Oʻzbekiston Respublikasi Prezidentining “Oʻzbekiston sportchilarini 2016-yilda Rio-de-Janeyro shahrida (Braziliya) boʻlib oʻtadigan XXXI yozgi Olimpiya va XV Paralimpiya oʻyinlariga tayyorlash toʻgʻrisida” 2013-yil 25-fevraldagi PQ–1923-son qaroriga muvofiq, shuningdek sport turlari boʻyicha Oʻzbekiston terma jamoalarini sport musobaqalarida qatnashishga sifatli tayyorlash maqsadida Vazirlar Mahkamasi qaror qiladi:

1. Sport turlari boʻyicha Oʻzbekiston Respublikasi terma jamoalari aʼzolari boʻlgan sportchilarni tayyorlash uchun jalb etilgan xorijiy mutaxassislarning ish shart-sharoitlari toʻgʻrisidagi nizom ilovaga muvofiq tasdiqlansin.

2. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.I. Ikramov zimmasiga yuklansin.

1. Ushbu Nizom mehnat shartnomasi (kontrakt) asosida Oʻzbekiston Respublikasi terma jamoalarining aʼzolari boʻlgan sportchilarni tayyorlash uchun jalb etilgan, mehnatiga budjet mablagʻlari hisobiga haq toʻlanadigan xorijiy mutaxassislarga haq toʻlash tartibini va ularning ish shart-sharoitlari belgilaydi.

2. Ushbu Nizomda quyidagi asosiy tushunchalardan foydalaniladi:

xorijiy mutaxassis — boshqa mamlakatning amaliy sport tajribasiga ega boʻlgan sport sohasidagi mutaxassisi;

ish beruvchi — Oliy sport mahorati respublika maktabi, sport turlari boʻyicha respublika sport federatsiyasi (uyushma, markaz va shu kabilar);

sport maslahatchisi — sportchini yoki sport jamoasini tayyorlash masalalari boʻyicha, shuningdek sportchilar sport musobaqalarida qatnashishi jarayonida maslahatlar beruvchi sport turlari boʻyicha mutaxassis;

sport menejeri — sportchi yoki sport jamoasining natijali kasb faoliyatini taʼminlaydigan boshqaruv, iqtisodiyot, psixologiya, sotsiologiya sohasidagi mutaxassis;

trener — tegishli maʼlumotga ega boʻlgan, oʻquv-mashq va jismoniy tarbiya-ommaviy tadbirlarni oʻtkazuvchi, shuningdek sport natijalariga erishish uchun musobaqalashish faoliyatiga rahbarlik qiluvchi jismoniy shaxs.

3. Xorijiy mutaxassis ishga trener, sport menejeri, sport maslahatchisi sifatida qabul qilinishi mumkin.

4. Oʻzbekiston Respublikasi terma jamoalari aʼzolari boʻlgan sportchilarni tayyorlash uchun jalb etilgan xorijiy mutaxassis belgilangan tartibda uning nomiga berilgan mehnat faoliyati bilan shugʻullanish huquqining tasdiqnomasi mavjud boʻlganda va xorijiy ishchi kuchini jalb etishga ish beruvchi tomonidan olingan ruxsatnoma asosida Oʻzbekiston Respublikasi hududida ishlashi mumkin.

5. Ish beruvchi xorijiy mutaxassislar faoliyatini faoliyat natijalari asosida oʻrganadi. Oʻrganish yakunlari boʻyicha natijali xorijiy mutaxassisni tanlaydi va u bilan muzokaralar olib boradi.

6. Xorijiy mutaxassis ish beruvchiga oʻz xizmatlarini koʻrsatishga rozi boʻlgan taqdirda, ish beruvchi u bilan mehnat shartnomasi (kontrakt) tuzish toʻgʻrisida takliflar tayyorlash uchun zarur hujjatlarni tayyorlaydi.

