Mehnatga layoqatli yoshdagi aholini, ayniqsa yoshlar va xotin-qizlarni ish bilan taʼminlash borasida faol siyosatni oʻtkazish, sanoat, qurilish, qishloq xoʻjaligi, bozor hamda ijtimoiy infratuzilma, kichik biznes va xususiy tadbirkorlikni, shuningdek xalq xoʻjaligining alohida ahamiyatga molik boʻlgan boshqa sohalarini rivojlantirish hisobiga bandlikni oshirish va shu orqali aholining iqtisodiy ahvolini yanada yuksaltirishga qaratilgan chora-tadbirlarni amalga oshirish hamda Oʻzbekiston Respublikasi Vazirlar Mahkamasining 1993-yil 24-iyundagi “Aholi bandligini taʼminlash dasturini ishlab chiqish va amalga oshirish tartibini tasdiqlash toʻgʻrisida”gi 310-sonli qarori ijrosini taʼminlash hamda Oʻzbekiston Respublikasining “Mahalliy davlat hokimiyati toʻgʻrisida”gi Qonunining 6-moddasiga asosan qaror qilaman:

1. Oʻzbekiston Respublikasi Vazirlar Mahkamasining 1993-yil 24-iyundagi “Aholi bandligini taʼminlash dasturini ishlab chiqish va amalga oshirish tartibini tasdiqlash toʻgʻrisida”gi 310-sonli qaroriga asosan Mehnat va aholini ijtimoiy muhofaza qilish va Iqtisodiyot bosh boshqarmalari hamda shahar va tumanlar hokimliklari, xoʻjalik boshqaruvi organlari, yirik korxonalar bilan birgalikda shahar va tumanlar kesimida ishlab chiqilgan “2013-yilda ish oʻrinlari tashkil etish va aholini ish bilan taʼminlash hududiy Dasturi”ning asosiy prognoz koʻrsatkichlari ilovaga muvofiq tasdiqlansin.

2. Viloyat hokimining oʻrinbosarlari mavjud tabiiy resurslarni va xalq xoʻjaligida alohida ahamiyatga ega boʻlgan sohalarda ishlab chiqarilayotgan xomashyo hamda yarim tayyor mahsulotlarni qayta ishlab, tayyor mahsulot chiqarishga ixtisoslashgan korxonalar barpo etish va faoliyat koʻrsatayotgan korxonalar quvvatidan toʻliq foydalanish boʻyicha chora-tadbirlarni ishlab chiqish va amalga oshirishni taʼminlasin.

3. Qarshi shahar va tumanlar hokimlari:

yangi ishlab chiqarish obyektlarini ishga tushirish, mavjud korxonalarni kengaytirish va quvvatlarni yangilash yoʻnalishi boʻyicha ish joylari – viloyatning 2013-yilga moʻljallangan investitsiya va tarmoq dasturlariga muvofiq;

sanoatda kichik korxonalar va mikrofirmalarni tashkil qilish hisobiga barpo etiladigan ish oʻrinlari — Oʻzbekiston Respublikasi Prezidentining 2009-yil 26-yanvardagi PQ–1047 sonli “Oziq-ovqat mahsulotlari ishlab chiqarishni kengaytirish va ichki bozorni toʻldirish yuzasidan qoʻshimcha chora-tadbirlar toʻgʻrisida”gi va 2009-yil 28-yanvardagi PQ–1050-sonli “Mahalliy nooziq-ovqat isteʼmol tovarlari ishlab chiqarish kengaytirilishini ragʻbatlantirish borasidagi qoʻshimcha chora-tadbirlar toʻgʻrisida”gi qarorlariga, tarmoq va hududiy dasturlariga muvofiq;

qurilish-pudrat ishlarini kengaytirish, jumladan uy-joy qurilishi va taʼmirlash yoʻnalishida tashkil qilinadigan ish joylari — Oʻzbekiston Respublikasi Prezidentining 2009-yil 29-yanvardagi PQ–1051 sonli “Uy-joy fondini foydalanishga tayyor holda topshirish shartlarida rekonstruksiya qilish va taʼmirlash boʻyicha pudrat ishlarini kengaytirishni ragʻbatlantirishga doir qoʻshimcha chora-tadbirlar toʻgʻrisida”gi qaroriga, tarmoq va hududiy dasturlariga muvofiq;

