O‘zbekiston Respublikasi Prezidentining “Geologiya-qidiruv ishlarini tashkil etish va olib borish tizimi samaradorligini yanada oshirish chora-tadbirlari to‘g‘risida” 2010-yil 27-avgustdagi PQ-1396-son qarorini bajarish yuzasidan Vazirlar Mahkamasi qaror qiladi:

1. O‘zbekiston Respublikasi Davlat geologiya va mineral resurslar qo‘mitasi to‘g‘risidagi nizom 1-ilovaga muvofiq tasdiqlansin.

2. O‘zbekiston Respublikasi Hukumatining 2-ilovaga muvofiq ayrim qarorlari o‘z kuchini yo‘qotgan deb hisoblansin.

3. Mazkur qarorning bajarilishini nazorat qilish O‘zbekiston Respublikasi Bosh vazirining o‘rinbosari G‘.I. Ibragimov zimmasiga yuklansin.

1. O‘zbekiston Respublikasi Davlat geologiya va mineral resurslar qo‘mitasi (keyingi o‘rinlarda Davlat geologiya qo‘mitasi deb ataladi) davlat boshqaruvi organi hisoblanadi.

Davlat geologiya qo‘mitasi o‘z faoliyatida O‘zbekiston Respublikasi Vazirlar Mahkamasiga hisobot beradi.

2. Davlat geologiya qo‘mitasi o‘z faoliyatida O‘zbekiston Respublikasi Konstitutsiyasi va qonunlariga, O‘zbekiston Respublikasi Oliy Majlisi palatalari qarorlariga, O‘zbekiston Respublikasi Prezidentining farmonlari, qarorlari va farmoyishlariga, O‘zbekiston Respublikasi Vazirlar Mahkamasining qarorlari va farmoyishlariga, boshqa normativ-huquqiy hujjatlarga hamda mazkur Nizomga amal qiladi.

3. Davlat geologiya qo‘mitasi o‘z faoliyatini davlat va xo‘jalik boshqaruvining boshqa organlari, mahalliy davlat hokimiyati organlari hamda boshqa tashkilotlar bilan o‘zaro hamkorlikda amalga oshiradi.

4. Davlat geologiya qo‘mitasi yuridik shaxs hisoblanadi, O‘zbekiston Respublikasi Davlat gerbi tasviri tushirilgan va o‘z nomi davlat tilida yozilgan muhrga hamda blankalarga, shuningdek banklarda qonun hujjatlariga muvofiq ochiladigan hisob raqamlariga ega bo‘ladi.

5. Quyidagilar Davlat geologiya qo‘mitasining asosiy vazifalari hisoblanadi:

yer osti boyliklarini geologik o‘rganish, ulardan foydalanish va ularni muhofaza qilish, mineral-xomashyo bazasini takroriy ishlab chiqarish sohasida yagona davlat siyosatini ro‘yobga chiqarish, kon munosabatlari sohasida davlat boshqaruvini amalga oshirish;

hududlarni mintaqaviy geologik o‘rganish yuzasidan kompleks tadqiqotlar sifatli amalga oshirilishini ta’minlash hamda foydali qazilmalar zaxiralarini prognozlashtirishning zamonaviy texnologiyalarini va ilg‘or usullarini keng qo‘llagan holda davlat geologik suratga olishlarini tizimli asosda olib borish asosida geologik axborotlarning xolisonaligini va ishonchliligini oshirish;

Davlat geologiya qo‘mitasi korxonalari tomonidan bajariladigan gidromineral resurslar, qattiq noruda foydali qazilmalar, qora va kamyob metallar, kamyob yer elementlari, foydali qazilmalarning yangi (noan’anaviy) turlari konlarini qidirib topish, baholash va razvedka qilish samaradorligini oshirishni ta’minlovchi geologiya-qidiruv ishlarini sifatli prognoz qilish;

prognoz qilishning ilg‘or metodlaridan foydalangan holda yer osti boyliklari to‘g‘risidagi geologik va boshqa axborotlarni chuqur ilmiy tahlil qilish, foydali qazilmalar konlarini (uglevodorodlardan tashqari) qidirish va baholash natijalari asosida mineral xomashyo bazasini rivojlantirish va takror hosil qilishning uzoq muddatli (3 yildan ortiq davrga), o‘rta muddatli (3 yilgacha bo‘lgan davrga) hamda har yilgi davlat dasturlarini respublikaning kon-metallurgiya kombinatlari bilan birgalikda shakllantirish, shuningdek ularning amalga oshirilishini ta’minlash;

