Oʻzbekiston Respublikasi Vazirlar Mahkamasining 2012-yil 2-iyuldagi 01-02/2-171-sonli selektor bayoni ijrosini taʼminlash, xususan viloyatda 2013-yilda aholi bandligini taʼminlash va ish oʻrinlari yaratishni taʼminlash maqsadida hamda “Aholini ish bilan taʼminlash toʻgʻrisida”gi Oʻzbekiston Respublikasi Qonunining 15-moddasi va “Mahalliy davlat hokimiyati toʻgʻrisida”gi Oʻzbekiston Respublikasi Qonunining 6-moddasiga asosan Xalq deputatlari viloyat Kengashi qaror qiladi:

1. 2013-yil davomida viloyatda yaratilgan yangi ish oʻrinlarining parametrlari 1-ilovaga, Qarshi shahar va tumanlarda yangi ish oʻrinlarini tashkil etish parametrlari 2-ilovaga*, xotin-qizlar uchun yaratiladigan yangi ish oʻrinlari parametrlari 3-ilovaga hamda viloyat Ishchi komissiyasi 4-ilovaga muvofiq tasdiqlansin.

2. Tuman (shahar) hokimliklari 2013-yilda yangi ish joylari yaratish hududiy dasturlari parametrlari Oʻzbekiston Respublikasi Prezidentining 2008-yil 28-noyabrdagi PF-4058-sonli Farmoni bilan tasdiqlangan moliyaviy inqirozga qarshi kurash choralari doirasida shakllantirilganligi maʼqullansin.

Ishchi komissiyasining hududlardagi biriktirilgan aʼzolari:

har oyda biriktirilgan hududga chiqqan holda 2013-yilda yangi ish oʻrinlar yaratish va aholi bandligini taʼminlash dasturi ijrosini tanqidiy oʻrganib, hokimliklar va mutasaddi tashkilotlar ishtirokida muhokama etib borsinlar.

hududiy dasturlarni amalga oshirishda yoʻl qoʻyilayotgan qoloqlik va muammolarni aniqlab, ularni bartaraf qilish yuzasidan tegishli choralarni koʻrsinlar;

belgilangan vazifalarni talab darajasida bajarmagan tarmoqlar, hokimliklar, masʼul davlat organlari, tijorat banklari va korxonalar rahbarlarining masʼuliyatini koʻrib chiqish yuzasidan viloyat Ishchi komissiyasiga takliflar kiritib borsinlar;

hududiy dasturlarga kiritilgan obyektlarning oʻz vaqtida ishga tushirilishi, dastur parametrlarining toʻliq va sifatli bajarilishi ustidan qatʼiy nazorat oʻrnatsinlar.

3. Viloyat Iqtisodiyot boshqarmasi (A. Umirov)ga:

ushbu parametrlar boʻyicha hokimliklar bilan kelishgan holda 2013-yilda har bir hudud (Qarshi shahri va tumanlarda) yaratiladigan yangi ish oʻrinlari parametrlarini yana bir marotaba tahlil qilib, viloyat hokimligiga taqdim etsin.

2013-yilda yangi ish joylari yaratish va aholi bandligin taʼminlash dasturining ijrosi monitoringini yuritishda investitsiya, lokalizatsiya, tarmoqlar, hududlarni, ishlab chiqarish va ijtimoiy infratuzilmani rivojlantirish va boshqa maqsadli dasturlar ijrosiga alohida eʼtibor qaratsin.

4. Viloyat Monopoliyadan chiqarish va raqobatni rivojlantirish hududiy boshqarmasi (A. Rustamov):

Davlat mulki boshqarmasi va tuman (shahar) hokimliklari bilan birgalikda moliyaviy sogʻlomlashtirish choralari qoʻllanilgan sharoitda ish joylarini tiklash, ulardagi boʻsh ish joylari va ishlab chiqarish quvvatlaridan foydalanish darajasini oshirish imkoniyati boʻlgan iqtisodiy nochor korxonalar hisobiga yaratiladigan yangi ish oʻrinlarining hisobini yuritsin va nazoratga olsin.

