“Fuqarolarning davlat pensiya taʼminoti toʻgʻrisida”gi Oʻzbekiston Respublikasi Qonuniga hamda Oʻzbekiston Respublikasining Mehnat kodeksiga oʻzgartish va qoʻshimchalar kiritish haqida”gi Oʻzbekiston Respublikasining 2010-yil 22-dekabrdagi OʻRQ-272-sonli Qonunini bajarish yuzasidan Vazirlar Mahkamasi qaror qiladi:

1. Quyidagi yangilangan:

Bolalikdan nogironlarga va oʻn sakkiz yoshga toʻlmagan OIV infeksiyasiga chalingan shaxslarga nafaqalar tayinlash va toʻlash tartibi toʻgʻrisidagi nizom 1-ilovaga muvofiq;

Pensiya tayinlash uchun zarur boʻlgan ish stajiga ega boʻlmagan qariyalarga, mehnatga layoqatsiz fuqarolarga hamda bolalikdan nogironligi boʻlgan farzandi bor (boʻlgan) onalarga nafaqalar tayinlash va toʻlash tartibi toʻgʻrisidagi nizom 2-ilovaga muvofiq tasdiqlansin.

2. Oʻzbekiston Respublikasi Moliya vazirligi manfaatdor vazirliklar va idoralar bilan birgalikda Vazirlar Mahkamasiga:

bir oy muddatda — “Fuqarolarning davlat pensiya taʼminoti toʻgʻrisida”gi Oʻzbekiston Respublikasi Qonuniga davlat pensiyalari miqdorlarini ish haqining yakka tartibdagi koeffitsiyentlarini qoʻllagan holda hisoblash tartibini joriy etishni nazarda tutuvchi oʻzgartirish va qoʻshimchalar toʻgʻrisida takliflarni;

ikki oy muddatda — nogironlikni va kasbiy mehnatga layoqatni yoʻqotish darajasini aniqlashning aniq mezonlarini belgilovchi tegishli normativ-huquqiy hujjatlarni tasdiqlash boʻyicha Hukumat qarori loyihasini;

uch oy muddatda — davlat pensiyalarini tayinlash va toʻlashning birxillashtirilgan tartibini, pensiya imtiyozlarini qoʻllashni va fuqarolarning pensiya taʼminoti bilan bogʻliq boshqa masalalarni tasdiqlash boʻyicha Hukumat qarori loyihasini kiritsin.

4. Oʻzbekiston Respublikasi Hukumatining 4-ilovaga muvofiq ayrim qarorlari oʻz kuchini yoʻqotgan deb hisoblansin.

5. Oʻzbekiston Respublikasi Moliya vazirligi manfaatdor vazirliklar va idoralar bilan birgalikda bir oy muddatda idoraviy normativ-huquqiy hujjatlarni ushbu qarorga muvofiqlashtirsin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.

1. Ushbu Nizom 16 yoshdan katta bolalikdan nogironlarga, 16 yoshgacha nogiron bolalarga va oʻn sakkiz yoshga toʻlmagan OIV infeksiyasiga chalingan shaxslarga har oylik nafaqalar (keyingi oʻrinlarda nafaqa deb ataladi) tayinlash va toʻlash tartibini belgilaydi.

Nafaqa Oʻzbekiston Respublikasi fuqarolariga, shuningdek Oʻzbekiston Respublikasida doimiy yashaydigan xorijiy fuqarolarga va fuqaroligi boʻlmagan shaxslarga beriladi.

2. Nafaqa olish huquqiga tibbiy-mehnat ekspert komissiyalari (TMEK) tomonidan bolalikdan I guruh nogironlari, bolalikdan II guruh nogironlari deb eʼtirof etilgan 16 yoshdan katta shaxslar (keyingi oʻrinlarda 16 yoshdan katta bolalikdan nogiron deb ataladi), kasallikning bosqichidan qatʼi nazar, oʻn sakkiz yoshga toʻlmagan OIV infeksiyasiga chalingan shaxslar, shuningdek nafaqa olish huquqini beradigan tibbiy xulosa mavjud boʻlgan taqdirda 16 yoshgacha nogiron bolalar (keyingi oʻrinlarda nogiron bola deb ataladi) egadirlar.

3. Nafaqa olish huquqiga ega boʻlgan shaxslar nafaqa olish huquqi paydo boʻlgandan soʻng biror-bir muddat bilan cheklashsiz, istalgan vaqtda uning tayinlanishi uchun murojaat qilishlari mumkin.

4. Nafaqa qonun hujjatlarida belgilangan miqdorda tayinlanadi. Bunda oʻn sakkiz yoshga toʻlmagan OIV infeksiyasiga chalingan shaxslarga nafaqa qonun hujjatlarida bolalikdan nogironlar uchun belgilangan miqdorda tayinlanadi.

Nafaqani tayinlash va toʻlash Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasining tuman (shahar) boʻlimlari (keyingi oʻrinlarda Pensiya jamgʻarmasi boʻlimi deb ataladi) tomonidan amalga oshiriladi.

5. Nafaqa tayinlash toʻgʻrisidagi ariza (keyingi oʻrinlarda ariza deb ataladi):

OIV infeksiyasiga chalingan shaxs va 16 yoshdan katta bolalikdan nogiron tomonidan;

OIV infeksiyasiga chalingan shaxsning va muomalaga layoqatsiz deb eʼtirof etilgan 16 yoshdan katta bolalikdan nogironning ota-onasi, farzandlikka oluvchisi, vasiysi yoki homiysi tomonidan;

nogiron bolaning, shuningdek 16 yoshga toʻlmagan OIV infeksiyasiga chalingan shaxsning ota-onasi, farzandlikka oluvchisi, vasiysi yoki homiysi tomonidan yashash joyi boʻyicha Pensiya jamgʻarmasi boʻlimiga beriladi.