geologiya-qidiruv ishlari samadorligini baholash va tarmoqning yakuniy natijalariga — yer osti boyliklari hamda gidromineral resurslar, qattiq noruda foydali qazilmalar, qora va kamyob metallar, kamyob yer elementlarining sanoat zaxiralarini ko‘paytirish to‘g‘risidagi boshqa axborotlarning to‘liqligi va sifati bilan bog‘liq holda rag‘batlantirish asosida geologiya-qidiruv ishlarini moliyalashtirishning zamonaviy metodlarini joriy etish;

tasarrufidagi tashkilotlarni tubdan modernizatsiya qilish va texnik jihatdan qayta jihozlash, ularning moddiy-texnika bazasini mustahkamlash;

ushbu sohadagi ilg‘or tajribadan foydalangan holda geologiya tarmog‘i uchun kadrlarni tayyorlash va qayta tayyorlashni tizimli asosda amalga oshirish, shuningdek respublikaning oliy va o‘rta ta’lim muassasalarida kadrlar tayyorlash yo‘nalishlari bo‘yicha takliflar kiritish.

6. Davlat geologiya qo‘mitasi o‘ziga yuklangan vazifalarga muvofiq quyidagi funksiyalarni bajaradi:

O‘zbekiston hududining geologik jihatdan o‘rganilganligini tahlil qiladi, bunda mintaqaviy geologik tadqiqotlarni va amaldagi kartografik asoslarning davlat tomonidan geologik suratga olishlarning yangi materiallari, boshqa tadqiqotlar natijalari bilan yangilanganlik darajasini hisobga oladi;

manfaatdor vazirliklar, idoralar, mahalliy davlat hokimiyati organlari va tashkilotlar bilan birgalikda mineral-xomashyo bazasidan foydalanish, ularni yanada kengaytirish, mustahkamlash va sifat jihatidan yaxshilash, ulardan oqilona va kompleks foydalanish strategiyasi hamda ushbu maqsadlar uchun zarur bo‘lgan davlat investitsiyalari va boshqa investitsiyalar hajmlari haqida takliflar ishlab chiqadi;

respublikani iqtisodiy va ijtimoiy rivojlantirish prognozlarini ishlab chiqishda, respublikaning mineral-xomashyo bazasini rivojlantirish va takroriy ishlab chiqarish, yer osti boyliklarini muhofaza qilish davlat dasturlarini, yer osti boyliklarini geologik o‘rganish va muhofaza qilish xalqaro dasturlarini ishlab chiqishda va amalga oshirishda o‘z vakolatlari doirasida qatnashadi;

kon-metallurgiya kombinatlari bilan birgalikda, O‘zbekiston Respublikasi Iqtisodiyot vazirligi va Moliya vazirligi bilan kelishgan holda uzoq muddatli (3 yildan ortiq davrga) va o‘rta muddatli (3 yilgacha bo‘lgan davrga) mineral xomashyo bazasini rivojlantirish va takror hosil qilishning davlat dasturlarini ishlab chiqadi hamda tasdiqlash uchun O‘zbekiston Respublikasi Vazirlar Mahkamasiga kiritadi;

mineral xomashyo bazasini rivojlantirish va takror hosil qilishning uzoq muddatli va o‘rta muddatli davlat dasturlarini amalga oshirish doirasida Davlat geologiya qo‘mitasi tizimi bo‘yicha mineral xomashyo bazasini rivojlantirish va takror hosil qilishning har yilgi davlat dasturlarini O‘zbekiston Respublikasi Iqtisodiyot vazirligi va Moliya vazirligi bilan kelishgan holda ishlab chiqadi va tasdiqlaydi;

mineral xomashyo bazasini rivojlantirish va takror hosil qilishning uzoq muddatli, o‘rta muddatli va har yilgi davlat dasturlarini ishlab chiqishda vakolatli organlar va manfaatdor tashkilotlar bilan kelishgan holda gidromineral resurslar, qattiq noruda foydali qazilmalar, qora va kamyob metallar, kamyob yer elementlari zaxiralarini ko‘paytirish bo‘yicha davlat buyurtmasi loyihalari shakllantirilishini ta’minlaydi;

