Ushbu Qonun “Oʻzbekiston Respublikasidagi korxonalar toʻgʻrisida”gi Qonun va “Oʻzbekiston Respublikasida tadbirkorlik toʻgʻrisida” gi Oʻzbekiston Respublikasi qonunlari bilan bir qatorda kooperatsiya faoliyatining jamoa mulkchilik shakli sifatidagi oʻziga xos jihatlarini belgilaydi.

U yuridik va jismoniy shaxslarga kooperativga ixtiyoriy ravishda kirish va undan erkin chiqish, kooperativni boshqarishda ishtirok etish huquqini, kooperativlarni mulkchilikning barcha shakllaridagi korxonalar bilan teng huquqlilik asosida rivojlantirish, jamoa boʻlib xoʻjalik yuritish mustaqillikni hamda ustavda belgilangan vazifalarni bajarish yuzasidan qaror qabul qilishda kooperativning mustaqilligini kafolatlaydi.

1. Oʻzbekiston Respublikasida kooperatsiya fuqarolar va yuridik shaxslarning iqtisodiy hamda ijtimoiy faoliyatining turli sohalarida umumiy maqsadlarga erishish uchun tashkiliy jihatdan rasmiylashtirilgan, mulkchilikning jamoa shakliga asoslangan ixtiyoriy birlashmalari (kooperativlari) majmuidan iboratdir.

2. Oʻzbekiston Respublikasida kooperatsiyasi sistemasida foyda olish maqsadida aholining mahsulotlar, ishlar va xizmatlarga boʻlgan ijtimoiy ehtiyojlarini qondirish uchun tuziladigan matlubot, ishlab chiqarish va aralash ishlab chiqarish — matlubot kooperativlari amal qiladi.

Kooperatsiya, shuningdek oʻz aʼzolarining uy-joy-maishiy va boshqa ijtimoiy ehtiyojlarini qondirishga xizmat qiladigan kooperativlarni,(uy-joy-qurish uy joy kooperativlarini, garaj qurish, chorbogʻ qurish va shu kabi kooperativlarni) ham oʻz ichiga oladi.

Barcha turdagi kooperativlar va ularning xoʻjalik uyushmalarini tuzishning, roʻyxatga olishning, ular faoliyatining, ularni qayta tuzish va tugatishning umumiy huquqiy, iqtisodiy va ijtimoiy asoslari “Oʻzbekiston Respublikasida korxonalar toʻgʻrisida”gi va “Oʻzbekiston Respublikasida tadbirkorlik toʻgʻrisida”gi Oʻzbekiston Respublikasi Qonunlari, ushbu Qonun, Oʻzbekiston Respublikasining boshqa qonun hujjatlari bilan, Qoraqalpogʻiston SSRda esa Qoraqalpogʻiston MSSR qonunlari bilan tartibga solinadi.

1. Yuridik shaxs huquqiga ega boʻlgan, jamoa mulki huquqi asosida oʻziga qarashli mulkka egalik qiladigan, undan foydalanadigan va uni tasarruf etadigan mustaqil xoʻjalik yurituvchi subyekt kooperativ hisoblanadi.

Ishlab chiqarish va ishlab chiqarish-matlubot kooperativlarining faoliyati, oʻz aʼzolarining, shuningdek mehnat shartnomalari (kontraktlar, bitimlar) boʻyicha ishlayotgan kishilarning oʻz mehnatlari bilan shaxsan ishtirok etishiga asoslanadi

Matlubot kooperativlari hamda oʻz aʼzolarining uy-joy-maishiy va boshqa ijtimoiy ehtiyojlarini qondirishga xizmat qiladigan kooperativlar faoliyati oʻz mehnati bilan shaxsan ishtirok etish bilan boʻlmasligi ham mumkin.

2. Kooperativlar tarmoq prinsipi, hududiy va boshqa belgilar boʻyicha xoʻjalik uyushmalariga qatʼiy ixtiyoriylik asosida birlashmalari va yakkahokimlikka qarshi qonunlarning talablarini hisobga olgan holda ish olib borishlari mumkin.

3. Kooperativ, Oʻzbekiston Respublikasi qonunlarida taqiqlanganlaridan tashqari, faoliyatning har qanday turi bilan shugʻullanishga haqlidir. Bunda kooperativlar va ularning xoʻjalik uyushmalari (shu jumladan barcha turdagi aralash davlat-kooperativ uyushmalari) davlat boshqaruvi, kontroli va nazorati, shuningdek surishtiruv, tergov va odil sudlov idoralarining vazifalarini bajarishlariga yoʻl qoʻyilmaydi.