6. Arizaga quyidagi hujjatlar ilova qilinadi:

a) 16 yoshdan katta bolalikdan nogiron tomonidan — pasportining nusxasi;

a¹) 16 yoshdan katta OIV infeksiyasiga chalingan shaxs tomonidan — pasportining nusxasi va sogʻliqni saqlash muassasalari tomonidan belgilangan tartibda beriladigan tibbiy xulosa;

b) muomalaga layotqatsiz deb eʼtirof etilgan 16 yoshdan katta bolalikdan nogironning va OIV infeksiyasiga chalingan shaxsning ota-onasi, farzandlikka oluvchisi, vasiysi yoki homiysi tomonidan — muomalaga layoqatsiz deb eʼtirof etilgan 16 yoshdan katta bolalikdan nogironning va 16 yoshdan katta OIV infeksiyasiga chalingan shaxsning pasporti nusxasi, ariza bergan ota-ona, farzandlikka oluvchi, vasiy yoki homiyning pasporti nusxasi;

v) nogiron bolaning, shuningdek 16 yoshga toʻlmagan OIV infeksiyasiga chalingan shaxsning ota-onasi, farzandlikka oluvchisi, vasiysi yoki homiysi tomonidan — nogiron bola, shuningdek 16 yoshga toʻlmagan OIV infeksiyasiga chalingan shaxsning tugʻilganligi toʻgʻrisidagi guvohnoma nusxasi, sogʻliqni saqlash muassasalari tomonidan belgilangan tartibda beriladigan tibbiy xulosa, ariza bergan ota-ona, farzandlikka oluvchi, vasiy yoki homiyning pasporti nusxasi;

Farzandlikka oluvchi, vasiy yoki homiy tomonidan ariza bilan murojaat qilinganda tuman (shahar) hokimining farzandlikka olish, vasiylik yoki homiylikni belgilash toʻgʻrisidagi qarorining nusxasi ham taqdim etiladi.

Pensiya jamgʻarmasi boʻlimi arizaga Pensiya jamgʻarmasi boʻlimi tomonidan tibbiy-mehnat ekspert komissiyasidan olingan 16 yoshdan katta bolalikdan nogironni tibbiy tekshirish dalolatnomasidan koʻchirmani ilova qiladi.

7. Arizani qabul qilib olgan Pensiya jamgʻarmasi boʻlimi tomonidan ariza beruvchiga ariza qabul qilib olingan sana koʻrsatilgan holda ariza va unga ilova qilingan hujjatlar qabul qilinganligi haqida tilxat beriladi.

8. Ariza barcha zarur hujjatlar bilan birga tushgan kundan boshlab oʻn kundan koʻp boʻlmagan muddatda koʻrib chiqiladi.

Ariza mazkur Nizomning 6-bandiga muvofiq barcha zarur hujjatlar bilan birga Pensiya jamgʻarmasi boʻlimi tomonidan qabul qilib olingan kun nafaqa tayinlash uchun murojaat qilingan kun hisoblanadi.

Agar ariza pochta orqali yuborilsa va bunda barcha zarur hujjatlar taqdim etilsa, u holda ariza joʻnatilgan joyning pochta shtempelida koʻrsatilgan sana nafaqa tayinlash toʻgʻrisida murojaat qilingan kun hisoblanadi.

Arizaga barcha zarur hujjatlar ilova qilinmagan hollarda ariza beruvchiga uch kun muddatda qanday hujjatlarni qoʻshimcha ravishda taqdim etish zarurligi maʼlum qilinadi. Agar bu hujjatlar qoʻshimcha hujjatlarni taqdim etish zarurligi toʻgʻrisida bildirishnoma olingan kundan boshlab uch oydan kechikmay taqdim etilsa, u holda ariza qabul qilib olingan kun nafaqa tayinlash toʻgʻrisida murojaat qilingan kun hisoblanadi.

9. Nafaqa barcha zarur hujjatlar mavjud boʻlgan taqdirda murojaat qilingan kundan boshlab tayinlanadi. 16 yoshdan katta bolalikdan nogironga nafaqa nogironlikning butun davriga tayinlanadi. Nogiron bolaga nafaqa tibbiy xulosa berilgan muddatga tayinlanadi. OIV infeksiyasiga chalingan shaxsga nafaqa u oʻn sakkiz yoshga toʻlgungacha boʻlgan muddatga tayinlanadi.

10. Nafaqa tayinlash rad etilgan taqdirda Pensiya jamgʻarmasi boʻlimi ushbu Nizomning 8-bandida koʻrsatilgan muddat mobaynida rad etish sababi (sabablari) va qabul qilingan qaror yuzasidan shikoyat qilish tartibini koʻrsatib, ariza beruvchi tomonidan taqdim etilgan barcha hujjatlarning asl nusxalarini ilova qilgan holda bildirishnomani ariza beruvchining qoʻliga beradi yoki pochta orqali joʻnatadi.

11. Nafaqa tayinlash yoki nafaqa tayinlash rad etilishi toʻgʻrisidagi qaror yuzasidan ariza beruvchi tomonidan bevosita sudga yoki Pensiya jamgʻarmasi boʻlimining yuqori organiga shikoyat qilinishi mumkin.

12. Ariza taqdim etilgan barcha hujjatlar bilan birgalikda nafaqa oluvchining alohida shaxsiy hujjatlar yigʻmajildida saqlanadi.

13. Nafaqa Pensiya jamgʻarmasi boʻlimi tomonidan 16 yoshdan katta OIV infeksiyasiga chalingan shaxsning va bolalikdan nogironning, nafaqa tayinlangan 16 yoshdan katta bolalikdan nogironning, nogiron bolaning yoki oʻn sakkiz yoshga toʻlmagan OIV infeksiyasiga chalingan shaxsning ota-onasi, farzandlikka oluvchisi, vasiysi yoki homiysining yashash joyi boʻyicha toʻlanadi.

Nafaqa oluvchining doimiy propiskasi boʻlmasa va u faqat vaqtincha propiska qilingan boʻlsa (Toshkent shahrida va Toshkent viloyatida kelgan joyi boʻyicha hisobga olingan boʻlsa), nafaqa vaqtinchalik propiska (Toshkent shahrida va Toshkent viloyatida kelgan joyi boʻyicha hisobga olish)ning amal qiladigan muddati mobaynida toʻlanadi. Oʻzbekiston Respublikasida doimiy yashaydigan xorijiy fuqaroga yoki fuqaroligi boʻlmagan shaxsga nafaqa yashash hujjati amal qiladigan muddat davomida toʻlanadi.