tizimli asosda zamonaviy ilmtalab texnologiyalar va asbob-uskunalarni geologiya-qidiruv ishlariga joriy etishni amalga oshiradi, shuningdek Davlat geologiya qo‘mitasi tasarrufidagi korxonalar va tashkilotlarni modernizatsiya qilish hamda texnik jihatdan qayta jihozlash bo‘yicha o‘z vaqtida chora-tadbirlar ko‘radi;

fundamental va amaliy ilm-fanning ilg‘or yutuqlari asosida yer osti boyliklarini geologik o‘rganish va mineral resurslardan foydalanish sohasida mavzuli, tajriba-konstruktorlik ishlari, konlar va kon jinslarining texnologik tadqiqotlari, shuningdek boshqa ishlarning ustuvor yo‘nalishlarini ilmiy asoslaydi;

respublika hududlarini kompleks ravishda mintaqaviy o‘rganish, turli masshtablarda davlat tomonidan geologik suratga olishlar natijalari, geofizik, geokimyoviy, geoekologik, aerokosmofotogeologik, gidrogeologik, muhandislik-geologik tadqiqotlar hamda ixtisoslashtirilgan jadal izlash ishlari asosida qattiq foydali qazilmalar (shu jumladan noyob va rangli metallar, uran), yer osti chuchuk va mineral suvlarning istiqbolli konlari hududlarini aniqlaydi;

geologiya-qidiruv ishlarini o‘tkazish amaliyotiga yangi metodlar va texnologiyalarni, shu jumladan masofadan amalga oshiriladigan metodlar va texnologiyalarni joriy etishni ta’minlaydi;

respublika hududini mintaqaviy geologik o‘rganish, geoekologik ishlarni bajarish, davlat tomonidan geologik suratga olish, ixtisoslashtirilgan jadal izlash ishlari, gidromineral resurslar, qattiq noruda foydali qazilmalar, qora va kamyob metallar, kamyob yer elementlari, ilmiy-tadqiqot va tajriba-konstruktorlik ishlari bo‘yicha kompleks tadqiqotlar o‘tkazish yuzasidan davlat buyurtmalarini tasarrufidagi korxonalar va tashkilotlar o‘rtasida joylashtiradi, ularni bajarishni davlat budjeti mablag‘lari va boshqa mablag‘lar hisobiga moliyalashtiradi;

davlat budjeti mablag‘lari hisobiga yer osti boyliklarini geologik o‘rganish ishlarini amalga oshiruvchi yuridik va jismoniy shaxslar tomonidan bajarilishi majburiy bo‘lgan yer osti boyliklarini geologik o‘rganish ishlarini loyihalash va yuritish sohasidagi norma va qoidalarni o‘z vakolatlari doirasida ishlab chiqadi va tasdiqlaydi;

mineral xomashyo bazasini rivojlantirish va takror hosil qilishning tasdiqlangan davlat dasturlariga muvofiq yer osti boyliklarini geologik o‘rganish ishlarini muvofiqlashtiradi va amalga oshiradi;

yer osti boyliklarini geologik o‘rganish ishlari olib borilishini, gidromineral resurslar, qattiq noruda foydali qazilmalar, qora va kamyob metallar, kamyob yer elementlari zaxiralarini ko‘paytirish va respublikaning moddiy-xomashyo bazasi shakllantirilishi, mustahkamlanishi va kengaytirilishi bo‘yicha (uglevodorod xomashyo, noyob va rangli metallar, urandan tashqari) hamda respublika hududini geologik o‘rganish sohasidagi boshqa ishlar bo‘yicha topshiriqlarning bajarilishini ta’minlaydi;

Davlat geologiya qo‘mitasi tizimi bo‘yicha mineral xomashyo bazasini rivojlantirish va takror hosil qilishning har yilgi dasturlari, gidromineral resurslar, qattiq noruda foydali qazilmalar, qora va kamyob metallar, kamyob yer elementlari zaxiralarini ko‘paytirish bo‘yicha topshiriqlar bajarilishining har choraklik monitoringini amalga oshiradi;