7. Ish beruvchi Oʻzbekiston Respublikasi Sport vazirligiga (keyingi oʻrinlarda Vazirlik deb ataladi) xorijiy mutaxassislar bilan mehnat shartnomalari (kontraktlar) tuzish toʻgʻrisidagi takliflarni (keyingi oʻrinlarda ish beruvchining takliflari deb ataladi) taqdim etadi. Ish beruvchining takliflarida quyidagilar:

xorijiy mutaxassisning trenerlik faoliyati toʻgʻrisidagi maʼlumotlar;

sportchilarni tayyorlash boʻyicha xorijiy mutaxassisning dasturi;

xorijiy mutaxassisning maʼlumoti toʻgʻrisidagi hujjatlar (mavjud boʻlganda);

xorijiy mutaxassis mehnatiga har oylik haq toʻlashning moʻljallanayotgan summasi (shartnoma (kontrakt) tuzilgan kundagi mehnatga haq toʻlashning eng kam miqdorining 50 baravarigacha miqdorda, har oylik haq toʻlashning miqdori tomonlar tuzgan shartnoma (kontrakt) bilan aniqlanadi) mavjud boʻladi.

8. Vazirlik ish beruvchining takliflarini oʻzining huzurida tashkil etiladigan Ekspert komissiyasiga yuboradi.

9. Ekspert komissiyasi Oʻzbekiston Respublikasi sport vazirining buyrugʻi bilan tashkil etiladi.

Ekspert komissiyasi kamida yetti nafar kishidan iborat tarkibda tuziladi, unga Vazirlikning tegishli tarkibiy boʻlinmalari rahbarlari, Oʻzbekiston Milliy olimpiya qoʻmitasi, Oʻzbekiston Milliy paralimpiya qoʻmitasi, sport turlarini rivojlantirish respublika markazlari va sport federatsiyalari (uyushmalari)ning vakillari kiritiladi.

Ekspert komissiyasiga rais boshchilik qiladi (Oʻzbekiston Respublikasi sport vazirining oʻrinbosaridan past boʻlmagan darajada).

10. Ekspert komissiyasi ish beruvchining takliflarini ish beruvchi tomonidan taklif etilayotgan xorijiy mutaxassisning mehnatiga haq toʻlash uchun budjet mablagʻlari ajratishning maqsadga muvofiqligi yuzasidan bir oy mobaynida koʻrib chiqadi.

11. Ekspert komissiyasi majlisini rais, u boʻlmaganda esa — raisning qarori boʻyicha Ekspert komissiyasi aʼzolaridan biri boshqaradi.

12. Ekspert komissiyasining majlisi, agar unda Ekspert komissiyasi aʼzolari umumiy sonining kamida uchdan bir qismi hozir boʻlsa qonuniy huquqqa ega hisoblanadi. Qaror ochiq ovoz berish yoʻli bilan qabul qilinadi.

13. Ekspert komissiyasi ish beruvchining takliflarini koʻrib chiqadi va xorijiy mutaxassisning mehnatiga haq toʻlash uchun budjet mablagʻlari ajratishning maqsadga muvofiqligi yoki budjet mablagʻlari ajratishni rad etish toʻgʻrisida qaror qabul qiladi.

14. Ekspert komissiyasining qarori, agar uning uchun Komissiyaning majlisda hozir boʻlgan aʼzolarining oddiy koʻpchiligi ovoz bergan boʻlsa qabul qilingan deb hisoblanadi. Ovozlar teng boʻlib qolgan taqdirda raislik qiluvchining ovozi hal qiluvchi hisoblanadi.

15. Ekspert komissiyasining qarori protokol bilan rasmiylashtiriladi va u Ekspert komissiyasining raisi va kotibi tomonidan imzolanadi.

16. Xorijiy mutaxassisning mehnatiga haq toʻlash uchun budjet mablagʻlari ajratishning maqsadga muvofiqligi toʻgʻrisida qaror qabul qilingan taqdirda Ekspert komissiyasi bir vaqtning oʻzida ushbu mablagʻlar miqdorini belgilaydi (shartnoma (kontrakt) tuzilgan kundagi mehnatga haq toʻlashning eng kam miqdorining 50 baravarigacha). Bunda:

ushbu Nizomning 8-bandida sanab oʻtilgan hujjatlar;

Oʻzbekiston Respublikasi terma jamoalarining aʼzolari boʻlgan sportchilarni tayyorlash boʻyicha prognozlashtirilayotgan natijalar hisobga olinadi.

17. Ish beruvchi tomonidan taklif etilgan xorijiy mutaxassisning mehnatiga haq toʻlash uchun budjet mablagʻlari ajratishni rad etish toʻgʻrisida qaror qabul qilingan taqdirda Ekspert komissiyasining qarorida rad etish sabablari koʻrsatiladi.

