Oʻzbekiston Respublikasining “Raqobat toʻgʻrisida”gi Qonuni (Oʻzbekiston Respublikasi qonun hujjatlari toʻplami, 2012-y., 1-son, 5-modda) va Oʻzbekiston Respublikasi Vazirlar Mahkamasining 2010-yil 2-iyundagi 105-son qarori bilan tasdiqlangan Oʻzbekiston Respublikasi Monopoliyadan chiqarish va raqobatni rivojlantirish davlat qoʻmitasi toʻgʻrisidagi nizomga (Oʻzbekiston Respublikasi qonun hujjatlari toʻplami, 2010-y., 23-son, 182-modda) muvofiq, Oʻzbekiston Respublikasi Monopoliyadan chiqarish va raqobatni rivojlantirish davlat qoʻmitasi qaror qiladi:

1. Xoʻjalik yurituvchi subyekt ustav fondidagi (ustav kapitalidagi) aksiyalarni (ulushlarni) olish ustidan nazorat qilish tartibi toʻgʻrisida nizom ilovaga muvofiq tasdiqlansin.

2. Quyidagilar oʻz kuchini yoʻqotgan deb hisoblansin:

Oʻzbekiston Respublikasi Monopoliyadan chiqarish, raqobat va tadbirkorlikni qoʻllab-quvvatlash davlat qoʻmitasining 2008-yil 29-dekabrdagi 17-son “Xoʻjalik yurituvchi subyektning 35 foizdan ortiq aksiyalari, ulushlarini olish ustidan nazorat qilish tartibi toʻgʻrisidagi yoʻriqnomani tasdiqlash haqida”gi qarori (roʻyxat raqami 1896, 2009-yil 5-fevral) (Oʻzbekiston Respublikasi qonun hujjatlari toʻplami, 2009-yil, 6-son, 62-modda);

Oʻzbekiston Respublikasi Monopoliyadan chiqarish va raqobatni rivojlantirish davlat qoʻmitasining 2010-yil 25-iyundagi 7-son “Xoʻjalik yurituvchi subyektning 35 foizdan ortiq aksiyalari, ulushlarini olish ustidan nazorat qilish tartibi toʻgʻrisidagi yoʻriqnomani tasdiqlash haqida”gi qarorga oʻzgartishlar kiritish haqida”gi qarori (roʻyxat raqami 1896-1, 2010-yil 8-iyul) (Oʻzbekiston Respublikasi qonun hujjatlari toʻplami, 2010-yil, 26-27-son, 227-modda).

3. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

Mazkur Nizom Oʻzbekiston Respublikasining “Raqobat toʻgʻrisida”gi Qonuniga (Oʻzbekiston Respublikasi qonun hujjatlari toʻplami, 2012-y., 1-son, 5-modda) muvofiq, xoʻjalik yurituvchi subyekt ustav fondidagi (ustav kapitalidagi) aksiyalarni (ulushlarni) (keyingi oʻrinlarda aksiyalar (ulushlar) deb yuritiladi) olish ustidan nazorat qilish tartibini belgilaydi.

1. Mazkur Nizomda quyidagi asosiy tushunchalar qoʻllaniladi:

investor — aksiyalarni (ulushlarni) oʻz nomidan va oʻz hisobidan oluvchi yuridik va jismoniy shaxslar yoki yakka tartibdagi tadbirkor, shuningdek aksiyalarni (ulushlarni) olayotgan shaxslar guruhi;

aksiyalarni (ulushlarni) olish — investorga aksiyalarning (ulushlarning) tegishli foiziga egalik qilish, foydalanish, tasarruf etish huquqini beradigan oldi-sotdi, ayirboshlash, hadya va boshqa bitimlarni tuzish, shuningdek aksiyalar (ulushlar) bilan boshqa xoʻjalik yurituvchi subyekt ustav fondidagi (ustav kapitalidagi) aksiyalarni (ulushlarni) toʻlash;

xoʻjalik yurituvchi subyekt — ustav fondi (ustav kapitali) aksiyadorlarning (ishtirokchilarning) aksiyalariga (ulushlariga) boʻlingan, tovarlarni (ishlarni, xizmatlarni) ishlab chiqarish, olish va realizatsiya qilish faoliyati bilan shugʻullanuvchi yuridik shaxs.