O‘zbekiston hududining geologik-ekologik tadqiqotlari dasturlarini ishlab chiqish va amalga oshirishda ishtirok etadi;

o‘z vakolati doirasida yer osti boyliklari uchastkalaridan foydalanish huquqiga berilgan litsenziyalarda belgilangan shartlarga, yer osti boyliklarini geologik o‘rganish ishlarini loyihalash sohasidagi norma va qoidalarga yer osti boyliklaridan foydalanuvchilar tomonidan rioya etilishini nazorat qiladi;

tasarrufidagi korxonalarga yer osti boyliklarini geologik o‘rganish ishlarini amalga oshirish uchun ajratiladigan davlat mablag‘laridan foydalanilishini nazorat qiladi;

tadbirkorlik tavakkalchiligi sharoitlarida geologik o‘rganish, foydali qazilmalarni qazib olish, texnogen mineral hosilalardan foydalanish, foydali qazilmalarni qazib olish bilan bog‘liq bo‘lmagan yer osti inshootlari qurish va ulardan foydalanish uchun yer osti uchastkalaridan foydalanish (chiqindilarni saqlash va ko‘mish maqsadida yer osti inshootlari qurish va ulardan foydalanish huquqi uchun litsenziyalardan tashqari), qo‘riqlanadigan geologik obyektlar hosilalaridan foydalanish hamda tovlanadigan tosh xomashyo, paleontologik qoldiqlar namunalarini va boshqa geologik kolleksiya materiallarini to‘plash huquqini beruvchi litsenziyalarni qonun hujjatlarida belgilangan tartibda beradi;

tasarrufidagi korxonalar uchun davlat budjeti mablag‘lari hisobiga geologik o‘rganish uchun yer osti boyliklari uchastkalaridan foydalanish huquqi paydo bo‘lishining asosi hisoblanadigan yer osti boyliklarini geologik o‘rganishga doir loyiha-smeta hujjatlarini o‘z vakolatlari doirasida tasdiqlaydi;

O‘zbekiston Respublikasi Vazirlar Mahkamasi tomonidan belgilangan tartibda, foydalanish uchun berilgan yer osti boyliklari uchastkalarining davlat hisobini yuritadi, yer osti boyliklari uchastkalaridan foydalanish huquqini va yer osti boyliklarini geologik o‘rganish ishlarining davlat hisobini yuritish huquqini davlat ro‘yxatidan o‘tkazadi;

Davlat geologiya qo‘mitasi tizimi bo‘yicha davlat mablag‘lari hisobiga olingan yer osti boyliklari to‘g‘risidagi geologik va boshqa axborotlarga mulkdor huquqi va majburiyatlarini amalga oshiradi;

ham davlat mablag‘lari hisobiga, ham yer osti boyliklaridan foydalanuvchilarning o‘z mablag‘lari hisobiga o‘tkazilgan geologiya-qidiruv ishlari natijasida olingan geologik va foydali qazilmalarning barcha turlari bo‘yicha yer osti boyliklari to‘g‘risidagi boshqa axborotlarni hisobga oladi, saqlaydi va tizimlashtiradi;

yer osti boyliklarini geologik o‘rganish ishlarini olib borish yuzasidan loyiha-smeta hujjatlari ekspertizasini tashkil etadi va uning amalga oshirilishini ta’minlaydi;

O‘zbekiston Respublikasi Davlat tabiatni muhofaza qilish qo‘mitasi va “Sanoatgeokontexnazorat” davlat inspeksiyasi bilan birgalikda O‘zbekiston Respublikasining keng tarqalgan foydali qazilmalari ro‘yxatini aniqlaydi hamda uni tasdiqlash uchun O‘zbekiston Respublikasi Vazirlar Mahkamasiga taqdim etadi;

yer osti boyliklari to‘g‘risidagi geologik va boshqa axborotlarning davlat fondini, geologik tosh materiallar davlat fondini yuritadi;

foydali qazilmalarning istiqboli konlarini aniqlash mumkin bo‘lgan konlar va yer osti boyliklari uchastkalari davlat reyestrini (o‘z vakolatlari doirasida), foydali qazilmalar zaxiralari davlat balansini, konlarning, foydali qazilmalar va texnogen mineral hosilalar namoyon bo‘lishi davlat kadastrini, davlat suv (yer osti suvlari) kadastrini, yuqori darajada tabiiy xavfli zonalar (xavfli geologik jarayonlar paydo bo‘ladigan zonalar) davlat kadastrini yuritadi, shuningdek muhofaza qilinadigan tabiiy hududlar davlat kadastriga binoan chuchuk yer osti suvlari konlarining shakllanish zonalari bo‘yicha ma’lumotlarni tuzadi va taqdim etadi;

