Oʻzbekiston Respublikasi Vazirlar Mahkamasining 2004-yil 20-iyuldagi 341-son “Oʻzbekiston Respublikasi Oliy va oʻrta maxsus taʼlim vazirligi faoliyatini takomillashtirish toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2004-y., 29-son, 332-modda) muvofiq buyuraman:

1. Oliy va oʻrta maxsus, kasb-hunar taʼlimi muassasalarida oʻqitishning toʻlov-kontrakt shakli va undan tushgan mablagʻlarni taqsimlash tartibi toʻgʻrisidagi nizom ilovaga muvofiq tasdiqlansin.

2. Mazkur buyruq rasmiy eʼlon qilingan kundan eʼtiboran kuchga kiradi.

Mazkur Nizom Oʻzbekiston Respublikasining “Taʼlim toʻgʻrisida”gi (Oʻzbekiston Respublikasi Oliy Majlisining Axborotnomasi, 1997-y., 9-son, 225-modda) va “Kadrlar tayyorlash milliy dasturi toʻgʻrisida”gi (Oʻzbekiston Respublikasi Oliy Majlisining Axborotnomasi, 1997-y., 11-12-son, 295-modda) qonunlariga muvofiq oliy va oʻrta maxsus, kasb-hunar taʼlimi muassasalarida (bundan buyon matnda taʼlim muassasalari deb yuritiladi) oʻqitishning toʻlov-kontrakt (bundan buyon matnda kontrakt deb yuritiladi) shaklini belgilash va undan kelib tushadigan mablagʻlarni taqsimlash tartibini belgilaydi.

1. Mazkur Nizom Oʻzbekiston Respublikasi Davlat budjetidan moliyalashtiriladigan taʼlim muassasalariga tatbiq etiladi.

Mazkur Nizom oliy taʼlim muassasalarida tashkil etiladigan oliy oʻquv yurtidan keyingi taʼlim tizimiga hamda malaka oshirish va qayta tayyorlash tizimiga, shuningdek harbiy taʼlim muassasalariga tatbiq etilmaydi.

2. Qonun hujjatlariga muvofiq, taʼlim muassasalariga kontrakt asosida oʻqishga qabul qilish Oʻzbekiston Respublikasi Prezidenti yoki Vazirlar Mahkamasining qarori bilan tasdiqlangan qabul kvotalari doirasida hamda qabul kvotalaridan tashqari Oʻzbekiston Respublikasi taʼlim muassasalariga qabul qilish boʻyicha Davlat komissiyasi (bundan buyon matnda Davlat komissiyasi deb yuritiladi) tomonidan amalga oshiriladi.

3. Xorijiy fuqarolarni taʼlim muassasalariga oʻqishga qabul qilish Oʻzbekiston Respublikasi Vazirlar Mahkamasining 2008-yil 4-avgustdagi 169-son “Xorijiy fuqarolarni Oʻzbekiston Respublikasi taʼlim muassasalariga oʻqishga qabul qilish va oʻqitish tartibini takomillashtirish toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2008-y., 31-32-son, 304-modda) muvofiq kontrakt asosida amalga oshiriladi.

Xorijiy fuqarolarni Toshkent davlat yuridik universitetiga oʻqishga qabul qilish Oʻzbekiston Respublikasi Vazirlar Mahkamasining 2017-yil 2-iyundagi 347-son “Toshkent davlat yuridik universitetida kadrlar tayyorlash tizimini yanada takomillashtirish chora-tadbirlari toʻgʻrisida”gi qaroriga muvofiq amalga oshiriladi;

Oʻzbekiston Respublikasining “Taʼlim toʻgʻrisida”gi Qonuniga asosan Oʻzbekiston Respublikasida istiqomat qilayotgan fuqaroligi boʻlmagan shaxslar bilim olishda Oʻzbekiston Respublikasi fuqarolari bilan teng huquqlarga ega.

4. Oliy taʼlim muassasalarida ikkinchi va undan keyingi oliy maʼlumotni olish Oʻzbekiston Respublikasi “Taʼlim toʻgʻrisida”gi Qonunining 14-moddasiga asosan kontrakt asosida amalga oshiriladi.

5. Oliy taʼlim muassasalarida oʻqitish uchun kontrakt ikki yoki uch tomonlama rasmiylashtirilishi mumkin boʻlib, uning taraflari quyidagilar hisoblanadi:

ikki tomonlama kontraktda: bir tomondan — oliy taʼlim muassasasining vakolatli shaxsi, ikkinchi tomondan — abituriyent yoki talaba yoxud ularning ota-onasi (yoki ularning oʻrnini bosuvchi shaxslar);

uch tomonlama kontraktda: bir tomondan — oliy taʼlim muassasasining vakolatli shaxsi, ikkinchi tomondan — yuridik yoki jismoniy shaxs (bundan buyon matnda buyurtmachi deb yuritiladi), uchinchi tomondan — abituriyent yoki talaba yoxud ularning ota-onasi (yoki ularning oʻrnini bosuvchi shaxslar).

