Vazirlar Mahkamasi qayd etadiki, 1998-yilda ijtimoiy-iqtisodiy rivojlantirishning asosiy ustuvor yoʻnalishlarini hamda Iqtisodiy islohotlarni chuqurlashtirish boʻyicha chora-tadbirlar dasturini bajarishga doir amalga oshirilgan ishlar makroiqtisodiy barqarorlikka va iqtisodiy oʻsishga yordam berdi.

Yalpi ichki mahsulot oʻtgan yilning tegishli davridagiga nisbatan 103,3 foizga, sanoat mahsulotlari — 104,3 foizga, qishloq xoʻjaligi mahsulotlari — 103,4 foizga, chakana tovar oboroti — 117,1 foizga, xizmatlar koʻrsatish — 113,2 foizga koʻpaydi. Iqtisodiyotga jalb qilingan investitsiyalar hajmi 3,5 foizga oʻsdi.

Inflatsiyaning oʻrtacha oylik surʼatlari oʻtgan yilning I choragidagi 5,7 foizdan 2,4 foizgacha pasaydi. Aholining oʻrtacha jon boshi hisobiga real pul daromadlari koʻpaydi. Umumiy xarajatlarning 2,3 foizi miqdoridagi ortiqcha naqd pullarning muomaladan chiqarilishi taʼminlandi. Davlat budjeti daromad qismining bajarilishi prognozga nisbatan 101,5 foizni tashkil qildi.

Biroq, shartnoma va toʻlov intizomini mustahkamlash, korxonalarni tarkibiy oʻzgartirish, ularni sanatsiya qilish va zarar koʻrib ishlayotgan korxonalarni tugatish boʻyicha koʻrilgan chora-tadbirlarga qaramay, zarar koʻrib ishlayotgan korxonalar soni Kommunal xizmat koʻrsatish vazirligi, Qishloq va suv xoʻjaligi vazirligi, “Oʻzqurilishmateriallari” aksiyadorlik kompaniyasi, “Oʻzsuvqurilish” davlat konserni, “Oʻzmevasabzavotuzumsanoat-xolding” kompaniyasi tizimida koʻpaydi.

Omborlarda tayyor mahsulotlar qoldiqlari miqdorining koʻpligi, toʻlov muddati oʻtib ketgan debitorlik va kreditorlik qarzlarining koʻpayishi korxonalarning moliyaviy ahvolini qiyinlashtirmoqda.

Pudratchi qurilish tashkilotlarida islohotlarning sust borayotganligi, loyiha-smeta hujjatlarining va mablagʻ bilan taʼminlashning aniq manbalari yoʻqligi tufayli investitsiya dasturi qoloqlik bilan amalga oshirilmoqda.

Iqtisodiyotni rivojlantirishning tasdiqlangan ustuvorliklarini soʻzsiz bajarish maqsadida Vazirlar Mahkamasi qaror qiladi:

1. Qayd etilsinki, vazirliklar, idoralar, konsernlar, uyushmalar, korporatsiyalar, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan korxonalarni moliyaviy barqarorlashtirish, zarar koʻrib ishlayotgan va istiqbolsiz korxonalarni tugatish, qimmatli qogʻozlar bozori imkoniyatlarini ishga solish, xalq xoʻjaligining eng muhim obyektlari qurilishi surʼatlarini jadallashtirish yuzasidan keng koʻlamli chora-tadbirlar koʻrilmadi.

Ular zimmasiga oʻn kun muddatda omborlardagi tayyor mahsulotlar qoldiqlari koʻpayayotganligi sabablarini oʻz joyida har qaysi korxona boʻyicha aniqlab chiqish yuklansin. Ichki va tashqi bozorlarda xaridorlar, sifatli mahsulotlar ishlab chiqarish hajmlarini koʻpaytirish hisobiga ishlab chiqarish imkoniyatlari samaradorligini oshirish boʻyicha aniq chora-tadbirlar belgilansin.