5. Markaziy bank (T. Karimov):

viloyat tijorat banklari birgalikda yangi ish oʻrinlari yaratishga yoʻnaltirilgan kredit resurslari hajmlarini hududlar (shahar va tumanlar), tijorat banklari va maqsadli yoʻnalishlar kesimida ajratishning reja jadvalini tasdiqlab, joylariga yetkazilishini taʼminlash;

tasdiqlangan reja-grafigiga muvofiq tijorat banklari tomonidan 2013-yilda yangi ish joylari yaratish uchun kreditlarning belgilangan muddatlarda ajratilishini qatʼiy nazoratga olish, mablagʻlar ajratilishini joylarga chiqqan holda hokimliklar, tijorat banklari va tadbirkorlar ishtirokida muhokama etib, zarur choralarni koʻrish tavsiya etilsin.

shahar va tuman hokimliklari bilan birgalikda qishloq joylarida xizmat koʻrsatish va servis obyektlarini ishga tushirish uchun imtiyozli kreditlar ajratish reja-jadvalini ishlab chiqish va amalga oshirish tavsiya etilsin.

6. Viloyat Monopoliyadan chiqarish va raqobatni rivojlantirish hududiy boshqarmasi (A. Rustamov), Adliya boshqarmasi (Sh. Qoʻchqorov), Mikrokreditbank (K. Eshboyev) va Savdo sanoat palatasi viloyat boshqarmasi (F. Toshatov):

xususiy tadbirkorlik, kichik biznes va xizmatlar sohasini rivojlantirish, ularga qulay shart-sharoitlar yaratib berish hamda sohada yangi ish oʻrinlari yaratishga asosiy masʼul etib belgilangan holda, kichik biznes subyektlarining tashkil etilishi va faoliyat koʻrsatishi uchun zarur shart-sharoitlar yaratilishini joylarga chiqib oʻrganib, mavjud muammolarni hal etish boʻyicha zaruriy choralarni koʻrishi tavsiya etilsin.

7. Viloyat Monopoliyadan chiqarish va raqobatni rivojlantirish hududiy boshqarmasi (A. Rustamov), Markaziy bank (T. Karimov), viloyat tijorat banklari va hokimliklari bilan birgalikda:

iqtisodiy nochor va ishlamasdan turgan korxonalar faoliyatini qayta tiklash va ularda yangi ish oʻrinlari yaratish chora-tadbirlariga asosiy masʼul etib belgilanib, iqtisodiy nochor va ishlamasdan turgan korxonalar faoliyatini qayta tiklash va ularda yangi ish oʻrinlari yaratishning prognoz parametrlari ijrosining taʼminlanishini qatʼiy nazoratga olishi tavsiya etilsin.

8. Moliya boshqarmasi (B. Maxmadaliyev) sugʻurta idoralari bilan birgalikda yirik sugʻurta idoralarining har bir shahar va tumanlardagi filiallari (vakolatxonalari) tarmogʻini kengaytirishning qoʻshimcha chora-tadbirlarini ishlab chiqsin va har bir shahar va tumanlar kesimida 2013-yilda yangidan tashkil etiladigan obyektlarning manzilli roʻyxatlarini tasdiqlasin.

9. Viloyat davlat Soliq boshqarmasi (S. Eshmatov):

norasmiy tarzda tadbirkorlik faoliyati bilan shugʻullanayotgan fuqarolarni aniqlab, ularni rasmiylashtirsin va yangidan tashkil etish ishtiyoqida boʻlgan fuqarolar har tomonlama qoʻllab-quvvatlansin;

taʼlim muassasalari bitiruvchilari uchun yangi ish oʻrinlar Oʻzbekiston Respublikasi Prezidentining 2010-yil 28-iyuldagi “Taʼlim muassasalari bitiruvchilarini tadbirkorlik faoliyatiga jalb etish borasidagi qoʻshimcha chora-tadbirlar toʻgʻrisida”gi PF-4232-sonli Farmonining 1-bandida mikrofirmalar va kichik korxonalar tomonidan respublikaning kasb-hunar kollejlari, akademik litseylari va oliy taʼlim muassasalari bitiruvchilari bilan mehnat shartnomalari tuzilganda, band boʻlgan xodimlarning oʻrtacha yillik soni qonun hujjatlarida belgilangan cheklangan normativdan koʻpi bilan 20 foiz oshirilgan hollarda, mikrofirmalar va kichik korxonalar uchun nazarda tutilgan imtiyozlar, kafolatlar va huquqlar ularda saqlanib qolishligini inobatga olgan holda amalga oshirsin.