Kontraktlar har bir taraf uchun bir nusxadan rasmiylashtiriladi.

6. Kontraktda shartnomaning bajarilish muddatlari, hisob-kitob qilish tartibi, taraflarning huquqlari va majburiyatlari, shartnoma majburiyatlari bajarilmaganda yoki lozim darajada bajarilmaganda taraflar uchun vujudga kelishi mumkin boʻlgan huquqiy oqibatlar, nizolarni hal etish tartibi hamda taraflarning rekvizitlari, shartnoma tuzilgan sana va joy hamda boshqa muhim shartlar nazarda tutilishi lozim.

7. Kontraktlar Davlat komissiyasining abituriyentlarni kontrakt asosida talabalikka tavsiya etish toʻgʻrisidagi qarori (bundan buyon matnda Davlat komissiyasining qarori deb yuritiladi) qabul qilinganidan soʻng rasmiylashtiriladi.

8. Davlat komissiyasining qaroriga asosan talabalikka tavsiya etilgan abituriyentlarni mazkur Nizomda belgilangan tartibda kontraktda nazarda tutilgan tegishli toʻlovlar amalga oshirilguniga qadar yoki abituriyentlarni talabalikka qabul qilish boʻyicha oliy taʼlim muassasasining buyrugʻi qabul qilingunga qadar oliy taʼlim muassasasining tegishli buyrugʻiga asosan darslarda qatnashib turishiga ruxsat etiladi.

9. Tegishli komissiyalar tomonidan belgilangan tartibda oʻqishini koʻchirishga yoki qayta tiklashga tavsiya etilgan talabalarni ham mazkur Nizomda belgilangan tartibda kontraktda nazarda tutilgan tegishli toʻlovlar amalga oshirilguniga qadar oliy taʼlim muassasasining tegishli buyrugʻiga asosan darslarda qatnashib turishiga ruxsat etiladi.

10. Taraflar oʻrtasida tuzilgan kontraktga muvofiq toʻlovni amalga oshirilganligi toʻgʻrisidagi bank toʻlov topshiriqnomasi yoki kvitansiyasi nusxasi, shuningdek toʻlovlarning oliy taʼlim muassasasining hisobvaragʻiga kelib tushganligi asosida abituriyentni yoki tegishli komissiyalar tomonidan belgilangan tartibda oʻqishini koʻchirishga yoxud qayta tiklashga tavsiya etilgan talabalarni oliy taʼlim muassasasiga talabalikka qabul qilish toʻgʻrisidagi buyruq chiqariladi.

11. Qonun hujjatlariga muvofiq, oʻquv yili davomida Davlat komissiyasining qarori qoʻshimcha ravishda chiqarilganda yoki Davlat komissiyasi tomonidan toʻlovlarni amalga oshirish muddati uzaytirilganda, abituriyentni yoki belgilangan tartibda oʻqishini koʻchirishga yoxud qayta tiklashga tavsiya etilgan talabalarni oliy taʼlim muassasasiga talabalikka qabul qilish toʻgʻrisidagi tegishli buyruqni chiqarish muddati ham uzaytirilishi mumkin.

12. Oliy taʼlim muassasalarida kontrakt asosida oʻqitishning toʻlov miqdori bilim sohalari, soha va taʼlim yoʻnalishlari, taʼlim shakllari (ishlab chiqarishdan ajralgan yoki ajralmagan holda) va taʼlim bosqichlari (bakalavriat, magistratura, ikkinchi va undan keyingi taʼlim) boʻyicha alohida, har oʻquv yili uchun belgilanadi.

13. Oliy taʼlim muassasalarida kontrakt asosida oʻqitishning toʻlov miqdori Oʻzbekiston Respublikasi Vazirlar Mahkamasining 2009-yil 20-avgustdagi 237-son “Respublika oliy taʼlim muassasalarini moliyaviy jihatdan yanada mustahkamlash choralari toʻgʻrisida”gi qaroriga muvofiq Oʻzbekiston Respublikasi Moliya vazirligi tomonidan Oliy va oʻrta maxsus taʼlim vazirligi hamda boshqa manfaatdor vazirlik va idoralar bilan kelishilgan holda belgilanadi.

14. Xorijiy fuqarolarni oliy taʼlim muassasalarida kontrakt asosida oʻqitishning toʻlov miqdori Oʻzbekiston Respublikasi Vazirlar Mahkamasining 2008-yil 4-avgustdagi 169-son “Xorijiy fuqarolarni Oʻzbekiston Respublikasi taʼlim muassasalariga oʻqishga qabul qilish va oʻqitish tartibini takomillashtirish toʻgʻrisida”gi qaroriga muvofiq, Oʻzbekiston Respublikasi Moliya vazirligi va taʼlim muassasalariga ega boʻlgan boshqa vazirlik va idoralar bilan kelishgan holda Oliy va oʻrta maxsus taʼlim vazirligining taklifi asosida Davlat komissiyasi tomonidan belgilanadi.