Kooperativlar, kooperativlarning xoʻjalik uyushmalari Oʻzbekiston Respublikasining, SSR Ittifoqining amaldagi qonunlariga va Oʻzbekiston Respublikasi ishtirok etayotgan xalqaro shartnomalarga muvofiq respublika, Ittifoq bozorlarida va xalqaro bozorlarda xoʻjalik faoliyatini erkin yuritish huquqiga egadirlar.

1. Kooperativning mustaqil balansida oʻz ifodasini topadigan asosiy fondlar va oborot mablagʻlar, shuningdek boshqa boyliklar kooperativ mulkini tashkil etadi.

2. Kooperativ mol-mulki oʻz aʼzolarining pul va moddiy badallari, u ishlab chiqargan mahsulotlar, bu mahsulotlarni sotishdan va kooperativ ustavida nazarda tutilgan boshqa faoliyatdan olingan daromad hisobiga hosil boʻladi. Kooperativ mulkini shakllantirishda, mulk shaklidan qati nazar, shartnoma asoslarida pul badallari va moddiy badallar toʻlash yoʻli bilan davlat korxonalari (tashkilotlari) va boshqa korxonalar (tashkilotlar), shuningdek ushbu kooperativga aʼzo boʻlmagan, ammo unda shartnoma (kontrakt, bitim), asosida ishlayotgan fuqarolar ham ishtirok etishlari mumkin.

3. Kooperativ tomonidan tashkil etilayotgan korxonalar va tashkilotlarning mol-mulki, shuningdek qoʻshgan ulushlariga muvofiq xoʻjaliklararo korxonalar va tashkilotlarning mol-mulki kooperativ mulki hisoblanadi.

Kooperativlardan, boshqa jamoa va davlat korxonalari hamda tashkilotlaridan, shuningdek yakka tartibdagi korxonalardan iborat tarkibidagi xoʻjalik uyushmalarining mol-mulki davlat, kooperativlar va fuqarolarning umumiy mulki hisoblanadi. Tarkibiga faqat kooperativlar kirgan xoʻjalik uyushmalarining mol-mulki umumiy jamoa mulki huquqi asosida ana shu kooperativlarga qarashli boʻladi, basharti, xoʻjalik uyushmalarining taʼsis hujjatlarida va Oʻzbekiston Respublikasi qonunlarida oʻzga hol nazarda tutilgan boʻlmasa.

1. Kooperativ fuqarolar istagi bilan yoki yuridik shaxslarning tashabbusi bilan mutlaqo ixtiyoriylik asosida tashkil etiladi. Kooperativ aʼzolari boʻlgan fuqarolarning soni uch kishidan kam boʻlmasligi, matlubot kooperativida (jamiyatida) va jamoa xoʻjaligida esa yetti kishidan kam boʻlmasligi kerak.

Kooperativ mustaqillik asosida ham, davlat korxonalari, muassasalari, tashkilotlari, kooperativ va boshqa korxonalar, muassasalar hamda tashkilotlar qoshida ham tashkil etiladi va amal qiladi.

Mulkchilikning har qanday turdagi korxonaning, tashkilotning qaroriga koʻra tuziladigan kooperativ yuridik shaxs huquqiga ega boʻlishi, joriy va hisob-kitob schyotlari ochishi mumkin. Korxona, tashkilot shunday turdagi kooperativning ustavini tasdiqlaydi, uning ishlab chiqarish va xoʻjalik faoliyatini nazorat qiladi hamda uning faoliyat natijalari uchun toʻla javobgar boʻladi.

2. Kooperativning ustavi kooperativ taʼsis etishni istagan fuqarolarning umumiy yigʻilishida yoki yuridik shaxslar muxtor vakillarining yigʻilishida qabul qilinadi va kooperativ joylashgan yerdagi nohiya, shahar xalq deputatlari Soveti ijroiya qoʻmitasi tomonidan roʻyxatga olinadi.

Matlubot, ishlab chiqarish kooperativlari, aralash shaklidagi kooperativlarning ustavida kooperativ aʼzolarining kooperativ qarzlari boʻyicha mulkiy javobgarligi koʻrsatilgan boʻlishi kerak. Bu qoida kooperativ ustavida oʻz aksini topmasa, uni davlat roʻyxatiga olish man etiladi.