2. Mazkur Nizom quyidagilarga nisbatan tatbiq etiladi:

aksiyalarni (ulushlarni) olishga;

aksiyalar (ulushlar) bilan boshqa xoʻjalik yurituvchi subyekt ustav fondidagi (ustav kapitalidagi) aksiyalarni (ulushlarni) toʻlashga;

qoʻshimcha aksiyalarni chiqarish yoʻli bilan aksiyadorlik jamiyati yoki ulushlarni oshirish yoʻli bilan masʼuliyati cheklangan yoki qoʻshimcha masʼuliyatli jamiyat ustav fondining (ustav kapitalining) birlamchi miqdori oʻzgartirilganda investor aksiyalari (ulushlari) paketining koʻpayishiga.

3. Mazkur Nizom quyidagilarga nisbatan tatbiq etilmaydi:

xoʻjalik yurituvchi subyektni tashkil etishda uning muassislariga, bundan moliya-sanoat guruhlarini, xolding kompaniyalarini tashkil etish hollari mustasno;

xoʻjalik yurituvchi subyekt oʻz aksiyalarini (ulushlarini) olganda;

xoʻjalik yurituvchi subyektlar tomonidan amalga oshiriladigan bitimlar, agar bu bitimlarni tuzish paytida tegishli bitimda ishtirok etayotgan shaxslar aktivlarining jami balans qiymati yoki oxirgi kalendar yilda tovarlarni realizatsiya qilishdan olgan jami tushumi eng kam ish haqining yuz ming baravari miqdoridan ortiq boʻlmagan hollarda;

aksiyadorlik jamiyati oʻz ustav fondining (ustav kapitalining) miqdorini saqlab qolgan holda boshqa tashkiliy-huquqiy shaklga oʻzgartirilganda;

aksiyalar (ulushlar) ishonchli boshqaruvga berilganda, shuningdek aksiyalar (ulushlar) keyinchalik qayta sotish maqsadida investitsiya vositachilari tomonidan olinganda;

ustav fondidagi (ustav kapitalidagi) aksiyalar (ulushlar) xoʻjalik yurituvchi subyekt tomonidan Oʻzbekiston Respublikasi Prezidenti yoki Oʻzbekiston Respublikasi Vazirlar Mahkamasi qaroriga muvofiq olinganda;

kredit va boshqa moliya tashkilotlari ishtirokchilar boʻlgan ustav fondidagi (ustav kapitalidagi) aksiyalarni (ulushlarni) olishga doir bitimlarda.

4. Aksiyalarni (ulushlarni) olishga doir bitimlarni tuzish jarayonida raqobat toʻgʻrisidagi qonun hujjatlariga rioya qilinishi ustidan nazorat, agar bu bitimlarni tuzish paytida tegishli bitimda ishtirok etayotgan shaxslar aktivlarining jami balans qiymati yoki oxirgi kalendar yilda tovarlarni realizatsiya qilishdan olgan jami tushumi eng kam ish haqining yuz ming baravari miqdoridan ortiq boʻlsa yoxud bitim ishtirokchilaridan biri ustun mavqeni egallab turgan xoʻjalik yurituvchi subyekt boʻlsa, Oʻzbekiston Respublikasi Monopoliyadan chiqarish va raqobatni rivojlantirish davlat qoʻmitasi yoki uning tegishli hududiy organlarining (bundan keyingi oʻrinlarda monopoliyaga qarshi organ deb yuritiladi) oldindan roziligini olish yoʻli bilan amalga oshiriladi.

5. Yagona (umumiy) iqtisodiy manfaatga ega boʻlgan hamda “Raqobat toʻgʻrisida”gi Oʻzbekiston Respublikasi Qonunining 5-moddasida nazarda tutilgan shartlarga javob beradigan shaxslar yigʻindisi shaxslar guruhi deb eʼtirof etiladi.

