Oʻzbekiston Respublikasi Prezidentining 2012-yil 25-dekabrdagi “Oʻzbekiston Respublikasining 2013-yilgi asosiy makroiqtisodiy koʻrsatkichlari prognozi va Davlat budjeti parametrlari toʻgʻrisida”gi PQ-1887-sonli qarori asosida Oʻzbekiston Respublikasi “Mahalliy Davlat hokimiyati toʻgʻrisida”gi Qonunining 24, 25-moddalariga binoan xalq deputatlari Oqoltin tuman Kengashi qaror qiladi:

1. Oqoltin tumani mahalliy budjetining 2013-yilga asosiy istiqbol koʻrsatkichlari 1 — 28-ilovalar* bilan tasdiqlansin.

2. Tuman hokimining oʻrinbosarlariga asosiy eʼtiborni, birinchi darajali xarajatlar — ish haqi, ijtimoiy nafaqalar va stipendiyalarni toʻliq moliyalashtirilishiga va oʻz vaqtida toʻlanishiga qaratib, ushbu masalalarga tuman Kengashi deputatlari, jamoatchilikni keng jalb etishini taʼminlasinlar. Buning uchun joylardagi rahbarlarning shaxsan javobgarligi belgilab qoʻyilsin.

3. Oqoltin tuman Davlat soliq inspeksiyasi (K. Umurzaqov)ga:

2013-yilgi tuman mahalliy budjetining daromadlar qismining prognoz koʻrsatkichlarini har bir soliq turi boʻyicha har chorakda barcha tashkilotlar kesimida soʻzsiz bajarilishini hamda budjet daromadlarini belgilangan muddatlarda tushishini taʼminlasin;

Soliq toʻlovchilarning budjetdan boqimanda qarzdorliklarini kamaytirish va soliqlarning yigʻuvchanligini oshirish, daromadlar rejasini ortigʻi bilan bajarish boʻyicha tegishli choralarni koʻrsin.

4. Oqoltin tuman moliya boʻlimi (Sh. Nurbayev)ga:

tuman mahalliy budjeti mablagʻlaridan samarali va maqsadli ishlatilishini taʼminlasin, birinchi darajali toʻlovlarni oʻz vaqtida toʻliq moliyalashtirsin hamda koʻzda tutilgan xarajatlarini toʻliq ijrosini taʼminlasin;

Tuman soliq inspeksiyasi va gʻaznachilik boʻlimi bilan birgalikda soliq budjet qonunchiligidagi oʻzgarishlar toʻgʻrisida muntazam ravishda tushuntirish ishlarini olib borsin, bu oʻzgarishlarni barcha soliq toʻlovchilar va budjetdan mablagʻ oluvchilarga yetkazsin.

5. Tuman Gʻaznachilik boʻlimi (F. Ashurmatov)ga:

budjetdan mablagʻ oluvchilarning budjet va budjetdan tashqari mablagʻlarini maqsadli va samarali ishlatilishi ustidan doimiy nazorat oʻrnatsin hamda Davlat xaridlari tizimida kichik biznes subyektlarining ulushini doimiy ravishda oshirib borilishi boʻyicha tegishli choralar koʻrsin.

6. Tuman iqtisodiyot boʻlimi (F. Abulqosimov)ga va kompleks rahbarlariga:

tumanda ishlab chiqarilayotgan tovarlar va koʻrsatilayotgan xizmatlarning ichki hamda tashqi bozorda raqobatbardoshligini taʼminlash maqsadida investitsiya va innovatsiya jarayonlarini ragʻbatlantirish orqali iqtisodiyotning yetakchi tarmoqlarida ishlab chiqarishni modernizatsiya qilish, texnik va texnologik jihatdan yangilashni jadallashtirishga yoʻnaltirilgan tarkibiy oʻzgartirishlar hamda iqtisodiyotni diversifikatsiya qilish dasturlarini amalga oshirishni davom ettirsin.

7. Oqoltin tuman moliya boʻlimi (Sh. Nurbayev), tuman hududiy gʻaznachilik boʻlimi (F. Ashurmatov) budjet mablagʻlarining maqsadli va samarali foydalanilishi ustidan nazoratni kuchaytirsin.

8. Ushbu qaror ijrosini nazorat qilish mahalliy budjetni shakllantirish va ijro etish, iqtisodiy islohotlarni amalga oshirish va tadbirkorlikni rivojlantirish masalalari boʻyicha doimiy komissiyasi raisi zimmasiga yuklatilsin.

7. Ushbu qaror qabul qilingan kundan kuchga kiradi.