Respublika iqtisodiyoti tarmoqlarini 1998/99 yil kuz-qish davrida barqaror ishlashga oʻz vaqtida tayyorlashni taʼminlash maqsadida Vazirlar Mahkamasi qaror qiladi:

1. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, vazirliklar, idoralar, uyushmalar, korporatsiyalar, konsernlar, birlashmalar, korxonalar va tashkilotlar:

oʻzlariga qarashli xoʻjaliklarni 1997/98 yil kuz-qish davrida ishlashga tayyorlashda yoʻl qoʻyilgan kamchiliklar va nuqsonlarni tanqidiy tahlil qilib chiqsinlar. Shaharlar va tumanlarni, korxonalar va tashkilotlarni, uy-joylarni, sogʻliqni saqlash, xalq taʼlimi, madaniy-maishiy, savdo va umumiy ovqatlanish muassasalarini, qishloq xoʻjaligi korxonalarini 1998/99 yil boʻlajak kuz-qish davrida barqaror ishlashga tayyorlash yuzasidan 20 kun muddatda chora-tadbirlar ishlab chiqsinlar va tasdiqlasinlar;

bugʻ qozonxonalarini, issiqlik, suv quvurlari, gaz tarmoqlarini mukammal tuzatishni, qattiq va suyuq yoqilgʻi, texnik tuzning zarur zaxiralarini yaratishni joriy yilning 1-oktabrigacha, uy-joylarni tuzatishni ishlab chiqilgan jadvallarga muvofiq tugallashni taʼminlovchi chora-tadbirlarni amalga oshirsinlar;

joriy yilning 1-oktabriga qadar gaz yoqilgʻisini aholi uchun boʻshatish maqsadida barcha korxonalar va tashkilotlarda ularning kuz-qish davrida yoqilgʻining zaxira turlari bilan uzluksiz ishlashini taʼminlash uchun suyuq va qattiq yoqilgʻining zarur zaxiralarini yaratsinlar;

kommunal-maishiy obyektlarni gazni hisobga olish asboblari bilan jihozlashni tugallash yuzasidan kechiktirib boʻlmaydigan chora-tadbirlar koʻrsinlar. Gazni hisobga olish asboblari boʻlmagan sanoat va kommunal-maishiy korxonalarga gaz yetkazib berish toʻxtatilsin;

Kommunal xizmat koʻrsatish vazirligi, Energetika va elektrlashtirish vazirligi, “Oʻzbeknefgaz” milliy korporatsiyasi va “Koʻmir” aksiyadorlik birlashmasi tomonidan yetkazib berilgan yoqilgʻi-energetika resurslari va koʻrsatilgan kommunal xizmatlar uchun korxona va tashkilotlar qarzlari toʻlanishini taʼminlash yuzasidan aniq chora-tadbirlar koʻrsinlar.

2. Koʻmir va suyuq yoqilgʻining zarur hajmlardagi zaxiralarini yaratish uchun “Koʻmir” aksiyadorlik birlashmasi, “Oʻzdavneftmahsulot” birlashmasi va “Oʻzbekiston temir yoʻllari” davlat-aksiyadorlik kompaniyasi ularni respublika korxonalari va tashkilotlariga joriy yilning 15-sentabrigacha belgilangan tartibda yetkazib berishni taʼminlasinlar.

3. Energetika va elektrlashtirish vazirligi, Kommunal xizmat koʻrsatish vazirligi, “Oʻzbekneftgaz” milliy korporatsiyasi, “Koʻmir” aksiyadorlik birlashmasi elektr stansiyalari va sanoat korxonalarini 1998/99 yil kuz-qish davrida yoqilgʻining zaxira turiga oʻtkazish jadvalini 1998-yil 1-oktabrga qadar ishlab chiqsinlar va tasdiqlash uchun Vazirlar Mahkamasiga kiritsinlar.

4. “Oʻzbekneftgaz” milliy korporatsiyasi, “Koʻmir” aksiyadorlik birlashmasi, Kommunal xizmat koʻrsatish vazirligi elektr stansiyalari va issiqlik markazlariga yoqilgʻi mazuti, koʻmir, tabiiy gaz Vazirlar Mahkamasi tomonidan 1998-yil 29-aprelda tasdiqlangan jadvalga muvofiq oʻz vaqtida yetkazib berilishini taʼminlasinlar.

