“Kredit axboroti almashinuvi toʻgʻrisida”gi Oʻzbekiston Respublikasi Qonuniga muvofiq, shuningdek kredit axboroti almashinuvi tizimini yanada takomillashtirish, moliyaviy intizomni mustahkamlash, kredit bitimlari boʻyicha tavakkalchiliklarni kamaytirish, tijorat banklari va bank boʻlmagan kredit tashkilotlari tomonidan koʻrsatiladigan xizmatlar tezkorligini oshirish maqsadida Vazirlar Mahkamasi qaror qiladi:

1. Oʻzbekiston Respublikasi Markaziy banki, Oʻzbekiston Banklar uyushmasi va tijorat banklarining Banklararo kredit byurosi negizida “Kredit-axborot tahliliy markazi” kredit byurosi” masʼuliyati cheklangan jamiyatni tashkil etish, uning tarkibiga ilovaga* muvofiq muassislarni jalb etish toʻgʻrisidagi taklifiga rozilik berilsin.

2. Quyidagilar “Kredit-axborot tahliliy markazi” kredit byurosi” masʼuliyati cheklangan jamiyat faoliyatining asosiy yoʻnalishlari hisoblanishi maʼlumot uchun qabul qilinsin:

kredit axborotlari subyektlari boʻlgan yuridik va jismoniy shaxslarning kredit tarixlarini shakllantirish uchun zarur boʻlgan ular toʻgʻrisidagi maʼlumotlar bazasini shakllantirish va axborotni tahlil qilish;

kredit axboroti subyektlarining moliyaviy faoliyatini tahlil qilish va ularning reytingini baholash tizimini shakllantirish;

kredit axborotidan foydalanuvchilarga, shuningdek kredit axborotlari subyektlarining oʻziga ularning soʻrovlari boʻyicha kredit axborotlari subyektlarining kredit tarixi toʻgʻrisidagi maʼlumotlarni berish boʻyicha shartnoma asosida xizmatlar koʻrsatish;

kredit axboroti subyektlarining toʻlovga qodirligini, kreditga layoqatini va toʻlov intizomini baholashda kredit axborotidan foydalanuvchilarga koʻmaklashish maqsadida ularga maslahat xizmatlari va boshqa xizmatlar koʻrsatish.

3. Oʻzbekiston Respublikasi Markaziy bankiga:

kredit axboroti subyektlarining kredit bitimlari toʻgʻrisidagi maʼlumotlarni toʻplash va tegishli maʼlumotlar bazasini shakllantirish;

kredit axborotining davlat reyestrini yuritish;

kredit byurolarining Oʻzbekiston Respublikasi Markaziy bankiga beriladigan kredit axboroti maʼlumotlar bazasini jamlash;

kredit axborotining maʼlumotlar bazasini yangidan tashkil etilgan kredit byurolariga berish yuklansin.

4. Oʻzbekiston Respublikasi Markaziy bankiga bir oy muddatda:

Oʻzbekiston Respublikasi Moliya vazirligi, Davlat soliq qoʻmitasi, Ichki ishlar vazirligi hamda boshqa manfaatdor vazirliklar va idoralar bilan birgalikda kredit byurolari hamda kredit byurosiga kredit axboroti beruvchi organlar va tashkilotlar oʻrtasida axborotning aylanishi va berilishi tartibini, shuningdek kredit byurolari va kredit axborotidan foydalanuvchilar oʻrtasida kredit axboroti almashinuvi tartibini ishlab chiqish va belgilangan tartibda tasdiqlash;

“Kredit-axborot tahliliy markazi” kredit byurosi” masʼuliyati cheklangan jamiyatning davlat roʻyxatidan oʻtkazilishini va unga qonun hujjatlarida belgilangan tartibda litsenziya berilishini, shuningdek Oʻzbekiston Respublikasi Markaziy banki Kredit axborotining davlat reyestrini yuritish departamentining kredit axboroti maʼlumotlar bazasi berilishini taʼminlash;

manfaatdor vazirliklar va idoralar bilan birgalikda kredit byurosiga kredit axboroti beruvchi organlar va tashkilotlarning mutaxassislari uchun seminarlar va treninglar tashkil etish va oʻtkazish ishlarini amalga oshirish tavsiya qilinsin.

5. Oʻzbekiston Milliy axborot agentligi, Oʻzbekiston milliy teleradiokompaniyasi va boshqa ommaviy axborot vositalari Oʻzbekiston Respublikasining “Kredit axboroti almashinuvi toʻgʻrisida” 2011-yil 4-oktabrdagi OʻRQ-301-son Qonuni normalari keng yoritilishini taʼminlasinlar.

7. Vazirlar Mahkamasining “Qarz oluvchilarning kredit tarixi toʻgʻrisidagi axborotni hisobga olish tizimini shakllantirish chora-tadbirlari toʻgʻrisida” 2004-yil 23-apreldagi 197-son qarori oʻz kuchini yoʻqotgan deb hisoblansin.

8. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S.Azimov va Oʻzbekiston Respublikasi Markaziy banki raisi F.M.Mullajonov zimmasiga yuklansin.