Qoraqalpogʻiston Respublikasi, Buxoro va Xorazm viloyatlari isteʼmolchilarini yoqilgʻi-energetika resurslari bilan barqaror taʼminlash maqsadida Vazirlar Mahkamasi qaror qiladi:

1. Iqtisodiyot vazirligi, Moliya vazirligi, “Oʻzbekenergo” davlat-aksiyadorlik kompaniyasi, “Oʻzbekkoʻmir” ochiq aksiyadorlik jamiyati, Qoraqalpogʻiston Respublikasi Vazirlar Kengashi, Buxoro va Xorazm viloyatlari hokimliklarining 2012-yil 1-iyulgacha boʻlgan muddatda “Oʻzbekkoʻmir” ochiq aksiyadorlik jamiyatining ilovaga* muvofiq roʻyxat boʻyicha aholiga va budjet tashkilotlariga koʻmir yetkazib berish boʻyicha 12 filiali boʻlgan 3 ta distribyutorlik markazlarini (keyingi oʻrinlarda hududiy distribyutorlik markazlari deb ataladi) tashkil etish toʻgʻrisidagi takliflariga rozilik berilsin.

2. Belgilansinki:

“Oʻzbekkoʻmir” ochiq aksiyadorlik jamiyatining 2,1 mlrd soʻm miqdoridagi oʻz mablagʻlari va “Xalq banki” davlat-aksiyadorlik tijorat bankining 1 yil imtiyozli davrni qoʻshgan holda 3 yilgacha muddatga yillik 16 foizli stavka bilan beriladigan 7,4 mlrd soʻm miqdoridagi kredit mablagʻlari hududiy distribyutorlik markazlarini tashkil etish ishlarini moliyalashtirish manbalari hisoblanadi;

hududiy distribyutorlik markazlarini tashkil etish boʻyicha loyiha-smeta hujjatlarini ishlab chiqish “Oʻzbekkoʻmir” ochiq aksiyadorlik jamiyatining loyihalash ishlari boshqarmasi tomonidan 2012-yil 1-aprelgacha boʻlgan muddatda amalga oshiriladi;

“Oʻzbekkoʻmir” ochiq aksiyadorlik jamiyatining “Koʻmir kon qurilish” unitar korxonasi hududiy distribyutorlik markazlarini qurish va jihozlash boʻyicha bosh pudratchi hisoblanadi.

3. Qoraqalpogʻiston Respublikasi Vazirlar Kengashi, Buxoro va Xorazm viloyatlari hokimliklari hududiy distribyutorlik markazlarini qurish uchun yer uchastkasi ajratilishini bir oy muddatda taʼminlasinlar.

4. Oʻzbekiston Respublikasi Moliya vazirligi Monopoliyadan chiqarish va raqobatni rivojlantirish davlat qoʻmitasi, boshqa manfaatdor vazirliklar va idoralar bilan birgalikda “Oʻzbekkoʻmir” ochiq aksiyadorlik jamiyatining hududiy distribyutorlik markazlari orqali sotiladigan koʻmirning chakana narxini shakllantirish tartibini belgilangan tartibda ishlab chiqsin va tasdiqlasin.

5. Oʻzbekiston Respublikasi Monopoliyadan chiqarish va raqobatni rivojlantirish davlat qoʻmitasi hududiy distribyutorlik markazlari orqali sotiladigan koʻmirning hajmlari va narxlari yuzasidan nazorat va monitoringni belgilangan tartibda amalga oshirsin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari Gʻ.I.Ibragimov zimmasiga yuklansin.