17¹. Ish beruvchi tomonidan taklif etilgan xorijiy mutaxassisning mehnatiga haq toʻlash miqdori mehnatga haq toʻlashning eng kam miqdorining 50 baravaridan koʻp boʻlgan taqdirda, Olimpiya va Paralimpiya oʻyinlariga Oʻzbekiston sportchilarini tayyorlash boʻyicha tuzilgan Respublika komissiyasi raisining ruxsati bilan Davlat budjetidan qoʻshimcha moliyalashtirishga ruxsat beriladi.

18. Vazirlik Ekspert komissiyasining qarorini ish beruvchiga u qabul qilingandan keyin bir hafta muddatda yuboradi.

19. Ekspert komissiyasining xorijiy mutaxassisning mehnatiga haq toʻlash uchun budjet mablagʻlari ajratishning maqsadga muvofiqligi toʻgʻrisidagi qarori asosida ish beruvchi xorijiy ishchi kuchini jalb etish va Oʻzbekiston Respublikasi hududidagi faoliyatda foydalanish uchun zarur boʻlgan hujjatlarni (mehnat faoliyati bilan shugʻullanish huquqi uchun tasdiqnoma, xorijiy ishchi kuchini jalb etishga ruxsatnoma, vizalarni rasmiylashtirish va shu kabilar) belgilangan tartibda oladi.

20. Ish beruvchi bilan xorijiy mutaxassis oʻrtasida zarur hujjatlar rasmiylashtirilgandan keyin mehnat shartnomasi (kontrakt) tuziladi.

21. Ish beruvchi xorijiy ishchi kuchini jalb etish va Oʻzbekiston Respublikasi hududida xorijiy ishchi kuchidan foydalanish uchun zarur boʻlgan hujjatlarni ilova qilgan holda mehnat shartnomasining nusxasini Vazirlikka uch kun muddatda yuboradi.

22. Xorijiy mutaxassisning mehnatiga haq toʻlash uchun ish beruvchiga tegishli moliyaviy yilga Vazirlikning sport va jismoniy tarbiya-ommaviy tadbirlar Kalendar rejasida nazarda tutilgan mablagʻlar hisobiga moliyaviy mablagʻlar ajratiladi.

23. Vazirlik tomonidan Ekspert komissiyasining budjet mablagʻlari ajratishning maqsadga muvofiqligi toʻgʻrisidagi qarori va ushbu Nizomning 21-bandiga muvofiq ish beruvchi tomonidan taqdim etilgan hujjatlar asosida xorijiy mutaxassisning har oylik ish haqi va yagona ijtimoiy toʻlov bilan bogʻliq xarajatlarni qoplash uchun moliyaviy mablagʻlar ajratish toʻgʻrisida buyruq chiqariladi.

24. Xorijiy mutaxassisning mehnatiga haq toʻlash uchun budjet mablagʻlari Vazirlik tomonidan ish beruvchining hisob-kitob raqamiga oʻtkaziladi.

25. Xorijiy mutaxassisning mehnatiga haq toʻlash ish beruvchi tomonidan, u bilan tuzilgan mehnat shartnomasiga (kontraktga) muvofiq, unga Vazirlik tomonidan ajratilgan mablagʻlar hisobiga amalga oshiriladi.

26. Xorijiy mutaxassis har oylik ish haqini oʻzi bilan ish beruvchi oʻrtasida tuzilgan mehnat shartnomasi (kontrakt) asosida Oʻzbekiston Respublikasining milliy valyutasida oladi.

27. Ish beruvchi xorijiy mutaxassislarni sport kiyim-boshi, sport uskunasi, inventar va ular mehnat faoliyatini amalga oshirishi uchun zarur boʻlgan boshqa moddiy-texnika vositalari bilan taʼminlashi, shuningdek koʻrsatib oʻtilgan kiyim-bosh, uskuna, inventar va moddiy-texnika vositalarini ulardan foydalanish uchun yaroqli holatda saqlashi mumkin.

