Chuqur makroiqtisodiy tadqiqotlarni amalga oshirish, makroiqtisodiy ko‘rsatkichlarni prognoz qilish, mamlakatning ijtimoiy-iqtisodiy rivojlanish istiqbollarini asoslash, mamlakat iqtisodiyotini modernizatsiyalash va uni tarkibiy jihatdan o‘zgartirishni asoslash uchun negiz bo‘lib xizmat qiladigan makroiqtisodiy ko‘rsatkichlarni prognoz qilishning mustahkam ilmiy-metodologik bazasini yaratish va takliflar ishlab chiqish, uzoq muddatli makroiqtisodiy barqarorlikka erishish maqsadida:

1. Ijtimoiy-iqtisodiy tadqiqotlar markazi O‘zbekiston Respublikasi Iqtisodiyot vazirligi huzuridagi Prognozlashtirish va makroiqtisodiy tadqiqotlar instituti etib qayta tashkil qilinsin.

2. Quyidagilar Prognozlashtirish va makroiqtisodiy tadqiqotlar instituti faoliyatining asosiy vazifalari va yo‘nalishlari etib belgilansin:

soliq-budjet, pul-kredit, tashqi iqtisodiy va valyuta siyosati bilan uzviy bog‘liq holda makroiqtisodiy ko‘rsatkichlarni chuqur tahlil qilish, jahon iqtisodiyotining rivojlanish tendensiyalarini va milliy iqtisodiyotga ta’sir ko‘rsatadigan tashqi omillarni o‘rganish, uning asosida mamlakatni mutanosib hamda barqaror makroiqtisodiy rivojlantirishning moslashuvchan modeli, mexanizmlari va prognozlarini ishlab chiqish;

O‘zbekistonni ijtimoiy-iqtisodiy rivojlantirishning o‘rta muddatli (5 yil) va uzoq muddatli (10 yil) ko‘p variantli prognozlarini shakllantirish, mazkur prognozlar doirasida uzoq muddatli makroiqtisodiy mutanosiblikni ta’minlashga yo‘naltirilgan makroiqtisodiy ko‘rsatkichlar va ularning o‘sish sur’atlarini belgilash;

moliya-bank tizimini yanada isloh qilish va liberallashtirish, soliq, budjet hamda kredit siyosatini takomillashtirish, pul muomalasini mustahkamlash, inflatsiyaga qarshi ishlarni tartibga solishning samarali mexanizmini joriy etish, milliy valyuta barqarorligini ta’minlash bo‘yicha tendensiyalarni tahlil qilish va takliflar ishlab chiqish;

tarmoq va hududiy nomutanosibliklarni, ularni belgilab beruvchi omillarni teran tahlil qilish, buning asosida mamlakat iqtisodiyotini modernizatsiya qilish va har tomonlama chuqur rivojlantirishning muhim yo‘nalishi sifatida tarkibiy qayta qurish, uning barqarorligi hamda raqobatbardoshligini oshirish bo‘yicha takliflar ishlab chiqish, investitsiyaviy siyosatning ustuvorliklarini asoslash, yanada qulay investitsiya muhitini shakllantirish va xorijiy investitsiyalarni jalb qilish bo‘yicha tavsiyalar tayyorlash;

o‘rta va uzoq muddatli istiqboldagi demografik jarayonlarni tadqiq hamda prognoz qilish, mehnat bozori muvozanatlashuvini tahlil etish va aholining oqilona bandligini ta’minlash bo‘yicha takliflar ishlab chiqish, ko‘p variantli makroiqtisodiy prognozlarning ijtimoiy oqibatlari va natijalarini baholash;

tahliliy ma’ruzalar va prognozlar tayyorlash, makroiqtisodiy tadqiqotlar natijalari va prognozlarni, o‘rta va uzoq muddatli istiqbolda ijtimoiy-iqtisodiy muammolarni hal etish bo‘yicha yondashuvlar va uning mexanizmlarini ommaviy axborot vositalari va ilmiy maqolalarda, konferensiyalar, davra suhbatlari va seminarlarda mahalliy hamda xorijiy olimlar va mutaxassislarni, manfaatdor xalqaro moliyaviy va iqtisodiy tashkilotlarni jalb etgan holda keng muhokama qilish.

