Oʻzbekiston Respublikasining “Fuqarolarning sogʻligʻini saqlash toʻgʻrisida” hamda “Dori vositalari va farmatsevtika faoliyati toʻgʻrisida”gi qonunlariga muvofiq, shuningdek ayrim toifadagi shaxslarni imtiyozli asosda dori vositalari bilan taʼminlash tartibini yanada takomillashtirish maqsadida Vazirlar Mahkamasi qaror qiladi:

1. Quyidagilar tasdiqlansin va 2013-yil 1-sentabrdan boshlab amalga kiritilsin:

Ambulatoriyada davolanishda dori vositalari bilan imtiyozli taʼminlanish huquqiga ega boʻlgan shaxslar toifalari roʻyxati 1-ilovaga muvofiq;

Ambulatoriyada davolanishda shaxslarning ayrim toifalarini dori vositalari bilan imtiyozli taʼminlash tartibi toʻgʻrisidagi nizom 2-ilovaga muvofiq.

2. Oʻzbekiston Respublikasi Sogʻliqni saqlash vazirligi:

ushbu qaror bilan tasdiqlangan Roʻyxat va Nizomning davlat sogʻliqni saqlash tizimi tibbiyot muassasalariga va dorixona muassasalariga yetkazilishini;

bir oy muddatda Moliya vazirligi bilan birgalikda ambulatoriyada davolanishda imtiyozli taʼminlash uchun moʻljallangan dori vositalarining roʻyxati tasdiqlanishini, shuningdek idoraviy normativ-huquqiy hujjatlarning ushbu qarorga muvofiqlashtirilishini;

davlat sogʻliqni saqlash tizimi tibbiyot muassasalari va dorixona muassasalari tomonidan ushbu qaror talablariga rioya etilishi ustidan nazoratni taʼminlasin.

3. Vazirlar Mahkamasining “Respublikada dori-darmonlar va tibbiy buyumlar bilan taʼminlashni va ularni taqsimlashni yaxshilashga doir kechiktirib boʻlmaydigan chora-tadbirlar toʻgʻrisida” 1994-yil 6-avgustdagi 404-son qaroriga 3-ilovaga muvofiq oʻzgartirishlar kiritilsin.

Oʻzbekiston Respublikasi Hukumatining 4-ilovaga muvofiq ayrim qarorlari oʻz kuchini yoʻqotgan deb hisoblansin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.I.Ikramov zimmasiga yuklansin.

1. Onkologik kasalliklarga chalinganlar.

2. Sil kasalligiga chalinganlar.

3. Moxov kasalligiga chalinganlar.

4. Endokrinologik kasalliklarga (qandli va qandsiz diabetga) chalinganlar.

5. Ruhiy kasalliklarga chalinganlar.

6. OIV kasalligini yuqtirganlar.

7. Yurak klapanini protezlash va organlarni koʻchirish yuzasidan operatsiya qilingan shaxslar.

8. Oʻzgalar parvarishiga muhtoj yolgʻiz pensionerlar.

9. 1941—1945-yillardagi urush nogironlari va qatnashchilari, shuningdek ularga tenglashtirilgan shaxslar.

10. 1941—1945-yillardagi urush mehnat fronti qatnashchilari.

11. Chernobil AESidagi halokat oqibatlarini tugatishda qatnashgan — nogiron shaxslar.

12. Baynalmilalchi jangchilar.

13. Harbiy xizmatni yadro poligonlarida va boshqa radiatsiya-yadro obyektlarida oʻtagan pensiya yoshidagi shaxslar.

1. Ushbu Nizom “Fuqarolarning sogʻligʻini saqlash toʻgʻrisida” hamda “Dori vositalari va farmatsevtika faoliyati toʻgʻrisida”gi Oʻzbekiston Respublikasi qonunlariga muvofiq sogʻliqni saqlash davlat tizimining ambulatoriya-poliklinika muassasalarida ambulatoriyada davolanishda shaxslarning ayrim toifalarini dori vositalari bilan imtiyozli taʼminlash tartibini belgilaydi.