15. Oliy taʼlim muassasalarida kontrakt asosida oʻqitishning toʻlov miqdorini belgilash bir talabani oʻqitish bilan bogʻliq xarajatlar miqdoridan kelib chiqib amalga oshiriladi.

16. Bir talabani oʻqitish bilan bogʻliq xarajatlar miqdori quyidagi mezonlarni inobatga olgan holda belgilanadi:

qabul kvotasi va bino-inshootlar quvvati oʻrtasidagi mutanosiblik;

taʼlim yoʻnalishlari va taʼlim jarayoni xususiyatlari;

bir oʻqituvchiga toʻgʻri keladigan talabalar soni nisbatining cheklangan normativlari;

oʻqitish muddatlari va boshqalar.

17. Oliy taʼlim muassasalari faoliyatini taʼminlash uchun zarur boʻlgan mablagʻlarning yetishmaydigan qismi oliy taʼlim muassasalarini saqlashga ajratiladigan Oʻzbekiston Respublikasi Davlat budjeti mablagʻlari hisobidan qoplanadi.

18. Ish haqi va stipendiyalar miqdorlarining, energiya resurslari, kommunal va ekspluatatsiya xizmatlarining narxlari va tariflari oʻzgarishi munosabati bilan kontrakt asosida oʻqitishning toʻlov miqdori oʻquv yili davomida qayta koʻrib chiqilishi mumkin.

19. Oʻquv yili davomida kontrakt asosida oʻqitishning toʻlov miqdori oʻzgarganda oliy taʼlim muassasasi tomonidan oʻqitish uchun toʻlov qayta hisob-kitob qilinadi va kontraktga tegishli oʻzgartirishlar kiritiladi.

Bunda, qayta hisob-kitob faqatgina oʻquv yilining qolgan muddati uchun amalga oshiriladi.

Qayta hisob-kitob natijasida toʻlanishi lozim boʻlgan qoʻshimcha mablagʻ, oʻqitish uchun toʻlovni oshirilganligi toʻgʻrisidagi xabarnoma olingan kundan boshlab bir oy muddatda amalga oshirilishi lozim.

Oʻqitishning toʻlov miqdori kamaytirilganda ortiqcha toʻlangan mablagʻ keyingi toʻlovlar hisobiga oʻtkaziladi yoki toʻlovni amalga oshirgan tarafning yozma murojaatiga koʻra qaytarib beriladi.

20. Oliy taʼlim muassasalarida kontrakt asosida oʻqitish uchun belgilangan miqdordagi toʻlov oʻquv yilida toʻliq yoki qisman (biroq, birinchi toʻlov tegishli oʻquv yili uchun belgilangan toʻlov miqdorining 50 foizidan kam boʻlmagan holda) mazkur Nizomning 22-bandida yoki kontraktda belgilangan muddatlarda amalga oshiriladi.

21. Oʻzbekiston yoshlar ittifoqi tomonidan moddiy yordam sifatida talabalarini oʻqitish uchun toʻlovlar qonun hujjatlariga muvofiq amalga oshiriladi.

22. Kontrakt asosida oʻqitish uchun toʻlov oʻquv yilining quyidagi muddatlarida:

belgilangan toʻlov miqdorining kamida 50 foizi — talabalikka tavsiya etilgan abituriyentlar uchun 15-sentabrgacha, ikkinchi va undan keyingi bosqich talabalar uchun 1-oktabrgacha;

qolgan qismi (qismlarga boʻlib toʻlangan hollarda ham) — 1-martgacha amalga oshiriladi.

Qoʻshimcha oshirilgan toʻlov-kontrakt asosida qabul qilingan abituriyentlarning birinchi oʻquv yili uchun toʻlovi Davlat komissiyasi tomonidan belgilangan muddatlarda amalga oshiriladi.

23. Xorijiy fuqarolarni oʻqitish uchun belgilangan toʻlovlar milliy valyutada amalga oshiriladi, qonun hujjatlariga muvofiq toʻlovlar chet el valyutasida amalga oshirilishi mumkin boʻlgan holatlar bundan mustasno.

24. Qonun hujjatlariga muvofiq, oʻquv yili davomida Davlat komissiyasining qarori qoʻshimcha ravishda chiqarilganda oliy taʼlim muassasalariga kontrakt asosida qabul qilingan abituriyentlardan oʻqitish uchun toʻlov faqat oʻquv yilining qolgan muddati uchun olinadi.

Bunda, oʻquv yilining qolgan muddati sifatida oliy taʼlim muassasasining abituriyentni darslarga qatnashishga ruxsat berish toʻgʻrisidagi buyrugʻida darslarga qatnashishi belgilangan oyning birinchi sanasidan oʻquv yilining oxirigacha boʻlgan davr tushuniladi.

Oshirilgan toʻlov-kontrakt miqdori Davlat komissiyasining qarori hamda oliy taʼlim muassasasining abituriyentlarni darslarga qatnashishga ruxsat berish toʻgʻrisidagi buyrugʻi qabul qilingan sanadan qatʼi nazar, toʻliq toʻlanadi.