3. Quyidagilar belgilansin:

Institut tadqiqotlarining eng muhim funksional yo‘nalishlari bo‘yicha shakllantiriladigan loyihalar Institutning asosiy tarkibiy bo‘linmalari hisoblanadi;

tadqiqot loyihalariga ilmiy ish tajribasiga ega bo‘lgan yuqori malakali mutaxassislar orasidan tanlov asosida tayinlanadigan loyiha rahbarlari boshchilik qiladilar;

qonun hujjatlariga muvofiq, loyihalarning rahbarlari va ijrochilari bilan bir yilga mo‘ljallangan mehnat shartnomalari (kontraktlar) tuziladi, ularda mavzu, maqsad, vazifalar va loyihani amalga oshirishning asosiy bosqichlari aniq ko‘rsatiladi;

loyihalar rahbarlarining hisobotlari muntazam ravishda Institut ilmiy kengashi majlislarida tinglab boriladi, ilmiy kengash yil yakunlari bo‘yicha o‘tkazilgan tadqiqotlar natijalari va sifatiga baho beradi hamda loyiha doirasida tadqiqotlarni davom ettirish yoki uni yopish to‘g‘risida qaror qabul qiladi;

Institut xodimlariga davlat boshqaruvi organlari xodimlari uchun belgilangan mehnatga haq to‘lash, mukofotlash va moddiy yordam ko‘rsatish shartlari tatbiq etiladi;

Prognozlashtirish va makroiqtisodiy tadqiqotlar instituti shartnomalar va majburiyatlar bo‘yicha tugatilayotgan Ijtimoiy-iqtisodiy tadqiqotlar markazining huquqiy vorisi hisoblanadi.

4. Quyidagilar:

Prognozlashtirish va makroiqtisodiy tadqiqotlar institutining umumiy cheklangan xodimlar soni 146 kishidan, shu jumladan ilmiy xodimlar soni 109 kishidan iborat bo‘lgan tuzilmasi 1-ilovaga* muvofiq;

Prognozlashtirish va makroiqtisodiy tadqiqotlar institutining Nizomi 2-ilovaga* muvofiq tasdiqlansin.

Belgilansinki, Institut direktori O‘zbekiston Respublikasi iqtisodiyot vaziri tomonidan lavozimga tayinlanadi va ozod etiladi.

Institut direktoriga O‘zbekiston Respublikasi Iqtisodiyot vazirligi bilan kelishilgan holda, belgilangan xodimlarning cheklangan soni doirasida tasdiqlangan Institut tuzilmasiga zarur hollarda o‘zgartirishlar kiritish huquqi berilsin.

5. Institutga quyidagi huquqlar berilsin:

tadqiqotlarga milliy ekspertlar sifatida kontrakt asosida davlat boshqaruv organlari, idoralar, banklar, tadqiqot markazlari xodimlarini, olimlar va oliy o‘quv yurtlari o‘qituvchilarini, shu jumladan xorijiy mutaxassislarni jalb etish;

qo‘shma tadqiqotlar o‘tkazish uchun boshqa ilmiy-tadqiqot tashkilotlari, fondlar, universitetlar bilan, jumladan, xalqaro va xorijiy muassasalar bilan shartnomalar tuzish;

noshirlik faoliyatini amalga oshirish, iqtisodiyotning rivojlanishi muammolari bo‘yicha axborot-tahliliy sharh va ma’ruzalar chop etish;

Institutga yuklatilgan vazifalar doirasida markaziy iqtisodiy organlar, vazirliklar, idoralar, banklar va boshqa tashkilotlardan zarur bo‘lgan barcha normativ, statistik va tahliliy axborotlarni so‘rash hamda bepul olish.