2. Oʻzbekiston Respublikasi Vazirlar Mahkamasi tomonidan tasdiqlanadigan roʻyxatga muvofiq shaxslar ambulatoriyada davolanishda dori vositalari bilan imtiyozli taʼminlanish huquqiga ega boʻladilar.

3. Ambulatoriyada davolanishda shaxslarning ayrim toifalarini (keyingi oʻrinlarda bemorlar deb ataladi) dori vositalari bilan imtiyozli taʼminlash dori vositalarini ambulatoriya-poliklinika muassasalari orqali yoxud dorixona muassasalari orqali berish yoʻli bilan amalga oshiriladi.

4. Bemorlarga dori vositalarini imtiyozli berish bemorlar ambulatoriya tartibida davolanadigan ambulatoriya-poliklinika muassasasida davolovchi vrachlarning tayinlashi boʻyicha bepul beriladi.

5. Bemorlarga dori vositalarini imtiyozli berish dorixona muassasalari tomonidan bemor ambulatoriya tartibida davolanadigan ambulatoriya-poliklinika muassasasida davolovchi vrach tomonidan yozilgan imtiyozli berish retsepti (keyingi oʻrinlarda retsept deb ataladi) asosida bepul beriladi.

6. Ambulatoriyada davolanishda imtiyozli taʼminlash uchun moʻljallangan dori vositalari roʻyxati Oʻzbekiston Respublikasi Sogʻliqni saqlash vazirligi tomonidan Moliya vazirligi bilan birgalikda belgilanadi.

7. Tibbiy xizmat koʻrsatish uchun ambulatoriya-poliklinika muassasalariga biriktirilgan bemorlarga imtiyozli berish uchun moʻljallangan dori vositalari ushbu muassasa rahbarining buyrugʻi bilan belgilangan masʼul shaxs tomonidan beriladi.

8. Dori vositalarini imtiyozli berish davolovchi vrachlarning tayinlashiga muvofiq dori vositalarini hisobga olish uchun belgilangan shakl boʻyicha talablar asosida amalga oshiriladi.

9. Talabnoma ambulatoriyada davolanishda dori vositalari bilan imtiyozli taʼminlanish huquqini tasdiqlaydigan hujjat (hujjatlar) asosida yoziladi.

Talabnoma dori vositasining savdo nomi, oʻram turi, qadoqlash va shu kabilar koʻrsatilgan holda ikki nusxada yoziladi. Talabnoma ambulatoriya-poliklinika muassasasining rahbari yoki uning oʻrinbosari tomonidan imzolanishi va dumaloq muhr bilan tasdiqlanishi kerak. Talabnomaning birinchi nusxasi (dori vositalari olinganligi toʻgʻrisida masʼul shaxsning tilxati bilan birgalikda) ambulatoriya-poliklinika muassasasi dorixonasida qoladi, ikkinchi nusxasi esa – masʼul shaxs dori vositalarini olganidan keyin unga qaytariladi.

10. Masʼul shaxs dori vositalari olinganidan keyin ularni maxsus jurnalda tilxat ostida bemorga beradi. Voyaga yetmagan bemorlarga moʻljallangan dori vositalari ularning ota-onalariga yoki ularning oʻrnini bosuvchi shaxslarga beriladi. Ayrim hollarda voyaga yetgan bemorning holatiga qarab dori vositalari uning qarindoshlariga berilishi mumkin.

11. Talab etiladigan dori vositasi ambulatoriya poliklinika-muassasasida mavjud boʻlmagan taqdirda davolovchi vrachlar ularni dorixona muassasalaridan imtiyozli berish uchun retseptlar yozadilar.

12. Dorixona muassasalaridan dori vositalarini imtiyozli ajratish Oʻzbekiston Respublikasi Sogʻliqni saqlash vazirligi tomonidan tasdiqlanadigan shakl boʻyicha blankalarda davolovchi vrachlar tomonidan yozilgan retseptlar boʻyicha amalga oshiriladi.