manfaatdor vazirliklar va idoralar bilan o‘zaro hamkorlikda yer osti boyliklari davlat monitoringi, shu jumladan yer osti suvlari monitoringi amalga oshirilishini ta’minlaydi;

tog‘li hududlarda xavfli geologik jarayonlar (ko‘chki, o‘pirilish, cho‘kish, suffoziylar, karstlar)ni o‘rganish, shuningdek ularning hosil bo‘lishi va rivojlanishini kuzatish ishlarini amalga oshiradi;

qo‘shni davlatlarning geologiya xizmatlari bilan birgalikda transchegara hududlar doirasida radioaktiv va toksik elementlar bilan ifloslanish o‘choqlarini aniqlash va o‘rganish ishlarini amalga oshiradi, qo‘shni hududlarning ekologik holatiga salbiy ta’sir ko‘rsatishi mumkin bo‘lgan alohida xavfli zonalar va uchastkalarni aks ettirgan holda geologiya xaritalari va atlaslarini tuzadi hamda ularni O‘zbekiston Respublikasi Vazirlar Mahkamasiga, manfaatdor vazirliklar va idoralarga taqdim etadi;

vazirliklar va idoralar bilan birgalikda suv resurslaridan (yer osti suvlaridan) foydalanish hamda hududlarni texnogen va xavfli geologik jarayonlar ta’siridan himoya qilish sxemalarini ishlab chiqadi;

geologiya va mineralogiya obyektlari qo‘riqlanishi, shuningdek yer osti suvlarining ifloslanish va qurib qolishdan qo‘riqlanishi yuzasidan nazoratni qonun hujjatlarida belgilangan tartibda amalga oshiradi;

suv quduqlari burg‘ulashga ruxsatnoma va suvdan (yer osti suvlaridan) maxsus foydalanishga ruxsatnoma berilishini kelishadi;

respublika hududining sho‘rlanishiga va cho‘lga aylanishiga ta’sir ko‘rsatuvchi mintaqaviy ekzogen geologik jarayonlarni o‘rganadi;

kelgusida sanoat va xo‘jalik qurilishi obyektlarini joylashtirish uchun muhandislik-geologiya, gidrogeologiya va ekologiya-geologiya asoslashlarini tayyorlaydi;

qurilayotgan va rekonstruksiya qilinayotgan yirik sanoat va qishloq xo‘jaligi obyektlarining atrof muhitga ta’sirini baholash ishlarida o‘z vakolatlari doirasida qatnashadi;

yer osti boyliklari uchastkalaridan foydalanish huquqini berish yuzasidan ochiq savdolar tashkil etilishi va o‘tkazilishiga vazirliklar va idoralar bilan birgalikda materiallar tayyorlaydi va ularda qatnashadi, yer osti boyliklari uchastkalaridan foydalanish bilan bog‘liq investitsiya loyihalarining texnik-iqtisodiy asoslashlari ishlab chiqilishida qatnashadi;

vazirliklar, idoralar va mahalliy davlat hokimiyati organlari bilan birgalikda yer osti boyliklarini geologik o‘rganish, ulardan foydalanish va ularni muhofaza qilish sohasida tashqi iqtisodiy aloqalarni rivojlantirish strategiyasi to‘g‘risida takliflar ishlab chiqadi;

xorijiy investitsiyalarni jalb etish ishlarini olib boradi, xorijiy investorlar bilan to‘g‘ridan to‘g‘rimuzokaralar o‘tkazadi va ularga yer osti boyliklari uchastkalaridan foydalanish huquqini berish to‘g‘risida (o‘z vakolatlari doirasida) O‘zbekiston Respublikasi Vazirlar Mahkamasiga takliflar kiritadi;

Davlat geologiya qo‘mitasi vakolatiga kiradigan masalalar bo‘yicha xalqaro hamkorlikni amalga oshiradi, konferensiyalar, simpoziumlar, ko‘rgazmalar tashkil qiladi, xalqaro tashkilotlar, boshqa mamlakatlarning geologiya xizmatlari bilan belgilangan tartibda aloqalar o‘rnatadi;

