Oʻzbekiston Respublikasi Prezidentining 2008-yil 8-iyuldagi PQ-910-sonli “Bolalar musiqa va sanʼat maktablarining moddiy-texnik bazasini mustahkamlash va ularning faoliyatini yanada yaxshilash boʻyicha 2009 — 2014-yillarga moʻljallangan Davlat dasturi toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2008-y., 28-son, 267-modda) muvofiq Oʻzbekiston Respublikasi Xalq taʼlimi vazirligi va Moliya vazirligi qaror qiladi:

1. Ota-onalar tomonidan bolalarning bolalar musiqa va sanʼat maktablarida oʻqishi uchun haq toʻlash va undan foydalanish tartibi toʻgʻrisidagi nizom ilovaga muvofiq tasdiqlansin.

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan boshlab oʻn kun oʻtgach kuchga kiradi.

Mazkur Nizom Oʻzbekiston Respublikasi Prezidentining 2008-yil 8-iyuldagi PQ-910-sonli “Bolalar musiqa va sanʼat maktablarining moddiy-texnik bazasini mustahkamlash va ularning faoliyatini yanada yaxshilash boʻyicha 2009 — 2014-yillarga moʻljallangan Davlat dasturi toʻgʻrisida”gi qaroriga (Oʻzbekiston Respublikasi qonun hujjatlari toʻplami, 2008-y., 28-son, 267-modda) muvofiq bolalar (oʻquvchilar)ning (bundan keyingi oʻrinlarda bolalar deb yuritiladi) bolalar musiqa va sanʼat maktablarida oʻqishi uchun toʻlanadigan toʻlovning miqdori, uni toʻlash va undan foydalanish tartibini belgilaydi.

1. Mazkur Nizom Davlat budjeti tomonidan moliyalashtiriladigan bolalar musiqa va sanʼat maktablariga taalluqlidir.

2. Bolalar musiqa va sanʼat maktablarida oʻqish uchun toʻlanadigan toʻlovlar qonunchilik hujjatlarida belgilanadigan miqdorlarda undiriladi.

3. Bolalar musiqa va sanʼat maktablarida bolalarning taʼlim olishlari uchun toʻlovlar ota-onalar yoki ularning oʻrnini bosuvchi shaxslar (bundan keyingi oʻrinlarda ota-onalar deb yuritiladi) va maktab maʼmuriyati tomonidan tuzilgan shartnoma asosida amalga oshiriladi.

4. Bolalar musiqa va sanʼat maktablarida oʻqish uchun toʻlanadigan toʻlov oʻquv yili (sentabr — may oylari) uchun toʻlanadi. Toʻlovlar har oyda kelgusi oyning 5-sanasidan kechikmasdan toʻlanadi.

5. Bolaning kasalligi davrida (2 haftadan kam boʻlmaganda) bolalar musiqa va sanʼat maktabida oʻqish uchun toʻlov olinmaydi. Bunda, bolaning kasalligi toʻgʻrisida ota-onaning arizasi va davolash muassasasidan yoki hudud shifokoridan olingan maʼlumotnoma taqdim etilishi zarur.

6. Bolalar musiqa va sanʼat maktablarida oʻqish uchun amalga oshiriladigan toʻlov tegishli xizmat koʻrsatuvchi bankka toʻlanadi va toʻlov toʻlanganligini tasdiqlovchi hujjat (kvitansiya) nusxasi bolalar musiqa va sanʼat maktabiga taqdim etiladi.

7. Agar toʻlov naqd pulsiz shaklda amalga oshirilgan boʻlsa, bolalar musiqa va sanʼat maktabiga toʻlov topshiriqnomasining nusxasi (toʻlov toʻlanganligi toʻgʻrisidagi bank belgisi qoʻyilgan holda) taqdim etiladi.

8. Toʻlov bolalar musiqa va sanʼat maktablariga xizmat koʻrsatuvchi tegishli gʻaznachilik boʻlinmalarining hududiy gʻaznachilik hisob raqamlariga oʻtkaziladi va tegishli bolalar musiqa va sanʼat maktabining shaxsiy gʻazna hisobvaraqlariga undan keyinchalik foydalanish uchun hisobga olinadi.

