O‘zbekiston Respublikasi “Buxgalteriya hisobi to‘g‘risida”gi Qonuniga asosan va O‘zbekiston Respublikasi Vazirlar Mahkamasining 1992-yil 23-noyabrdagi 553-son qarori bilan tasdiqlangan O‘zbekiston Respublikasi Moliya vazirligi to‘g‘risidagi nizomga muvofiq buyuraman:

1. Ilova qilinayotgan Budjet tashkilotlari daromadlari va xarajatlarining buxgalteriya hisobi to‘g‘risidagi nizom (yangi tahrirda) tasdiqlansin.

2. O‘zbekiston Respublikasi Moliya vazirligi tomonidan 1999-yil 21-dekabrda 100-son buyruq bilan tasdiqlangan Budjet tashkilotlari daromadlari va xarajatlarining buxgalteriya hisobi to‘g‘risidagi nizom (1999-yil 23-dekabr, ro‘yxat raqami 859) o‘z kuchini yo‘qotgan deb hisoblansin.

3. Mazkur buyruq O‘zbekiston Respublikasi Adliya vazirligida davlat ro‘yxatidan o‘tkazilgan vaqtdan boshlab o‘n kun o‘tgandan keyin amalga kiritilsin.

Mazkur Nizom O‘zbekiston Respublikasining “Buxgalteriya hisobi to‘g‘risida”gi Qonuni, Vazirlar Mahkamasining 1999-yil 3-sentabrdagi “Budjet tashkilotlarini mablag‘ bilan ta’minlash tartibini takomillashtirish to‘g‘risida”gi 414-sonli qarori (O‘zbekiston Respublikasi Hukumati qarorlari to‘plami., 1999-y., 9-son, 51-modda) asosida ishlab chiqilgan bo‘lib, Davlat budjeti mablag‘lari hisobidan mablag‘ bilan ta’minlanadigan barcha vazirliklar, davlat qo‘mitalari, idoralar, tashkilotlar va muassasalarning (bundan keyingi o‘rinlarda budjet tashkiloti deb yuritiladi) daromadlari va xarajatlarining buxgalteriya hisobini yuritish tartibini belgilaydi.

1. Ushbu Nizom bilan budjet tashkilotlarining quyidagi daromadlari va xarajatlarining buxgalteriya hisobida aks ettirilishi tartibga solinadi:

budjet tashkilotining rivojlantirish jamg‘armasi mablag‘lari bo‘yicha;

tibbiyot muassasalarining moddiy rag‘batlantirish va rivojlantirish jamg‘armasi mablag‘lari bo‘yicha;

ta’lim muassasalarida o‘qitishning to‘lov-kontrakt shaklidan tushgan mablag‘lar bo‘yicha;

boshqa maxsus mablag‘lar bo‘yicha.

2. Yuridik shaxs maqomini olgan budjet tashkilotlari banklarda (Moliya vazirligining G‘aznachiligi va uning hududiy bo‘linmalarida) belgilangan tartibda quyidagi hisobvaraqlarni (shaxsiy hisobvaraqlarni) ochadilar:

a) banklarda:

budjet mablag‘lari bo‘yicha talab qilib olinguncha depozit hisobvarag‘i (G‘aznachilik va uning hududiy bo‘linmalari orqali xizmat ko‘rsatilmayotgan budjet tashkilotlari uchun);

budjetdan tashqari mablag‘lar bo‘yicha talab qilib olinguncha depozit hisobvaraqlari;

qonun hujjatlarida nazarda tutilgan boshqa hisobvaraqlar.

b) Budjetdan mablag‘ oluvchilarning shaxsiy hisobvaraqlarini O‘zbekiston Respublikasi Moliya vazirligi g‘aznachiligida va uning hududiy bo‘linmalarida yuritish Qoidalarida (2007-yil 5-dekabr, ro‘yxat raqami 1746 — O‘zbekiston Respublikasi qonun hujjatlari to‘plami, 2007-y., 48-49 son, 495-modda) ko‘rsatilgan Moliya vazirligining G‘aznachiligi va uning hududiy bo‘linmalarida Davlat budjetining xarajatlar tasnifi bo‘limlari, boblari va paragraflari bo‘yicha shaxsiy hisobvaraqlar (respublika va hududiy g‘azna hisobvaraqlari orqali xizmat ko‘rsatilayotgan budjet tashkilotlari uchun).

3. Budjet tashkilotining rivojlantirish jamg‘armasining talab qilib olinguncha depozit hisobvaraqlaridagi yil oxiriga ishlatilmay qolgan qoldiq mablag‘lari keyingi yilga o‘tkaziladi.

4. Budjet tashkilotining negizida yangi budjet tashkiloti tashkil qilinsa, u holda budjet tashkilotining budjetdan tashqari mablag‘lari bo‘yicha talab qilib olinguncha depozit hisobvarag‘idagi qoldiq mablag‘lar yangi tashkil etilgan budjet tashkilotining tegishli hisobvaraqlariga o‘tkaziladi, qonun hujjatlarida nazarda tutilgan holatlar bundan mustasno.

5. Tugatilgan budjet tashkilotining budjetdan tashqari mablag‘lari bo‘yicha talab qilib olinguncha depozit hisobvarag‘idagi qoldiq mablag‘lar belgilangan tartibda tegishli budjet daromadlariga o‘tkaziladi, qonun hujjatlarida nazarda tutilgan holatlar bundan mustasno.