O‘zbekiston Respublikasining xalqaro tashkilotlardagi a’zoligidan hamda yer osti boyliklarini geologik o‘rganish, ulardan foydalanish va ularni muhofaza qilish, mineral-xomashyo potensialini takroriy ishlab chiqarish va rivojlantirish sohasida xalqaro shartnomalarda ishtirok etishidan kelib chiquvchi majburiyatlar bajarilishini tashkil etishda va ularning muvofiqlashtirilishida qatnashadi;

respublika mineral-xomashyo bazasining holati to‘g‘risidagi axborot tizimlari faoliyat ko‘rsatishi va rivojlanishini ta’minlaydi, yer osti boyliklarini geologik o‘rganish, ulardan foydalanish va ularni muhofaza qilish sohasida noshirlik faoliyatini belgilangan tartibda amalga oshiradi;

manfaatdor vazirliklar va idoralar bilan birgalikda geologiya-qidiruv ishlariga (mineral-xomashyo bazasini takroriy ishlab chiqarishga) xarajatlarni qoplash stavkalari miqdorlarini, geologiya-qidiruv ishlarini moliyalashtirish va ularga kreditlar ajratish bo‘yicha normativ-huquqiy hujjatlarni ishlab chiqadi;

ekstremal sharoitlarda (suvsizlik, baland tog‘li, yer osti va boshqa sharoitlarda) ishlarni olib borish uchun qo‘shimcha haq miqdorlarini belgilash yuzasidan takliflarni asoslaydi va ishlab chiqadi;

tasarrufidagi korxonalar va tashkilotlarda mehnatni muhofaza qilish ishlarini muvofiqlashtiradi;

geologiya sohasi uchun kadrlar tayyorlash va ularning malakasini oshirish ishlarini muntazam amalga oshiradi;

qonun hujjatlarida nazarda tutilgan boshqa funksiyalarni bajaradi.

7. Davlat geologiya qo‘mitasi o‘ziga yuklangan vazifalarni hamda o‘z funksiyalarini bevosita, shuningdek o‘ziga qarashli korxonalar va ilmiy-tadqiqot institutlari orqali hal etadi va bajaradi.

8. Davlat geologiya qo‘mitasi o‘ziga yuklangan vazifalar va funksiyalarni bajarish uchun quyidagi huquqlarga ega:

davlat va xo‘jalik boshqaruvi organlaridan, tashkilotlardan o‘z vakolatiga kiradigan masalalarni hal etish uchun zarur bo‘lgan materiallar va ma’lumotlarni belgilangan tartibda so‘rash va olish;

o‘z vakolatlari doirasida yer osti boyliklari uchastkalaridan foydalanish huquqini berish;

davlat va xo‘jalik boshqaruvi organlari hamda tashkilotlar bilan kelishuv bo‘yicha geologiya materiallari ekspertizasini o‘tkazish uchun ularning mutaxassislarini jalb etish;

O‘zbekiston Respublikasi Prezidenti va Vazirlar Mahkamasi tomonidan belgilangan tartibda yer osti boyliklari uchastkalaridan foydalanish huquqini cheklash, to‘xtatib turish va to‘xtatish to‘g‘risida qaror qabul qilish;

yer osti boyliklarini geologik o‘rganish, ulardan foydalanish va ularni muhofaza qilish masalalari bo‘yicha idoralararo tusdagi xalqaro shartnomalarni belgilangan tartibda tuzish;

zaruriyat bo‘lganda, normativ-huquqiy hujjatlarni ishlab chiqish uchun olimlar, tarmoq mutaxassislaridan vaqtinchalik ishchi guruhlar tashkil qilish, shartnoma asosida ushbu ishga boshqa vazirliklar va idoralarning mutaxassislari va ekspertlarini jalb etish;

davlat budjeti mablag‘lari va boshqa manbalar hisobiga olingan yer osti boyliklari to‘g‘risidagi geologik va boshqa axborotlarni belgilangan tartibda shartnoma asosida realizatsiya qilish (berish, almashtirish, sotish);

Davlat geologiya qo‘mitasi O‘zbekiston Respublikasi qonun hujjatlariga muvofiq boshqa huquqlarga ham ega.

9. Davlat geologiya qo‘mitasi o‘z vakolatlari doirasida vazirliklar va idoralar, mahalliy davlat hokimiyati organlari, tashkilotlar, mansabdor shaxslar va fuqarolar tomonidan bajarilishi majburiy bo‘lgan normativ-huquqiy hujjatlarni tasdiqlashga haqlidir.