13. Retseptni olish uchun bemorlar (ota-onalar yoki ularning oʻrnini bosuvchi shaxslar, qarindoshlar) ambulatoriyada davolanishda dori vositalari bilan imtiyozli taʼminlanish huquqini tasdiqlaydigan hujjatni (hujjatlarni) koʻrsatgan holda bemorlar hisobda turadigan joydagi yoki tibbiy xizmat koʻrsatish uchun biriktirilgan joydagi ambulatoriya-poliklinika muassasasiga murojaat qiladilar.

14. Retseptda dori vositalari davolashning bir kursidan ortiq boʻlmagan miqdorda tibbiy koʻrsatkichlar boʻyicha yoziladi. Retsept berilgan kundan boshlab bir oy mobaynida haqiqiydir.

15. Quyidagi dori vositalariga retseptlar yozish ushbu muassasaning mutaxassis vrachi yoki tegishli ixtisoslashtirilgan davolash-profilaktika muassasalari vrachlarining tavsiyalari asosida yashash joyidagi ambulatoriya-poliklinika muassasasining davolovchi vrachi (umumiy amaliyot vrachi) tomonidan amalga oshiriladi:

oʻsmaga qarshi va giyohvandlik vositalari (onkologik, gematologik bemorlarga) — onkolog va (yoki) gematologning tavsiyasi asosida;

qandli diabet va qandsiz diabetga duchor boʻlgan bemorlarni davolash vositalari — endokrinologning tavsiyasi asosida;

psixotrop vositalar (ruhiy kasalliklarga chalingan bemorlarga) — psixiatrning tavsiyasi asosida;

infeksiyaga qarshi preparatlar (OIVni yuqtirgan bemorlarga) — ambulatoriya-poliklinika muassasasi huzuridagi yuqumli kasalliklar xonasining infeksionist vrachining tavsiyasi asosida;

silga qarshi vositalar (silga chalingan bemorlarga) — ftiziatrning tavsiyasi asosida.

16. Retseptura blankalarini toʻldirish, dorixona muassasalari tomonidan retseptlarni rasmiylashtirish, retseptura blankalarini va dori vositalarini bepul berish uchun yozilgan retseptlarni hisobga olish, saqlash va yoʻq qilish Oʻzbekiston Respublikasi Sogʻliqni saqlash vazirligi tomonidan belgilangan tartibda amalga oshiriladi.

17. Dorixona muassasalaridan beriladigan dori vositalarining miqdori va dozasi (oʻlchami) retseptda koʻrsatilgan miqdor va dozaga muvofiq boʻlishi kerak.

18. Dori vositasini berishda retseptning yirtib olinadigan koreshoklariga berilgan dori vositasining nomi, miqdori, seriyali raqami, farmatsevtning familiyasi, ismi, otasining ismi yoziladi, uning imzosi qoʻyiladi. Dorixona muassasasining shtampi bosiladi. Bemor orqa tomondagi birinchi yirtib olinadigan koreshokka imzo chekadi, u keyinchalik uni haq toʻlash uchun ambulatoriya-poliklinika muassasasiga taqdim etish uchun dorixona muassasasida saqlanadi. Ikkinchi koreshok bemorga (ota-onalarga yoki ularning oʻrnini bosuvchi shaxslarga, qarindoshlarga) beriladi.

19. Dorixona muassasalarida umumiy qabul qilingan xalqaro-patentlanmagan nom hisobga olingan holda savdo nomi boʻyicha tayinlangan dori vositasi mavjud boʻlmagan taqdirda, yangidan yozilgan retsept asosida faqat ambulatoriya-poliklinika muassasasining rahbari (uning oʻrinbosari) bilan kelishgan holda boshqa savdo nomi bilan dori vositasiga sinonimik almashtirilishi mumkin.

Bunda retseptning orqa tomoniga ushbu dori vositasining mavjud emasligi toʻgʻrisida belgi (farmatsevt xodimning familiyasi, ismi, otasining ismi va imzosi, sana, dorixona muassasasining nomi va shtamp) qoʻyilgan holda keyinchalik uni ambulatoriya-poliklinika muassasasiga taqdim etish uchun bemorga beriladi.