9. Agar toʻlov ushbu Nizomning 4-bandida koʻrsatilgan muddatdan ikki hafta mobaynida uzrli sabablarsiz toʻlanmagan taqdirda, oʻquvchilar bolalar musiqa va sanʼat maktabi roʻyxatidan chiqariladi.

10. Bolaning bolalar musiqa va sanʼat maktabida taʼlim olganligi uchun mavjud boʻlgan qarzdorlik bir oy ichida toʻlangan taqdirda, bola mazkur sinfning oʻquv dasturlari talablarini bajargandan soʻng oʻquvchilar safiga qayta tiklanadi. Bola oʻqishni tegishli toʻlovni amalga oshirgan holda keyingi oʻquv yilida (oʻtgan oʻquv yilining tugatilmagan choragining birinchi oyidan) davom ettirishi mumkin.

12. Har bir bolalar musiqa va sanʼat maktabida oʻqish uchun toʻlovlardan ozod etish va oʻqituvchi hamda konsertmeysterlarga har oylik ustamalar belgilash boʻyicha Komissiya (bundan buyon matnda Komissiya deb yuritiladi) tuziladi.

13. Komissiya maktab direktori buyrugʻi asosida 5 — 7 kishidan iborat boʻlgan tarkibda tayinlanadi.

Komissiya raisi — bolalar musiqa va sanʼat maktabi direktori.

Komissiya aʼzolari — maʼnaviy-maʼrifiy va oʻquv ishlari boʻyicha direktor oʻrinbosari (masʼul kotib), bolalar musiqa va sanʼat maktabining kasaba uyushmasi qoʻmitasining raisi, ikki yetakchi oʻqituvchi va ota-onalar qoʻmitasining ikki vakili.

14. Komissiyaning asosiy vazifasi quyidagilar hisoblanadi:

a) oʻquv yilining boshlanishida, zarur hollarda oʻquv yili davomida ota-onalarni bolalarning oʻqishi uchun belgilangan toʻlovdan ozod etish masalasini koʻrib chiqish;

b) oʻquv yilining boshlanishida, shuningdek, zarur hollarda oʻquv yili davomida oylik ustama belgilash boʻyicha oʻqituvchi va konsertmeysterlarning nomzodlarini koʻrib chiqish hamda har oylik ustama belgilash.

v) oʻqish uchun toʻlanadigan toʻlovdan ozod etiladigan bolalarning roʻyxatini shakllantirish va tasdiqlash.

15. Komissiya kelib tushgan hujjatlarni koʻrib chiqib, tegishli qaror qabul qiladi. Mazkur qaror tegishli buyruq chiqarish uchun bolalar musiqa va sanʼat maktabi direktoriga yuboriladi.

16. Oʻqituvchi va konsertmeysterlarga ustama belgilash uchun nomzodlarni koʻrib chiqishda bolalar musiqa va sanʼat maktablarining boʻlinma mudirlari Komissiyaga oʻqituvchi va konsertmeysterlarning tarbiyaviy va sinfdan tashqari ishlari, kasbiy mahorati, oʻqitish sifati va yuksak koʻrsatkichlari, shuningdek oʻquv yili davomida bajarilgan uslubiy ishlari toʻgʻrisida tavsifnomalar taqdim etishlari kerak.

17. Komissiya, zarur hollarda, oʻquv yili boshida belgilangan ustamalar miqdorining muddatidan oldin oʻzgarganligi toʻgʻrisida qaror qabul qiladi.

18. Bolalar musiqa va sanʼat maktablarida oʻquvchilar umumiy sonining 25 foizi doirasida bolalarning quyidagi toifalari toʻlovdan ozod etiladi:

musiqa va sanʼat yoʻnalishlari boʻyicha xalqaro (1 — 3-oʻrinlar) va respublika (1-oʻrin) tanlovlarida gʻolib boʻlgan bolalar — bir kalendar yil mobaynida (gʻolib deb eʼlon qilingandan keyingi oydan boshlab 12 oy mobaynida);

kam taʼminlangan oilalardan boʻlgan bolalar.