1. 16 yoshga toʻlgan, kooperativning maqsad va vazifalarini amalga oshirishda ishtirok etish istagini bildirgan va bunga qodir boʻlgan har bir fuqaro kooperativ aʼzosi boʻlishi mumkin, basharti, Oʻzbekiston Respublikasi qonunlarida oʻzga hol nazarda tutilgan boʻlmasa.

Mulkchilikning barcha shakllaridagi korxonalar va tashkilotlar, shuningdek boshqa kooperativlar va shirkatlar kooperativning jamoa aʼzolari boʻlishi mumkin. Kooperativlar va ularning jamoa aʼzolari oʻrtasidagi oʻzaro munosabatlar shartnoma asoslarida quriladi.

Mulkchilikning barcha shakllaridagi korxonalar va tashkilotlar, shuningdek boshqa kooperativlar va shirkatlar kooperativning jamoa aʼzolari boʻlishi mumkin. Kooperativlar va ularning jamoa aʼzolari oʻrtasidagi oʻzaro munosabatlar shartnoma asoslarida quriladi.

2. Ishlab chiqarish kooperativining aʼzosi mehnat shartnomasi boʻyicha bir nechta ishlab chiqarish kooperativida ishlashi yoki ayni bir vaqtning oʻzida uy-joy va boshqa ijtimoiy ehtiyojlarni qondirish bilan shugʻullanuvchi bir necha kooperativning aʼzosi boʻlishga haqli.

Kooperativga kirish yoki unda mehnat shartnomasi (kontrakt, bitim) boʻyicha ishlash uchun asosiy ish joyidagi korxona mulkdorining, maʼmuriyatning (boshqaruv idorasining) roziligi talab qilinmaydi.

Oʻzbekiston Respublikasi qonunlariga muvofiq tadbirkorlik bilan shugʻullanish huquqiga ega boʻlmagan shaxslar kooperativlarda ishlashi va ularga aʼzo boʻlishi mumkin emas.

3. Aʼzolik munosabatlaridan kelib chiqqan nizoli ishlar kooperativ ustavida belgilangan tartibda kooperativ idoralari tomonidan, Oʻzbekiston Respublikasi qonunlarida nazarda tutilgan hollarda esa — sud tomonidan hal etiladi.

4. Kooperativ aʼzosi ustavda nazarda tutilgan hollarda kooperativning umumiy yigʻilishi qaroriga binoan kooperativdan chiqarilishi mumkin.

Kooperativ aʼzoligidan chiqarilganlik ustidan sudga shikoyat qilinishi mumkin.

1. Barcha turdagi kooperativlarning aʼzolari:

kooperativ faoliyatda va uning ishlarini boshqarishda qatnashish kooperativning boshqaruv va nazorat idoralariga saylash hamda saylanish, kooperativ faoliyatini yaxshilash, uning idoralari va mansabdor shaxslarining ishidagi nuqsonlarni bartaraf etish haqida takliflar kiritish:

foydali (daromaddan) ulush olish, kooperativ tugatilgan taqdirda esa — ustavda nazarda tutilgan tartibda qoʻshgan mehnat va mulkiy hissasiga yarasha kooperativ aʼzolari oʻrtasida taqsimlanishi lozim boʻlgan mulk ulushini olish;

oʻz mehnat va mulkiy hissasiga mutanosib ravishda kooperativ mulkidan ulush olgan holda oʻz istagiga koʻra kooperativdan chiqish;

kooperativ mulkidan, ustavda kooperativ aʼzolari uchun nazarda tutilgan imtiyozlar va afzalliklardan foydalanish;

kooperativning mansabdor shaxslaridan kooperativning faoliyatiga doir har qanday masala yuzasidan axborot olish;

kooperativ mulkidagi oʻziga qarashli ulushni meros qilib qoldirish huquqiga egadir.

Bundan tashqari ishlab chiqarish va matlubot kooperativlarining aʼzolari:

ishlab chiqarish ehtiyojlarini va kasbiy tayyorgarlikni hisobga olgan holda kooperativdan ish olish;

ishlamaydigan kunlar berish orqali taʼminlanadigan dam olish, shuningdek ishchi va xizmatchilarning tegishli toifalari uchun qonunda belgilanganidan kam boʻlmagan muddatga har yili haq toʻlanadigan otpuska olish;

xavfsiz mehnat sharoiti bilan taʼminlanish;

oʻzini ijtimoiy va majburiy tibbiy sugʻurta qildirish hamda ijtimoiy taʼminlanish;

madaniy-maishiy xizmatdan foydalanish va kooperativ aʼzolarining umumiy yigʻilishi belgilagan tartibda boshqa ehtiyojlarni qondirish huquqiga ham egadirlar.