10. Mehnat va aholini ijtimoiy muhofaza qilish bosh boshqarmasi (M. Nurimov) Iqtisodiyot boshqarmasi (A. Umirov) bilan birgalikda 2013-yilda yangi ish oʻrinlari yaratish va aholi bandligini taʼminlash dasturi ijrosining har oylik tizimli monitoringini hududlar va tarmoqlar kesimida amalga oshirsin, dastur ijrosi haqida umumlashgan maʼlumotlarni viloyat hokimligiga har oy (hisobot oyi uni keyingi oyning 10-sanasiga) kiritib borsin, dastur ijrosini taʼminlash yuzasidan hududlar, tarmoq va korxonalar boʻyicha aniq takliflar kiritib borilsin.

11. Davlat statistika boshqarmasi (Y. Qorayev) Mehnat va aholini ijtimoiy muhofaza qilish boshqarmasi (M. Nurimov) bilan birgalikda barcha chora-tadbirlar hisobiga yaratayotgan yangi ish joylarining hisobining yuritilishini taʼminlasin, unga koʻra ish oʻrinlarining hisobi:

Oʻzbekiston Respublikasi Mehnat va aholini ijtimoiy muhofaza qilish vazirligi va Oʻzbekiston Respublikasi Davlat Statistika qoʻmitasi tomonidan 2011-yil 7-iyunda tasdiqlangan 31-QT/5-sonli “Yangidan tashkil qilingan ish oʻrinlari boʻyicha tezkor va davlat statistika hisobotlarining oʻzaro muvofiqligini taʼminlash va maʼlumotlarning haqqoniyligini tanlov asosida oʻrnatish yuzasidan hamkorlik qilish tartibi”ga koʻra amalga oshirilsin.

12. Qarshi shahri va tumanlar hokimliklari:

2013-yilda yangi ish joylari yaratish va aholi bandligini taʼminlash dasturi ijrosi haqida maʼlumotlarni har oyda (hisobot oyi uchun keyingi oyning 5-sanasiga) Mehnat va aholini ijtimoiy muhofaza qilish bosh boshqarmasiga taqdim etib borishlari shartligi belgilab qoʻyilsin;

2013-yilda yangi ish oʻrinlari yaratish va aholi bandligini taʼminlash dasturining tasdiqlangan asosiy parametrlarini 2013-yilda yangi tashkil etiladigan va kengaytiriladigan obyektlar (korxonalar, tashkilotlar, muassasalar, tadbirkorlik subyektlari, fermer va dehqon hoʻjaliklari va h.k.) kesimida muddatlar, moliyaviy manbalar, masʼullar boʻyicha aniqlashtirilgan holda tasdiqlansin;

har oyda xalq deputatlari mahalliy Kengashlari deputatlari bilan birgalikda 2013-yilda yangi ish oʻrinlari yaratish va aholi bandligini taʼminlash hududiy dasturining parametrlari bajarilishi, manzilli roʻyxatlarga kiritilgan obyektlarning ishga tushirilishi va belgilangan ish joylarining yaratilishini muhokama etib borsin;

har bir tuman, shaharda va hokimliklar boshchiligidagi tarkibiga manfaatdor tashkilotlar rahbarlari kiritilgan ishchi guruhlari tashkil etilsin, ular zimmasiga yangi ish joylari yaratish va aholi bandligini taʼminlash choralarini koʻrish, manzilli dasturga kiritilgan korxonalarning tashkil etilishi va faoliyat yuritishini har tomonlama qoʻllab-quvvatlash, jumladan roʻyxatdan oʻtkazish, moddiy-texnika resurslaridan va muhandislik kommunikatsiyalaridan foydalanish, dastlabki sarmoyani shakllantirish va kreditlar olish, soliqqa tortish, mahsulotni sotish kabi muammolarni aniqlash va joyida hal etish choralarini koʻrish vazifalari yuklatilsin.

13. Mazkur qarorning ijrosini nazorat qilish Xalq deputatlari viloyat kengashining doimiy komissiyalari raislari zimmasiga yuklatilsin.