19. Musiqa va sanʼat yoʻnalishlari boʻyicha xalqaro (1 — 3-oʻrinlar) va respublika (1-oʻrin) tanlovlarida gʻolib boʻlgan bolalarni bir kalendar yil mobaynida oʻqitish uchun toʻlovdan ozod etishga ularning tanlovda gʻolib boʻlganligini tasdiqlovchi hujjati asos boʻladi.

20. Kam taʼminlangan oilalarning bolalarini toʻlovdan ozod etish uchun quyidagi hujjatlar taqdim etilishi lozim:

a) ota-onalarning arizasi;

b) oilaning kam taʼminlanganligi toʻgʻrisida fuqarolarning oʻzini oʻzi boshqarish organlari tomonidan beriladigan maʼlumotnoma.

21. Oilaning bir aʼzosiga bir oyda toʻgʻri keladigan jami daromadi eng past darajada boʻlgan kam taʼminlangan oilalarning bolalari toʻlovdan ozod etiladigan bolalarning roʻyxatiga birinchi navbatda kiritiladi.

Roʻyxatga kirmagan kam taʼminlangan oilalarning bolalaridan zaxira shakllantiriladi.

22. Toʻliq davlat taʼminotida boʻlgan yetim bolalar va ota-ona qaramogʻidan mahrum boʻlgan bolalar ham bolalar musiqa va sanʼat maktablarida oʻqish uchun belgilangan toʻlovlardan ozod etiladi.

23. Toʻliq davlat taʼminotida boʻlgan yetim bolalar va ota-ona qaramogʻidan mahrum boʻlgan bolalarning oʻqishi uchun toʻlovdan ozod etishga xalq taʼlimi muassasalari faoliyatini metodik taʼminlash va tashkil etish tuman (shahar) boʻlimlari tomonidan berilgan maʼlumotnoma asos boʻladi.

23¹. Agarda bir oilaning ikki va undan ortiq farzandi bolalar musiqa va sanʼat maktablarida oʻqisa, ulardan har birining oʻqishi uchun belgilangan toʻlovning 70 foizi miqdorida toʻlov amalga oshiriladi.

23². Toʻlovdan ozod etiladigan bolalarning roʻyxati Komissiyaning qarori bilan tasdiqlanadi hamda mazkur qaror asosida bolalar musiqa va sanʼat maktabi direktorining buyrugʻi chiqariladi.

24. Oʻqish uchun ota-onalar toʻlovidan tushgan mablagʻlar birinchi navbatda bolalar musiqa va sanʼat maktablarini saqlash xarajatlariga (ish haqi va unga tenglashtirilgan toʻlovlar, yagona ijtimoiy toʻlov bundan mustasno) yoʻnaltiriladi. Tushumlarning qolgan qismi quyidagi tartibda taqsimlanadi:

a) 40 foizgacha — maktab pedagog xodimlari umumiy sonining koʻpi bilan 50 foizini qamrab olgan holda oʻqituvchi va konsertmeysterlar bazaviy tarif stavkasining 40 foizigacha boʻlgan miqdorda har oylik ustamalar shaklida ragʻbatlantirishga, shuningdek oʻquvchilari xalqaro koʻrik-tanlov va festivallarda 1, 2, 3, 4-oʻrinlarni egallagan oʻqituvchi va konsertmeysterlarga tegishincha eng kam oylik ish haqining 10, 9, 8, 7 barobari miqdorida, respublika tanlovlarida 1, 2, 3-oʻrinlarni egallaganligi uchun esa tegishincha eng kam ish haqining 6, 5, 4 barobari miqdorida mukofotlashga;

b) 20 foizgacha — oʻquvchi, oʻqituvchi va konsertmeysterlarni tanlovlar, festivallar, ustoz saboqlari hamda ijodiy maktablardagi mashgʻulotlarga borishi, shuningdek oʻquvchilarning teatr, muzey, konsertlarga tashrifi bilan bogʻliq xarajatlarini toʻlashga, maktabda madaniy-ommaviy tadbirlarni tashkil etish va oʻtkazishga;

v) qolgan mablagʻlar — mavjud kreditorlik qarzlarini qoplashga va moddiy-texnik bazani mustahkamlashga (bino va inshootlarni, mebel, musiqa asboblari va jihozlarni kapital va joriy taʼmirlashga, shuningdek mebel, uskunalar, musiqa asboblari, oʻquv qoʻllanmalari, adabiyotlar va boshqa zarur jihozlar sotib olishga).

