Oʻzbekiston Respublikasi Hukumati va Isroil Davlati Hukumati, (bundan keyin “Tomonlar” deb ataluvchilar),

ikkala davlat va xalqlar oʻrtasida har tomonlama munosabatlarni rivojlantirish istagiga amal qilib,

madaniyat, fan, taʼlim va sport sohalaridagi qizgʻin hamkorlikka hissa qoʻshishga va shu tariqa ularning bir-birlarini anglashlariga intilib,

xalqlar orasida tinchlik va doʻstlikni mustahkamlashga xizmat qilishga yoʻnaltirilgan intilishni davom ettirish zaruratini eʼtirof etib,

Oʻzbekiston va Isroil xalqlari orasida bir-birlarining madaniy qadriyatlari bilan tanishishga boʻlgan oʻzaro qiziqishni hisobga olib,

ikkala mamlakat oʻrtasida madaniyat, taʼlim va fan sohalarida hamkorlik toʻgʻrisida Quddus shahrida 1997-yil 7-aprelda imzolangan Bitimga asoslanib,

quyidagilar toʻgʻrisida ahdlashib oldilar:

Tomonlar Oʻzbekiston Respublikasida va Isroil Davlatida Oʻzbek va Isroil madaniy markazlari (bundan keyin “Markaz” deb ataladi)ni taʼsis qilish hamda eʼtirof etishga rozi.

Tomonlar Oʻzbekiston va Isroil shaharlarida Markazlarning boʻlimlari va/yoki shuʼbalarini ochishlari va boshqarishlari mumkin.

Ushbu Protokol maqsadlari uchun “Markaz” atamasi Oʻzbek Markazi va Isroil Markazi hamda ularning boʻlimlari va/yoki shuʼbalarini anglatadi.

Tomonlardan har biri Markazlarni joylashtirish oʻrnini aniqlash va bino qurish uchun ikkinchi Tomonga koʻmaklashadi va u bilan hamkorlik qiladi.

Markazlarning maqsadi Oʻzbekiston bilan Isroil orasida madaniyat, fan, taʼlim, sport, texnologiya, robita (jumladan audio-vizual robitalar) sohasida aloqalarni, oliy taʼlim muassasalari orasidagi hamkorlikni rivojlantirish, shuningdek ikkala davlatning mazkur sohalardagi qadriyatlari va erishgan yutuqlari bilan jamoatchilikni tanishtirishdan iborat.

Oʻzbek Markazi Oʻzbekiston Respublikasining Isroil Davlatidagi Elchixonasi himoyati va rahbarligida boʻladi. Isroil markazi Isroil Davlatining Oʻzbekistondagi Elchixonasi himoyati va rahbarligida boʻladi.

Markazlar, yuboruvchi davlatlarning milliy instituti oʻlaroq, ushbu Protokol asosida qabul qiluvchi davlatda yuridik muassasa maqomini oladilar.

Markazlar oʻz boʻlimlari va shuʼbalari bilan birgalikda ushbu Protokolda darj etilgan vazifalarini legal ravishda bajarishga vakil etilgan.

Markazlar qabul qiluvchi davlatda vazirliklar, boshqa muassasalar, mahalliy hokimiyatlar, jamoat tashkilotlari, kompaniyalar va alohida shaxslar bilan oʻz faoliyati doirasida toʻgʻridan toʻgʻri aloqa oʻrnatishi mumkin.

Har qaysi Tomon Markazlar faoliyatining lozim darajada amalga oshirilishi uchun kerakli shart-sharoitlarni muhayyo etishga harakat qiladi, zarur boʻlgan hollarda Markazlar xodimlari va turar joy binolari hamda unga tegishli hududning xavfsizligi va beshikastligini taʼminlash choralarini koʻradi.