6. Budjet tashkilotini rivojlantirish jamg‘armasi:

G‘azna ijrosiga o‘tmagan budjet tashkilotlari bo‘yicha — rejaga muvofiq budjetdan mablag‘ bilan ta’minlash hisobiga tushgan va hisobot choragining so‘nggi ish kuni oxirida budjet tashkilotlari hisob raqamlaridagi tejab qolingan mablag‘lar (kapital qo‘yilmalarni mablag‘ bilan ta’minlash uchun nazarda tutilgan mablag‘lar bundan mustasno);

G‘azna ijrosiga o‘tgan budjet tashkilotlari bo‘yicha — hisobot choragining so‘nggi ish kuni oxirida budjet tashkilotlarining Moliya vazirligi g‘aznachiligida va uning hududiy bo‘linmalarida ochilgan hisobvaraqlaridagi tejab qolingan mablag‘lar (kapital qo‘yilmalar bo‘yicha xarajatlarni to‘lash uchun nazarda tutilgan mablag‘lar bundan mustasno);

budjet tashkilotlari faoliyati turiga muvofiq tovarlar (ishlar, xizmatlar) ishlab chiqarish va sotishdan olingan daromadlar;

budjet tashkiloti balansida bo‘lgan davlat mulkini ijaraga berishdan qonun hujjatlariga muvofiq olingan mablag‘larning bir qismi;

yuridik va jismoniy shaxslar tomonidan budjet tashkilotlariga berilayotgan homiylik yordami (beg‘araz yordam) hisobiga shakllantiriladi.

7. Budjet tashkilotini rivojlantirish jamg‘armasi mablag‘lari faqat:

birinchi darajada to‘lanadigan vaqtincha mehnatga layoqatsizlik bo‘yicha nafaqalarni va mavjud kreditorlik qarzlarni to‘lashga;

budjet tashkilotining moddiy-texnika bazasini mustahkamlash tadbirlariga;

ijtimoiy rivojlantirish va budjet tashkilotlarining xodimlarini moddiy rag‘batlantirish tadbirlariga sarflanadi.

8. Budjet tashkilotini rivojlantirish jamg‘armasining joriy moliyaviy yil oxiriga mavjud qoldiq mablag‘lari o‘z maqsadli yo‘nalishini yo‘qotmaydi va kelgusi yilda budjet tashkilotining moddiy-texnika bazasini mustahkamlash hamda ijtimoiy rivojlantirish va budjet tashkilotlarining xodimlarini moddiy rag‘batlantirish tadbirlariga qayta taqsimlanmaydi.

9. Budjet tashkilotlarini rivojlantirish jamg‘armasining talab qilib olinguncha depozit hisobvarag‘idagi pul mablag‘larining harakati bo‘yicha operatsiyalarning analitik hisobi 381-sonli shakldagi jamg‘arma qaydnomasida (3-memorial orderda) va (yoki) 292-shakl “Joriy hisoblar va hisob-kitoblar daftari (kartochka)”da yuritiladi.

10. Budjet tashkilotlari hisobot choragining so‘nggi ish kuni oxirida tejalgan budjet mablag‘larini Budjet tashkilotini rivojlantirish jamg‘armasi hisobvarag‘iga belgilangan tartibda o‘tkazadilar.

Bunda quyidagi mablag‘lar tejab qolingan deb hisoblanmaydi va Budjet tashkilotining rivojlantirish jamg‘armasi hisobvarag‘iga o‘tkazilmaydi:

hisobot choragi oxirgi oyining ikkinchi yarmi uchun ish haqini to‘lashga moliyalashtirilgan mablag‘lar, deponentlashtirilgan ish haqi va stipendiyalar, mablag‘ bilan to‘liq ta’minlanmaganlik (to‘lovlar to‘liq amalga oshirilmaganlik) yoki budjet mablag‘lari bo‘yicha talab qilib olinguncha asosiy depozit hisobvarag‘ida mablag‘larning yetishmasligi sababli olib bo‘linmagan nafaqalar natijasida bo‘shab qolgan mablag‘lar;

O‘zbekiston Respublikasi Vazirlar Mahkamasining “Budjet tashkilotlarini mablag‘ bilan ta’minlash tartibini takomillashtirish to‘g‘risida” 1999-yil 3-sentabrdagi 414-son qarori bilan tasdiqlangan “Budjet tashkilotlarini xarajatlarini moliyalashtirish (to‘lash) tartibi”ning 4-bandi bilan o‘rnatilgan hisoblangan, lekin ikkinchi guruh “Ish beruvchining ajratmalari” xarajatlari bo‘yicha o‘tkazilmagan xarajatlar natijasida bo‘shab qolgan mablag‘lar;

budjet tashkilotining tarmoqlari, shtatlari va kontingentiga oid rejalarning bajarilmaganligi yoki belgilangan muddatlarga nisbatan kechroq bajarilishi, yangi muassasalarning ochilishini yoki mavjudlarining kengaytirilishini kechroq amalga oshirilishi natijasida bo‘shab qolgan mablag‘lar;

budjet tashkilotining funksiyasini to‘xtatilishi (vaqtinchalik to‘xtatilishi) natijasida bo‘shab qolgan mablag‘lar;

budjet tashkiloti uchun tasdiqlangan normativdan ortiqcha shtat birliklarining belgilanishi natijasida bo‘shab qolgan mablag‘lar;

O‘zbekiston Respublikasi Vazirlar Mahkamasi, Qoraqalpog‘iston Respublikasi Vazirlar Kengashi, viloyatlar hamda Toshkent shahar hokimiyatlarining qabul qilingan ayrim qarorlariga muvofiq bo‘shab qolgan mablag‘lar.