2. Bosh vazir oʻrinbosari V.A.Chjenning Oʻzbekiston Respublikasi Prezidentining 1997-yil 31-martdagi PF-1740-son, 1998-yil 4-martdagi PF-1939-son farmonlariga, Oʻzbekiston Respublikasi Vazirlar Mahkamasining qarorlariga muvofiq. koʻpgina vazirliklar va idoralarda xususiylashtirilgan korxonalar aksiyalari paketlarini “Vaqt” milliy depozitariysida roʻyxatdan oʻtkazgan holda qayta taqsimlash ishlari tugallanganligi, erkin sotuvga hamda xorijiy investorlarga sotish uchun aksiyalar paketlarini shakllantirish uchun shart-sharoitlar yaratilganligi toʻgʻrisidagi axboroti maʼlumot uchun qabul qilinsin.

Jizzax (Mirziyoyev) va Toshkent (Roʻziyev) viloyatlari hokimlari, “Oʻzqishloqxoʻjaliktaʼminottuzatish” davlat-kooperativ qoʻmitasi (Olimjonov) va “Oʻzagrokimyotaʼminot” birlashmasi (Hoshimov) raislari aksiyalar paketlari tarkibini oʻzgartirishni Oʻzbekiston Respublikasi Vazirlar Mahkamasining 1998-yil 5-martdagi 96-son qarorida belgilangan muddatlarda oʻtkazish yuzasidan shaxsan javobgar ekanliklari toʻgʻrisida ogohlantirilsinlar.

3. Oʻzbekiston Respublikasi Davlat mulki qoʻmitasi uyushmalar, kompaniyalar, konsernlar va korporatsiyalar bilan birgalikda xususiylashtirilgan korxonalar aksiyalarini dastlabki sotishni jadallashtirish maqsadida:

aksiyalari tender asosida sotilishi kerak boʻlgan korxonalar roʻyxatini bir oy muddatda tasdiqlash uchun Vazirlar Mahkamasiga kiritsin va Vazirlar Mahkamasining 1997-yil 18-avgustdagi 404-son qarori bilan belgilangan tartibga muvofiq, tendyerlarning muntazam ravishda oʻtkazilishini tashkil etsin;

tasdiqlangan emissiya prospektlariga muvofiq aksiyadorlik jamiyatlarining aksiyalari paketlarining 1998-yil oxirigacha joylashtirilishni taʼminlash boʻyicha tarmoq dasturlarini ikki hafta muddatda ishlab chiqsin.

4. Oʻzbekiston Respublikasi Davlat mulki qoʻmitasi va Oliy xoʻjalik sudi tomonidan 126 ta iqtisodiy nochor korxonalarni tugatish jadvali ishlab chiqilganligi va tasdiqlanganligi maʼlumot uchun qabul qilinsin.

Vazirlar Mahkamasi komplekslari rahbarlari Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda Iqtisodiy nochor korxonalarni qayta roʻyxatdan oʻtkazish respublika komissiyasiga zarar koʻrib ishlayotgan va istiqbolsiz har bir korxona boʻyicha ularni qayta ixtisoslashtirish, tarkibiy oʻzgartirish, sanatsiya qilish yoki tugatish chora-tadbirlari dasturini bir oy muddatda taqdim etsinlar.

Oʻzbekiston Respublikasi Davlat mulki qoʻmitasi, Oliy xoʻjalik sudi vazirliklar va idoralar bilan birgalikda qayta roʻyxatdan oʻtkazish yakunlari boʻyicha yangidan aniqlangan nochor korxonalarni tugatish jadvalini oʻn kun muddatda ishlab chiqsinlar.

5. Oʻzbekiston Respublikasi Davlat soliq qoʻmitasi va mahalliy hokimiyat organlarining eʼtibori tadbirkorlik faoliyati bilan shugʻullanayotgan yuridik va jismoniy shaxslarning soliq solish bilan toʻliq qamrab olinishini taʼminlash boʻyicha ishlarning yetarli emasligiga qaratilsin, mahalliy hokimiyat organlari rahbarlarining Vazirlar Mahkamasining “Tadbirkorlik faoliyati bilan shugʻullanuvchi jismoniy shaxslardan soliqlar va yigʻimlarni undirishni tartibga solish toʻgʻrisida” 1997-yil 23-oktabrdagi 483-son qarorining bajarilishi uchun shaxsan javobgarliklari belgilab qoʻyilsin.

