Qimmatli qogʻozlar bozorini rivojlantirish, chuqurlashtirish va kengaytirish borasida davlat siyosatini amalga oshirish, uni jonlantirish yoʻlidagi mavjud toʻsiqlarni olib tashlash, shuningdek aksiyador investorlarning huquq va manfaatlari himoya qilinishini taʼminlash maqsadida:

1. Oʻzbekiston Respublikasi Moliya vazirligi huzurida davlat boshqaruv organi maqomiga ega boʻlgan qimmatli qogʻozlar va fond birjalari boʻyicha Davlat komissiyasi tuzilsin.

2. Belgilab qoʻyilsinki, Davlat komissiyasining faoliyat koʻrsatishi uning ishchi apparati va ilovaga* muvofiq tarkibdagi Muvofiqlashtiruvchi kengash tomonidan taʼminlanadi. Muvofiqlashtiruvchi kengash zimmasiga qimmatli qogʻozlar bozorini shakllantirishga va rivojlantirishga konseptual yondashish, fond bozorini davlat tomonidan tartibga solib borish boʻyicha tavsiyalar ishlab chiqish hamda ushbu sohada qonunchilikni takomillashtirishga doir takliflar tayyorlash masalalari yuklansin.

3. Qimmatli qogʻozlar bozorini shakllantirish, rivojlantirish, nazorat qilish va tartibga solish sohasida davlat siyosatini amalga oshirish Oʻzbekiston Respublikasi Moliya vazirligi huzuridagi qimmatli qogʻozlar va fond birjalari boʻyicha Davlat komissiyasining asosiy vazifasi deb hisoblansin.

4. Davlat komissiyasi zimmasiga quyidagi vazifalarni hal etish yuklansin:

— oʻzbek va xorijiy emitentlarning qimmatli qogʻozlarni chiqarish hamda ularning milliy va xalqaro qimmatli qogʻozlar bozorida samarali muomalada boʻlishi uchun zarur huquqiy shartlarni taʼminlovchi meʼyoriy hujjatlarni ishlab chiqish;

— qimmatli qogʻozlarni, shu jumladan xorijiy emitentlarning qimmatli qogʻozlarni ham roʻyxatga olish, bozorga chiqarish va muomalasini tartibga solish;

— qimmatli qogʻozlar bilan operatsiyalarni amalga oshiruvchi investorlarning, ham yuridik, ham jismoniy shaxslarning huquq va manfaatlarini himoya qilish;

— qimmatli qogʻozlar bozorining samarali infrastrukturasini vujudga keltirishda tegishli davlat organlari bilan birgalikda ishtirok etish;

— Oʻzbekiston Respublikasi vazirliklari, idoralari, mahalliy boshqaruv organlarining va qimmatli qogʻozlar bozori bevosita qatnashchilarining faoliyatini muvofiqlashtirish;

— respublikada roʻyxatga olingan qimmatli qogʻozlar, shuningdek, investitsiya institutlari sifatida faoliyat koʻrsatish uchun litsenziya olgan yuridik shaxslarning Yagona davlat roʻyxatlarini olib borish;

— qimmatli qogʻozlar emissiyasi va muomalasi masalalariga oid qonunlarga rioya etilishini nazorat qilish;

— hisob-kitob va hisob yuritish, qimmatli qogʻozlar bozorini tashkil etish va rivojlantirish toʻgʻrisidagi maʼlumotlar bankini shakllantirish, investorlar va jamoatchilikni keng xabardor qilish.

5. Oʻzbekiston Respublikasi Davlat mulki qoʻmitasi qimmatli qogʻozlar va fond birjalari boʻyicha Davlat komissiyasi bilan birgalikda:

— investitsiya institutlarining fond birjasidagi savdolarga bab-baravar kirishini;

— haqiqiy talab va taklifni, emitentlarning moliyaviy-iqtisodiy koʻrsatkichlarini, qimmatli qogʻozlarning sotilish darajasini hisobga olgan xolda qimmatli qogʻozlar ochiq savdoga qoʻyilishini taʼminlasin.

6 Qimmatli qogʻozlar bozori qatnashchilarining manfaatdorligini oshirish, fond bozorida operatsiyalarni faollashtirish maqsadida:

— 1995-yil 1-iyuldan boshlab Oʻzbekiston Respublikasi yuridik va jismoniy shaxslarning dividendlar holida qimmatli qogʻozlarning aylanishidan, qimmatli qogʻozlarning sotib olish va sotish narxlari oʻrtasidagi tafovutdan olingan daromadlari uch yil muddatgacha soliqqa tortilishdan ozod qilinsin;

— 1995-yil 1-sentabrdan boshlab qimmatli qogʻozlar oldi-sotdi shartnomasini tuzish chogʻida bitim qatnashchilaridan olinadigan qimmatli qogʻozlar operatsiyasi soligʻi bekor qilinsin;

— 1995-yil 1-sentabrdan boshlab qimmatli qogʻozlar emissiyasi prospektini roʻyxatdan oʻtkazish chogʻida emitentdan olinadigan qimmatli qogʻozlar operatsiyasi soligʻining stavkasi emissiya oʻz qiymatining 0,5 foizidan 0,1 foiziga kamaytirilsin.

7. Qimmatli qogʻozlar bozorida xorijiy investorlarning qatnashishini ragʻbatlantirish maqsadida Oʻzbekiston Respublikasi Moliya vazirligi, Markaziy bank, Davlat soliq qoʻmitasi qimmatli qogʻozlar va fond birjalari Davlat komissiyasi bilan birgalikda:

— xorijiy investorlarning Oʻzbekiston Respublikasi emitentlarining qimmatli qogʻozlarini sotib olishga, qoʻyilgan mablagʻlarni va ular boʻyicha olingan daromadlarini konvertatsiyalashga, keyinchalik amaldagi qonunchilikka muvofiq repatriatsiya qilishga boʻlgan huquqlarning amalga oshirilishi ustidan qattiq nazoratni taʼminlasinlar;

— xorijiy emitentlarning qimmatli qogʻozlarini Oʻzbekiston Respublikasi hududida va Oʻzbekiston emitentlarinikini chet mamlakatlarga kiritish, roʻyxatdan oʻtkazish va joylashtirish tartibini 10 kun muddatda ishlab chiqsinlar va tasdiqlasinlar.

8. Oʻzbekiston Respublikasi Prezidentining “Davlat mulki korxonalarini aksiyalashtirish va qimmatli qogʻozlar bozorini takomillashtirishni jadallashtirishga oid chora-tadbirlar toʻgʻrisida”gi Farmoni 6-bandining 2-xatboshisi oʻz kuchini yoʻqotgan deb hisoblansin.

9. Oʻzbekiston Respublikasi Adliya vazirligi 10 kun muddatda Oʻzbekiston Respublikasining amaldagi qonunlariga ushbu Farmondan kelib chiqadigan oʻzgartishlarni kiritish toʻgʻrisida takliflar tayyorlasin.

10. Oʻzbekiston Respublikasi Vazirlar Mahkamasi 10 kun muddatda ushbu Farmonni amalga oshirish yuzasidan tashkiliy tadbirlar toʻgʻrisida qaror qabul qilish.

11. Mazkur Farmonning bajarilishini nazorat qilish Oʻzbekiston Respublikasi Vazirlar Mahkamasi zimmasiga yuklansin.