11. G‘aznachilik xizmatiga o‘tkazilmagan budjet tashkilotlari bo‘yicha — rejaga muvofiq budjetdan mablag‘ bilan ta’minlash hisobiga tushgan va hisobot choragining so‘nggi ish kuni oxirida budjet tashkilotlari hisob raqamlaridagi tejab qolingan mablag‘lar qoldig‘ini o‘tkazishda quyidagi buxgalteriya o‘tkazmalari amalga oshiriladi:

114 “Budjet tashkilotlarini rivojlantirish jamg‘armasining budjetdan tashqari mablag‘lari bo‘yicha talab qilib olinguncha depozit hisobvarag‘i” subhisobvaraq debeti;

090 “Respublika budjetidan moliyalashtiriladigan budjet tashkilotlarining talab qilib olinguncha depozit hisobvarag‘i” subhisobvaraq krediti yoki 100 “Mahalliy budjetlardan moliyalashtiriladigan budjet tashkilotlarining talab qilib olinguncha depozit hisobvarag‘i” subhisobvaraq krediti.

12. G‘aznachilik xizmatiga o‘tkazilgan budjet tashkilotlari bo‘yicha — hisobot choragining so‘nggi ish kuni oxirida budjet tashkilotlarining Moliya vazirligi G‘aznachiligida va uning hududiy bo‘linmalarida ochilgan shaxsiy hisob raqamlaridagi tejab qolingan mablag‘lar qoldig‘ini o‘tkazishda quyidagi buxgalteriya o‘tkazmalari amalga oshiriladi:

114 “Budjet tashkilotlarini rivojlantirish jamg‘armasining budjetdan tashqari mablag‘lari bo‘yicha talab qilib olinguncha depozit hisobvarag‘i” subhisobvaraq debeti;

237 “G‘aznachilik orqali tashkilotni saqlash va boshqa tadbirlarga amalga oshirilgan to‘lovlar” subhisobvaraq krediti.

13. Budjet tashkilotlari tomonidan tovarlar (ishlar, xizmatlar) ishlab chiqarilishi va sotilishi “Budjet tashkilotlari tomonidan tovarlar (ishlar, xizmatlar) ishlab chiqarilishi va sotilishi tartibi”ga (2000-yil 25-yanvar, ro‘yxat raqami 880 — Me’yoriy hujjatlar axborotnomasi 2000-y., 2-son) muvofiq tartibga solinadi.

14. Ishlab chiqarilayotgan mahsulotlar (bajarilayotgan ishlar, ko‘rsatilayotgan xizmatlar) tannarxiga kiritiladigan xarajatlar quyidagi buxgalteriya o‘tkazmalari bilan rasmiylashtiriladi:

a) mahsulot ishlab chiqarish (ish bajarish, xizmat ko‘rsatish) bilan bog‘liq bevosita va bilvosita moddiy xarajatlar amalga oshirilganda:

08 “Ishlab chiqarish va boshqa maqsadlar uchun xarajatlar” hisobvarag‘ining tegishli subhisobvaraqlari debeti bo‘yicha;

04 “Asbob-uskunalar, qurilish materiallari, ilmiy-tadqiqot ishlari uchun materiallar hamda ishlab chiqarilgan buyumlar va mahsulotlar” hisobvaraq krediti bo‘yicha;

06 “Materiallar va oziq-ovqat mahsulotlari” va boshqa hisobvaraqlarning tegishli subhisobvaraqlari krediti bo‘yicha.

b) kelgusi ishlab chiqarish jarayonida foydalanish mumkin bo‘lgan chiqindilarning qiymatiga:

04 “Asbob-uskunalar, qurilish materiallari, ilmiy-tadqiqot ishlari uchun materiallar hamda ishlab chiqarilgan buyumlar va mahsulotlar” hisobvaraq debeti bo‘yicha;

06 “Materiallar va oziq-ovqat mahsulotlari” va boshqa tegishli hisobvaraqlarning subhisobvarag‘i debeti bo‘yicha;

08 “Ishlab chiqarish va boshqa maqsadlar uchun xarajatlar” hisobvaraqning tegishli subhisobvarag‘i krediti bo‘yicha.

v) mehnat haqi bo‘yicha bevosita va bilvosita ishlab chiqarish xarajatlari amalga oshirilganda:

08 “Ishlab chiqarish va boshqa maqsadlar uchun xarajatlar” hisobvarag‘ining tegishli subhisobvaraqlari debeti bo‘yicha;

180 “Xodimlar bilan mehnatga haq to‘lash bo‘yicha hisoblashuvlar” subhisobvarag‘i va boshqa tegishli subhisobvaraqlar krediti bo‘yicha.

g) ish haqidan olingan hisoblangan ajratmalar summalariga:

08 “Ishlab chiqarish va boshqa maqsadlar uchun xarajatlar” hisobvarag‘ining tegishli subhisobvaraqlari debeti bo‘yicha;

175 “Yagona ijtimoiy to‘lov bo‘yicha hisob-kitoblar” subhisobvarag‘ining krediti bo‘yicha.

d) boshqa bevosita va bilvosita ishlab chiqarish xarajatlari (ishlab chiqarish jarayoni bilan bevosita bog‘liq bo‘lgan kommunal xizmatlar xarajatlari, aloqa xizmati xarajatlari va boshqa xarajatlar) summalariga:

08 “Ishlab chiqarishga va boshqa maqsadlarga qilinadigan xarajatlar” hisobvarag‘ining tegishli subhisobvaraqlari debeti bo‘yicha;

178 “Turli debitor va kreditorlar bilan hisob-kitoblar” subhisobvarag‘i va boshqa tegishli subhisobvaraqlar krediti bo‘yicha.