6. Oʻzbekiston Respublikasi Adliya vazirligi Iqtisodiy nochor korxonalar ishlari qoʻmitasi, Davlat mulki qoʻmitasi, Moliya vazirligi hamda Makroiqtisodiyot va statistika vazirligi bilan birgalikda “Bankrotlik toʻgʻrisida” Oʻzbekiston Respublikasi Qonunining yangi tahrirdagi loyihasini ikki oy muddatda ishlab chiqsin.

7. Oʻzbekiston Respublikasi Makroiqtisodiyot va statistika vazirligi vazirliklar, korporatsiyalar, uyushmalar, boshqa birlashmalar va hokimliklar bilan birgalikda loyiha-smeta hujjatlari ishlab chiqilmagan, mablagʻ bilan taʼminlash manbalari mutlaqo yoʻq yoki yetarli boʻlmagan obyektlarni 1 yarim yillik yakunlari boʻyicha koʻrib chiqsin va ularni 1998-yilgi investitsiya dasturidan chiqarish toʻgʻrisida Oʻzbekiston Respublikasi Vazirlar Mahkamasiga takliflar kiritsin.

8. “Oʻzqishloqxoʻjalikmash-xolding” kompaniyasi, “Oʻzfarmsanoat” davlat konserni, “Qorakoʻl” uyushmasi, “Koʻmir” aksiyadorlik jamiyati rahbarlariga mahsulotni eksport qilish prognozini bajarishga kirishmaganliklari, shuningdek “Oʻzkimyosanoat”, “Oʻzavtosanoat”, “Yogʻmoytamakisanoat” uyushmalari, “Oʻzikkilamchiranglimetall” aksiyadorlik jamiyati, “Oʻzmetkombinat” aksiyadorlik ishlab chiqarish birlashmasi, “Oʻzqurilishmateriallari” aksiyadorlik kompaniyasi, “Chkalov nomidagi Toshkent aviatsiya ishlab chiqarish birlashmasi” davlat-aksiyadorlik jamiyati rahbarlariga eksportga mahsulot yetkazib berishda qoloqlikka yoʻl qoʻyilganligi koʻrsatib oʻtilsin. Ularga Oʻzbekiston Respublikasi Makroiqtisodiyot va statistika vazirligi hamda Tashqi iqtisodiy aloqalar vazirligi bilan birgalikda mahsulotni eksportga joʻnatish va valyuta tushumlarining bir qismini majburiy sotish yuzasidan topshiriqlarni bajarishning oylar boʻyicha jadvalini I chorakda yoʻl qoʻyilgan qoloqlik oʻrnini toʻldirishni hisobga olgan holda bir hafta muddatda ishlab chiqish yuklatilsin.

9. Surxondaryo va Sirdaryo viloyatlari hokimliklari, Qishloq infratuzilmasini rivojlantirish dasturida nazarda tutilgan obyektlarni qurish va foydalanishga topshirish uchun yetarli chora-tadbirlar koʻrmayotganliklari qayd etilsin.

Qoraqalpogʻiston Respublikasi Vazirlar Kengashi, viloyatlar va tumanlar hokimliklari Oʻzbekiston Respublikasi Sogʻliqni saqlash vazirligi va Xalq taʼlimi vazirligi bilan birgalikda Dasturda belgilangan topshiriqlarning, shu jumladan, korxonalar mablagʻlari hisobiga ijtimoiy obyektlarni qurish topshiriqlarining bajarilishi yuzasidan amaliy chora-tadbirlar koʻrsinlar.

10. Qoraqalpogʻiston Respublikasi Vazirlar Kengashi raisi, viloyatlar va Toshkent shahar hokimlarining eʼtibori “Mahalliy sanoat” hududiy ishlab chiqarish-savdo aksiyadorlik kompaniyalarining va aholiga maishiy xizmat koʻrsatish uyushmalarining mahalliy mehnat va moddiy resurslardan eng koʻp foydalanishni hisobga olgan holda ularni rivojlantirish dasturlarini ishlab chiqish va amalga oshirish boʻyicha faoliyatlari yetarli darajada muvofiqlashtirib borilmayotganligiga qaratilsin.

Vazirlar Mahkamasining Isteʼmol bozori kompleksi (Usmonov M.Z.) Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda 1998 — 2000-yillarda mahalliy sanoatni rivojlantirishning hududiy dasturlarini ishlab chiqsin va tasdiqlasin.

11. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.T. Sultonov zimmasiga yuklansin.