Shu bilan birga, Markazlar faoliyati doirasiga quyidagilar kiradi:

ikkala davlatda madaniy, taʼlimga oid, yoshlar uchun, sport tadbirlarini, ilmiy va texnologik faoliyatni tashkil qilish;

tomoshalar, konsert va koʻrgazmalar tashkil qilish;

filmlar va boshqa audio-vizual materiallar taqdimini oʻtkazish;

olimlar, lektorlar, rassomlar, yoshlar va sportchilar bilan uchrashuvlar oʻtkazish, ularni almashlash;

ikkala davlatning madaniy hayoti, ilmiy hamda texnologik yutuqlari toʻgʻrisidagi maʼlumotlarni tarqatish;

kutubxonalar ochish va ularni kitoblar, gazetalar, jurnallar, filmlar, disketlar, kassetalar, slaydlar bilan hamda yozma, audiovizual va elektron tarzdagi boshqa materiallar bilan taʼminlash;

yangiliklar dasturi, kataloglar va maʼrifiy hamda ilmiy tusdagi boshqa hujjatlarni eʼlon qilish va tarqatish;

til oʻrgatish va ikkala xalqning madaniy, intellektual hamda ijtimoiy hayoti bilan tanishtirish, shuningdek taʼlim sohasida hamkorlik qilish;

xorijiy talabalar va maktab oʻquvchilariga taʼlim berish dasturini bajarishda hamkorlik qilish; almashish boʻyicha taʼlimiy dasturlar uchun nomzodlarni suhbatdan oʻtkazish hamda rasmiylashtirish; shunday dasturlar boʻyicha axborot tarqatish;

Oʻzbekiston Respublikasi va Isroil Davlatining turli taʼlimiy va ilmiy muassasalari hamda nohukumat tashkilotlari oʻrtasida toʻgʻridan toʻgʻri aloqalar oʻrnatilishiga koʻmaklashish;

oliy oʻquv yurtlari oʻrtasidagi aloqalar taraqqiyotini va dorilfunun darajasining turli bosqichlarida almashishni qoʻllab-quvvatlash, sirtqi dasturlar ham shunga kiradi;

qabul qiluvchi davlatning oʻquv yurtlari boʻlimlarida yuboruvchi davlatning madaniyati va anʼanalarini oʻrganish ishtiyoqini qoʻllab-quvvatlash;

isroil-yahudiy va oʻzbek taʼlimidan pedagogik dasturlar taʼsis etish hamda amalga oshirishda hamkorlik qilish;

Tomonlar ushbu Protokol maqsadlarini amalga oshirishga yoʻnaltirilgan yana boshqa xil faoliyat turlari bilan ham shugʻullanishlari mumkin.

Markazlar faoliyati, shuningdek boshqa muvofiq madaniy va taʼlimiy idoralarda ham amalga oshirilishi mumkin.

Tomonlar qabul qiluvchi davlatning mavjud maktablari bazasida “Maktab kuni” yoki “Yakshanba maktabi” mavzuidagi taʼlimiy dasturni amalga oshiradilar, bunda qabul qiluvchi davlatda yuboruvchi davlat tili, tarixi va anʼanalaridan taʼlim berish ham koʻzda tutiladi.

Har bir Tomon oʻzining mazkur dasturini mablagʻ bilan taʼminlaydi.

Tomonlar jamoatchilikning Markazlar faoliyatida ishtirok etishiga toʻsiqlar boʻlmasligini kafolatlaydilar. Markazlar qabul qiluvchi davlatning qonunlariga muvofiq oʻz faoliyatidan jamoatchilikni xabardor qilish uchun barcha zarur vositalardan foydalanish huquqiga ega boʻladilar.

Markazlarning faoliyati ushbu Protokol qoidalariga hamda xalqaro huquqqa, shuningdek Tomonlarning milliy qonunlariga muvofiq ravishda amalga oshiriladi.

Markazlarning faoliyati moliyaviy daromad olish maqsadida amalga oshirilishi mumkin emas. Qabul qiluvchi davlatning ichki qonunlari va qoidalariga binoan Markazlar notijoriy tashkilot hisoblanadi.