2. Barcha turdagi kooperativlarning aʼzolari:

kooperativ ustaviga rioya etishlari hamda kooperativning umumiy yigʻilishi, saylab qoʻyiladigan boshqaruv va nazorat idoralari qabul qilgan qarorlarni bajarishlari;

kooperativ faoliyatda mehnat qilib yoki mulk qoʻshib ishtirok etish bilan bogʻliq kooperativ oldidagi oʻz majburiyatlarini bajarishlari;

kooperativga xoʻjalik faoliyati yuritish uchun berib qoʻyilgan tabiat resurslaridan oqilona foydalanishlari, ularni asrab-avaylashlari hamda atrof-muhitni muhofaza qilish chora-tadbirlarini bajarishlari shart.

3. Kooperativ aʼzolari kooperativ ustavida nazarda tutilgan boshqa huquqlarga ham egalar, shuningdek ularning zimmasida ustavda koʻzda tutilgan masʼuliyatlar boʻladi.

1. Matlubot, ishlab chiqarish va aralash shakldagi kooperativlarning aʼzolari tugatilgan kooperativning qarzlari boʻyicha uning mulki bilan va oʻz shaxsiy mol-mulklari bilan, ular yetmagan taqdirda esa Oʻzbekiston Respublikasi qonunlarida belgilangan tartibda va miqdorlarda javobgar boʻladilar.

2. Matlubot kooperativining faoliyatida faqat pay badallari qoʻshib ishtirok etayotgan kooperativ aʼzosi, shuningdek oʻz aʼzolarining uy-joy-maishiy va boshqa ijtimoiy ehtiyojlarini qondirishga xizmat qiladigan kooperativ aʼzosi boʻlmish fuqaro oʻzi qoʻshgan pay badali doirasida kooperativning majburiyatlari boʻyicha javobgar boʻladi.

3. Matlubot, ishlab chiqarish kooperativining jamoa aʼzosi xoʻjalik mustaqilligini saqlab qoladi va oʻz faoliyatida oʻzining ustaviga (nizomiga) amal qiladi. U mustaqil mulkiy javobgar boʻladi. Matlubot va ishlab chiqarish kooperativi (jamiyati) oʻz tarkibidagi jamoa aʼzolarining majburiyatlari uchun javobgar boʻlmaydi, jamoa aʼzolari esa kooperativning (jamiyatning) majburiyatlari boʻyicha uning ustavida koʻzda tutilgan tartibda va miqdorlarda javobgar boʻladilar.

4. Oʻzbekiston Respublikasi qonunlarini buzganlik uchun aybdor boʻlgan mansabdor shaxslar, kooperativlar va ularning xoʻjalik uyushmalari (shu jumladan, matlubot jamiyatlari ittifoqi) aʼzolari qonunda belgilangan tartibda mulkiy, maʼmuriy, jinoiy va oʻzgacha tarzda javobgar boʻladilar.

1. Kooperativning oliy boshqaruv idorasi umumiy yigʻilish, konferensiya, syezd boʻlib, ular kooperativ raisini (boshqaruvini), taftish komissiyasini (taftishchini) saylaydi va ularga kooperativni boshqarish boʻyicha oʻz vakolatlarini topshiradi.

Kooperativning har bir aʼzosi, shu jumladan uning har bir jamoa aʼzosi, qoʻshgan mulkiy hissasining miqdoridan qatʼi nazar, bir ovozga ega boʻladi.

Kooperativda mehnat shartnomasi boʻyicha ishlayotgan fuqarolar umumiy yigʻilishda maslahat ovozi huquqi bilan ishtirok etadilar.

2. Umumiy yigʻilish:

kooperativning ustavini qabul qiladi, unga belgilangan tartibda oʻzgartirishlar va qoʻshimchalar kiritadi;

kooperativning raisini, boshqaruvini va taftish komissiyasini (taftishchisini) saylaydi (yollaydi), ularning faoliyatlariga doir hisobotlarini tinglaydilar;

kooperativ aʼzoligiga qabul qilish, aʼzolikdan chiqarish masalalarini, shuningdek, kooperativdan chiqish bilan bogʻliq masalalarni hal qiladi;