Davlat geologiya qo‘mitasi, zarur hollarda, boshqa vazirliklar va idoralar bilan birgalikda qo‘shma qarorlar hamda boshqa normativ-huquqiy hujjatlar chiqarishga haqlidir.

10. Davlat geologiya qo‘mitasiga O‘zbekiston Respublikasi Prezidenti tomonidan lavozimga tasdiqlanadigan va lavozimdan ozod qilinadigan rais boshchilik qiladi.

Raisning O‘zbekiston Respublikasi Prezidenti tomonidan lavozimga tayinlanadigan va lavozimdan ozod qilinadigan bir nafar o‘rinbosari bo‘ladi.

Davlat geologiya qo‘mitasi raisi moddiy, maishiy, transport va tibbiy xizmat ko‘rsatish shart-sharoitlari bo‘yicha vazirga, uning o‘rinbosari esa — vazir o‘rinbosariga tenglashtiriladi.

11.Davlat geologiya qo‘mitasi raisi:

Davlat geologiya qo‘mitasi faoliyatiga rahbarlik qiladi hamda Davlat geologiya qo‘mitasiga yuklangan vazifalar va funksiyalarning bajarilishi uchun shaxsan javob beradi;

zaruriyat bo‘lganda, xodimlarning belgilangan umumiy soni va mehnatga haq to‘lash fondi doirasida Davlat geologiya qo‘mitasi markaziy apparati tuzilmasiga o‘zgartirishlar kiritadi;

Davlat geologiya qo‘mitasi markaziy apparatining shtatlar jadvalini tasdiqlaydi;

Davlat geologiya qo‘mitasi markaziy apparatining tarkibiy bo‘linmalari to‘g‘risidagi nizomlarni, Davlat geologiya qo‘mitasi tizimiga kiruvchi davlat korxonalari ustavlarini tasdiqlaydi;

Davlat geologiya qo‘mitasi tasarrufidagi davlat korxonalarini qayta tashkil etish yoki tugatish to‘g‘risida qaror qabul qiladi;

Davlat geologiya qo‘mitasi markaziy apparati xodimlarini, Davlat geologiya qo‘mitasi tizimiga kiruvchi korxonalar, ilmiy-tadqiqot institutlari rahbarlarini belgilangan tartibda lavozimga tayinlaydi va lavozimdan ozod qiladi;

qonun hujjatlariga muvofiq boshqa vakolatlarni amalga oshiradi.

12. Davlat geologiya qo‘mitasida rais (hay’at raisi), uning o‘rinbosari, shuningdek Davlat geologiya qo‘mitasi faoliyatining asosiy yo‘nalishlarini muvofiqlashtiruvchi uning tarkibiy bo‘linmalari rahbarlaridan iborat tarkibda hay’at tashkil etiladi.

Hay’atning a’zolari soni va shaxsiy tarkibi Davlat geologiya qo‘mitasi raisining taqdimnomasiga binoan O‘zbekiston Respublikasi Vazirlar Mahkamasi tomonidan tasdiqlanadi.

Hay’at quyidagilar bilan bog‘liq masalalarni ko‘rib chiqadi:

Davlat geologiya qo‘mitasi faoliyatining yer osti boyliklarini geologik o‘rganish, ulardan foydalanish va ularni muhofaza qilish, mineral-xomashyo bazasini takroriy ishlab chiqarish sohasida yagona davlat siyosatini amalga oshirishni davom ettirish, kon munosabatlari sohasida davlat boshqaruvini amalga oshirish, foydali qazilmalar konlarini qidirish va razvedka qilish samaradorligini oshirishni ta’minlovchi geologiya-qidiruv ishlarini sifatli prognoz qilish, shuningdek prognozlashtirishning ilg‘or usullardan foydalangan holda yer osti boyliklari to‘g‘risidagi geologik va boshqa axborotlarni chuqur ilmiy tahlil qilish asosida mineral xomashyo bazasini rivojlantirish va takror hosil qilishning uzoq muddatli, o‘rta muddatli hamda har yilgi davlat dasturlarini shakllantirish bo‘yicha ushbu Nizomda belgilangan asosiy yo‘nalishlarini tayyorlash va amalga oshirish;

O‘zbekiston Respublikasi Davlat geologiya qo‘mitasi nomenklaturasiga kiradigan lavozimlarga kadrlarni tanlash, joy-joyiga qo‘yish, tayyorlash va qayta tayyorlash;

O‘zbekiston Respublikasi Prezidentining farmonlari, qarorlari va farmoyishlarida, O‘zbekiston Respublikasi Vazirlar Mahkamasi qarorlari va farmoyishlarida belgilangan vazifalarni amalga oshirish bo‘yicha ijro intizomini mustahkamlash, ularning o‘z vaqtida va sifatli amalga oshirilishini ta’minlash uchun Davlat geologiya qo‘mitasi rahbarlari va xodimlarining shaxsiy javobgarligini oshirish.

