“Mahalliy Davlat hokimiyati toʻgʻrisida”gi Oʻzbekiston Respublikasi Qonunining 6-moddasiga hamda Oʻzbekiston Respublikasi Vazirlar Mahkamasining 2008-yil 20-avgustdagi 186-sonli qaroriga asosan 2014-yil uchun ijtimoiy himoyaga muhtoj shaxslar uchun ish joylarini eng kam miqdorini belgilash maqsadida qaror qilaman:

1. “Aholini ish bilan taʼminlash toʻgʻrisida”gi Oʻzbekiston Respublikasi Qonunining 17-moddasiga asosan ijtimoiy muhofazaga muhtoj va ish topishda qiynalayotgan shaxslarni ishga joylashtirish uchun ish joylarining eng kam miqdori xodimlarining roʻyxat boʻyicha oʻrtacha sonidan 1876 kishini tashkil etadigan 7,0 % miqdorida, shu jumladan:

oʻn toʻrt yoshga toʻlmagan bolalari, nogiron bolalari boʻlgan yolgʻiz va koʻp bolali ota-onalar uchun 1,0 foiz (16 oʻrin);

taʼlim muassasalarini tugatgan yoshlar uchun 1,0 foiz (17 oʻrin);

muddatli harbiy xizmatdan boʻshatilganlar uchun 0,5 foiz (10 oʻrin);

nogironlar uchun 3,0 foiz (55 oʻrin);

Bandlikka koʻmaklashish va aholini ijtimoiy muhofaza qilish markazida ish qidiruvchi sifatida hisobda turgan pensiya yoshiga yaqinlashib qolgan shaxslar uchun 0,5 % (10 oʻrin);

jazoni ijro etish muassasalaridan ozod qilingan, jazoni oʻtayotgan yoki sud qaroriga koʻra tibbiy xarakterdagi majburiy choralar koʻrilgan shaxslar uchun 1,0 foiz (16 oʻrin) miqdorida ish oʻrinlari zaxirasi belgilansin.

2. Ushbu toifa shaxslar uchun ish oʻrinlari xodimlar tomonidan oʻzgalar mehnat majburiyatlarini toʻsiqlarsiz bajarishini taʼminlaydigan, shu jumladan:

yolgʻiz ota, yolgʻiz ona va 14 yoshgacha boʻlgan nogiron bolalari bor koʻp bolali ota-onalar uchun bolalarni tarbiyalash va mehnat majburiyatlari boʻyicha vazifalarni uygʻunlashtirish imkonini beradigan, oʻzgaruvchan ish jadvaliga ega boʻlgan ish oʻrinlari;

taʼlim muassasalarini tugatgan yoshlar uchun ularning kasb boʻyicha tayyorgarligiga muvofiq boʻlgan ish oʻrinlari;

muddatli harbiy xizmatdan boʻshatilgan shaxslar uchun ularning kasb boʻyicha tayyorgarligiga muvofiq boʻlgan ish oʻrinlari;

nogironlar uchun mehnat sharoitlari boʻyicha attestatsiyadan oʻtkazilgan hamda xodimga ish jarayonlarini toʻsqinliksiz bajarish imkonini beradigan ish oʻrinlari;

bandlikka koʻmaklashish va aholini ijtimoiy muhofaza qilish markazida ish qidiruvchi sifatida hisobda turgan pensiya yoshiga yaqinlashib qolgan shaxslar uchun maxsus malakani talab qilmaydigan ish oʻrinlari;

jazoni ijro etish muassasalaridan ozod qilingan, jazoni oʻtayotgan yoki sud qaroriga koʻra tibbiy xarakterdagi majburiy choralar koʻrilgan shaxslar uchun ularning kasb boʻyicha tayyorgarligi hisobga olingan xoldagi ish oʻrinlari, muayyan kasb-hunarga, malakaga ega boʻlmagan shaxslar uchun esa maxsus malaka talab qilinmaydigan ish oʻrinlari sanitariya-gigiyena normalari va mehnat sharoitlariga muvofiq boʻlishi kerak;

korxonalar, tashkilotlar va muassasalar “Bandlikka koʻmaklashish va aholini ijtimoiy muhofaza qilish” markaziga;

ish joylarining eng kam miqdorini (kvota) boʻyicha ish oʻrinlarini tashkil etilganligi toʻgʻrisidagi maʼlumotlarini kalendar yilining 1-choragi mobaynida taʼminlash va chorak tugagandan keyingi oyning 10-kuniga qadar;

ushbu oʻrinlarga ishga joylashtirilganligi toʻgʻrisidagi maʼlumotlarini har oyning 25 sanasiga qadar taqdim etsinlar;

ijtimoiy muhofazaga muhtoj boʻlgan toifadagi ishchilarga maxsus ish joylari ajrata olmagan korxonalar, muassasalar va tashkilotlar ish joylarini ijaraga sotib olish yoki boshqa korxonalar bilan hamkorlikda tashkil etiladi.