kooperativning ichki tartib qoidalari, kooperativ mulkiga yetkazilgan zarar uchun moddiy javobgarlik toʻgʻrisidagi, mehnatga haq toʻlash haq toʻgʻrisidagi qoidalarni hamda kooperativning boshqa ichki hujjatlarini qabul qiladi va ularni oʻzgartiradi;

kooperativga kirish, pay badallarining va boshqa badallarning miqdorini belgilaydi ;

kooperativ faoliyatning rejalarini va ularning ijrosiga doir hisobotlarni tasdiqlaydi;

foydani (daromadni) taqsimlash tartibini, kooperativ fondlari va rezervlarining turlari, miqdori hamda ulardan foydalanish yoʻnalishlarini belgilaydi:

kooperativni qayta tashkil etish va uning faoliyatini toʻxtatish, uning xoʻjalik uyushmalariga kirishi va ulardan chiqishi masalalarini hal qiladi.

Mazkur masalalar boʻyicha qarorlar qabul qilish kooperativ umumiy yigʻilishining mutlaq ixtiyorida boʻladi. Kooperativ ustaviga yoki umumiy yigʻilishning qaroriga muvofiq kooperativ faoliyatining boshqa tashkiliy, xoʻjalik va ijtimoiy masalalari ham kooperativning mutlaq ixtiyoriga berilishi mumkin.

Zarur hollarda kooperativlarda umumiy yigʻilish ixtiyoridagi masalalarni hal etish uchun vakillar yigʻilishlari chaqirilishi mumkin.

Kooperativ boshqaruvi (raisi)ning statusi kooperativ ustavi bilan belgilanadi.

3. Taftish komissiyasi (taftishchi) kooperativning (boshqaruvning) moliyaviy va xoʻjalik faoliyatini tekshiradi va u umumiy yigʻilish oldida hisobdordir.

1. Kooperativni tugatish yoki qaytadan tashkil etish (qoʻshib yuborish, birlashtirish, ajratish, alohida qilib chiqarish, oʻzgartirish) uning mol-mulkining egasining yoki kooperativ qaysi korxona (xoʻjalik uyushmasi) huzurida tashkil etilgan boʻlsa, oʻsha korxonaning qaroriga muvofiq yohud sud yo boʻlmasa hakamlikning qaroriga muvofiq amalga oshiriladi.

2. Kooperativning faoliyati quyidagi hollarda ham toʻxtatilishi mumkin:

agar kooperativ roʻyxatga olingan paytdan boshlab bir yil davomida ishlab chiqarish-xoʻjalik faoliyatiga kirishmagan boʻlsa yoki amalda toʻxtatib qoʻyilgan faoliyatini daromadlar toʻgʻrisidagi oxirgi deklaratsiyani topshirganidan keyin bir yil oʻtgach qaytadan boshlamasa;

kooperativ uzoq vaqt mobaynida (olti oydan koʻproq) toʻlovga qobiliyatsiz boʻlsa;

Oʻzbekiston Respublikasi qonunlarida koʻzda tutilgan boshqa hollarda.

3. Kooperativ davlat tomonidan roʻyxatga olish reyestridan chiqarilgan paytdan boshlab qayta tashkil etilgan yoki tugatilgan deb hisoblanadi.

4. Kooperativ tugatilgan taqdirda qarz beruvchilar va mehnat jamoasi aʼzolarining daʼvolari qondirilganidan keyin qolgan mol-mulk kooperativ aʼzolari oʻrtasida uning ustavida koʻzda tutilgan tartibda taqsimlanadi.

Matlubot jamiyatlari ittifoqlari ularning oliy organlari (syezd, konferensiya, vakillar yigʻilishi) qaroriga muvofiq tugatiladi.

1. Matlubot kooperatsiyasining asosiy vazifalari:

qishloq posyolkalar va shaharlarda chakana savdo hamda umumiy ovqatlanish korxonalari tarmogʻini vujudga keltirish va rivojlantirish, oʻz aʼzolari — paychilar hamda xizmat koʻrsatilayotgan aholiga oʻzi ishlab chiqargan va korxonalar, tashkilotlar hamda fuqarolardan sotib olingan oziq-ovqat mahsulotlari va nooziq-ovqat mollarini sotish;

aholi va korxonalardan qishloq xoʻjalik mahsulotlari hamda xom ashyo, yordamchi xoʻjalik mahsulotlari va hunarmandchilik buyumlari, keyinchalik qayta ishlash va sotish uchun yovvoyi oʻsimliklar, mevalar hamda dori-darmon-texnikaviy ashyoni Oʻzbekiston Respublikasi qonunlariga muvofiq xarid qilish;

sotib olinayotgan qishloq xoʻjaligi xom ashyosi va boshqa mahalliy xom ashyodan, shuningdek ulgurji savdo tarkibida xarid qiladigan resurslar, xom ashyo va materiallardan oziq-ovqat mahsulotlari va nooziq-ovqat mollari ishlab chiqarishni tashkil etish;

aholiga ishlab chiqarishga va maishiy turmushga doir turli xizmatlar koʻrsatishdan iboratdir.