20. Dori vositasining zarur miqdori mavjud boʻlmagan hollarda bemorga retseptlarning yirtib olinadigan koreshoklarining tegishli ustunlarida koʻrsatilgan holda mavjud dori vositasi miqdori beriladi.

21. Retsept notoʻgʻri rasmiylashtirilgan taqdirda unga dorixona muassasasining farmatsevt xodimlari tomonidan “Retsept haqiqiy emas” degan shtamp bosiladi, keyinchalik u ambulatoriya-poliklinika muassasasiga taqdim etish uchun bemorga (ota-onalarga yoki ularning oʻrnini bosuvchi shaxslarga, qarindoshlarga) qaytariladi.

22. Sogʻliqni saqlash hududiy boshqaruv organi yoki ambulatoriya-poliklinika muassasasi tasdiqlangan xarajatlar smetasiga muvofiq oldindan tanlov, tender yoki elektron savdolar oʻtkazmasdan, shuningdek maxsus axborot portallarida eʼlon bermasdan yozilgan retseptlar asosida bemorlarga berilgan dori vositalari qiymatini toʻlash uchun dorixona muassasalari bilan toʻgʻridan-toʻgʻri shartnomalar tuzadi.

Shartnomalar (bitimlar) belgilangan tartibda Gʻaznachilikning hududiy boʻlinmalarida roʻyxatdan oʻtkaziladi.

23. Sogʻliqni saqlash hududiy boshqaruv organi yoki ambulatoriya-poliklinika muassasasi shartnoma summasidan va budjetning tasdiqlangan smetasidan kelib chiqib oylik summaning 15 foizi miqdorida har oyda oldindan haq toʻlaydi.

24. Har oyda keyingi oyning 10-kunigacha dorixona muassasalari tomonidan imtiyozli retseptlar boʻyicha berilgan dori vositalari reyestrlari tuziladi, ular schyot-faktura va birinchi yirtib olinadigan koreshoklar bilan birgalikda sogʻliqni saqlash hududiy boshqaruv organiga yoki ambulatoriya-poliklinika muassasasiga taqdim etiladi. Reyestrlar ushbu Nizomga ilovaga muvofiq shakl boʻyicha har bir ambulatoriya-poliklinika muassasasi boʻyicha uch nusxada tuziladi.

25. Reyestrning ikki nusxasi haq toʻlash uchun taqdim etiladi. Reyestrning uchinchi nusxasi schyot-faktura, reyestrning ikki nusxasi va retseptlarning birinchi yirtib olinadigan koreshoklari olinganligi toʻgʻrisida sogʻliqni saqlash hududiy boshqaruv organi yoki ambulatoriya-poliklinika muassasasining masʼul shaxsi tomonidan imzolanadi.

26. Sogʻliqni saqlash hududiy boshqaruv organi yoki ambulatoriya-poliklinika muassasasi va dorixona muassasasi oʻrtasidagi keyingi hisob-kitoblar yirtib olinadigan koreshoklar va yozilgan schyot-fakturalar ilova qilingan holda hisobot oyi tamom boʻlgandan keyin navbatdagi kalendar oyning 15-kunigacha taqdim etilgan reyestrga muvofiq amalga oshiriladi.

Bunda schyot-fakturalar, toʻlov topshiriqlari bilan birgalikda reyestrlar Gʻaznachilikning hududiy boʻlinmalariga taqdim etiladi.

27. Sogʻliqni saqlash hududiy boshqaruv organlariga yoki ambulatoriya-poliklinika muassasalariga retseptning yirtib olinadigan koreshoklari, schyot-fakturalar va toʻldirilgan reyestr mavjud boʻlgan taqdirda berilgan dori vositalari boʻyicha toʻliq summani dorixona muassasalariga bir marta toʻlashga ruxsat beriladi.

