Oʻzbekiston Respublikasining “Oʻzbekiston Respublikasining Markaziy banki toʻgʻrisida” (Oʻzbekiston Respublikasi Oliy Majlisining Axborotnomasi, 1995-yil, 12-son, 247-modda), “Banklar va bank faoliyati toʻgʻrisida” (Oʻzbekiston Respublikasi Oliy Majlisining Axborotnomasi, 1996-y., 5-6-son, 54-modda) va “Jinoiy faoliyatdan olingan daromadlarni legallashtirishga va terrorizmni moliyalashtirishga qarshi kurashish toʻgʻrisida”gi (Oʻzbekiston Respublikasi qonun hujjatlari toʻplami, 2004-y., 43-son, 451-modda) qonunlariga muvofiq Oʻzbekiston Respublikasi Markaziy banki Boshqaruvi qaror qiladi:

1. Jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirgʻin qurolini tarqatishni moliyalashtirishga qarshi kurashishga oid qonun hujjatlari talablarini buzganliklari uchun tijorat banklari, mikrokredit tashkilotlari va lombardlarga nisbatan Oʻzbekiston Respublikasi Markaziy banki tomonidan qoʻllaniladigan choralar va sanksiyalar toʻgʻrisidagi nizom ilovaga muvofiq tasdiqlansin.

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgandan keyin kuchga kiradi.

Ushbu Nizom Oʻzbekiston Respublikasining “Oʻzbekiston Respublikasining Markaziy banki toʻgʻrisida” (Oʻzbekiston Respublikasi Oliy Majlisining Axborotnomasi, 1995-y., 12-son, 247-modda), “Banklar va bank faoliyati toʻgʻrisida” (Oʻzbekiston Respublikasi Oliy Majlisining Axborotnomasi, 1996-y., 5-6-son, 54-modda) hamda “Jinoiy faoliyatdan olingan daromadlarni legallashtirishga va terrorizmni moliyalashtirishga qarshi kurashish toʻgʻrisida”gi (Oʻzbekiston Respublikasi Oliy Majlisining Axborotnomasi, 2004-y., 9-son, 160-modda) qonunlariga muvofiq tijorat banklari, mikrokredit tashkilotlari va lombardlar tomonidan jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirgʻin qurolini tarqatishni moliyalashtirishga qarshi kurashish toʻgʻrisidagi qonun hujjatlari buzilganligi aniqlangan taqdirda, ularga nisbatan Oʻzbekiston Respublikasi Markaziy banki (bundan keyingi oʻrinlarda Markaziy bank deb yuritiladi) tomonidan qoʻllaniladigan choralar va sanksiyalarni belgilaydi.

1. Markaziy bank ushbu Nizomga muvofiq jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirgʻin qurolini tarqatishni moliyalashtirishga qarshi kurashish toʻgʻrisidagi qonun hujjatlarini buzilishiga yoʻl qoʻygan tijorat banklari, mikrokredit tashkilotlari va lombardlarga nisbatan chora va sanksiyalarni qoʻllaydi.

2. Jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirgʻin qurolini tarqatishni moliyalashtirishga qarshi kurashish toʻgʻrisidagi qonun hujjatlarining talablari bajarilmagan hollarda Markaziy bank:

tijorat bankiga aniqlangan kamchiliklarni bartaraf etish toʻgʻrisida tegishli koʻrsatma yoʻllash;

tijorat banki ustav kapitalining belgilangan eng kam miqdorining bir foizigacha boʻlgan miqdorda jarima undirish huquqiga ega.

3. Kamchiliklarni bartaraf etish toʻgʻrisidagi Markaziy bankning koʻrsatmalarini bajarmagan, jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirgʻin qurolini tarqatishni moliyalashtirishga qarshi kurashish toʻgʻrisidagi qonun hujjatlari talablarini qoʻpol ravishda yoki muntazam ravishda (bir yil mobaynida ikki va undan ortiq marotaba) buzgan tijorat bankiga nisbatan Markaziy bank:

ushbu tijorat banki (filiali) rahbari, shuningdek, uning ichki nazorat xizmati rahbari va masʼul xodimlarini almashtirishni talab qilish;

bank operatsiyalarini amalga oshirish huquqini beruvchi litsenziyada va xorijiy valyutadagi operatsiyalarni amalga oshirish huquqini beruvchi litsenziyada koʻrsatilgan ayrim operatsiyalarni oʻtkazishni bir yilgacha boʻlgan muddatga toʻxtatib qoʻyish;

bank operatsiyalarini amalga oshirish huquqini beruvchi litsenziyani va xorijiy valyutadagi operatsiyalarni amalga oshirish huquqini beruvchi litsenziyani chaqirib olishgacha boʻlgan choralarni qoʻllashga haqlidir.

4. Jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirgʻin qurolini tarqatishni moliyalashtirishga qarshi kurashish toʻgʻrisidagi qonun hujjatlarining talablari bajarilmagan hollarda Markaziy bank:

mikrokredit tashkiloti va lombardlarga aniqlangan kamchiliklarni bartaraf etish toʻgʻrisida tegishli koʻrsatma yoʻllash;

mikrokredit tashkilotidan mikrokredit tashkilotlari ustav fondining belgilangan eng kam miqdorining bir foizigacha boʻlgan miqdorida jarima undirish;

lombarddan eng kam oylik ish haqining 50 barobarigacha boʻlgan miqdorda jarima undirish huquqiga ega.

5. Markaziy bankning kamchiliklarni bartaraf etish toʻgʻrisidagi koʻrsatmalarini bajarmagan, jinoiy faoliyatdan olingan daromadlarni legallashtirishga, terrorizmni moliyalashtirishga va ommaviy qirgʻin qurolini tarqatishni moliyalashtirishga qarshi kurashish toʻgʻrisidagi qonun hujjatlari talablarini qoʻpol ravishda yoki muntazam ravishda (bir yil mobaynida ikki va undan ortiq marotaba) buzgan mikrokredit tashkiloti va lombardga nisbatan Markaziy bank:

ushbu mikrokredit tashkiloti va lombard rahbari, shuningdek, ularning ichki nazorat xizmati rahbari va masʼul xodimlarini almashtirishni talab qilish;

mikrokredit tashkiloti va lombard faoliyatini amalga oshirish huquqini beruvchi litsenziyada koʻrsatilgan ayrim operatsiyalarni oʻtkazishni toʻxtatib qoʻyish;

mikrokredit tashkiloti va lombard faoliyatini amalga oshirish huquqini beruvchi litsenziyani chaqirib olishgacha boʻlgan choralarni qoʻllashga haqlidir.

6. Ushbu Nizomda belgilangan jarima choralari tijorat banklari, mikrokredit tashkilotlari va lombardlarga Markaziy bankning farmoyishi asosida qoʻllaniladi.

7. Tijorat banklari, mikrokredit tashkilotlari va lombardlarga faoliyatni amalga oshirish uchun berilgan litsenziyani toʻxtatib qoʻyish va chaqirib olish qonun hujjatlarida belgilangan tartibda Markaziy bank Boshqaruvining qaroriga asosan amalga oshiriladi.

8. Undirilgan jarima summasi Markaziy bankning “Boshqa foizsiz daromadlari” balans hisobvaragʻiga oʻtkaziladi.