Vaqtinchalik propiska (Toshkent shahrida va Toshkent viloyatida kelgan joyi boʻyicha hisobga olish)ning yoki yashash uchun ruxsatnomaning amal qilish muddatining tugashi bilan vaqtinchalik propiska (Toshkent shahrida va Toshkent viloyatida kelgan joyi boʻyicha hisobga olish)ning yoki yashash uchun ruxsatnomaning keyingi sanasi oʻrtasida uzilish mavjud boʻlgan taqdirda Pensiya jamgʻarmasi boʻlimi tomonidan nafaqani toʻlash vaqtinchalik propiska (Toshkent shahrida va Toshkent viloyatida kelgan joyi boʻyicha hisobga olish)ning yoki yashash uchun ruxsatnomaning yangi sanasidan boshlab davom ettiriladi. Bunda nafaqani toʻlash nafaqa toʻlash toʻxtatilgan paytdan, biroq oʻn ikki oydan ortiq boʻlmagan paytdan boshlab davom ettiriladi.

14. Nafaqalarni toʻlash har oyda Pensiya jamgʻarmasi boʻlimlari tomonidan belgilangan muddatlarda, biroq joriy toʻlov oyidan kechikmay amalga oshiriladi.

Nafaqalar qonun hujjatlarida belgilangan tartibda ishonchnoma boʻyicha toʻlanishi mumkin.

15. Qayta tibbiy tekshirishdan oʻtkazish muddati oʻtkazib yuborilganda nafaqalarni toʻlash “Fuqarolarning davlat pensiya taʼminoti toʻgʻrisida”gi Oʻzbekiston Respublikasi Qonunining 55-moddasida nazarda tutilgan tartibda amalga oshiriladi.

Nafaqa oluvchi Oʻzbekiston Respublikasi hududi doirasida doimiy yashash uchun boshqa tuman (shahar)ga koʻchganda nafaqani toʻlash yangi yashash joyi boʻyicha tegishli Pensiya jamgʻarmasi boʻlimi tomonidan nafaqa oluvchining shaxsiy hujjatlar yigʻmajildi olingandan keyin shu tuman (shahar)da davom ettiriladi. Bunday holda nafaqa toʻlash ilgarigi yashash joyi boʻyicha nafaqa toʻlash toʻxtatilgan vaqtdan boshlab davom ettiriladi. Nafaqa oluvchilarni hisobdan chiqarish va yangi yashash joyida hisobga olish tartibi, shuningdek ularning yigʻma jildlarini joʻnatish tartibi Oʻzbekiston Respublikasi Moliya vazirligi tomonidan belgilanadi.

16 yoshdan katta bolalikdan nogiron, nogiron bola yoxud oʻn sakkiz yoshga toʻlmagan OIV infeksiyasiga chalingan shaxs doimiy yashash uchun Oʻzbekiston Respublikasi tashqarisiga chiqib ketganda nafaqa toʻlash toʻxtatiladi;

Nafaqa toʻlashning toʻxtatilishi yoki qayta tiklanishiga olib keladigan boshqa holatlar (nafaqa tayinlangan shaxslar toʻliq davlat taʼminotiga oʻtkazilganda yoki “Mehribonlik”, “Saxovat”, “Muruvvat” uylariga va shu kabilarga yuborilganligi yoki undan qaytib kelganligi sababli toʻliq davlat taʼminotidan chiqarilganda) paydo boʻlganda nafaqa toʻlash tegishli holatlar paydo boʻlgan oydan keyingi oyning birinchi kunidan boshlab toʻxtatiladi yoki tiklanadi.

16. 16 yoshdan katta bolalikdan nogiron, nogiron bola yoki oʻn sakkiz yoshga toʻlmagan OIV infeksiyasiga chalingan shaxs ozodlikdan mahrum etishga hukm qilingan taqdirda tayinlangan nafaqani toʻlash toʻxtatiladi va jazoni oʻtashdan ozod etilgandan keyin tiklanadi.

17. Oluvchi tomonidan oʻz vaqtida talab qilib olinmagan hisoblangan nafaqa summasi uni olish uchun murojaat qilingandan oldingi oʻn ikki oydan ortiq boʻlmagan muddat uchun bir yoʻla toʻlanadi.

Pensiya jamgʻarmasi boʻlimining aybi bilan oʻz vaqtida olinmagan nafaqa summasi biror-bir muddat bilan cheklashsiz bir yoʻla toʻlanadi.

18. OIV infeksiyasiga chalingan shaxsga va 16 yoshdan katta bolalikdan nogironga tayinlangan nafaqa, unga uning haq toʻlanadigan ishni bajarishidan yoki boshqa turdagi daromadlar (stipendiyalar, alimentlar va shu kabilar) olishidan qatʼi nazar, toʻlanadi.

Nogiron bolaga, shuningdek 16 yoshga toʻlmagan OIV infeksiyasiga chalingan shaxsga tayinlangan nafaqa unga boshqa pensiyalar va nafaqalar, shu jumladan boquvchisini yoʻqotganlik pensiyasi yoki nafaqasi olishidan qatʼi nazar, toʻlanadi.

Har xil nafaqalarning turlarini olish huquqiga ega boʻlgan 16 yoshdan katta OIV infeksiyasiga chalingan shaxsga va bolalikdan nogironga uning tanlashi boʻyicha nafaqaning bir turi tayinlanadi.

Nafaqaga yoki “Fuqarolarning davlat pensiya taʼminoti toʻgʻrisida”gi Oʻzbekiston Respublikasi Qonuniga muvofiq davlat pensiyasining turlaridan biriga huquqi boʻlgan OIV infeksiyasiga chalingan va 16 yoshdan katta bolalikdan nogironga uning oʻzi tanlagan nafaqa yoki davlat pensiyasining turlaridan biri tayinlanadi.

19. Tayinlangan nafaqa 16 yoshdan katta bolalikdan nogiron, nogiron bola yoxud oʻn sakkiz yoshga toʻlmagan OIV infeksiyasiga chalingan shaxs toʻliq davlat taʼminotida boʻlgan davr uchun toʻlanmaydi.

20. Nafaqa miqdori oʻzgarishiga yoki uni toʻlash toʻxtatilishiga olib keladigan holatlar paydo boʻlgan taqdirda nafaqa oluvchi oʻn kun muddatda bu haqda unga nafaqa toʻlaydigan Pensiya jamgʻarmasi boʻlimiga xabar qilishi shart.