6. Monopoliyaga qarshi organ yuridik va jismoniy shaxslarni shaxslar guruhi deb eʼtirof etish uchun zarur boʻlgan quyidagi axborotlarni soʻrab olishga haqlidir:

investorlarning taʼsis hujjatlarida investorning ustav fondidagi (ustav kapitalidagi) hammuassislarining ulushlari haqida;

investorning xoʻjalik yurituvchi subyekt taʼsis hujjatlaridagi, shuningdek investor muassislarining ushbu xoʻjalik yurituvchi subyektdagi ulushlari haqida;

investorning, shuningdek uning muassislarining boshqa xoʻjalik yurituvchi subyektlarning ustav fondidagi (ustav kapitalidagi) moliyaviy aktivlarga (aksiya va ulushlarga) egalik qilish qismiga doir investitsiyaviy faoliyati haqida;

xoʻjalik yurituvchi subyekt va (yoki) investorning tovarlarni ishlab chiqarish, olish va realizatsiya qilishga, xizmatlar koʻrsatishga doir asosiy faoliyat turlari hamda ularning muayyan tovar bozoridagi ulushi haqida.

Mazkur bandda nazarda tutilgan axborotlar investor tomonidan taqdim etiladi. Agar investorda ushbu axborotlar mavjud boʻlmasa, monopoliyaga qarshi organ tomonidan bunday axborotga ega boʻlgan boshqa shaxslardan soʻrab olinishi mumkin.

7. Aksiyadorlik jamiyatining aksiyalarini olish boʻyicha bitimlarni amalga oshirish uchun monopoliyaga qarshi organning oldindan roziligini olish investor tasarruf etish huquqini oladigan quyidagi hollarda zarur boʻladi:

oʻttiz besh va undan ortiq foizini tasarruf etish huquqini oladi, bunda ushbu olishga qadar u mazkur aksiyadorlik jamiyati ustav fondidagi (ustav kapitalidagi) aksiyalarni tasarruf etmagan yoki oʻttiz besh foizdan kamini tasarruf etgan boʻlsa;

ellik foizidan ortigʻini tasarruf etish huquqini oladi, bunda ushbu olishga qadar u mazkur aksiyadorlik jamiyati ustav fondidagi (ustav kapitalidagi) aksiyalarning kamida oʻttiz besh foizini va koʻpi bilan ellik foizini tasarruf etgan boʻlsa;

yetmish besh foizidan ortigʻini tasarruf etish huquqini oladi, bunda ushbu olishga qadar u mazkur aksiyadorlik jamiyati ustav fondidagi (ustav kapitalidagi) aksiyalarning kamida ellik foizini va koʻpi bilan yetmish besh foizini tasarruf etgan boʻlsa.

8. Masʼuliyati cheklangan yoki qoʻshimcha masʼuliyatli jamiyatning ustav fondidagi (ustav kapitalidagi) ulushlarni olish boʻyicha bitimlarni amalga oshirish uchun monopoliyaga qarshi organning oldindan roziligini olish investor tasarruf etish huquqini oladigan quyidagi hollarda zarur boʻladi:

ellik foizidan ortigʻini tasarruf etish huquqini oladi, bunda ushbu olishga qadar u mazkur jamiyatning ustav fondidagi (ustav kapitalidagi) ulushlarning koʻpi bilan ellik foizini tasarruf etgan boʻlsa;

ulushlarning uchdan ikki qismidan ortigʻini tasarruf etish huquqini oladi, bunda ushbu olishga qadar u mazkur jamiyatning ustav fondidagi (ustav kapitalidagi) ulushlarning kamida ellik foizini va koʻpi bilan uchdan ikki qismini tasarruf etgan boʻlsa.

9. Oʻttiz besh foizdan ellik foizgacha, ellik foizdan yetmish besh foizgacha va yetmish besh va undan ortiq foiz hajmdagi aksiyalarni, shuningdek ellik foizdan uchdan ikki qismigacha va uchdan ikki qismi hamda undan ortiq hajmdagi ulushlarni olishda monopoliyaga qarshi organning roziligini olish talab etilmaydi, mazkur Nizomning 7 va 8-bandlarida nazarda tutilgan hollar bundan mustasno.

10. Investor tomonidan aksiyalarni (ulushlarni) olish uchun oldindan rozilik shunday bitim tuzilguniga qadar olingan boʻlishi lozim.