28. Xorijiy mutaxassis bilan tuzilgan mehnat shartnomasida (kontraktda):

xorijiy mutaxassisning mehnat faoliyati bilan bevosita bogʻliq boʻlgan qismida sport musobaqalari toʻgʻrisidagi qoidalarga (reglamentlarga) rioya qilish toʻgʻrisida xorijiy mutaxassisning majburiyati toʻgʻrisidagi;

Oʻzbekiston Respublikasining mehnat toʻgʻrisidagi qonunlarida nazarda tutilgan hollarda xorijiy mutaxassisning tashabbusi bilan mehnat shartnomasi (kontrakt) bekor qilingan taqdirda xorijiy mutaxassis tomonidan ish beruvchining foydasiga neustoyka toʻlash tartibi va koʻrsatib oʻtilgan toʻlovning miqdori toʻgʻrisidagi;

xorijiy mutaxassisning sogʻligʻini yaxshilash maqsadida tiklash tadbirlari oʻtkazilishi toʻgʻrisidagi;

boshqa joyga ishga oʻtishi munosabati bilan qoʻshimcha kompensatsiyalar miqdorlari va toʻlash tartibi toʻgʻrisidagi;

ham respublika hududida, ham chet elda sport tadbirlarida qatnashish davrida moddiy taʼminlash toʻgʻrisidagi;

mehnat shartnomasi (kontrakt)ning amal qilishi davrida xorijiy mutaxassisni va uning oila aʼzolarini turar joy bilan taʼminlash toʻgʻrisidagi;

transport xarajatlarini qoplash toʻgʻrisidagi;

qoʻshimcha tibbiy xizmat koʻrsatish toʻgʻrisidagi;

qonunchilikda belgilangan tartibda energiya sarf-xarajatlarini qoplash va jismoniy resurslarni tiklash toʻgʻrisidagi shartlar nazarda tutilishi mumkin.

29. Xorijiy mutaxassisning funksional majburiyatlariga quyidagilar kiradi:

biriktirilgan sportchi(lar)ni tayyorgarlik rejasida rejalashtirilgan yuksak sport natijalariga erishishga, shu jumladan ularni jahon, Osiyo chempionatlarida, Olimpiya va Osiyo oʻyinlarida yuqori oʻrinlarni egallashga tayyorlash;

sport turlari boʻyicha terma jamoalar trenerlar kengashi tomonidan tasdiqlangan sport rejimiga va oʻquv-mashq jarayoni intizomiga qatʼiy rioya qilish, sport turi yoki turlariga biriktirilgan sport vrachlarining koʻrsatmalari va tavsiyalarini bajarish;

sport turlari boʻyicha terma jamoalar aʼzolarini musobaqalarga tayyorlashning yakka tartibdagi rejasini bajarish;

biriktirilgan sportchi(lar)ning sogʻligʻi va shaxsiy gigiyenasi toʻgʻrisida gʻamxoʻrlik qilish, shu jumladan uni (ularni) dispanser koʻrigidan oʻtkazishga muntazam ravishda yuborish;

yuksak maʼnaviy-axloqiy darajani saqlab turish.

30. Xorijiy mutaxassisga quyidagilar taqiqlanadi:

sport natijalariga erishish uchun musobaqa qoidalarida taqiqlangan usullar va vositalardan foydalanish;

doppingga qarshi qoidalarni buzish;

mehnat shartnomasi (kontrakt) amal qilishi muddati mobaynida tijorat sirini va boshqa maxfiy axborotni, shuningdek oʻquv-mashq jarayoni toʻgʻrisidagi axborotni, tibbiy va boshqa tekshirishlar (test sinovlari) natijalarini va hokazolarni oshkor qilish;

ish beruvchining yozma ruxsatisiz boshqa mamlakatlar nomidan ish koʻrishi, shuningdek ular bilan muzokaralar.

31. Ushbu Nizom talablariga rioya etilishini nazorat qilish Oʻzbekiston Respublikasi qonunchiligiga muvofiq amalga oshiriladi.

32. Xorijiy mutaxassis bilan mehnat shartnomasini (kontraktni) bekor qilish Oʻzbekiston Respublikasining amaldagi qonunchiligiga muvofiq amalga oshiriladi.

33. Ushbu Nizom talablarini buzgan shaxslar Oʻzbekiston Respublikasi qonunchiligiga muvofiq javobgarlikka tortiladi.