Tarmoqda nazorat, hisobga olish va boshqarishni maqbullashtirish asosida qogʻoz chiqindilarini tayyorlash tizimini rivojlantirish va takomillashtirish, real sektor korxonalarining, kichik va xususiy biznes subyektlarining ikkilamchi qogʻozga boʻlgan ehtiyojlarini yanada toʻliq taʼminlash uchun ikkilamchi xomashyodan sanoat yoʻli bilan foydalanishning samarali mexanizmlarini joriy etish, shuningdek tarmoq korxonalarining, shu jumladan “Sanoatqalinqogʼozsavdo” XI OAJ va “Oʻzbek qogʻozi” OAJning mavjud quvvatlaridan foydalanishni koʻpaytirish maqsadida Vazirlar Mahkamasi qaror qiladi:

1. “Sanoatqalinqogʼozsavdo” XI OAJ va “Oʻzbek qogʻozi” OAJning kelgusida qayta ishlash uchun joylarda toʻplangan ikkilamchi xomashyo — qogʻoz chiqindilarini qabul qilish punktlari tashkil etish toʻgʻrisidagi taklifiga rozilik berilsin.

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, Oʻzbekiston Respublikasi Davlat mulki qoʻmitasi foydalanilmayotgan turar joy boʻlmagan binolarni qogʻoz chiqindilarini qabul qilish punktlari tashkil etish uchun “Sanoatqalinqogʼozsavdo” XI OAJ va “Oʻzbek qogʻozi” OAJga belgilangan tartibda bersin.

2. Oʻzbekiston Respublikasi hududida qogʻoz chiqindilarini toʻplash, tayyorlash va qayta ishlash uchun yetkazib berish masalalari boʻyicha Respublika komissiyasi ilovaga muvofiq tarkibda tuzilsin.

Oʻzbekiston Respublikasi hududida qogʻoz chiqindilarini toʻplash, tayyorlash va qayta ishlash uchun yetkazib berish masalalari boʻyicha Respublika komissiyasi:

davlat va xoʻjalik boshqaruvi organlari, ularning hududiy boʻlinmalari, mahalliy davlat hokimiyati organlari tomonidan “Sanoatqalinqogʼozsavdo” XI OAJ va “Oʻzbek qogʻozi” OAJning qogʻoz chiqindilarini tayyorlash va qabul qilish punktlariga topshirish boʻyicha 2009-yilning II — IV choraklari va keyinchalik har yil uchun prognoz koʻrsatkichlarni oʻn kun muddatda belgilasin;

qogʻoz chiqindilarini toʻplash va tayyorlash boʻyicha tasdiqlangan prognoz koʻrsatkichlarning bajarilishi har oyda nazorat qilib borilishini taʼminlasin;

Davlat va xoʻjalik boshqaruvi organlari, ularning hududiy boʻlinmalari, mahalliy davlat hokimiyati organlarining masʼul xodimlarini qogʻoz chiqindilari tayyorlash boʻyicha belgilangan prognoz koʻrsatkichlarni bajarganlik va oshirib bajarganlik uchun ragʻbatlantirish toʻgʻrisidagi nizomni bir oy muddatda ishlab chiqsin va belgilangan tartibda tasdiqlasin.

3. Davlat va xoʻjalik boshqaruvi organlari, ularning hududiy boʻlinmalari, mahalliy davlat hokimiyati organlari tasdiqlangan prognoz koʻrsatkichlarga muvofiq qogʻoz chiqindilarini toʻplash va topshirishni belgilangan tartibda amalga oshirsinlar.

4. Belgilab qoʻyilsinki, “Sanoatqalinqogʼozsavdo” XI OAJ va “Oʻzbek qogʻozi” OAJ qabul qilish punktlari qogʻoz chiqindilarini tayyorlash va topshirish boʻyicha hisob-kitoblarni erkin narxlarda, shu jumladan ularni jismoniy shaxslardan qabul qilib olishda — naqd pul bilan va yuridik shaxslardan qabul qilib olishda — naqd pulsiz amalga oshiradilar.

5. Oʻzbekiston Respublikasi Monopoliyadan chiqarish, raqobat va tadbirkorlikni qoʻllab-quvvatlash qoʻmitasi Iqtisodiyot vazirligi, Moliya vazirligi, Markaziy bank, “Sanoatqalinqogʼozsavdo” XI OAJ “Oʻzbek qogʻozi” OAJ hamda boshqa manfaatdor vazirliklar va idoralar bilan birgalikda Qogʻoz chiqindilarini toʻplash, tayyorlash va qayta ishlash uchun yetkazib berish tartibi toʻgʻrisidagi nizomni bir oy muddatda ishlab chiqsin va tasdiqlasin.

6. Belgilab qoʻyilsinki:

qogʻoz chiqindilarini toʻplash va topshirishning tashkil etilishi uchun davlat va xoʻjalik boshqaruvi organlari, mahalliy davlat hokimiyati organlari rahbarlari javob beradilar;

budjet tashkilotlari boʻyicha qogʻoz chiqindilarini sotishdan olingan mablagʻlar ularning budjetdan tashqari hisob raqamiga oʻtkaziladi va ulardan tashkilotning moddiy-texnika bazasini mustahkamlashda foydalaniladi.

7. Respublika tijorat banklariga tarmoq qayta ishlash korxonalariga, shu jumladan texnologik asbob-uskunalarni modernizatsiyalash uchun, kreditlar ajratish tavsiya etilsin.

8. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari E.R. Shoismatov va N.M. Xanov zimmasiga yuklansin.