15. Ishlab chiqarilgan mahsulotlar (bajarilgan ishlar, ko‘rsatilgan xizmatlar)ning tannarxiga kiritilmagan, lekin foydani hisoblashda hisobga olinadigan xarajatlar (davr xarajatlari) summasiga:

410 “Foyda va zararlar” subhisobvarag‘i debeti bo‘yicha;

160 “Hisobdor shaxslar bilan hisob-kitoblar” subhisobvarag‘i krediti (sotish jarayoni bilan bog‘liq bo‘lgan xizmat safari xarajatlari summasiga) bo‘yicha yoki;

064 “Yonilg‘i, yoqilg‘i-moylash materiallari” subhisobvarag‘i (sotish jarayoni bilan bog‘liq bo‘lgan yoqilg‘i-moylash materiallari xarajatlari summasiga) va mahsulot sotish hamda ishlab chiqarishni boshqarish xarajatlari bilan bog‘liq bo‘lgan boshqa tegishli subhisobvaraqlar krediti.

16. Budjet tashkiloti bilan xaridor (buyurtmachi) o‘rtasida tuzilgan shartnomaga muvofiq oldindan kelib tushgan avans summasiga:

114 “Budjet tashkilotlarini (tibbiyot muassasalarini) rivojlantirish jamg‘armasining budjetdan tashqari mablag‘lar bo‘yicha talab qilib olinguncha depozit hisobvarag‘i” subhisobvarag‘i debeti bo‘yicha;

155 “Avans to‘lovlari bo‘yicha xaridor va buyurtmachilar bilan hisob-kitoblar” subhisobvarag‘i krediti bo‘yicha.

17. Ishlab chiqarilgan mahsulot uning haqiqiy tannarxi bo‘yicha kirim qilinganda:

045 “Ishlab chiqarish (o‘quv) ustaxonalari buyumlari” subhisobvarag‘i debeti yoki

046 “Yordamchi (o‘quv) qishloq xo‘jaligining mahsulotlari” subhisobvarag‘i debeti bo‘yicha;

08 “Ishlab chiqarishga va boshqa maqsadlarga qilinadigan xarajatlar” hisobvarag‘ining tegishli subhisobvaraqlari krediti bo‘yicha.

18. Ishlab chiqarilgan mahsulot (bajarilgan ish, ko‘rsatilgan xizmat) shartnomada ko‘rsatilgan sotish qiymati bo‘yicha yuklab jo‘natilganda (topshirilganda):

157 “Xaridorlar va buyurtmachilar bilan yetkazib berilgan mahsulotlar (bajarilgan ishlar, ko‘rsatilgan xizmatlar) bo‘yicha hisob-kitoblar” subhisobvarag‘i debeti bo‘yicha;

28 “Mahsulotlar (ish, xizmatlar) realizatsiyasi” hisobvarag‘ining tegishli subhisobvaraqlari krediti bo‘yicha.

19. Tovarlarni yetkazib berish (ish bajarish va xizmat ko‘rsatish)da ilgari olingan avans summasiga:

155 “Avans to‘lovlariga doir xaridor va buyurtmachilar bilan hisob-kitoblar” subhisobvarag‘i debeti bo‘yicha;

157 “Xaridorlar va buyurtmachilar bilan yetkazib berilgan mahsulotlar (bajarilgan ishlar, ko‘rsatilgan xizmatlar) bo‘yicha hisob-kitoblar” subhisobvarag‘i krediti bo‘yicha.

20. Haqiqiy tannarx bo‘yicha mahsulotlar yuklab jo‘natilganda:

280 “Ishlab chiqarish (o‘quv) ustaxonalari buyumlarini realizatsiyasi” subhisobvarag‘i debeti bo‘yicha yoki

281 “Yordamchi (o‘quv) qishloq xo‘jaligi mahsulotlarini realizatsiyasi” subhisobvarag‘i debeti bo‘yicha;

045 “Ishlab chiqarish (o‘quv) ustaxonalari buyumlari” subhisobvarag‘i krediti yoki

046 “Yordamchi (o‘quv) qishloq xo‘jaligining mahsulotlari” subhisobvaraqlari krediti bo‘yicha.

21. Ish bajarilganda va xizmatlar ko‘rsatilganda ularning haqiqiy tannarxi bo‘yicha:

282 “Shartnoma bo‘yicha ilmiy-tadqiqot ishlarini va boshqa bajarilgan ishlar hamda ko‘rsatilgan xizmatlarni realizatsiya qilish” subhisobvarag‘i debeti bo‘yicha;

082 “Shartnoma asosida bajariladigan ilmiy-tadqiqot ishlariga hamda boshqa bajarilgan ishlar va ko‘rsatilgan xizmatlarga doir xarajatlar” subhisobvarag‘i krediti bo‘yicha.

22. Xaridor (buyurtmachi) va budjet tashkiloti o‘rtasida tuzilgan shartnomaga muvofiq qolgan qoldiq summa kelib tushganda:

114 “Budjet tashkilotlarini (tibbiyot muassasalarini) rivojlantirish jamg‘armasining budjetdan tashqari mablag‘lar bo‘yicha talab qilib olinguncha depozit hisobvarag‘i” subhisobvarag‘i debeti bo‘yicha;

157 “Xaridorlar va buyurtmachilar bilan yetkazib berilgan mahsulotlar (bajarilgan ishlar, ko‘rsatilgan xizmatlar) bo‘yicha hisob-kitoblar” subhisobvarag‘i krediti bo‘yicha.