25. Oʻquv yilining qolgan muddati uchun toʻlov miqdori oʻquv yilining oxiriga qadar qolgan oylar sonini tegishli oʻquv yiliga tasdiqlangan oʻqitishning toʻlov miqdorining oʻn ikkidan bir qismiga koʻpaytirish orqali aniqlanadi.

26. Oliy taʼlim muassasalari bitiruvchi kurs talabalarining oxirgi oʻquv yili (qismlarga boʻlib toʻlanganda oxirgi oʻquv semestri) uchun toʻlov, toʻlovning belgilangan miqdoridan iyul va avgust oylari uchun toʻlanadigan stipendiya miqdorini chegirib qolish orqali amalga oshiriladi.

Bunda, chegirib qolinadigan stipendiya miqdori kontrakt asosida oʻqitish uchun toʻlov miqdorining oxirgi belgilangan stipendiyaning miqdori 0,75 koeffitsiyenti qoʻllangan bazaviy miqdoridan kelib chiqib aniqlanadi.

27. Talaba oʻquv intizomini va oliy taʼlim muassasasining ichki tartib-qoidalarini buzganligi, bir semestr davomida darslarni uzrli sabablarsiz 74 soatdan ortiq qoldirganligi yoki oʻqitish uchun belgilangan miqdordagi toʻlovni oʻz vaqtida amalga oshirmaganligi sababli talabalar safidan chetlashtirilganda yoxud belgilangan muddatlarda fanlarni oʻzlashtira olmaganligi (akademik qarzdor boʻlganligi) sababli kursdan qoldirilganda oliy taʼlim muassasasi tomonidan uning tegishli oʻquv semestri uchun amalga oshirilgan toʻlovi qaytarib berilmaydi.

28. Talaba quyidagi sabablarga koʻra talabalar safidan chetlashtirilganda oliy taʼlim muassasasi tomonidan uning oʻqigan muddati uchun haqiqatda sarflangan xarajatlar chegirilgan holda tegishli oʻquv yili yoki semestri uchun oldindan amalga oshirilgan toʻlovning qolgan qismi kontraktning tegishli tarafi yozma murojaatiga koʻra qaytarib beriladi:

oʻz xohishiga binoan;

oʻqishning boshqa taʼlim muassasasiga koʻchirilishi munosabati bilan;

salomatligi tufayli (tibbiy komissiya maʼlumotnomasi asosida);

talaba sud tomonidan ozodlikdan mahrum etilganligi munosabati bilan;

vafot etganligi sababli.

29. Talaba oʻquv yili davomida qonun hujjatlariga muvofiq akademik taʼtilga chiqqan hollarda ham oliy taʼlim muassasasi tomonidan uning oʻqigan muddati uchun haqiqatda sarflangan xarajatlar chegirilgan holda tegishli oʻquv yili yoki semestri uchun oldindan amalga oshirilgan toʻlovning qolgan qismi kontraktning tegishli tarafi yozma murojaatiga koʻra qaytarib beriladi.

Bunda, oʻquv yili yoki semestri boshidan oliy taʼlim muassasasi tomonidan talabaning talabalar safidan chetlatilganligi yoki akademik taʼtilga chiqqanligi haqidagi buyruq chiqarilgan oyning oxirgi sanasigacha boʻlgan davr, talabaning oʻqigan muddati hisoblanadi.

30. Oʻquv yili davomida oʻqishga qabul qilingan yoki qayta tiklangan talabalar, faqat oʻquv yili oxirigacha qolgan muddat uchun toʻlovlarni amalga oshiradi.

Bunda, toʻlovlar talabani oʻqishga qabul qilinganligi yoki qayta tiklaganligi munosabati bilan darslarga qatnashishga ruxsat berish toʻgʻrisidagi buyruqda darslarga qatnashishi belgilangan oyning birinchi sanasidan oʻquv yili oxirigacha boʻlgan davr uchun hisoblanadi.

Belgilangan muddatlarda fanlarni oʻzlashtira olmagan (akademik qarzdor boʻlgan) talaba kursdan qoldirilganda toʻlov miqdori oʻqishi davom etadigan oʻquv semestri uchun amalga oshiriladi.

31. Har yangi oʻquv yili boshlanguniga qadar oliy taʼlim muassasasi tomonidan kontrakt asosida oʻqitishning belgilangan toʻlov miqdori talabalar eʼtiboriga yetkazilishi lozim, toʻlov miqdori oʻzgarmagan hollar bundan mustasno.

32. Oliy taʼlim muassasasi bilan abituriyent yoki talabani kontrakt asosida oʻqitish uchun kontrakt tuzgan buyurtmachi belgilangan muddatda toʻlovni amalga oshirish imkoniyatiga ega boʻlmaganda, kontrakt boshqa buyurtmachi bilan belgilangan tartibda qayta rasmiylashtirilishi mumkin.