2. Matlubot kooperativlari (jamiyatlari) ishlab chiqarish vositalari va xalq isteʼmoli mollari xarid qilishni va sotishni tashkil etish orqali fuqarolarning qishloq xoʻjalik mahsulotlari xom ashyosini yetishtiruvchi va qayta ishlovchi yordamchi xoʻjaliklarini, shuningdek hunarmandchilikni rivojlantirishni ragʻbatlantiradilar.

1. Matlubot kooperativlari (jamiyatlari) yakkahokimlikka qarshi qonunlarning talablariga muvofiq ixtiyoriy ravishda xoʻjalik uyushmalariga birlashishlari mumkin.

2. Matlubot kooperativlari (jamiyatlari) xoʻjalik uyushmalari boshqaruvining oliy idoralari — syezd va konferensiyadir.

Matlubot kooperativi (jamiyati) boshqaruvining oliy idorasi — kooperativ (jamiyat) aʼzolarining umumiy yigʻilishidir.

Syezd va konferensiyalar kengashni (boshqaruvni) saylaydilar. Kengash (boshqaruv) syezd va konferensiyalar oraligʻidagi davrda ularning vazifalarini bajaradi hamda ularga hisob beradi.

Syezd va konferensiya oʻziga hisob beruvchi nazorat idorasi — taftish komissiyasini saylaydi.

3. Xoʻjalik uyushmalari boshqaruvi idoralarining oʻz vakolatlari doirasida qabul qilgan qarorlarini ijro etish ularning aʼzolari uchun majburiydir.

4. Matlubot kooperativlari (jamiyatlari), ular uyushmalari bilan davlat boshqa uyushmalar, korxonalar, tashkilotlar hamda fuqarolar oʻrtasidagi xoʻjalik munosabatlari shartnoma asosida tashkil etiladi, basharti, Oʻzbekiston Respublikasi qonunlarida oʻzga hol nazarda tutilmagan boʻlmasa.

5. Matlubot kooperativlari (jamiyatlari) narxlar hamda tariflarni mustaqil yoki shartnoma asosida belgilaydilar. Kooperativlar va ularning xoʻjalik uyushmalari bozorda yakkahokimlik qilgan hollarda davlat fuqarolarni ijtimoiy himoya qilish maqsadida Oʻzbekiston Respublikasi qonun hujjatlariga muvofiq narx-navoni tartibga soladi.

Jamoa xoʻjaligi yoki boshqa qishloq xoʻjaligi kooperativi ishlab chiqarish kooperativining shakllaridan biri sifatida ushbu Qonunda, boshqa qonun hujjatlari va oʻz ustavida nazarda tutilgan barcha huquqlardan foydalanadi.

Jamoa xoʻjaliklari va boshqa qishloq xoʻjalik kooperativlarining yerdan foydalanganlik uchun masʼuliyati “Yer toʻgʻrisida”gi Oʻzbekiston Respublikasi Qonuni bilan tartibga solinadi.

Fuqarolar oʻz ijtimoiy ehtiyojlarini qondirish uchun ixtiyoriylik asosida uy-joy qurish, uy-joy kooperativlari, garaj qurish kooperativlari va boshqa kooperativlar tuzishlari mumkin.

Bunday kooperativlar faoliyatining asosiy yoʻnalishi kooperativ mulki obyektlarini (uy-joylar, garajlar va shu kabilar), ustavda nazarda tutilgan hollarda esa — kooperativ aʼzolarining mulki boʻlgan obyektlarni ham qurish va keyinchalik ulardan foydalanishda pul mablagʻlari yoki shaxsiy mehnat bilan ishtirok etishdan, shuningdek kooperativ aʼzolariga kooperativni tuzishdan koʻzlangan maqsadlarga mos xizmatlarni koʻrsatishdan iboratdir.

Ushbu Qonun bogʻdorchilik shirkatlari, yakka tartibda qurilish bilan shugʻullanuvchilar shirkatlari va oʻzga matlubot shirkatlariga nisbatan amal qiladi.