11. Investor tomonidan aksiyalarni (ulushlarni) olishga rozilik berish masalasi:

a) Oʻzbekiston Respublikasi Monopoliyadan chiqarish va raqobatni rivojlantirish davlat qoʻmitasi tomonidan:

tovarlari respublika tovar bozorlarida aylanadigan xoʻjalik yurituvchi subyektlarning aksiyalarini (ulushlarini) olishda;

Respublika tovar bozorlarida ustun mavqeni egallab turgan xoʻjalik yurituvchi subyektlarning davlat reyestriga kiritilgan xoʻjalik yurituvchi subyekt aksiyalarini (ulushlarini) olishda;

tabiiy monopoliya subyektlarining aksiyalarini (ulushlarini) olishda;

aksiyalarni (ulushlarni) olishda, agar xoʻjalik yurituvchi subyekt hamda investor yoki shaxslar guruhi hisoblangan investorlar turli hududlarda joylashgan taqdirda;

chet ellik investorlar tomonidan aksiyalarni (ulushlarni) olishda koʻrib chiqiladi;

b) Oʻzbekiston Respublikasi Monopoliyadan chiqarish va raqobatni rivojlantirish davlat qoʻmitasining hududiy organlari tomonidan:

tovarlari mahalliy tovar bozorlarida aylanadigan xoʻjalik yurituvchi subyektlarning aksiyalarini (ulushlarini) olishda;

Mahalliy tovar bozorlarida ustun mavqeni egallab turgan xoʻjalik yurituvchi subyektlarning davlat reyestriga kiritilgan xoʻjalik yurituvchi subyektlar aksiyalarini (ulushlarini) olishda koʻrib chiqiladi.

12. Qimmatli qogʻozlar savdosining tashkilotchilari qimmatli qogʻozlar savdosini tashkillashtirish qoidalariga koʻra quyidagilarga majburdirlar, bundan qimmatli qogʻozlar egalari yoki qimmatli qogʻozlarga mulkiy huquq egalari mustasno:

investorni mazkur Nizomda nazarda tutilgan tartibga rioya qilishi zarurligi toʻgʻrisida xabardor qilish;

oʻttiz besh va undan ortiq foiz aksiyalarni oladigan bir martalik bitimlarni roʻyxatga olishda investorda monopoliyaga qarshi organning oldindan olinadigan roziligi mavjudligini tekshirish;

investor tomonidan monopoliyaga qarshi organning oldindan olinadigan roziligi taqdim qilinmaganda, ushbu bandning uchinchi xatboshisida nazarda tutilgan bitimni roʻyxatga olishni rad etish.

13. Aksiyalar boʻyicha bitimlarni roʻyxatga oluvchi depozitariylar quyidagilarga majburdirlar:

roʻyxatga olishni amalga oshiruvchi depozitariy tomonidan investorning aksiyalarni olish huquqini hisobga olish va tasdiqlashni amalga oshirishda, investorning oʻttiz besh va undan ortiq foiz aksiyalarga egalik qilishiga olib keladigan bir yoki bir nechta bitimlarni (bitimni) roʻyxatga olishda, investorda monopoliyaga qarshi organning oldindan olinadigan roziligi mavjudligini tekshirish;

investor tomonidan monopoliyaga qarshi organning oldindan olinadigan roziligi taqdim qilinmagan taqdirda, mazkur bandning ikkinchi xatboshisida nazarda tutilgan bitimni roʻyxatga olishni rad etish.

Qimmatli qogʻozlar markaziy depozitariysi investor tomonidan mazkur Nizomda nazarda tutilgan miqdorda aksiyalarni olish tartibi ustidan nazoratni amalga oshirish uchun har yili 15-martdan kech boʻlmagan muddatda Oʻzbekiston Respublikasi Monopoliyadan chiqarish va raqobatni rivojlantirish davlat qoʻmitasiga oʻttiz besh va undan ortiq foizga ega boʻlgan shaxslar roʻyxatini elektron shaklda taqdim etadi.

14. Depozitariylar raqobat toʻgʻrisidagi qonun hujjatlarining buzilish alomatlari yoki faktlari koʻrib chiqilayotganda monopoliyaga qarshi organning yozma soʻroviga asosan mijozlarning depo hisobvaraqlari boʻyicha maʼlumotlarni taqdim etadilar.

15. Monopoliyaga qarshi organ aksiyalarni (ulushlarni) olishda raqobat toʻgʻrisidagi qonun hujjatlariga rioya qilinishi ustidan nazoratni amalga oshirish uchun yuridik shaxslarni davlat roʻyxatidan oʻtkazishni amalga oshiruvchi organlarda taʼsis hujjatlariga kiritilgan investorning xoʻjalik yurituvchi subyekt ustav fondidagi (ustav kapitalidagi) ishtirok etish ulushining koʻpayishi bilan bogʻliq oʻzgartirish va qoʻshimchalarni roʻyxatga olishni xatlovdan oʻtkazadi.