Oʻzbekiston Respublikasi Oliy Majlisi Qonunchilik palatasining 2012-yil 23-dekabrdagi 579-II-sonli va Oʻzbekiston Respublikasi Oliy Majlisi Senatining 2012-yil 5-dekabrdagi 344-sonli “2013-yilda ish oʻrinlari tashkil etish va aholi bandligini taʼminlash dasturi toʻgʻrisida”gi qarorlari topshiriqlari va hududiy dasturlarga muvofiq;

ishlab chiqarish va ijtimoiy infratuzilmani rivojlantirish hisobiga tashkil etiladigan ish joylari — Oʻzbekiston Respublikasi Prezidentining 2009-yil 20-yanvardagi PQ-1041-sonli “Ishlab chiqarish va ijtimoiy infratuzilmani yanada rivojlantirish yuzasidan qoʻshimcha chora-tadbirlar toʻgʻrisida”gi Qaroriga, tarmoq va hududiy dasturlariga muvofiq;

ishlamasdan turgan korxonalar faoliyatini tiklash natijasida yaratiladigan (tiklanadigan) ish oʻrinlari — Oʻzbekiston Respublikasi Vazirlar Mahkamasining 2012-yil 25-oktabrdagi 6-sonli qarori va hududiy dasturlarga muvofiq shakllantirilishi va qarorlarda belgilab berilgan vazifalarni hayotga izchil tatbiq etish orqali bandlik masalasini hal etishga alohida eʼtibor qaratsinlar.

Bunda:

yangi korxonalarni ishga tushirish, ishlab chiqarish quvvatlaridan foydalanish darajasini oshirish, faoliyat yuritayotgan korxonalarni kengaytirish, qayta taʼmirlash va modernizatsiyalash;

kichik korxonalar va mikrofirmalarni tashkil etish, xususiy tadbirkorlikni rivojlantirish, mikrokreditlash tizimini qoʻllab-quvvatlash;

uy mehnatining barcha shakllarini, shu jumladan korxonalar bilan mehnat shartnomalariga binoan kooperatsiya asosida kasanachilikni tashkil etish, milliy hunarmandchilik va oilaviy tadbirkorlikni rivojlantirish;

yengil va oziq-ovqat sanoatlarining, mahalliy xomashyolarni qayta ishlash va tayyor, raqobatbardosh mahsulotlar ishlab chiqarishga moʻljallangan, koʻp mehnat talab qiladigan sohalarini tezkor rivojlantirish;

xizmat koʻrsatish va servisni rivojlantirish;

ixtisoslashgan dehqon va fermer xoʻjaliklarida chorvachilik, parrandachilik, baliqchilik, asalarichilik mahsulotlarini ishlab chiqarish, barcha joylarda issiqxonalarni tashkil etish;

zamonaviy ishlab chiqarish, ijtimoiy va bozor infrastrukturasini rivojlantirish;

norasmiy tarzda tadbirkorlik faoliyati bilan shugʻullanayotgan fuqarolarni aniqlab, ularni rasmiylashtirish va yangidan tadbirkorlik faoliyatini tashkil etadigan fuqarolarni har tomonlama qoʻllab-quvvatlash;

hududlarning oʻziga xos anʼanalarini, kasbiy moyilligini va mavjud imkoniyatlarini hisobga olgan holda hunarmandchilik va xalq badiiy kosibchiligini rivojlantirish hamda yoshlarni “Usta-shogird” usulida kosibchilikka oʻqitish hisobiga dasturda belgilangan barcha koʻrsatkichlar ijrosini taʼminlash;

ishsizlarni ishga joylashtirish, shu jumladan kasb-hunarga qayta oʻqitish va qayta tayyorlash, haq toʻlanadigan jamoat ishlariga yoʻllash orqali ishga joylashtirish, shuningdek boʻsh ish oʻrinlari yarmarkalarini oʻtkazishni tashkil etish chora-tadbirlarini soʻzsiz bajarilishini taʼminlash;

joylarda qabul qilingan “Bandlik” dasturlarini hududlarning ijtimoiy - iqtisodiy rivojlantirish boʻyicha istiqbolli dasturlari bilan mutanosibligini taʼminlash, har chorakda tahlil qilib tegishli oʻzgartirishlarni kiritish hamda muhokama qilib borish vazifasi yuklatilsin.

4. Mehnat va aholini ijtimoiy muhofaza qilish bosh boshqarmasi (M.Nurimov) va shahar va tumanlar hokimlari bu boradagi vazifalarni amalga oshirishni muvofiqlashtirish va har chorak yakunida dasturning bajarilishi yuzasidan viloyat hokimligiga tegishli takliflarni kiritish topshirilsin.

5. Mazkur qarorning ijrosini nazorat qilish viloyat hokimi oʻrinbosari Gʻ. Djavliyev zimmasiga yuklatilsin.