6. Institutning asosiy moliyalashtirish manbalari etib quyidagilar belgilansin:

moddiy-texnik bazani joriy ta’minlash va rivojlantirishga, axborot bosma nashrlariga, shu jumladan, xorijiy nashrlarga obuna bo‘lishni tashkil etish hamda Institutning boshqa ehtiyojlari uchun maqsadli budjet mablag‘lari;

Grant tanlovlari natijalari bo‘yicha ajratiladigan mablag‘lar;

vazirliklar, idoralar va banklarning buyurtmalari bo‘yicha tadqiqotlar o‘tkazish uchun ular ajratadigan mablag‘lar;

xalqaro moliya institutlari va donor tashkilotlarning grantlari, qonun hujjatlarida taqiqlanmagan boshqa manbalar mablag‘lari.

Belgilansinki, Institutning daromadlari soliqqa tortish obyekti hisoblanmaydi.

7. Prognozlashtirish va makroiqtisodiy tadqiqotlar institutining o‘z ehtiyojlari uchun import qilinadigan uskunalar, kompyuter hamda telekommunikatsiya tizimlari, dasturiy ta’minlash vositalari bojxona to‘lovlari (bojxona rasmiylashtiruvi yig‘imlaridan tashqari) to‘lashdan ozod etilsin, bo‘shaydigan mablag‘lar esa Institutning nizom faoliyatini bajarishga yo‘naltirilsin.

8. Institut:

O‘zbekiston Respublikasi Prezidentining farmonlari, qarorlari va farmoyishlari, Oliy Majlis materiallari, Vazirlar Mahkamasining qarorlari va farmoyishlari, vazirliklar va idoralarning normativ hamda yo‘riqnoma tarzidagi hujjatlari yuborilishi shart bo‘lgan tashkilotlar ro‘yxatiga;

O‘zbekiston Respublikasi Davlat statistika qo‘mitasi, Moliya vazirligi, Tashqi iqtisodiy aloqalar, investitsiyalar va savdo vazirligi, Mehnat va aholini ijtimoiy muhofaza qilish vazirligi, Davlat soliq qo‘mitasi, Davlat bojxona qo‘mitasi, Davlat raqobat qo‘mitasi, boshqa vazirliklar va idoralarning statistik axborot byulletenlari yuborilishi shart bo‘lgan reyestrga kiritilsin.

9. Institut:

O‘zbekiston Respublikasi Moliya vazirligi bilan kelishilgan holda ikki hafta muddatda Institutning shtat jadvalini ishlab chiqsin va belgilangan tartibda tasdiqlasin;

Institutning bo‘linmalari makroiqtisodiy tahlil va prognozlash ko‘nikmalariga ega bo‘lgan, respublikada olib borilayotgan islohotlarning mazmun-mohiyatini chuqur anglaydigan yuqori malakali, tajribali mutaxassislar bilan kontrakt asosida to‘ldirilishini ta’minlasin.

10. Prognozlashtirish va makroiqtisodiy tadqiqotlar instituti Toshkent shahar, A. Qayumov ko‘chasi, 2-uy va G‘ulomov ko‘chasi, 1-uy manziliga joylashtirilsin.

11. O‘zbekiston Respublikasi Prezidentining “Iqtisodiy tadqiqotlarni tashkil qilishni takomillashtirishga oid qo‘shimcha chora-tadbirlar to‘g‘risida” 2005-yil 2-avgustdagi PQ-143-sonli qarori o‘z kuchini yo‘qotgan deb hisoblansin.

12. Mazkur qarorning ijrosini nazorat qilish O‘zbekiston Respublikasi Bosh vazirining birinchi o‘rinbosari R.S. Azimov zimmasiga yuklansin.