5. “Oʻzbekneftgaz” milliy korporatsiyasi:

1998/99 yil kuz-qish davrida respublikaning barcha gaz taqsimlovchi stansiyalari boʻyicha belgilangan limitlar va koʻrsatkichlar doirasida gaz yetkazib berilishini taʼminlasin;

isitish mavsumi boshlangunga qadar Andijon viloyatidagi yerosti gaz omborxonasi birinchi navbatining ishga tushirish minimumini foydalanishga topshirsin;

joriy yilning 1-oktabrigacha Kalif-Termiz gaz quvurining eng koʻp eskirgan uchastkalarini tuzatib qoʻysin;

Toshkent shahridagi 5 - “Chilonzor” bugʻ qozonxonasiga gaz quvuri tarmogʻini ulashni va uni foydalanishga topshirishni taʼminlasin.

6. Qoraqalpogʻiston Respublikasi Vazirlar Kengashi, viloyatlar hokimliklari va “Oʻzgazuzatish” davlat birlashmasi Oʻzbekiston Respublikasi Vazirlar Mahkamasining 1998-yil 17-martdagi 117-son qaroriga muvofiq, 1998-yil qurilish dasturida nazarda tutilgan gaz taqsimlash quvurlari tarmoqlari va gaz taqsimlash stansiyalari qurilishini 1998-yil 1-noyabrga qadar tugallasin.

7. Surxondaryo viloyati hokimi (Noraliyev) tuzilgan shartnomalarga va oldindan haqi toʻlanganligiga muvofiq Oʻzbekiston Respublikasi Kommunal xizmat koʻrsatish vazirligi, Energetika va elektrlashtirish vazirligi va “Oʻzbekneftgaz” milliy korporatsiyasi korxonalariga texnik tuz oʻz vaqtida yetkazib berilishini taʼminlasin.

8. Oʻzbekiston Respublikasi Energetika va elektrlashtirish vazirligi:

kuz-qish davrini oʻtkazishda qatnashadigan elektr stansiyalari, issiqlik-elektr markazlari, elektr tarmoqlari obyektlarining asosiy texnologik asbob-uskunalarini mukammal, oʻrtacha va joriy tuzatishni 1998-yil 1-oktabrgacha tugallasin;

1998-yil 1-oktabrga 1150 ming tonna, 1998-yil 1-noyabrga 1200 ming tonna hajmida yoqilgʻi mazuti va 1998-yil 1-oktabrga 1120 ming tonna, 1998-yil 1-noyabrga 1200 ming tonna hajmida koʻmir jamgʻarilishini taʼminlasin.

9. “Oʻzbekiston temir yoʻllari” davlat-aksiyadorlik kompaniyasi (Ermetov) Oʻzbekiston Respublikasi Energetika va elektrlashtirish vazirligi va Kommunal xizmat koʻrsatish vazirligining elektr stansiyalari, issiqlik bilan taʼminlovchi tashkilotlari uchun tuz, neft mahsulotlari va koʻmirning uzluksiz tashilishini taʼminlasin.

10. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari:

isitish mavsumi boshlangunga qadar koʻp qavatli uy-joylarning barcha yertoʻlalarini quruq holga keltirsinlar;

issiqlikni saqlash maqsadida barcha issiqlik trassalarini issiqlik oʻtkazmaydigan materiallar bilan qoplasinlar;

kanalizatsiya va kollektor tarmoqlarini tozalasinlar;

maktabgacha binolar muassasalari, maktablar, kasalxonalar va poliklinikalarga issiqlik uzluksiz yetkazib berilishiga alohida eʼtibor bersinlar.

11. Respublika iqtisodiyoti tarmoqlarini 1998/99 yil kuz-qish davrida ishlashga tayyorlash masalalari boʻyicha komissiya tarkibi ilovaga muvofiq tasdiqlansin.

12. Ommaviy axborot vositalari iqtisodiyot tarmoqlarini boʻlajak kuz-qish davrida barqaror ishlashga tayyorlashning borishini muntazam ravishda yoritsinlar.

13. Oʻzbekiston Respublikasi Bosh vazirining oʻrinbosarlari mazkur qarorning bajarilishi ustidan nazorat oʻrnatsinlar, oʻzlari mutasaddi boʻlgan tarmoqlarni kuz-qish davrida ishlashga tayyorlashning borishini har oyda tahlil qilib chiqsinlar, zaruriyat boʻlganda tegishli chora-tadbirlar koʻrsinlar.

14. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari, Komissiya raisi I.H. Joʻrabekov, Qoraqalpogʻiston Respublikasi Vazirlar Kengashi Raisi, viloyatlar va Toshkent shahar hokimlari zimmasiga yuklansin.