23. Kelishilgan qiymat ishlab chiqarilgan mahsulot (ish, xizmatlar)ning tannarxidan yuqori bo‘lib, ijobiy moliyaviy natija (foyda) yuzaga kelganda quyidagi buxgalteriya o‘tkazmasi bilan aks ettiriladi:

28 “Mahsulotlar (ish, xizmatlar) realizatsiyasi” hisobvarag‘ining tegishli subhisobvaraqlari debeti bo‘yicha;

410 “Foyda va zararlar” subhisobvarag‘i krediti bo‘yicha.

24. Kelishilgan qiymat ishlab chiqarilgan mahsulot (ish, xizmatlar)ning tannarxidan past bo‘lib, salbiy moliyaviy natija (zarar) yuzaga kelganda quyidagi buxgalteriya o‘tkazmasi bilan aks ettiriladi:

410 “Foyda va zararlar” subhisobvaraqlari debeti bo‘yicha;

28 “Mahsulotlar (ish, xizmatlar) realizatsiyasi” hisobvaraqning tegishli subhisobvaraqlari krediti bo‘yicha.

25. Xaridorlar (buyurtmachilar)dan kelib tushgan mablag‘lar doirasida (ushbu mahsulot bo‘yicha yuzaga kelgan debitorlik qarzni hisobga olgan holda) hisobot yili mobaynida aniqlangan moliyaviy natija (foyda) 400 “Budjetdan tashqari daromadlar va tushumlar” subhisobvarag‘iga olinadi va bu hisobda quyidagi buxgalteriya o‘tkazmasi bilan aks ettiriladi:

410 “Foyda va zararlar” subhisobvarag‘i debeti bo‘yicha;

400 “Budjetdan tashqari daromadlar va tushumlar” subhisobvaraqlari krediti bo‘yicha.

26. Hisobot yilining oxirida aniqlangan moliyaviy natija (zarar) hisobiga 400 “Budjetdan tashqari daromadlar va tushumlar” subhisobvarag‘idagi daromadlar summasi kamaytiriladi va bu hisobda quyidagi buxgalteriya o‘tkazmasi bilan aks ettiriladi:

400 “Budjetdan tashqari daromadlar va tushumlar” subhisobvaraqlari debeti bo‘yicha;

410 “Foyda va zararlar” subhisobvaraqlari krediti bo‘yicha.

27. Ushbu 400 “Budjetdan tashqari daromadlar va tushumlar” subhisobvarag‘i krediti (debeti) hisobiga yozilgan summalar budjet tashkilotining yaratilgan qo‘shimcha daromad (ilgari yaratilgan qo‘shimcha daromadlarni kamayishi) summasini bildiradi va budjet tashkiloti tomonidan topshiriladigan choraklik Budjet tashkilotlarining rivojlantirish jamg‘armasi bo‘yicha daromadlari va xarajatlari to‘g‘risidagi hisobotida (keyingi o‘rinlarda — 2-RJ hisoboti deb yuritiladi) daromad (yoki daromadni kamayishi) sifatida aks ettiriladi.

28. Mahsulot ishlab chiqarish (ishlar bajarish va xizmatlar bajarish) bo‘yicha operatsiyalarning analitik hisobi har bir ishlab chiqarilgan mahsulot (ish, xizmatlar) turi bo‘yicha alohida holda yuritilishi lozim.

29. Budjet tashkilotlari tomonidan vaqtincha foydalanilmayotgan binolarni va davlatning boshqa mol-mulklarini boshqa tashkilotlarga ijaraga berish qonunchilikka muvofiq tartibga solinadi.

30. O‘zaro tuzilgan ijara shartnomasida belgilangan summaning (budjet tashkilotining ulushiga) har oyga (chorakka) to‘g‘ri keladigan summasi miqdoriga (har oyda yoki chorakda):

178 “Turli debitor va kreditorlar bilan hisob-kitoblar” subhisobvaraqlar debeti bo‘yicha;

401 “Hisoblangan, lekin hisob raqamga tushmagan daromadlar” subhisobvaraqlar krediti bo‘yicha.

31. Ijara to‘lovi kelib tushganda:

114 “Budjet tashkilotlarini rivojlantirish jamg‘armasining budjetdan tashqari mablag‘lar bo‘yicha talab qilib olinguncha depozit hisobvarag‘i” subhisobvaraq debeti bo‘yicha;

178 “Turli debitor va kreditorlar bilan hisob-kitoblar” subhisobvaraq krediti bo‘yicha.

32. Bir vaqtning o‘zida tushgan ijara to‘lovi summasiga:

401 “Hisoblangan, lekin hisob raqamga tushmagan daromadlar” subhisobvaraq debeti bo‘yicha;

400 “Budjetdan tashqari daromadlar va tushumlar” subhisobvaraq krediti bo‘yicha.

33. Bunda, 400 “Budjetdan tashqari daromadlar va tushumlar” subhisobvaraq krediti hisobiga yozilgan summalar budjet tashkilotining vaqtincha foydalanilmayotgan binolarni va davlatning boshqa mol-mulklarini boshqa tashkilotlarga ijaraga berish hisobiga yaratgan qo‘shimcha daromadi summasini bildiradi va budjet tashkiloti tomonidan topshiriladigan choraklik 2-RJ hisobotida tushum sifatida aks ettiriladi.

34. Budjet tashkilotiga yuridik va jismoniy shaxslar tomonidan (naqd pulsiz hisob-kitoblar yo‘li bilan) berilgan homiylik (beg‘araz) yordam shuningdek, olingan insonparvarlik yordami, texnik ko‘maklashish vositalari hamda grant ko‘rinishidagi mablag‘lar hisobi quyidagi buxgalteriya o‘tkazmasi bilan aks ettiriladi:

114 “Budjet tashkilotlarini (tibbiyot muassasalarini) rivojlantirish jamg‘armasining budjetdan tashqari mablag‘lar bo‘yicha talab qilib olinguncha depozit hisobvarag‘i” subhisobvaraq bo‘yicha;

400 “Budjetdan tashqari daromadlar (tushumlar)” subhisobvaraq krediti bo‘yicha.