28. Shaxslarning ayrim toifalariga dori vositalarini imtiyozli berish boʻyicha xarajatlarni moliyalashtirish tegishli budjetlar mablagʻlari hisobiga amalga oshiriladi.

29. Dori vositalarini bemorlarga imtiyozli berish uchun ambulatoriya-poliklinika muassasasi:

ularni muassasaning xarajatlar smetasida ushbu maqsadlarda nazarda tutilgan rejali ajratiladigan mablagʻlar hisobiga xarid qiladi;

ularni budjetdan tashqari mablagʻlar hisobiga xarid qiladi;

ularni taqsimot boʻyicha sogʻliqni saqlashning yuqori organlaridan bepul oladi;

ularni qonun hujjatlarida taqiqlanmagan boshqa manbalardan oladi.

30. Ambulatoriyada davolanishda shaxslarning ayrim toifalarini taʼminlash uchun dori vositalariga haq toʻlash xarajatlari maqsadli xususiyatga egadir va boshqa maqsadlarda foydalanilmasligi kerak.

31. Shaxslarning ayrim toifalariga dori vositalari asossiz tayinlanganligi uchun davolovchi vrach javob beradi.

32. Bemorlarga dori vositalarini berishni tashkil etish uchun javobgarlik ushbu Nizom talablariga muvofiq ambulatoriya-poliklinika muassasasi rahbariga yuklanadi.

33. Ushbu Nizomning bajarilishini nazorat qilish Oʻzbekiston Respublikasi Sogʻliqni saqlash vazirligi va Moliya vazirligi tomonidan amalga oshiriladi.

34. Ushbu Nizom talablari buzilishida aybdor boʻlgan shaxslar qonun hujjatlarida belgilangan tartibda javob beradilar.

Vazirlar Mahkamasining “Respublikada dori-darmonlar va tibbiy buyumlar bilan taʼminlashni va ularni taqsimlashni yaxshilashga doir kechiktirib boʻlmaydigan chora-tadbirlar toʻgʻrisida” 1994-yil 6-avgustdagi 404-son qarori bilan tasdiqlangan Respublika dorixona muassasalarida dori-darmonlar va tibbiy buyumlar sotish qoidalarida:

1. 10-band quyidagi tahrirda bayon qilinsin:

“10. Ayrim toifadagi shaxslarga dorixona muassasalaridan dori vositalarini imtiyozli berish qonun hujjatlarida belgilangan tartibda amalga oshiriladi”.

2. 19-bandda:

birinchi xatboshidagi “imtiyozli shartlarda yoki bepul berilgan dorilar uchun retseptlar” soʻzlari “shaxslarning ayrim toifalariga dori vositalarini imtiyozli berish uchun retseptlar” soʻzlari bilan almashtirilsin;

ikkinchi xatboshidagi “Imtiyozli shartlarda yoki bepul berilgan dori-darmonlarning retseptlari” soʻzlari “Shaxslarning ayrim toifalariga dori vositalarini imtiyozli berish uchun retseptlar” soʻzlari bilan almashtirilsin.

3. 20-band chiqarib tashlansin.

4. 21 va 22-bandlar tegishli ravishda 20 va 21-bandlar deb hisoblansin.

3. Vazirlar Mahkamasining “Dori-darmon vositalari va tibbiyot buyumlari sotishni tartibga solish toʻgʻrisida” 1999-yil 14-yanvardagi 19-son qarorining 6-bandi (Oʻzbekiston Respublikasi QT, 1999-y.. 1-son, 4-modda).

5. Vazirlar Mahkamasining “Yadro poligonlarida va boshqa radiatsiya-yadro obyektlarida harbiy xizmatni oʻtagan pensiya yoshidagi shaxslarni ijtimoiy qoʻllab-quvvatlashni taʼminlash chora-tadbirlari toʻgʻrisida” 2002-yil 31-maydagi 188-son qaroriga 2-ilovaning 1-bandi (Oʻzbekiston Respublikasi QT, 2002-y.. 5-son, 27-modda).