Bunda, kontraktni qayta rasmiylashtirishga abituriyent yoki talabaning arizasi yoxud avval kontraktni rasmiylashtirgan buyurtmachining abituriyent yoki talabani oʻqitish uchun toʻlov qobiliyati yoʻqligi toʻgʻrisida oliy taʼlim muassasasiga qilingan yozma murojaati asos qilib olinadi.

33. Budjet tashkilotlarining Oʻzbekiston Respublikasi Davlat budjeti mablagʻlari, shuningdek oʻqitishning kontrakt shaklidan tushgan yoki Budjet tashkilotlarini rivojlantirish jamgʻarmasi mablagʻlari hisobidan oʻqitish uchun toʻlovlarni amalga oshirilishi taqiqlanadi.

34. Oʻqitishning kontrakt shaklidan tushgan mablagʻlar oliy taʼlim muassasasi daromadiga kiritiladi hamda belgilangan tartibda tasdiqlangan daromadlar va xarajatlar smetasida quyidagilarga sarflash uchun taqsimlanishi mumkin:

oliy taʼlim muassasalarining ishlab chiqarishdan ajralgan holda kontrakt asosida taʼlim olayotgan talabalariga (xorijiy talabalardan tashqari) stipendiyalar toʻlashga;

oliy taʼlim muassasalari xodimlarining ish haqi va unga tenglashtirilgan toʻlovlari, shuningdek yagona ijtimoiy toʻlovlar boʻyicha xarajatlarni toʻlashga;

oliy taʼlim muassasalarida bino va inshootlarni saqlash hamda kommunal xizmatlar boʻyicha xarajatlarni toʻlashga;

mavjud kreditor qarzlarni uzishga;

oʻquv-laboratoriya binolari, talabalar turar joylari hamda boshqa bino va inshootlarni, asbob-uskunalarni joriy va kapital taʼmirlashga, oliy taʼlim muassasasining hududini va atrofini obodonlashtirishga, shuningdek qurilish-tiklash ishlariga;

oʻquv, ilmiy-tadqiqot va laboratoriya jihozlari, yumshoq va qattiq inventarlar, mebellar, oʻqitishning texnik vositalari, kompyuter texnikasi va ularning ehtiyot hamda butlovchi qismlarini, kerakli materiallarni va boshqalarni sotib olish hamda taʼmirlashga;

oliy taʼlim muassasasi Axborot-resurs markazi (kutubxona) fondini toʻldirishga;

“Maʼnaviyat va maʼrifat” tadbirlari, “Universiada” va “Barkamol avlod” sport tadbirlari, “Nihol” ijodiy festivallarini oʻtkazishga;

Oʻzbekiston Respublikasi Prezidentining “Isteʼdod” jamgʻarmasi yoʻnalishi boʻyicha xorijiy oliy oʻquv yurtlarida istiqbolli yosh pedagog va ilmiy kadrlarni malakasini oshirish va stajirovka oʻtashlariga;

Oʻzbekiston Respublikasi Prezidenti yoki Hukumati qarorlari asosida vazirlik va idoralarning Oʻzbekiston Respublikasi Davlat budjetidan tashqari jamgʻarmalariga ajratmalarni amalga oshirishga;

oliy taʼlim muassasalari xodimlarini moddiy ragʻbatlantirishga (ustama, mukofot) va ularga moddiy yordam koʻrsatishga;

oliy taʼlim muassasalari talabalarini ijtimoiy muhofaza qilish doirasida bir yilda bir talabaga eng kam ish haqining olti barobaridan ortiq boʻlmagan miqdorda bir yoʻla moddiy yordam koʻrsatishga;

oliy taʼlim muassasasi faoliyatini amalga oshirishini taʼminlash uchun zarur boʻlgan boshqa xarajatlarni qoplashga.

35. Xarajatlarni amalga oshirishda mablagʻlar birinchi navbatda stipendiya, ish haqi va unga tenglashtirilgan toʻlovlar hamda energiya resurslari va kommunal xizmatlarning haqini toʻlash maqsadlariga yoʻnaltiriladi.

36. Oliy taʼlim muassasalarining kontrakt asosida taʼlim olayotgan talabalariga stipendiyalar, ularni oʻqitish uchun toʻlovlar amalga oshirilgandan keyin toʻlanadi. Bunda, stipendiya faqat oʻqitish uchun toʻlov amalga oshirilgan oylar uchungina beriladi.

37. Oliy taʼlim muassasalarining oʻqitishning kontrakt shaklidan tushgan mablagʻlari Budjet tashkilotlarini rivojlantirish jamgʻarmasi tarkibiga kiritilmaydi.