35. Mazkur mablag‘lar budjet tashkiloti tomonidan topshiriladigan choraklik 2-RJ hisobotida tushum sifatida aks ettiriladi.

36. Budjet tashkilotlarini rivojlantirish jamg‘armasining talab qilib olinguncha depozit hisobvarag‘idagi mavjud mablag‘lar birinchi navbatda birinchi darajada to‘lanadigan vaqtincha mehnatga layoqatsizlik nafaqasi hamda budjet mablag‘lari hisobidan amalga oshiriladigan mavjud kreditorlik qarzlar to‘lovi xarajatlariga sarflanadi.

37. Vaqtincha mehnatga layoqatsizlik nafaqasini to‘lash bo‘yicha operatsiyalar quyidagi buxgalteriya o‘tkazmalari bilan rasmiylashtiriladi:

a) Jamg‘arma mablag‘lari hisobiga vaqtincha mehnatga layoqatsizlik nafaqasi hisoblanganda:

215 “Budjetdan tashqari Jamg‘armalar hisobiga xarajatlar” subhisobvaraq debeti bo‘yicha;

171 “Vaqtincha mehnatga layoqatsizlik nafaqasi” subhisobvaraq krediti bo‘yicha.

b) budjet tashkiloti kassasiga vaqtincha mehnatga layoqatsizlik nafaqasini to‘lash uchun belgilangan tartibda naqd pul mablag‘lari olinganda:

120 “Kassa” subhisobvaraq debeti bo‘yicha;

114 “Budjet tashkilotlarini (tibbiyot muassasalarini) rivojlantirish jamg‘armasining budjetdan tashqari mablag‘lar bo‘yicha talab qilib olinguncha depozit hisobvarag‘i” subhisobvaraq krediti bo‘yicha.

v) vaqtincha mehnatga layoqatsizlik nafaqasi to‘langanda:

171 “Vaqtincha mehnatga layoqatsizlik nafaqasi” subhisobvaraq debeti bo‘yicha;

120 “Kassa” subhisobvaraq krediti bo‘yicha.

38. Xarajatlarning budjet mablag‘lari bo‘yicha yuzaga kelgan kreditorlik qarzlar to‘langanda:

178 “Turli debitor va kreditorlar bilan hisob-kitoblar” subhisobvaraq yoki boshqa tegishli subhisobvaraqlar debeti bo‘yicha;

114 “Budjet tashkilotlarini (tibbiyot muassasalarini) rivojlantirish jamg‘armasining budjetdan tashqari mablag‘lar bo‘yicha talab qilib olinguncha depozit hisobvarag‘i” subhisobvaraq krediti bo‘yicha.

39. Budjet tashkilotining talab qilib olinguncha depozit (respublika va hududiy g‘azna) hisobvarag‘ida (shaxsiy hisobvarag‘ida) mablag‘lar yetarli darajada mavjud bo‘lmaganda, ushbu xarajatlar, keyinchalik budjet mablag‘lari bo‘yicha talab qilib olinguncha depozit hisobvarag‘i (shaxsiy hisobvarag‘i)dan tiklash sharti bilan, Budjet tashkilotini rivojlantirish jamg‘armasining budjetdan tashqari mablag‘lar bo‘yicha talab qilib olinguncha depozit hisobvarag‘i mablag‘lari hisobiga amalga oshirilishi mumkin.

Bunda quyidagi buxgalteriya o‘tkazmalari amalga oshiriladi:

178 “Turli debitor va kreditorlar bilan hisob-kitoblar” subhisobvaraq (yoki boshqa tegishli subhisobvaraqlar) debeti bo‘yicha;

114 “Budjet tashkilotlarini (tibbiyot muassasalarini) rivojlantirish jamg‘armasining budjetdan tashqari mablag‘lar bo‘yicha talab qilib olinguncha depozit hisobvarag‘i” subhisobvaraq krediti bo‘yicha.

40. Budjet tashkilotining talab qilib olinguncha asosiy depozit hisobvarag‘iga (shaxsiy hisobvarag‘iga) mablag‘lar kelib tushgandan keyin, ilgari Budjet tashkilotini rivojlantirish jamg‘armasining budjetdan tashqari mablag‘lar bo‘yicha talab qilib olinguncha depozit hisobvarag‘idan o‘tkazilgan summalarga teng bo‘lgan mablag‘lar Budjet tashkilotini rivojlantirish jamg‘armasining budjetdan tashqari mablag‘lar bo‘yicha talab qilib olinguncha depozit hisobvarag‘iga qaytariladi. Bunda quyidagi buxgalteriya o‘tkazmalari amalga oshiriladi:

114 “Budjet tashkilotlarini (tibbiyot muassasalarini) rivojlantirish jamg‘armasining budjetdan tashqari mablag‘lar bo‘yicha talab qilib olinguncha depozit hisobvarag‘i” subhisobvaraq debeti bo‘yicha;

090 “Respublika budjetidan moliyalashtiriladigan budjet tashkilotlarining talab qilib olinguncha depozit hisobvarag‘i” subhisobvaraq krediti bo‘yicha;

100 “Mahalliy budjetlardan moliyalashtiriladigan budjet tashkilotlarining talab qilib olinguncha depozit hisobvarag‘i” subhisobvaraq krediti bo‘yicha yoki

237 “g‘aznachilik orqali tashkilotni saqlash va boshqa tadbirlar uchun amalga oshirilgan to‘lovlar” subhisobvaraq krediti bo‘yicha.