16. Investor aksiyalarni (ulushlarni) olayotganda monopoliyaga qarshi organga:

bitim tuzishga oldindan rozilik berish toʻgʻrisidagi arizani;

yuridik shaxs uchun — barcha oʻzgartishlar hisobga olingan taʼsis hujjatlarining koʻchirma nusxalarini yoki jismoniy shaxs uchun — arizachining pasportiga oid maʼlumotlarni (hujjatning seriyasi va raqami, berilgan sanasi va joyi, hujjatni bergan organ);

ariza bergan kundan oldingi ikki yil mobaynida yoxud agar faoliyat ikki yildan kamroq muddatni tashkil etsa, investor tomonidan faoliyat amalga oshirilgan muddat mobaynida olib borilgan faoliyat turlari, ishlab chiqargan va realizatsiya qilgan tovar turlarining nomlari hamda ularning hajmlari toʻgʻrisidagi maʼlumotlarni;

oʻtgan ikki kalendar yilga doir moliyaviy (1 va 2-shakl) va statistika hisobotini;

shaxslar guruhining tarkibi toʻgʻrisidagi, bu shaxslarning ushbu guruhga kirish asoslari koʻrsatilgan maʼlumotlarni va aksiyalarni (ulushlarni) olish boʻyicha koʻrib chiqilayotgan bitimga taalluqli boshqa axborotni taqdim etadi.

17. Agar obyektiv sabablarga koʻra xorijiy investor moliyaviy va statistika hisobotini taqdim qila olmasa, bitim ushbu hujjatlar boʻlmagan taqdirda ham kelishiladi.

18. Bitimni tuzishga oldindan rozilik olish uchun arizada quyidagi maʼlumotlar koʻrsatilishi zarur:

xoʻjalik yurituvchi subyektning nomi;

investor sotib olayotgan aksiyalarning (ulushlarning) miqdori;

tuzilayotgan bitimning maqsadi;

investor va xoʻjalik yurituvchi subyektning saylab qoʻyiladigan va ijro etuvchi organlari tarkibiga kiradigan shaxslar roʻyxati;

investor va uni aksiyadorlarining (ishtirokchilarining) boshqa xoʻjalik yurituvchi subyektlarning ustav fondidagi (ustav kapitalidagi) ishtiroki toʻgʻrisida.

Ushbu bandda nazarda tutilgan maʼlumotlardan birortasi boʻlmagan taqdirda, investor bu haqda monopoliyaga qarshi organni yozma ravishda xabardor qiladi.

19. Amalga oshirilayotgan bitimning raqobatni cheklashga taʼsir koʻrsatuvchi faktlarini oʻrganish uchun monopoliyaga qarshi organ koʻrib chiqilayotgan bitimga doir qoʻshimcha maʼlumotlarni bevosita ularga egalik qiluvchi shaxslardan soʻrab olishi mumkin.

20. Monopoliyaga qarshi organ, agar:

bitimlar tuzishga oldindan rozilik berish toʻgʻrisidagi arizaning qanoatlantirilishi tovar bozorida tegishli xoʻjalik yurituvchi subyektning yoki shaxslar guruhining ustun mavqei yuzaga kelishiga yoki kuchayishiga va (yoki) raqobatning cheklanishiga olib kelishi mumkin boʻlsa;

taqdim etilgan hujjatlarni koʻrib chiqishda ularda bayon etilgan axborotning ishonchsizligi yoki yolgʻonligi aniqlansa, investorga aksiyalarning (ulushlarning) olinishiga oldindan rozilik berishni rad etishga haqli.

21. Tovar bozorlarida xoʻjalik yurituvchi subyekt va investorning ustun mavqei monopoliyaga qarshi organ tomonidan qonun hujjatlarida belgilangan tartibda aniqlanadi.

Xoʻjalik yurituvchi subyekt va investorning maʼlum bir tovar bozoridagi ulushlari yigʻindisi ularning yakka ulushlarining summasi sifatida, shuningdek xoʻjalik yurituvchi subyekt va investor aksiyalariga (ulushlariga) egalik qilayotgan boshqa yuridik shaxslar ulushlari sifatida qaraladi.