Ayni paytda oʻz xarajatlarini qisman qoplash uchun, ushbu Protokol maqsadini amalga oshirish uchun va ushbu Protokol hamda qabul qiluvchi davlat qonunlariga muvofiq ravishda Markazlar quyidagi huquqlarga ega boʻladilar:

Markazlar tashkil qilgan tadbirlarda ishtirok etganlik uchun, kurslar rasmiylashtirganligi hamda shu kabi faoliyat uchun toʻlovlar olish;

oʻz faoliyat yoʻnalishiga toʻgʻridan toʻgʻri bogʻliq boʻlgan kataloglar, plakatlar, kitob, gazeta, jurnal, disklar, kasseta, slaydlar va yozma yoki audio-vizual yoxud elektron tarzdagi boshqa materiallarni sotish; bunda shu xildagi materiallari sotish tijorat faoliyati tusini olmasligi kerak.

Markazlar hamda ularning xodimlarini soliqqa tortish qabul qiluvchi davlatning qonunlariga binoan belgilanadi, bunda ikkala mamlakat oʻrtasida ikkiyoqlama soliq solinishining oldini olish toʻgʻrisidagi Konvensiya eʼtiborga olinadi.

Markazlarning xizmatchilari yuboruvchi davlatda doimiy yashovchi fuqarolardan tashkil topadi.

Qabul qiluvchi davlat mazkur xizmatchilarni yuboruvchi davlatning davlat xizmatchilari sifatida qabul qiladi.

Markazlarning direktorlari yuboruvchi davlatning diplomatik korpusi aʼzolaridan hisoblanadi.

Tomonlar Markaz xizmatchilarini ishga qabul qilish, shuningdek ular ish faoliyatining boshlanishi va tugashi toʻgʻrisida bir-birini xabardor qiladilar.

Markazlar qabul qiluvchi davlatning fuqarolari boʻlgan mahalliy kadrlarni ham ishga qabul qilishi mumkin.

Tomonlardan har biri oʻzaro asosda uning hududiga Markazlarning ushbu Protokolga muvofiq ishlatishi uchun import qilingan, ammo sotib foyda olish uchun moʻljallanmagan quyidagi tovarlar, uskuna va materiallarni bojxona rasmiylashtirishi xarajatlaridan tashqari barcha boj va import uchun boshqa soliqlar hamda shunga monand toʻlovlardan ozod qiladi:

Markazlarning doimiy ishlab turishi uchun zarur boʻlgan tovarlar, uskuna va materiallar, bunga avtoulovlar ham kiradi;

Markazlarning faoliyatiga bogʻliq boʻlgan, ushbu Protokolning 8-moddasiga muvofiq ravishda olib kiriladigan kataloglar, plakat, buklet, kitob, jurnal, disklar, taʼlimiy, oʻquv va audio-vizual materiallar;

Markazlarda va uning faoliyati doirasida yana boshqa joylarda koʻrsatiladigan filmlar.

Tomonlardan har biri oʻzaro asosda boshqa Tomonning Markazi xizmatchisiga shaxsan foydalanadigan va kundalik hayotda ishlatadigan buyumlarini, jumladan oʻz vazifalarini ado etishi uchun zarur boʻlgan hamda shaxsiy maqsadlarida foydalanadigan avtoulov vositalarini import qilishda bojxona rasmiylashtirishi xarajatlaridan tashqari bojlar va boshqa soliqlar hamda import uchun toʻlovlardan ozod qiladi.

Bu imtiyozlar xizmatchining Markazda ishlagan davridagina amal qiladi.

Yuqorida darj etilgan imtiyozlar Markazlarning qabul qiluvchi davlatda ushbu Protokolga muvofiq oʻz vazifalarini bajarish maqsadida yashab turgan xodimlariga nisbatangina qoʻllanadi.

Zarur boʻlganda Tomonlarning bojxona maʼmurlari ushbu Protokolning bojxona masalalari yuzasidan qoidalarini batartib qoʻllashni taʼminlash uchun oʻzaro maqbul protseduralarni belgilashlari mumkin.

16- va 17-moddalarga muvofiq import qilingan hamda imtiyozli ravishda yetkazib berilgan barcha tovarlar quyidagi protseduralarga asos boʻladi:

1. Tomonlar Markazlar va ularning xodimlariga qabul qiluvchi davlatning milliy qonunlariga muvofiq ravishda uning hududidan shunday tovarlarni har qanday cheklashlarsiz olib chiqishga yoʻl qoʻyadilar, bunga avtoulov vositalari ham kiradi.