20¹. Nafaqadan chegirmalar “Fuqarolarning davlat pensiya taʼminoti toʻgʻrisida”gi Oʻzbekiston Respublikasi Qonunining 65-moddasida nazarda tutilgan tartibda amalga oshirilishi mumkin.

21. Nogironligi boʻlgan bolaga, oʻn sakkiz yoshga toʻlmagan OIV infeksiyasiga chalingan shaxs yoki 16 yoshdan katta bolalikdan nogironligi boʻlgan shaxsga tegishli boʻlgan va uning oʻlimi sababli olinmay qolgan nafaqa summasi meros tarkibiga kiritilmaydi va uning ota-onasiga, eriga (xotiniga), shuningdek, nogironligi boʻlgan bola, oʻn sakkiz yoshga toʻlmagan OIV infeksiyasiga chalingan shaxs yoki 16 yoshdan katta bolalikdan nogironligi boʻlgan shaxs bilan u vafot etgan kunda birga yashaydigan oila aʼzolariga toʻlanadi.

Nogironligi boʻlgan bola, oʻn sakkiz yoshga toʻlmagan OIV infeksiyasiga chalingan shaxs yoki 16 yoshdan katta bolalikdan nogironligi boʻlgan shaxs vafot etgan oy uchun toʻliq olinmay qolgan nafaqa summasi yuqorida koʻrsatib oʻtilgan shaxslarga mazkur oyning nogironligi boʻlgan shaxsning oʻlimigacha boʻlgan kunlari uchun toʻlanadi.

Bir necha shaxs murojaat qilishganda ularga tegishli nafaqa summasi ular oʻrtasida teng miqdorda taqsimlanadi.

Koʻrsatib oʻtilgan summa, uni olish uchun nogironligi boʻlgan bola, oʻn sakkiz yoshga toʻlmagan OIV infeksiyasiga chalingan shaxs yoki 16 yoshdan katta bolalikdan nogironligi boʻlgan shaxs vafotidan keyin 6 oydan kechikmay murojaat qilingan taqdirda toʻlanadi.

22. Nafaqa miqdori oʻzgargan taqdirda nafaqa qonun hujjatlariga muvofiq qayta hisoblab chiqiladi.

23. OIV infeksiyasiga chalingan shaxsga yoki 16 yoshdan katta bolalikdan nogironga “Fuqarolarning davlat pensiya taʼminoti toʻgʻrisida”gi Oʻzbekiston Respublikasi Qonuniga muvofiq davlat pensiyasining turlaridan biri tayinlanganda nafaqa toʻlash toʻxtatiladi, pensiya esa nafaqa oxirgi marta toʻlangan oydan keyingi oyning birinchi kunidan boshlab toʻlanadi.

24. Nafaqalarni toʻlash, yetkazib berish va qayta yuborish boʻyicha xarajatlarni moliyalashtirish qonun hujjatlarida belgilangan tartibda Oʻzbekiston Respublikasining respublika budjeti mablagʻlari hisobiga amalga oshiriladi.

1. Ushbu Nizom “Fuqarolarning davlat pensiya taʼminoti toʻgʻrisida”gi Oʻzbekiston Respublikasi Qonuniga muvofiq davlat pensiyasini tayinlash uchun zarur boʻlgan ish stajiga ega boʻlmagan qariyalarga, mehnatga layoqatsiz fuqarolarga va bolalikdan nogironligi boʻlgan farzandi bor (boʻlgan) onalarga har oylik nafaqalar (keyingi oʻrinlarda nafaqa deb ataladi) tayinlash va toʻlash tartibini belgilaydi.

Nafaqa Oʻzbekiston Respublikasi fuqarolariga, shuningdek Oʻzbekiston Respublikasida doimiy yashaydigan xorijiy fuqarolarga va fuqaroligi boʻlmagan shaxslarga beriladi.

2. Mazkur Nizom boʻyicha:

yoshga doir nafaqa;

nogironlik nafaqasi (bolalikdan nogironlardan tashqari);

boquvchisini yoʻqotganlik nafaqasi tayinlanadi.

3. Nafaqa olish huquqiga ega boʻlgan shaxslar nafaqa olish huquqi paydo boʻlgandan soʻng biror-bir muddat bilan cheklashsiz, istalgan vaqtda uning tayinlanishi uchun murojaat qilishlari mumkin.

4. Nafaqa qonun hujjatlarida belgilangan miqdorda tayinlanadi. Nafaqalarni tayinlash va toʻlash Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasining tuman (shahar) boʻlimlari (keyingi oʻrinlarda Pensiya jamgʻarmasi boʻlimi deb ataladi) tomonidan amalga oshiriladi.

5. Yoshga doir nafaqa:

ish stajiga ega boʻlmagan;

“Fuqarolarning davlat pensiya taʼminoti toʻgʻrisida”gi Oʻzbekiston Respublikasi Qonunining 37-moddasi birinchi qismining “a”, “b”, “v” va “g” bandlarida nazarda tutilgan 7 yildan kam ish staji mavjud boʻlib, yoshga doir pensiya tayinlash uchun yetarli ish stajiga ega boʻlmagan shaxslarga tayinlanadi.

6. Yoshga doir nafaqa:

erkaklarga — 65 yoshga yetganlarida;

ayollarga — 60 yoshga yetganlarida;

bolalikdan nogironligi boʻlgan farzandi bor (boʻlgan) onalarga — 55 yoshga yetganlarida tayinlanadi.

7. Haq toʻlanadigan ish bajarayotgan yoki boshqa daromad manbaiga ega boʻlgan (alimentlar yoki stipendiyalar olish bundan mustasno) shaxslarga yoshga doir nafaqa tayinlanmaydi.

8. Ish stajiga ega boʻlmagan shaxsga (bolalikdan nogironligi boʻlgan farzandi bor (boʻlgan) onalardan tashqari) yoshga doir nafaqa mehnatga layoqatli voyaga yetgan farzandlari, qarindoshlari yoki Oʻzbekiston Respublikasining Oila kodeksiga muvofiq ularni taʼminlashga majbur boʻlgan boshqa shaxslar boʻlmagan taqdirda tayinlanadi.