38. Oʻqitishning kontrakt shaklidan tushgan va vaqtinchalik boʻsh turgan mablagʻlar oliy taʼlim muassasasi tomonidan Oʻzbekiston Respublikasining moliyaviy barqaror va toʻlov qobiliyati yuqori boʻlgan banklarining depozit hisobvaragʻlariga tanlov asosida joylashtirilishi mumkin. Olingan foiz daromadlari oliy taʼlim muassasasining oʻqitishning kontrakt shaklidan tushgan mablagʻlari daromadlar va xarajatlar smetasiga kiritiladi hamda mazkur Nizomning 34-bandida nazarda tutilgan maqsadlarga sarflash uchun taqsimlanadi.

39. Oliy taʼlim muassasalari tomonidan oʻqitishning kontrakt shaklidan tushgan mablagʻlar va ular sarflanishining buxgalteriya hisobi qonun hujjatlarida belgilangan tartibda yuritiladi.

40. Har yili oliy taʼlim muassasalari tomonidan oʻqitishning kontrakt shaklidan tushadigan mablagʻlar boʻyicha kalendar yilga daromadlar va xarajatlar smetasi ishlab chiqiladi hamda boʻysunuvi boʻyicha tegishli vazirlik yoki idoraga tasdiqlash uchun taqdim etiladi.

41. Oliy taʼlim muassasalarining oʻqitishning kontrakt shaklidan tushgan mablagʻlari boʻyicha daromadlar va xarajatlar smetalariga oʻzgartirishlar, kalendar yil davomida oʻqitish uchun toʻlov miqdori, ish haqi va stipendiyalar miqdorlarining, energiya resurslari, kommunal va ekspluatatsiya xizmatlarining narxlari hamda tariflari oʻzgarganda, shuningdek oliy taʼlim muassasalari takliflari asosida belgilangan tartibda kiritiladi.

42. Oliy taʼlim muassasalarida oʻqitishning kontrakt shaklidan tushgan mablagʻlar boʻyicha daromadlar va xarajatlar smetalarini tuzish Budjet tashkilotlari va budjet mablagʻlari oluvchilarning xarajatlar smetasi va shtat jadvallarini tuzish, tasdiqlash va roʻyxatdan oʻtkazish tartibi toʻgʻrisidagi nizomga (roʻyxat raqami 2634, 2014-yil 15-dekabr), shuningdek mazkur Nizomga muvofiq amalga oshiriladi.

43. Oliy taʼlim muassasalari tomonidan oʻqitishning kontrakt shaklidan tushgan mablagʻlar boʻyicha daromadlar va xarajatlarning hisobotlarini tuzish, tasdiqlash va taqdim qilish Oʻzbekiston Respublikasi Davlat budjetidan mablagʻ bilan taʼminlanadigan tashkilotlarning davriy moliyaviy hisobotlarini tuzish, tasdiqlash hamda taqdim qilish boʻyicha qoidalarga (roʻyxat raqami 2270, 2011-yil 27-sentabr) (Oʻzbekiston Respublikasi qonun hujjatlari toʻplami, 2011-y., 39-son, 408-modda) muvofiq amalga oshiriladi.

44. Oliy taʼlim muassasalari oʻqitishning kontrakt shaklidan tushgan mablagʻlar boʻyicha daromadlar va xarajatlar smetalarining bajarilishi haqidagi choraklik va yillik hisobotlarni boʻysunuvi boʻyicha tegishli vazirlik yoki idoraga belgilangan tartibda taqdim etishlari lozim.

45. Oʻzbekiston Respublikasi Vazirlar Mahkamasining 2012-yil 6-iyuldagi 200-son “Oʻzbekiston Respublikasida oʻrta maxsus, kasb-hunar taʼlimi toʻgʻrisidagi nizomni tasdiqlash haqida”gi qaroriga (Oʻzbekiston Respublikasi qonun hujjatlari toʻplami, 2012-y., 28-son, 315-modda) muvofiq kasb-hunar kolleji manfaatdor vazirliklar va idoralar, ish beruvchilar, mehnat va aholi bandligi organlari bilan hamkorlikda kontrakt asosida:

oʻrta maxsus, kasb-hunar maʼlumotiga ega boʻlmagan shaxslarni umumtaʼlim maktablarining 11-sinflari bitiruvchilari kasbiy tayyorgarlikka ega boʻlishlari uchun oʻrta maxsus, kasb-hunar taʼlimi dasturlari boʻyicha;

ikkinchi mutaxassislikni olishni xohlovchi oʻrta maxsus, kasb-hunar maʼlumotli shaxslarni oʻrta maxsus, kasb-hunar taʼlimi dasturlari boʻyicha oʻqitishi mumkin (boʻsh oʻquv maydonlari, zarur resurs taʼminoti va oʻqituvchi kadrlar mavjud boʻlgan taqdirda).

46. Oʻrta maxsus, kasb-hunar taʼlim muassasalarida kontrakt asosida oʻqitishning toʻlov miqdori Oʻzbekiston Respublikasi Moliya vazirligi tomonidan Oʻzbekiston Respublikasi Oliy va oʻrta maxsus taʼlim vazirligining Oʻrta maxsus, kasb-hunar taʼlimi markazi hamda boshqa manfaatdor vazirlik va idoralar bilan kelishilgan holda belgilanadi.