41. Budjet tashkilotlarini rivojlantirish jamg‘armasining budjetdan tashqari mablag‘lar bo‘yicha talab qilib olinguncha depozit hisobvarag‘i va budjet mablag‘lari hisobiga amalga oshiriladigan xarajatlar bo‘yicha kreditorlik qarzlarini to‘lashga mablag‘larni o‘tkazish uchun to‘lov topshiriqnomalarining “to‘lov maqsadi” satrida “Budjet mablag‘lari hisobidan amalga oshiriladigan xarajatlar bo‘yicha kreditorlik qarz to‘lovi summasi o‘tkaziladi” yozuvini qayd qilish lozim.

42. Budjet tashkilotlarini rivojlantirish jamg‘armasining budjetdan tashqari mablag‘lar bo‘yicha talab qilib olinguncha depozit hisobvarag‘i mablag‘lari hisobiga budjet tashkilotlari tomonidan amalga oshiriladigan haqiqiy xarajatlar yil mobaynida 215 “Budjetdan tashqari jamg‘armalar hisobiga xarajatlar” subhisobvaraq debetida aks ettiriladi.

43. Hisobot yilining oxirida 215 “Budjetdan tashqari jamg‘armalar hisobidan xarajatlar” subhisobvarag‘i debetida aks ettirilgan haqiqiy xarajatlar yakuniy o‘tkazmalar bilan 400 “Budjetdan tashqari daromadlar va tushumlar” subhisobvarag‘i bilan yopiladi.

44. Budjet hisobidan amalga oshiriladigan haqiqiy xarajatlar tasdiqlangan budjet limiti summasidan oshib ketgan taqdirda, oshib ketgan summa Budjet tashkilotini rivojlantirish jamg‘armasi mablag‘lari hisobiga qoplanadi. Yakuniy o‘tkazmalarda 200 “Muassasalarni saqlash va boshqa tadbirlar uchun budjet bo‘yicha xarajatlar” subhisobvarag‘i bo‘yicha (g‘aznachilik xizmatiga o‘tkazilgan tashkilotlar bo‘yicha 206 “Tashkilotni saqlash va boshqa tadbirlarga budjetdan qilingan haqiqiy xarajatlar” subhisobvarag‘i bo‘yicha) limitdan oshib ketgan haqiqiy xarajatlar summasi 400 “Budjetdan tashqari daromadlar va tushumlar” subhisobvarag‘iga o‘tkaziladi.

45. Agar 215 “Budjetdan tashqari jamg‘armalar hisobidan xarajatlar” subhisobvarag‘i debetida hisobda turgan mablag‘lar budjet mablag‘lari hisobiga amalga oshiriladigan xarajatlar bo‘yicha iqtisod qilingan mablag‘lar hisobiga amalga oshirilgan haqiqiy xarajatlar hisobiga 400 “Budjetdan tashqari daromadlar va tushumlar” subhisobvarag‘i kreditida hisobda turgan mablag‘lar summasidan oshib ketsa, ushbu oshgan summa 140 “Muassasa xarajatlariga doir hisob-kitoblar” yoki 230 “Budjet tomonidan muassasa xarajatlarini va boshqa tadbirlarni moliyalashtirish” (g‘aznachilik xizmatiga o‘tkazilgan tashkilotlar bo‘yicha 237 “g‘aznachilik orqali tashkilotni saqlash va boshqa tadbirlar uchun amalga oshirilgan to‘lovlar” subhisobvarag‘i) subhisobvaraqlariga o‘tkaziladi.

46. Quyidagilar Tibbiyot muassasalarini moddiy rag‘batlantirish va rivojlantirish jamg‘armasining shakllanish manbalari hisoblanadi:

tibbiyot muassasasi uchun ajratiladigan budjet mablag‘lari umumiy hajmining 5 foizigacha bo‘lgan qismi;

homiylik va donorlik tashkilotlaridan hamda pulli davolash va xizmatlar ko‘rsatishdan tushadigan mablag‘lar;

tibbiyot xodimlarining mehnat haqini to‘lash uchun mo‘ljallangan budjet mablag‘laridan tejalgan mablag‘lar;

47. Tibbiyot muassasalari Tibbiyot muassasalarini moddiy rag‘batlantirish va rivojlantirish jamg‘armasi mablag‘lari sarflanishini ikki mustaqil yo‘nalish bo‘yicha alohida hisobini yuritadilar:

tibbiyot xodimlarini moddiy rag‘batlantirishga;

tibbiyot muassasasining moddiy-texnik bazasini rivojlantirish, modernizatsiya qilish va ta’mirlashga.

48. Tibbiyot muassasasi uchun ajratiladigan budjet mablag‘lari umumiy hajmining 5 foizigacha bo‘lgan qismi har bir tibbiyot muassasasini saqlanishi uchun xarajatlar smetasida Davlat budjeti xarajatlari iqtisodiy tasnifining 01-9-10 “Tibbiyot muassasasining moddiy rag‘batlantirish va rivojlantirish jamg‘armasini shakllantirishga xarajatlar” moddasida ko‘zda tutiladi.