Pensiya jamgʻarmasi boʻlimi tomonidan fuqarolarning oʻzini oʻzi boshqarish organlari bilan birgalikda oʻtkazilgan tekshirishda ish stajiga ega boʻlmagan va yoshga doir nafaqa soʻrab murojaat etgan shaxsni taʼminlashga majbur boʻlgan qarindoshlarining yoki boshqa shaxslarning moddiy nochorligi aniqlangan hollarda yoshga doir nafaqa yoshga doir nafaqa soʻrab murojaat qilgan shaxsga moddiy yordam bera olmaydigan qarindoshlar yoki boshqa shaxslar bor boʻlgan taqdirda ham yoshga doir nafaqa tayinlanishi mumkin.

Bolalikdan nogironligi boʻlgan farzandi bor (boʻlgan) onalarga yoshga doir nafaqa farzandi bolalikdan nogiron deb eʼtirof etilganligi toʻgʻrisida Tibbiy-maslahat komissiyasining (keyingi oʻrinlarda TMK deb yuritiladi) tibbiy xulosasi yoki Tibbiy mehnat ekspertiza komissiyasining (keyingi oʻrinlarda TMEK deb yuritiladi) nogironlik toʻgʻrisidagi maʼlumotnomasi bilan tasdiqlangan taqdirda tayinlanadi. Bunda nafaqa miqdori pensiya tayinlash uchun zarur boʻlgan ish stajiga ega boʻlmagan qariyalar va mehnatga layoqatsiz fuqarolarning nafaqasi miqdorida belgilanadi.

9. Nogironlik nafaqasi nogironlik sodir boʻlgan hollarda, yoshidan qatʼi nazar, ish stajiga ega boʻlmagan I va II guruh nogironligi boʻlgan shaxslarga tayinlanadi va toʻlanadi.

10. Mehnat faoliyatiga layoqati cheklanganligi darajasini aniqlash uchun tibbiy tekshirish (mehnatga layoqati doimiy yoki uzoq muddat yoʻqotilganda) Pensiya jamgʻarmasi boʻlimlari yoʻllanmalari boʻyicha TMEK tomonidan amalga oshiriladi.

11. Qabul qilingan xulosa asosida TMEK yetti kun muddatda tibbiy tekshirish dalolatnomasidan koʻchirmani Pensiya jamgʻarmasi boʻlimiga yuboradi.

12. Ishlayotgan yoki hayot kechirishning boshqa manbalariga (alimentlar yoki stipendiyalar olish bundan mustasno) ega boʻlgan I guruh nogironlarga va II guruh nogironlarga nafaqa tayinlanmaydi.

13. Nogironlik nafaqasi mehnatga layoqat yoʻqotilishining butun davri uchun tayinlanadi.

14. “Fuqarolarning davlat pensiya taʼminoti toʻgʻrisida”gi Oʻzbekiston Respublikasi Qonuni boʻyicha davlat pensiyasi olish huquqiga ega boʻlmagan shaxsning qaramogʻida boʻlgan oilaning mehnatga layoqatli boʻlmagan aʼzolari boquvchisini yoʻqotganlik nafaqasi olish huquqiga egadirlar.

“Fuqarolarning davlat pensiya taʼminoti toʻgʻrisida”gi Oʻzbekiston Respublikasi Qonunining 19-moddasida aytib oʻtilgan shaxslar oilaning mehnatga layoqatsiz aʼzolari jumlasiga kiritiladilar.

15. Boquvchisini yoʻqotganlik nafaqasi vafot etganning oila aʼzolariga vafot etgan fuqaro olgan yoki olish huquqiga ega boʻlgan nafaqaga foiz nisbatida quyidagi miqdorlarda belgilanadi:

a) oilaning uch va undan ortiq mehnatga layoqatsiz aʼzosiga — nafaqaning 100 foizi;

b) oilaning mehnatga layoqatsiz ikki aʼzosiga — nafaqaning 75 foizi;

v) oilaning mehnatga layoqatsiz bir aʼzosiga — nafaqaning 50 foizi.

16. Nafaqa olish huquqiga ega boʻlmagan shaxs vafot etgan taqdirda vafot etganning oila aʼzolariga nafaqa ushbu Nizomning 15-bandida nazarda tutilgan tartibda belgilanadi. Bunda boquvchisini yoʻqotganlik nafaqasi miqdori yoshga doir pensiyaning eng kam miqdoridan kelib chiqqan holda belgilanadi.

16¹. Boquvchisini yoʻqotganlik nafaqasini olish huquqiga ega boʻlgan oila aʼzolarining barchasiga ushbu Nizomda belgilangan miqdorda bitta umumiy nafaqa tayinlanadi. Oila aʼzosining talabiga koʻra uning nafaqadagi ulushi ajratiladi va unga alohida toʻlanadi. Bunda tayinlangan nafaqaning umumiy miqdori oluvchilarning umumiy soniga boʻlinadi.

Boshqa tumanda (shaharda) yashaydigan oila aʼzosi oʻziga nafaqa ulushini tayinlash yoki ajratish toʻgʻrisidagi ariza bilan murojaat qilganda, murojaat qilganning yashash joyi boʻyicha Pensiya jamgʻarmasi boʻlimi oilaning barcha aʼzolariga hujjatlarni rasmiylashtiradigan yoki ushbu oilaning amaldagi hujjatlar yigʻmajildi turgan Pensiya jamgʻarmasi boʻlimiga tegishli xabarnomani yuboradi. Xabarnomaga ariza va yangidan murojaat qilgan oila aʼzosining nafaqa olish huquqini tasdiqlaydigan hujjatlar ilova qilinadi. Ushbu holatda nafaqa boquvchisini yoʻqotganlik nafaqasidan ulush ajratib berish toʻgʻrisida murojaat qilingan oydan keyingi oyning birinchi kunidan boshlab tayinlanadi.

Yigʻmajildni rasmiylashtirishda barcha hollarda unga oila har bir aʼzosining nafaqaga boʻlgan huquqini tasdiqlaydigan barcha hujjatlar tikib qoʻyiladi.

Oila aʼzosiga nafaqadan ulush ajratilishida ushbu Nizomning 15-bandida belgilangan talablarga rioya etiladi.

17. Nafaqa tayinlash toʻgʻrisidagi ariza (keyingi oʻrinlarda ariza deb ataladi) ariza beruvchining yashash joyi boʻyicha Pensiya jamgʻarmasi boʻlimiga beriladi.