22. Investor tomonidan aksiyalarning (ulushlarning) olinishiga rozilik berish masalasi monopoliyaga qarshi organ rahbarining buyrugʻi bilan uning xodimlaridan tuziladigan maxsus komissiya tomonidan koʻrib chiqiladi.

23. Maxsus komissiya koʻrib chiqish natijalari boʻyicha ariza olingan paytdan boshlab oʻn kalendar kundan kechiktirmay, aksiyalarni (ulushlarni) olishga oldindan rozilik berish yoki rozilik berishni rad etish toʻgʻrisida qaror chiqaradi.

Aksiyalarning (ulushlarning) ayni bir turkumini olishga oldindan rozilik olish uchun shaxslar yoki shaxslar guruhlari bir vaqtning oʻzida murojaat etgan taqdirda monopoliyaga qarshi organning qarori arizachilarga ayni bir kunda yetkaziladi. Zarur hollarda, agar monopoliyaga qarshi organda bitim raqobatning cheklanishiga olib keladi yoki olib kelishi mumkin, shu jumladan tovar bozorida ustun mavqening vujudga kelishi yoxud kuchayishi orqali raqobatning cheklanishiga olib keladi yoki olib kelishi mumkin deb taxmin qilish uchun asoslar paydo boʻlsa, arizani koʻrib chiqish muddati bir oydan koʻp boʻlmagan muddatga uzaytirilishi mumkin.

Qaror maxsus komissiya raisi va uning aʼzolari tomonidan ikki nusxada imzolanadi hamda gerbli muhr bilan tasdiqlanadi.

Maxsus komissiya tomonidan koʻrib chiqish natijalari boʻyicha qabul qilingan qaror investorga qaror qabul qilingan kuni yuboriladi.

Yozma soʻrov boʻlgan hollarda, manfaatdor tomonlarga qarorning nusxasi beriladi.

Aksiyalarni (ulushlarni) olish boʻyicha bitim ushbu bitimni tuzishga rozilik berish toʻgʻrisidagi qaror qabul qilingan paytdan boshlab bir yil mobaynida tuzilishi shart. Ushbu muddatda bitim tuzilmagan taqdirda qaror oʻz kuchini yoʻqotadi.

24. Zarurat boʻlganda, maxsus komissiya majlisiga aksiyalarning (ulushlarning) olinishiga rozilik soʻrab monopoliyaga qarshi organga murojaat qilgan shaxslar (ularning vakillari ishonchnoma asosida), shuningdek ushbu bitimni tuzishdan manfaatdor boʻlgan boshqa shaxslar ham taklif qilinishi mumkin.

25. Monopoliyaga qarshi organ bitimlarni tuzishga oldindan rozilik berishga va buni raqobatni taʼminlashga qaratilgan talablarni bajarishga bogʻliq qilib qoʻyishga haqli.

Mazkur bitimlarning tuzilishi tovar bozorida tegishli xoʻjalik yurituvchi subyektning yoki shaxslar guruhining ustun mavqei yuzaga kelishiga yoki kuchayishiga va (yoki) raqobatning cheklanishiga olib kelishi mumkin boʻlgan taqdirda, bu bitimlarni tuzish toʻgʻrisida qaror qabul qilgan yuridik va (yoki) jismoniy shaxslar monopoliyaga qarshi organning talabiga koʻra raqobatning zarur shart-sharoitlarini tiklash chora-tadbirlarini koʻrishi shart.

26. Monopoliyaga qarshi organ tovar bozorida hatto xoʻjalik yurituvchi subyektning yoki shaxslar guruhining ustun mavqei yuzaga kelishi yoki kuchayishi va (yoki) raqobatning cheklanishi, noxush oqibatlar yuz berishi mumkin boʻlgan taqdirda ham, agar aksiyalarni (ulushlarni) olish boʻyicha bitimlar tuzish toʻgʻrisida qaror qabul qilgan yuridik va (yoki) jismoniy shaxslar bitimlari isteʼmolchilarga sezilarli darajada naf keltirishini isbotlab bersa, bitimlar tuzish uchun oldindan rozilik berish haqidagi arizani qanoatlantirishga haqli.

27. Monopoliyaga qarshi organning aksiyalarning olinishiga oldindan rozilik berishni rad etish toʻgʻrisidagi qarori aksiyalarni olish boʻyicha bitimni roʻyxatga olishni rad etish uchun asos boʻladi.

