.

42. Davlat roʻyxatidan oʻtkazish va ruxsat beruvchi hujjatlarni rasmiylashtirish boʻyicha belgilangan tartibga rioya etilishi ustidan nazorat adliya organlari tomonidan amalga oshiriladi.

43. Davlat roʻyxatidan oʻtkazish va ruxsat beruvchi hujjatlarni rasmiylashtirish tartibini buzgan mansabdor shaxslar belgilangan tartibda javobgarlikka tortiladi.

Davlat roʻyxatidan oʻtkazish va ruxsat beruvchi hujjatlarni rasmiylashtirish tartibini buzish oqibatida tadbirkorlik subyektlariga va ularning taʼsischilariga yetkazilgan zarar aybdor shaxslar tomonidan belgilangan tartibda qoplanadi.

44. Mazkur Nizom Oʻzbekiston Respublikasi Savdo-sanoat palatasi bilan kelishilgan.