18. Arizaga quyidagi hujjatlar ilova qilingan boʻlishi kerak:

a) ariza beruvchining yoshini tasdiqlaydigan hujjat (pasport yoki tugʻilganlik toʻgʻrisidagi guvohnoma nusxasi);

b) ish stajiga ega boʻlmagan shaxsga yoshga doir nafaqa tayinlashda — ariza beruvchining yashash joyidagi fuqarolarning oʻzini oʻzi boshqarish organidan berilgan maʼlumotnoma, unda ariza beruvchining barcha oila aʼzolarining, shu jumladan alohida yashaydigan voyaga yetgan mehnatga layoqatli aʼzolari (yoki ularning yoʻqligi), ularning familiyasi, ismi va otasining ismi, tugʻilgan yillari, qarindoshlik darajasi, ariza beruvchi oilasi har bir aʼzosining turmush kechirish manbalari koʻrsatilgan boʻlishi kerak;

v) yoshga doir nafaqa tayinlash uchun yetarli ish stajiga ega boʻlmagan shaxslar uchun yoshga doir nafaqa tayinlashda, “Fuqarolarning davlat pensiya taʼminoti toʻgʻrisida”gi Oʻzbekiston Respublikasi Qonunining 37-moddasi birinchi qismining “a”, “b”, “v” va “g” bandlarida nazarda tutilgan 7 yildan kam ish stajiga ega boʻlganda — mehnat daftarchasi;

v¹) bolalikdan nogironligi boʻlgan farzandi bor (boʻlgan) onalarga yoshga doir nafaqa tayinlashda – bolalikdan nogironligi boʻlgan farzandining tugʻilganlik yoki vafot etganligi haqidagi guvohnomasi nusxasi, farzandi bolalikdan nogiron deb eʼtirof etilganligi toʻgʻrisida TMK tomonidan berilgan tibbiy xulosa yoki TMEKning nogironlik toʻgʻrisidagi maʼlumotnomasining tegishli qismi;

g) boquvchisini yoʻqotganlik nafaqasi tayinlashda — boquvchining vafot etganligi toʻgʻrisidagi guvohnoma nusxasi va boquvchisini yoʻqotgan taqdirda nafaqa olish huquqiga ega boʻlgan oila aʼzolarining tugʻilganligi toʻgʻrisidagi hujjatlar (pasport va/yoki tugʻilganlik toʻgʻrisidagi guvohnoma) nusxalari.

Pensiya jamgʻarmasi boʻlimi arizaga:

nogironlik nafaqasi tayinlashda — ushbu Nizomning 9-bandida koʻrsatilgan shaxslarni;

boquvchisini yoʻqotganlik nafaqasi tayinlashda — ushbu Nizomning 9-bandida koʻrsatilgan vafot etgan shaxsni Pensiya jamgʻarmasi boʻlimi tomonidan tibbiy-mehnat ekspert komissiyasidan olingan tibbiy tekshirish dalolatnomasidan koʻchirmani ilova qiladi.

Ish stajiga ega boʻlmagan shaxsga (bolalikdan nogironligi boʻlgan farzandi bor (boʻlgan) onalardan tashqari) yoshga doir nafaqa tayinlash toʻgʻrisidagi arizada mehnatga layoqatli farzandlarining, qarindoshlarining yoki Oʻzbekiston Respublikasining Oila kodeksiga muvofiq ularni taʼminlashi shart boʻlgan boshqa shaxslarning borligi va ariza beruvchining jami daromadi toʻgʻrisidagi maʼlumotlar majburiy tartibda koʻrsatilishi zarur.

19. Arizani qabul qilgan Pensiya jamgʻarmasi boʻlimi tomonidan ariza beruvchiga ariza qabul qilingan sana koʻrsatilgan holda ariza va unga ilova qilingan hujjatlar qabul qilinganligi toʻgʻrisida tilxat beriladi.

20. Ariza barcha zarur hujjatlar bilan tushgan kundan boshlab oʻn kundan ortiq boʻlmagan muddatda koʻrib chiqiladi.

Pensiya jamgʻarmasi boʻlimi tomonidan ushbu Nizomning 18-bandiga muvofiq ariza barcha zarur hujjatlar bilan birga qabul qilingan kun nafaqa tayinlash uchun murojaat qilingan kun hisoblanadi.

Agar ariza pochta orqali joʻnatilsa va bunda barcha zarur hujjatlar taqdim etilgan boʻlsa, u holda ariza joʻnatilgan joydagi pochta shtempelida koʻrsatilgan sana nafaqa tayinlash uchun murojaat qilingan kun hisoblanadi.

Arizaga zarur boʻlgan hujjatlarning ayrimlari ilova qilinmagan hollarda ariza beruvchiga uch kun muddatda qoʻshimcha ravishda qanday hujjatlar taqdim etilishi kerakligi maʼlum qilinadi. Agar ushbu hujjatlar qoʻshimcha hujjatlar taqdim etilishi zarurligi toʻgʻrisidagi bildirishnoma olingan kundan boshlab uch oydan kechikmay taqdim etilsa ariza qabul qilingan kun nafaqa tayinlash uchun murojaat qilingan kun hisoblanadi.

21. Nafaqa barcha zarur hujjatlar mavjud boʻlgan taqdirda murojaat qilingan kundan boshlab tayinlanadi.

22. Nafaqa tayinlash rad etilgan taqdirda Pensiya jamgʻarmasi boʻlimi ushbu Nizomning 20-bandida koʻrsatilgan muddat mobaynida rad etish sababi(sabablari) va qabul qilingan qaror yuzasidan shikoyat qilish tartibini koʻrsatib, ariza beruvchi tomonidan taqdim etilgan barcha hujjatlarning asl nusxalarini ilova qilgan holda bildirishnomani ariza beruvchining qoʻliga beradi yoki pochta orqali joʻnatadi.

23. Nafaqa tayinlash yoki nafaqa tayinlashni rad etish toʻgʻrisidagi qaror yuzasidan ariza beruvchi tomonidan bevosita sudga yoki Pensiya jamgʻarmasi boʻlimining yuqori organiga shikoyat qilinishi mumkin.