Hay’at Davlat geologiya qo‘mitasi vakolatiga taalluqli boshqa masalalarni ham ko‘rib chiqish huquqiga ega.

Hay’at majlisiga Davlat geologiya qo‘mitasi vakolatiga kiradigan masalalar bo‘yicha boshqa vazirliklar, davlat qo‘mitalari, idoralar, mahalliy davlat hokimiyati organlari va tashkilotlar rahbarlari taklif etilishi mumkin.

Hay’at uning majlisida tarkibining yarmidan ko‘pi qatnashgan taqdirda vakolatli bo‘ladi. Ko‘rib chiqilayotgan masalalar bo‘yicha qarorlar oddiy ko‘pchilik ovoz bilan qabul qilinadi.

Hay’at qarorlari Qo‘mitaning qarorlari va raisning buyruqlari bilan amalga oshiriladi. Rais va hay’at a’zolari o‘rtasida kelishmovchiliklar paydo bo‘lgan taqdirda rais paydo bo‘lgan kelishmovchiliklar to‘g‘risida O‘zbekiston Respublikasi Vazirlar Mahkamasiga axborot bergan holda mustaqil ravishda qaror qabul qiladi. Hay’at a’zolari ham o‘z fikr-mulohazalarini O‘zbekiston Respublikasi Vazirlar Mahkamasiga ma’lum qilishlari mumkin.

Hay’at faoliyati tartibi uning hay’at tasdiqlaydigan reglamentida belgilanadi.

13. Yer osti boyliklarini geologik o‘rganish bilan bog‘liq eng muhim yo‘nalishlarni, ishlar natijalarini va boshqa masalalarni ko‘rib chiqish uchun Davlat geologiya qo‘mitasi huzurida yuqori malakali mutaxassislardan ilmiy-texnika kengashi tashkil etiladi. Ilmiy-texnika kengashi tarkibi va uning to‘g‘risidagi nizom hay’at tomonidan tasdiqlanadi.

14. Davlat geologiya qo‘mitasi apparati ta’minoti davlat budjeti mablag‘lari, tasarrufidagi davlat korxonalari ajratmalari, shuningdek qonun hujjatlarida taqiqlanmagan boshqa manbalar hisobiga amalga oshiriladi.

15. Davlat geologiya qo‘mitasini qayta tashkil etish va tugatish qonun hujjatlarida belgilangan tartibda amalga oshiriladi.

1. Vazirlar Mahkamasining “O‘zbekiston Respublikasi Davlat geologiya va mineral resurslar qo‘mitasi to‘g‘risidagi nizomni tasdiqlash haqida” 2007-yil 5-fevraldagi 26-son qarori (O‘zbekiston Respublikasi QT, 2007-y., 2-3-son, 8-modda).

2. Vazirlar Mahkamasining “O‘zbekiston Respublikasi Hukumatining ayrim qarorlariga o‘zgartirish va qo‘shimchalar kiritish haqida (O‘zbekiston Respublikasi Prezidentining “Yer qa’ri uchastkalaridan foydalanish huquqi uchun litsenziyalar berish tartibini takomillashtirish chora-tadbirlari to‘g‘risida” 2007-yil 7-iyundagi PQ-649-son qarori) 2007-yil 19-iyuldagi 147-son qaroriga (O‘zbekiston Respublikasi QT, 2007-y., 7-son, 40-modda) ilovaning 3-bandi.

3. Vazirlar Mahkamasining “O‘zbekiston Respublikasi Hukumatining vazirliklar, davlat qo‘mitalari va idoralar to‘g‘risidagi nizomlarni tasdiqlash bo‘yicha qarorlariga o‘zgartirish va qo‘shimchalar kiritish haqida” 2010-yil 5-iyundagi 108-son qaroriga (O‘zbekiston Respublikasi QT, 2010-y., 6-son, 27-modda) ilovaning 57-bandi.