25. Ota-onalar toʻlovidan tushgan mablagʻlarning taqsimlanishi Komissiya qarori asosida maktab direktori buyrugʻi bilan tasdiqlanadi.

26. Oʻqituvchi va konsertmeysterlarga belgilanadigan ustama miqdori ularning oʻquv-tarbiyaviy va sinfdan tashqari ishlari, oʻquv jarayoniga qoʻshgan shaxsiy hissasi uchun 100 ballik tizim asosida mazkur Nizomning 1-ilovasiga muvofiq baholanadi. Ulardan:

80 va undan koʻp ballni toʻplagan oʻqituvchi va konsertmeysterlarga bazaviy tarif stavkasining 15 foizigacha ustama belgilanadi;

70 balldan 80 ballgacha toʻplagan oʻqituvchi va konsertmeysterlarga bazaviy tarif stavkasining 10 foizigacha ustama belgilanadi;

60 balldan 70 ballgacha toʻplagan oʻqituvchi va konsertmeysterlarga bazaviy tarif stavkasining 5 foizigacha ustama belgilanadi.

27. Oʻqituvchi va konsertmeysterlarga belgilanadigan ustama miqdori ularning kasbiy mahorati uchun 100 ballik tizim asosida mazkur Nizomning 2-ilovasiga muvofiq baholanadi. Ulardan:

80 va undan koʻp ballni toʻplagan oʻqituvchi va konsertmeysterlarga bazaviy tarif stavkasining 25 foizigacha ustama belgilanadi;

70 balldan 80 ballgacha toʻplagan oʻqituvchi va konsertmeysterlarga bazaviy tarif stavkasining 15 foizigacha ustama belgilanadi;

60 balldan 70 ballgacha toʻplagan oʻqituvchi va konsertmeysterlarga bazaviy tarif stavkasining 10 foizigacha ustama belgilanadi.

28. Oʻqish uchun toʻlanadigan toʻlovning tushumi va sarflanishi boʻyicha buxgalteriya hisobini yuritish va hisobotlarni tuzish tegishli musiqa va sanʼat maktabining buxgalteriyasi tomonidan amalga oshiriladi.

29. Ota-onalar toʻlovining hisoblanishi, tushumi va uning ishlatilishi buxgalteriya hisob-kitobida qonunchilik hujjatlarida belgilangan tartibda buxgalteriya qaydnomalari orqali rasmiylashtiriladi.

30. Oʻzbekiston Respublikasi Madaniyat vazirligi va uning hududiy boshqarmalari ota-onalar tomonidan toʻlovni amalga oshirish va pedagog xodimlarga belgilanadigan ustamalarning monitoringini olib boradi.

31. Bolalar musiqa va sanʼat maktabining rahbari va bosh hisobchisi ota-onalar toʻlovi tushumini maqsadli sarflash boʻyicha javobgar hisoblanadi.

32. Iqtisodiyot va moliya vazirligining nazorat-taftish bosh boshqarmasi va uning hududiy boshqarmalari tomonidan bolalar musiqa va sanʼat maktablarida oʻqish uchun toʻlanadigan ota-onalar toʻlovidan tushgan mablagʻlarning oʻz vaqtida qabul qilinishi, shuningdek, maqsadli sarflanishi hamda pedagog va konsertmeysterlarning ustamalari miqdorini hisoblashning toʻgʻri taqsimlanishi boʻyicha nazorat olib boriladi.

33. Ushbu Nizom talablarini buzilishida aybdor boʻlgan shaxslar qonunchilik hujjatlariga muvofiq javobgar boʻladi.