47. Xorijiy fuqarolarni oʻrta maxsus, kasb-hunar taʼlim muassasalarida kontrakt asosida oʻqitishning toʻlov miqdori mazkur Nizomning 14-bandida koʻrsatib oʻtilgan tartibda belgilanadi.

48. Ish haqi miqdorining, energiya resurslari, kommunal va ekspluatatsiya xizmatlarining narxlari va tariflari oʻzgarishi munosabati bilan kontrakt asosida oʻqitishning toʻlov miqdori oʻquv yili davomida qayta koʻrib chiqilishi mumkin.

49. Oʻrta maxsus, kasb-hunar taʼlimi muassasalarida kontrakt asosida oʻqitish uchun kontraktning rasmiylashtirilishi, toʻlov miqdori va uni amalga oshirilishi mazkur Nizomning 5—12, 15—17, 19, 20, 22—25 va 27—33-bandlarida belgilangan tartibda amalga oshiriladi.

50. Oʻqitishning kontrakt shaklidan tushgan mablagʻlar oʻrta maxsus, kasb-hunar taʼlimi muassasasi daromadiga kiritiladi hamda belgilangan tartibda tasdiqlangan daromadlar va xarajatlar smetasida quyidagilarga sarflash uchun taqsimlanishi mumkin:

oʻrta maxsus, kasb-hunar taʼlimi muassasalari xodimlarining ish haqi va unga tenglashtirilgan toʻlovlari, shuningdek yagona ijtimoiy toʻlovlar boʻyicha xarajatlarni toʻlashga;

oʻrta maxsus, kasb-hunar taʼlimi muassasalarida bino va inshootlarni saqlash hamda kommunal xizmatlar boʻyicha xarajatlarni toʻlashga;

mavjud kreditor qarzlarni uzishga;

oʻquv-laboratoriya binolari hamda boshqa bino va inshootlarni, asbob-uskunalarni joriy va kapital taʼmirlashga, oʻrta maxsus, kasb-hunar taʼlimi muassasasining hududini va atrofini obodonlashtirishga, shuningdek qurilish-tiklash ishlariga;

oʻquv, ilmiy-tadqiqot va laboratoriya jihozlari, yumshoq va qattiq inventarlar, mebellar, oʻqitishning texnik vositalari, kompyuter texnikasi va ularning ehtiyot hamda butlovchi qismlarini, kerakli materiallarni va boshqalarni sotib olish hamda taʼmirlashga;

oʻrta maxsus, kasb-hunar taʼlimi muassasasi Axborot-resurs markazi (kutubxona) fondini toʻldirishga;

“Maʼnaviyat va maʼrifat” tadbirlari, “Universiada” va “Barkamol avlod” sport tadbirlari, “Nihol” ijodiy festivallarini oʻtkazishga;

Oʻzbekiston Respublikasi Prezidenti yoki Hukumati qarorlari asosida vazirlik va idoralarning Oʻzbekiston Respublikasi Davlat budjetidan tashqari jamgʻarmalariga ajratmalarni amalga oshirishga;

oʻrta maxsus, kasb-hunar taʼlimi muassasalari xodimlarini moddiy ragʻbatlantirishga (ustama, mukofot) va ularga moddiy yordam koʻrsatishga;

oʻrta maxsus, kasb-hunar taʼlimi muassasalari oʻquvchilarini ijtimoiy muhofaza qilish doirasida bir yilda bir oʻquvchiga eng kam ish haqining olti barobaridan ortiq boʻlmagan miqdorda bir yoʻla moddiy yordam koʻrsatishga;

oʻrta maxsus, kasb-hunar taʼlimi muassasasi faoliyatini amalga oshirishini taʼminlash uchun zarur boʻlgan boshqa xarajatlarni qoplashga.

51. Xarajatlarni amalga oshirishda mablagʻlar birinchi navbatda ish haqi va unga tenglashtirilgan toʻlovlar hamda energiya resurslari va kommunal xizmatlarning haqini toʻlash maqsadlariga yoʻnaltiriladi.

52. Oʻrta maxsus, kasb-hunar taʼlimi muassasalarining oʻqitishning kontrakt shaklidan tushgan mablagʻlari Budjet tashkilotlarini rivojlantirish jamgʻarmasi tarkibiga kiritilmaydi.

53. Oʻqitishning kontrakt shaklidan tushgan va vaqtinchalik boʻsh turgan mablagʻlar oʻrta maxsus, kasb-hunar taʼlimi muassasasi tomonidan Oʻzbekiston Respublikasining moliyaviy barqaror va toʻlov qobiliyati yuqori boʻlgan banklarining depozit hisobvaragʻlariga tanlov asosida joylashtirilishi mumkin. Olingan foiz daromadlari oʻrta maxsus, kasb-hunar taʼlimi muassasasining oʻqitishning kontrakt shaklidan tushgan mablagʻlari daromadlar va xarajatlar smetasiga kiritiladi hamda mazkur Nizomning 50-bandida nazarda tutilgan maqsadlarga sarflash uchun taqsimlanadi.