24. Ariza taqdim etilgan barcha hujjatlar bilan birga va nafaqa tayinlash toʻgʻrisidagi qaror nafaqa oluvchining alohida shaxsiy hujjatlar yigʻmajildida saqlanadi.

25. Nafaqalarni toʻlash har oyda, Pensiya jamgʻarmasi boʻlimlari tomonidan belgilangan muddatlarda, biroq joriy toʻlov oyidan kechikmay amalga oshiriladi.

Nafaqalar qonun hujjatlarida belgilangan tartibda ishonchnoma boʻyicha toʻlanishi mumkin.

Nafaqa oluvchining doimiy propiskasi boʻlmasa va u faqat vaqtincha propiska qilingan boʻlsa (Toshkent shahrida va Toshkent viloyatida kelgan joyi boʻyicha hisobga olingan boʻlsa), nafaqa vaqtinchalik propiska (Toshkent shahrida va Toshkent viloyatida kelgan joyi boʻyicha hisobga olish)ning amal qiladigan muddati mobaynida toʻlanadi. Oʻzbekiston Respublikasida doimiy yashaydigan xorijiy fuqaroga yoki fuqaroligi boʻlmagan shaxsga nafaqa yashash hujjati amal qiladigan muddat davomida toʻlanadi.

Vaqtinchalik propiska (Toshkent shahrida va Toshkent viloyatida kelgan joyi boʻyicha hisobga olish)ning yoki yashash uchun ruxsatnomaning amal qilish muddatining tugashi bilan vaqtinchalik propiska (Toshkent shahrida va Toshkent viloyatida kelgan joyi boʻyicha hisobga olish)ning yoki yashash uchun ruxsatnomaning keyingi sanasi oʻrtasida uzilish mavjud boʻlgan taqdirda Pensiya jamgʻarmasi boʻlimi tomonidan nafaqani toʻlash vaqtinchalik propiska (Toshkent shahrida va Toshkent viloyatida kelgan joyi boʻyicha hisobga olish)ning yoki yashash uchun ruxsatnomaning yangi sanasidan boshlab davom ettiriladi. Bunda nafaqani toʻlash nafaqa toʻlash toʻxtatilgan paytdan, biroq oʻn ikki oydan ortiq boʻlmagan paytdan boshlab davom ettiriladi.

26. Qayta tibbiy tekshirishdan oʻtkazish muddati oʻtkazib yuborilganda nafaqalarni toʻlash “Fuqarolarning davlat pensiya taʼminoti toʻgʻrisida”gi Oʻzbekiston Respublikasi Qonunining 55-moddasida nazarda tutilgan tartibda amalga oshiriladi.

Nafaqa oluvchi Oʻzbekiston Respublikasi hududi doirasida doimiy yashash uchun boshqa tuman (shahar)ga koʻchganda nafaqani toʻlash yangi yashash joyi boʻyicha tegishli Pensiya jamgʻarmasi boʻlimi tomonidan nafaqa oluvchining shaxsiy hujjatlar yigʻmajildi olingandan keyin shu tuman (shahar)da davom ettiriladi. Bunday holda nafaqa toʻlash ilgarigi yashash joyi boʻyicha nafaqa toʻlash toʻxtatilgan vaqtdan boshlab davom ettiriladi. Nafaqa oluvchilarni hisobdan chiqarish va yangi yashash joyida hisobga olish tartibi, shuningdek ularning yigʻma jildlarini joʻnatish tartibi Oʻzbekiston Respublikasi Moliya vazirligi tomonidan belgilanadi.

Nafaqa oluvchi doimiy yashash uchun Oʻzbekiston Respublikasi tashqarisiga chiqib ketganda nafaqa toʻlash toʻxtatiladi.

Nafaqa toʻlashning toʻxtatilishi yoki qayta tiklanishiga olib keladigan boshqa holatlar (nafaqa tayinlangan shaxslar toʻliq davlat taʼminotiga oʻtkazilganda yoki “Mehribonlik”, “Saxovat”, “Muruvvat” uylariga va shu kabilarga yuborilganligi yoki undan qaytib kelganligi sababli toʻliq davlat taʼminotidan chiqarilganda) paydo boʻlganda nafaqa toʻlash tegishli holatlar paydo boʻlgan oydan keyingi oyning birinchi kunidan boshlab toʻxtatiladi yoki tiklanadi.

27. Nafaqa oluvchi ozodlikdan mahrum etishga hukm etilgan taqdirda tayinlangan nafaqani toʻlash toʻxtatiladi va jazodan ozod etilgandan keyin tiklanadi.

28. Oluvchi tomonidan oʻz vaqtida talab qilinmagan hisoblangan nafaqa summasi uni olish uchun murojaat qilishdan oldingi oʻn ikki oydan ortiq boʻlmagan muddat uchun bir yoʻla toʻlanadi.

Pensiya jamgʻarmasi boʻlimining aybi bilan oʻz vaqtida olinmagan nafaqa summasi biror-bir muddat bilan cheklashsiz bir yoʻla toʻlanadi.

29. Pensiya tayinlash uchun zarur boʻlgan ish stajiga ega boʻlmagan, nafaqalarning har xil turlarini olish huquqiga ega boʻlgan qariyalarga va mehnatga layoqatsiz fuqarolarga ularning tanlovi boʻyicha nafaqalarning bir turi tayinlanadi.

30. Toʻlanayotgan nafaqalar miqdorini oʻzgartirishga yoki nafaqa toʻlash toʻxtatilishiga sabab boʻluvchi holatlar paydo boʻlgan taqdirda, nafaqa oluvchi bu haqda oʻn kun muddatda unga nafaqa toʻlaydigan Pensiya jamgʻarmasi boʻlimiga xabar qilishi shart.

Nafaqadan chegirmalar “Fuqarolarning davlat pensiya taʼminoti toʻgʻrisida”gi Oʻzbekiston Respublikasi Qonunining 65-moddasida belgilangan tartibda amalga oshirilishi mumkin

31. Nafaqa oluvchiga tegishli boʻlgan va uning vafoti munosabati bilan toʻliq olinmay qolgan nafaqa summasi merosga kiritilmaydi va uning ota-onasiga, eriga (xotiniga), shuningdek nafaqa oluvchi vafot etgan kunda u bilan birga yashayotgan oila aʼzolariga toʻlanadi.