28. Investor mazkur Nizomning 7 va 8-bandlarida nazarda tutilgan miqdorlarda aksiyalarni (ulushlarni) olish uchun bir tomonlama bitimlarni (meros) tuzishda, ushbu bitimga asosan tegishli huquqqa ega boʻlgan kundan boshlab oʻn besh kalendar kun mobaynida monopoliyaga qarshi organni xabardor qilishi kerak.

Mazkur xabarnomada:

xoʻjalik yurituvchi subyektning nomi;

egalik qilinayotgan aksiyalarning (ulushlarning) miqdori;

boshqa aksiyalarga (ulushlarga) egalik qilishi toʻgʻrisidagi maʼlumot koʻrsatiladi.

29. Investor tomonidan aksiyalarga (ulushlarga) monopoliyaga qarshi organning oldindan roziligini olmasdan egalik qilish hollari aniqlanganda, qonun hujjatlariga muvofiq investorga nisbatan raqobat toʻgʻrisidagi qonun hujjatlarini buzilganlik haqidagi ish qoʻzgʻatiladi.

30. Raqobat toʻgʻrisidagi qonun hujjatlarini buzilganlik haqidagi ish monopoliyaga qarshi organning maxsus komissiyasi tomonidan koʻrib chiqiladi.

Maxsus komissiya tomonidan aksiyalarni (ulushlarni) olish tartibi buzilganlik haqidagi masala koʻrib chiqilayotganda Oʻzbekiston Respublikasi Davlat mulki qoʻmitasi huzuridagi Qimmatli qogʻozlar bozori faoliyatini muvofiqlashtirish va nazorat qilish markazining vakili ekspert sifatida taklif etilishi mumkin.

Maxsus komissiya ishni mazmunan koʻrib chiqish natijalari boʻyicha quyidagi qarorlardan birini qabul qiladi:

aksiyalarga (ulushlarga) egalik qilishni rad etish toʻgʻrisida;

aksiyalarga (ulushlarga) egalik qilishga rozilik berish toʻgʻrisida.

Aksiyalarga (ulushlarga) egalik qilishni rad etish toʻgʻrisida qaror qabul qilinganda, investorga dastlabki holatni tiklash va raqobat toʻgʻrisidagi qonun hujjatlarini buzishni toʻxtatish toʻgʻrisida koʻrsatma beriladi.

31. Maxsus komissiya qabul qilingan qarordan qatʼi nazar, aksiyalarni (ulushlarni) monopoliyaga qarshi organning oldindan roziligini olmasdan olganligi uchun investorga raqobat toʻgʻrisidagi qonun hujjatlariga muvofiq jarima soladi.

32. Monopoliyaga qarshi organning qoʻzgʻatilgan ishni koʻrish natijalari boʻyicha qabul qilgan qarori investorga, shuningdek manfaatdor tomonlarga qaror qabul qilingan kundan soʻng uch kalendar kundan kechiktirmay yuboriladi.

33. Monopoliyaga qarshi organning qarori asosida berilgan koʻrsatma unda belgilangan muddatlarda ijro etilishi shart.

Monopoliyaga qarshi organning oldindan berilgan roziligisiz sodir etilgan, xoʻjalik yurituvchi subyektning yoki shaxslar guruhining ustun mavqei yuzaga kelishiga yoki kuchayishiga va (yoki) raqobatning cheklanishiga olib keladigan bitimlar monopoliyaga qarshi organning daʼvosi asosida sud tomonidan haqiqiy emas deb topilishi mumkin.

34. Investor monopoliyaga qarshi organning qaroridan (koʻrsatmasidan) norozi boʻlgan taqdirda, qarorni butunlay yoki qisman haqiqiy emas deb topish toʻgʻrisidagi ariza bilan sudga yoxud qarorni (koʻrsatmani) bekor qilish yoki oʻzgartirish toʻgʻrisidagi ariza bilan yuqori turuvchi monopoliyaga qarshi organga murojaat qilishga haqli.

35. Mazkur Nizom Oʻzbekiston Respublikasi Davlat mulki qoʻmitasi huzuridagi Qimmatli qogʻozlar bozori faoliyatini muvofiqlashtirish va nazorat qilish markazi bilan kelishilgan.