2. Imtiyoz bilan kiritilgan, ammo belgilangan maqsadi yoʻlida qoʻllanmayotgan tovarlar, jumladan avtoulov vositalari darhol qabul qiluvchi davlat hududidan olib chiqilishi yoki sotilishi yoxud qabul qiluvchi davlatning qonunlari va qoidalariga muvofiq boshqa yoʻsinda ishlatilishi kerak. Bu holda qabul qiluvchi davlat oʻz davlati hududidan bunday tovarlar, jumladan avtoulov vositalarini har qanday cheklashlarsiz hamda qabul qiluvchi davlatning milliy qonunlariga muvofiq ravishda olib chiqilishiga yoʻl qoʻyib berishi kerak.

Yuborayotgan davlatning mehnat qonunlari va ijtimoiy muhofaza tizimi Markazlarning yuboruvchi davlatning fuqarolari boʻlgan va qabul qiluvchi davlatda vaqtincha yashayotgan xizmatchilari hamda u bilan birga yashayotgan oila aʼzolariga qoʻllanadi.

Isroil milliy sugʻurta instituti faoliyati doirasiga kiradigan masalalar Institut bilan Oʻzbekiston Respublikasining vakolatli maʼmurlari oʻrtasida tuziladigan alohida bitim orqali tartibga solinadi.

Har bir Tomon oʻzaro asosda oʻz qonunlari va qoidalariga muvofiq ravishda yuboruvchi davlatning xizmatchisiga va ishga tayinlangan mahalida u bilan birga yashab turgan oila aʼzolariga vizalar berish, ishlashga va yashab turishga ruxsat etilishini kafolatlaydi. Qabul qiluvchi davlatning Tashqi ishlar vazirligi vizalar beradi va ularning berilishini osonlashtiradi hamda ushbu moddaning bajarilishi uchun ruxsat olinishiga koʻmaklashadi.

Lozim boʻlgan hollarda ushbu Protokolni talqin qilish va qoʻllashga doir masalalar diplomatik kanallar orqali hal etiladi

Ushbu Protokol qoidalari Tomonlarning oʻzaro roziligi bilan Protokolni kuchga kiritish protsedurasiga muvofiq ravishda oʻzgartirilishi va toʻldirilishi mumkin.

Ushbu Protokol Tomonlar uni kuchga kiritish uchun oʻz ichki protseduralari bajarilganligi toʻgʻrisida xabar qiluvchi notalar almashinganidan soʻng mazkur protseduralar bajarib boʻlinganligi toʻgʻrisida oxirgi diplomatik nota sanasidan boshlab kuchga kiradi.

Protokol besh yil amal qiladi. Shundan soʻng Tomonlardan hech qaysisi ikkinchi Tomonni tegishli muddat tugashidan kamida olti oy ilgari ushbu Protokol faoliyatini toʻxtatish istagi toʻgʻrisida diplomatik kanallar orqali yozma ravishda xabardor qilmasa, oʻz-oʻzidan har gal keyingi besh yillik muddatlarga uzayadi.

Ushbu Protokol faoliyati toʻxtatilsa, uning Protokolga muvofiq qabul qilingan, ammo faoliyati toʻxtatilgan vaqtda yakunlanmagan amaldagi dasturlar, bitimlar, loyihalar va boshqa ishlarga oid qoidalari ular toʻla bajarib boʻlgunicha yoki mazkur faoliyat amalga oshirib boʻlinguncha oʻz kuchini saqlab qoladi.

Quddus shahrida 1998-yil 15-sentabrda, bu 5758 yilning 24 Eluliga toʻgʻri keladi, ikki nusxada, oʻzbek, ivrit va ingliz tillarida tuzildi, barcha matnlar bir xil kuchga ega. Talqin qilishda har xilliklar yuzaga kelsa, ingliz tilidagi matn ustun hisoblanadi.