3. Ish oʻrinlari band qilib qoʻyiladigan kasblar va lavozimlar qarorning 1-bandi ikkinchi xatboshisida koʻrsatilgan talablarga javob beradigan kasb va mutaxassisliklar boʻyicha korxonalar kesimida ish oʻrinlari koʻrsatilgan holda (ilova* boʻyicha) tashkil etilsin. Jumladan:

14 yoshga toʻlmagan bolalari, nogiron bolalari boʻlgan yolgʻiz va koʻp bolali ota-onalar uchun 16 ta ish oʻrni, taʼlim muassasalarni tamomlagan yoshlar uchun 17 ta ish oʻrni, muddatli harbiy xizmatdan boʻshatilganlar uchun 10 ta ish oʻrni, nogironlar uchun 55 ta ish oʻrni, bandlikka koʻmaklashish va aholini ijtimoiy muhofaza qilish markazida ish qidiruvchi sifatida hisobda turgan pensiya yoshiga yaqinlashib qolgan shaxslar uchun 10 ta ish oʻrni va jazoni ijro etish muassasalaridan ozod qilingan, jazoni oʻtayotgan yoki sud qaroriga koʻra tibbiy xarakterdagi majburiy choralar koʻrilgan shaxslar uchun 16 ta ish oʻrni band qilib qoʻyilsin.

4. Korxonalar, tashkilotlar va muassasalar rahbarlari Oʻzbekiston Respublikasi Vazirlar Mahkamasining 2008-yil 28-avgustdagi 186-sonli qarori bilan tasdiqlangan “Ijtimoiy muhofazaga muhtoj va ish topishda qiynaladigan shaxslarni ishga joylashtirish uchun ish oʻrinlarini band qilib qoʻyish tartibi toʻgʻrisida”gi nizomga muvofiq ijtimoiy muhofazaga muhtoj va ish topishda qiynaladigan shaxslar uchun koʻrsatilgan ish oʻrinlarini tashkil etilishini taʼminlasinlar.

5. Ushbu qaror bajarilmagan taqdirda tashkilotlarning mansabdor shaxslariga “Ijtimoiy muhofazaga muhtoj va ish topishda qiynaladigan shaxslarni ishga joylashtirish uchun ish oʻrinlarining band qilib qoʻyish tartibi toʻgʻrisida”gi nizomning 15-bandiga muvofiq jarima solinishi toʻgʻrisida ogohlantirilsin.

6. Ushbu qarorda belgilangan ijtimoiy muhofazaga muhtoj va ish topishda qiynalayotgan shaxslar uchun ish oʻrinlarini band qilib qoʻyish sonidan ortiqcha ish oʻrinlari tashkil etilganda tashkilot uchun quyidagi imtiyozlar belgilanadi:

nogironlar uchun band qilib qoʻyiladigan ish oʻrinlarini belgilangan sonidan ortiqcha tashkil etgan tashkilotlar qonun hujjatlarida belgilangan tartibda imtiyoz olishi;

mutasaddi tashkilotlar, korxonalar, muassasalar oʻz vakolatlari doirasida ijtimoiy muhofazaga muhtoj va ish qidirishda qiynalayotgan shaxslar uchun belgilangan koʻrsatkichlardan ortiqcha, shu jumladan ish uchastkalari (sexlar) tashkil etish uchun turar joy boʻlmagan binolarni birlamchi navbatda ajratish yoʻli bilan band qilib qoʻyiladigan ish oʻrinlari tashkil etgan tashkilotlar uchun imtiyozlar belgilanishi;

ijtimoiy muhofazaga muhtoj va ish topishda qiynalayotgan shaxslar uchun band qilib qoʻyiladigan ish oʻrinlari tuman xokimi tomonidan belgilangan miqdordan ortiqcha tashkil etgan tashkilotlar ushbu ish oʻrinlarini tashkil etishga sarflangan mablagʻlarning bir qismini tuman Bandlikka koʻmaklashish va aholini ijtimoiy muhofaza qilish markazi bilan tuzilgan shartnoma asosida bandlikka koʻmaklashish jamgʻarmasi hisobidan qoplash huquqiga egadir.

7. Guliston tuman Bandlikka koʻmaklashish va aholini ijtimoiy muhofaza qilish markazi bir hafta muddat ichida ushbu qarorni ilovada koʻrsatilgan korxonalar, tashkilotlar va muassasalarga yetkazsin va ijrosi nazoratga olinsin.

8. Ushbu qaror ijrosini nazorat qilishni oʻz zimmamda qoldiraman.

9. Mazkur qaror rasmiy nashrda eʼlon qilingan kundan eʼtiboran qonuniy kuchga kiradi.