54. Oʻrta maxsus, kasb-hunar taʼlimi muassasalari tomonidan oʻqitishning kontrakt shaklidan tushgan mablagʻlar va ular sarflanishining buxgalteriya hisobi qonun hujjatlarida belgilangan tartibda yuritiladi.

55. Har yili oʻrta maxsus, kasb-hunar taʼlimi muassasalari tomonidan oʻqitishning kontrakt shaklidan tushadigan mablagʻlar boʻyicha kalendar yilga daromadlar va xarajatlar smetasi ishlab chiqiladi hamda boʻysunuvi boʻyicha tegishli vazirlik yoki idoraga tasdiqlash uchun taqdim etiladi.

56. Oʻrta maxsus, kasb-hunar taʼlimi muassasalarining oʻqitishning kontrakt shaklidan tushgan mablagʻlari boʻyicha daromadlar va xarajatlar smetalariga oʻzgartirishlar, kalendar yil davomida oʻqitish uchun toʻlov miqdori, ish haqi miqdori, va kommunal, ekspluatatsiya xizmatlari va energiya resurslari narxlari hamda tariflarining miqdorlari oʻzgarganda, shuningdek oʻrta maxsus, kasb-hunar taʼlimi muassasalari takliflari asosida belgilangan tartibda kiritiladi.

57. Oʻrta maxsus, kasb-hunar taʼlimi muassasalarida oʻqitishning kontrakt shaklidan tushgan mablagʻlar boʻyicha daromadlar va xarajatlar smetalarini tuzish Budjet tashkilotlari va budjet mablagʻlari oluvchilarning xarajatlar smetasi va shtat jadvallarini tuzish, tasdiqlash va roʻyxatdan oʻtkazish tartibi toʻgʻrisidagi nizomga (roʻyxat raqami 2634, 2014-yil 15-dekabr), shuningdek mazkur Nizomga muvofiq amalga oshiriladi.

58. Oʻrta maxsus, kasb-hunar taʼlimi muassasalari tomonidan oʻqitishning kontrakt shaklidan tushgan mablagʻlar boʻyicha daromadlar va xarajatlarning hisobotlarini tuzish, tasdiqlash va taqdim qilish Oʻzbekiston Respublikasi Davlat budjetidan mablagʻ bilan taʼminlanadigan tashkilotlarning davriy moliyaviy hisobotlarini tuzish, tasdiqlash hamda taqdim qilish boʻyicha qoidalarga (roʻyxat raqami 2270, 2011-yil 27-sentabr) (Oʻzbekiston Respublikasi qonun hujjatlari toʻplami, 2011-y., 39-son, 408-modda) muvofiq amalga oshiriladi.

59. Oʻrta maxsus, kasb-hunar taʼlimi muassasalari oʻqitishning kontrakt shaklidan tushgan mablagʻlar boʻyicha daromadlar va xarajatlar smetalarining bajarilishi haqidagi choraklik va yillik hisobotlarni boʻysunuvi boʻyicha tegishli vazirlik yoki idoraga belgilangan tartibda taqdim etishlari lozim.

60. Taʼlim muassasalarining rahbarlari, moliya va buxgalteriya xizmatlari xodimlari toʻlov-kontrakt asosida oʻqitishdan tushgan mablagʻlar boʻyicha daromadlar va xarajatlar smetasining toʻgʻri tuzilishi, ularning bajarilishi boʻyicha hisobotlarning haqqoniyligi, shuningdek budjetdan tashqari mablagʻlarni tasdiqlangan smetalarga muvofiq maqsadli sarflanishi uchun qonunchilikda belgilangan tartibda javobgardirlar.

61. Taʼlim olishning toʻlov-kontrakt asosida kelib tushadigan mablagʻlarining toʻgʻri sarflanishi va mablagʻlardan maqsadli foydalanish ustidan nazoratni tasarrufida taʼlim muassasalari boʻlgan vazirliklar va idoralar, Oʻzbekiston Respublikasi Moliya vazirligining Nazorat-taftish bosh boshqarmasi, uning hududiy organlari va joylardagi moliya organlari qonunchilik tomonidan taqdim etilgan vakolatlarga muvofiq amalga oshiradi.

62. Mazkur Nizom Oʻzbekiston Respublikasi Moliya vazirligi, Xalq taʼlimi vazirligi, Sogʻliqni saqlash vazirligi, Madaniyat va sport ishlari vazirligi, Tashqi ishlar vazirligi, Qishloq va suv xoʻjaligi vazirligi, Aloqa, axborotlashtirish va telekommunikatsiya texnologiyalari davlat qoʻmitasi, Davlat soliq qoʻmitasi, Oʻzbekiston Badiiy akademiyasi, “Oʻzbekiston temir yoʻllari” davlat aksiyadorlik temir yoʻl kompaniyasi va “Navoiy kon-metallurgiya kombinati” davlat korxonasi bilan kelishilgan.