Nafaqa oluvchi vafot etgan oy uchun toʻliq olinmay qolgan summa yuqorida koʻrsatib oʻtilgan shaxslarga mazkur oyning nafaqa oluvchi vafotigacha boʻlgan kunlari uchun toʻlanadi.

Bir necha shaxs murojaat qilishganda ularga tegishli summa ular oʻrtasida teng taqsimlanadi.

Koʻrsatib oʻtilgan summa uning uchun nafaqa oluvchi vafotidan keyin 6 oydan kechikmay murojaat qilingan taqdirda toʻlanadi.

32. Nafaqalar:

oilaning boquvchisini yoʻqotganlik nafaqasi tayinlashda hisobga olinadigan son tarkibi oʻzgarganda;

qonun hujjatlariga muvofiq nafaqa miqdori oʻzgarganda qayta hisoblab chiqiladi.

33. Boquvchisini yoʻqotganlik nafaqasini tayinlashda oilaning hisobga olinadigan son tarkibi oʻzgarganda, tayinlangan nafaqani qayta hisoblab chiqish ushbu holatlar boshlangan oydan keyingi oyning birinchi kunidan boshlab amalga oshiriladi.

34. Nafaqa oluvchiga “Fuqarolarning davlat pensiya taʼminoti toʻgʻrisida”gi Oʻzbekiston Respublikasi Qonuniga muvofiq davlat pensiyasi turlaridan biri tayinlanganda nafaqa toʻlash toʻxtatiladi, pensiya esa nafaqa oxirgi marta toʻlangan oydan keyingi oyning birinchi kunidan boshlab toʻlanadi.

35. Nafaqalarni toʻlash, yetkazib berish va qayta yuborish boʻyicha xarajatlar Oʻzbekiston Respublikasining respublika budjeti mablagʻlari hisobiga amalga oshiriladi.

1. Vazirlar Mahkamasining “Fuqarolarning davlat pensiya taʼminoti toʻgʻrisida” Oʻzbekiston Respublikasining Qonunini roʻyobga chiqarish uchun zarur boʻlgan normativ hujjatlarni tasdiqlash haqida” 1994-yil 11-maydagi 249-son qarori 1-bandining yettinchi, sakkizinchi va toʻqqizinchi xatboshi hamda qarorga 4 va 5-ilovalar.

2. Vazirlar Mahkamasining “Bolalikdan nogironlarga, qariyalarga va mehnatga layoqatsiz fuqarolarga nafaqalar tayinlash va toʻlash tartibi toʻgʻrisida” 1994-yil 24-iyundagi 319-son qarori (Oʻzbekiston Respublikasi QT, 1994-y., 6-son, 33-modda).

3. Vazirlar Mahkamasining “Vazirlar Mahkamasining 1994-yil 11-maydagi 249-son qarori bilan tasdiqlangan Pensiya tayinlash uchun mehnat stajini tasdiqlash tartibi toʻgʻrisidagi Nizomga qoʻshimcha kiritish haqida” 1995-yil 8-avgustdagi 311-son qarori (Oʻzbekiston Respublikasi QT, 1995-y., 8-son, 27-modda).

4. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish va ayrimlarini oʻz kuchini yoʻqotgan deb hisoblash toʻgʻrisida” 1999-yil 30-apreldagi 202-son qaroriga 1-ilova 4-bandining ikkinchi, uchinchi, oltinchi, yettinchi va oʻn birinchi xatboshi (Oʻzbekiston Respublikasi QT, 1999 y, 4-son, 22-modda).

5. Vazirlar Mahkamasining “Oʻzbekiston Respublikasi Vazirlar Mahkamasining ayrim qarorlariga oʻzgartirish va qoʻshimchalar kiritish, shuningdek ularning baʼzilarini oʻz kuchini yoʻqotgan deb hisoblash toʻgʻrisida” 2001-yil 1-martdagi 103-son qaroriga ilovaning 9-bandi (Oʻzbekiston Respublikasi QT, 2001 y, 3-son, 13-modda).

6. Vazirlar Mahkamasining “Oʻzbekiston Respublikasi Mehnat va aholini ijtimoiy muhofaza qilish vazirligi hamda Tashqi mehnat migratsiyasi agentligi toʻgʻrisidagi nizomlarni tasdiqlash haqida” 2001-yil 6-apreldagi 162-son qaroriga 3-ilovaning 6, 7, va 12-bandlari (Oʻzbekiston Respublikasi QT, 2001 y, 4-son, 21-modda).

7. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida” 2005-yil 27-yanvardagi 35-son qaroriga ilovaning 5-bandi (Oʻzbekiston Respublikasi QT, 2005 y, 1-son, 5-modda).

8. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida (Oʻzbekiston Respublikasi Prezidentining “Oʻzbekiston Respublikasining 2009-yilgi asosiy makroiqtisodiy koʻrsatkichlari va Davlat budjeti parametrlari toʻgʻrisida” 2008-yil 29-dekabrdagi PQ-1024-son qarori) 2009-yil 9-fevraldagi 36-son qaroriga ilovaning 1-bandi (Oʻzbekiston Respublikasi QT, 2009 y, 2-son, 10-modda).

9. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish, shuningdek baʼzilarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Fuqarolarning pensiya taʼminoti tizimini yanada takomillashtirish chora-tadbirlari toʻgʻrisida” 2009-yil 30-dekabrdagi PF-4161-son Farmoni, Oʻzbekiston Respublikasi Prezidentining “Oʻzbekiston Respublikasi Mehnat va aholini ijtimoiy muhofaza qilish vazirligi tuzilmasini takomillashtirish chora-tadbirlari toʻgʻrisida” 2009-yil 30-dekabrdagi PQ-1251-son hamda Oʻzbekiston Respublikasi Moliya vazirligi huzuridagi budjetdan tashqari Pensiya jamgʻarmasining tashkiliy tuzilmasini shakllantirish chora-tadbirlari toʻgʻrisida” 2009-yil 30-dekabrdagi PQ-1252-son qarorlari)” 2010-yil 24-martdagi 52-son qaroriga 1-ilova 5-bandining yettinchi xatboshi va 8-bandi (Oʻzbekiston Respublikasi QT, 2010-y., 3-son, 12-modda).