49. G‘aznachilik xizmatiga o‘tkazilmagan tibbiyot muassasalari bo‘yicha — tibbiyot muassasasi uchun ajratilgan budjet mablag‘lari umumiy hajmining 5 foizigacha bo‘lgan qismi muassasaning budjet mablag‘lari bo‘yicha talab qilib olinguncha hisobvarag‘iga kelib tushganda:

090 “Respublika budjetidan moliyalashtiriladigan budjet tashkilotlarining talab qilib olinguncha depozit hisobvarag‘i” subhisobvarag‘i debetlanadi;

140 “Muassasa xarajatlariga doir hisob-kitoblar” yoki 230 “Budjet tomonidan muassasa xarajatlarini va boshqa tadbirlarni moliyalashtirish” subhisobvaraqlari kreditlanadi.

50. Tibbiyot muassasasi uchun ajratilgan budjet mablag‘lari umumiy hajmining 5 foizigacha bo‘lgan qismini (har oyda), shuningdek mehnat haqi to‘loviga mo‘ljallangan budjet mablag‘laridan tejalgan (chorak bo‘yicha) mablag‘lar Tibbiyot muassasasining moddiy rag‘batlantirish va rivojlantirish jamg‘armasiga o‘tkazilishida quyidagi buxgalteriya o‘tkazmalari beriladi (har ikkala hisobvaraqqa o‘tkazilgan mablag‘lar uchun alohida buxgalteriya o‘tkazmasi beriladi):

114 “Budjet tashkilotlarini (tibbiyot muassasalarini) rivojlantirish jamg‘armasining talab qilib olinguncha depozit hisobvarag‘i” subhisobvarag‘i debeti bo‘yicha;

090 “Respublika budjetidan moliyalashtiriladigan budjet tashkilotlarining talab qilib olinguncha depozit hisobvarag‘i” subhisobvarag‘i krediti bo‘yicha yoki

100 “Mahalliy budjetlardan moliyalashtiriladigan budjet tashkilotlarining talab qilib olinguncha depozit hisobvarag‘i” subhisobvarag‘i krediti bo‘yicha.

51. G‘aznachilik xizmatiga o‘tkazilgan tibbiyot muassasalari bo‘yicha — tibbiyot muassasasi uchun ajratiladigan budjet mablag‘lari umumiy hajmining 5 foizigacha bo‘lgan qismini (har oyda), shuningdek mehnat haqi to‘loviga mo‘ljallangan budjet mablag‘laridan tejalgan (chorak bo‘yicha) mablag‘lar Tibbiyot muassasasining moddiy rag‘batlantirish va rivojlantirish jamg‘armasiga o‘tkazilishida quyidagi buxgalteriya o‘tkazmasi beriladi (har ikkala hisob raqamga o‘tkazilgan mablag‘lar uchun alohida o‘tkazma beriladi):

114 “Budjet tashkilotlarini rivojlantirish Jamg‘armasining talab qilib olinguncha depozit hisobvarag‘i” subhisobvarag‘i debeti bo‘yicha;

237 “G‘aznachilik orqali tashkilotni saqlash va boshqa tadbirlar uchun amalga oshirilgan to‘lovlar” subhisobvarag‘i krediti bo‘yicha.

52. Tovarlar (ishlar, xizmatlar) ishlab chiqarish va sotishdan (jumladan, davolash-profilaktika muassasalarining pulli davolash va xizmatlar ko‘rsatishidan) tushgan mablag‘larning buxgalteriya hisobi ushbu Nizomning 13 — 26-bandlarida belgilangan tartibda amalga oshiriladi.

53. Tibbiyot muassasalarini moddiy rag‘batlantirish va rivojlantirish jamg‘armasi mablag‘lari hisobidan tibbiyot muassasalari tomonidan amalga oshiriladigan haqiqiy xarajatlar yil mobaynida 215 “Budjetdan tashqari jamg‘armalar hisobiga xarajatlar” subhisobvarag‘i debeti bo‘yicha belgilangan tartibda hisobga olinadi.

54. Hisobot yilining oxirida 215 “Budjetdan tashqari Jamg‘armalar hisobidan xarajatlar” aktiv subhisobvarag‘i bo‘yicha hisobda turgan haqiqiy xarajatlar summalari yakuniy o‘tkazmalar bilan 400 “Budjetdan tashqari daromadlar va tushumlar” subhisobvarag‘iga o‘tkaziladi.

55. Budjet mablag‘lari hisobidan amalga oshiriladigan haqiqiy xarajatlar tasdiqlangan budjet limiti summasidan oshib ketgan taqdirda, oshib ketgan summa Tibbiyot muassasalarini moddiy rag‘batlantirish va rivojlantirish jamg‘armasi mablag‘lari hisobiga qoplanadi. Yakuniy o‘tkazmalarda 200 “Muassasalarni saqlash va boshqa tadbirlar uchun budjet bo‘yicha xarajatlar” subhisobvarag‘i bo‘yicha limitdan oshib ketgan haqiqiy xarajat summasi (G‘aznachilik xizmatiga o‘tkazilgan tashkilotlar bo‘yicha 206 “Tashkilotni saqlash va boshqa tadbirlarga budjetdan qilingan haqiqiy xarajatlar”) aktiv subhisobvarag‘i bo‘yicha 400 “Budjetdan tashqari daromadlar va tushumlar” subhisobvarag‘iga o‘tkaziladi.

215 “Budjetdan tashqari jamg‘armalar hisobidan xarajatlar” subhisobvarag‘i debetida hisobda turgan mablag‘lar budjet mablag‘lari hisobiga amalga oshiriladigan xarajatlar bo‘yicha iqtisod qilingan mablag‘lar hisobiga amalga oshirilgan haqiqiy xarajatlar hisobiga 400 “Budjetdan tashqari daromadlar va tushumlar” subhisobvarag‘i kreditida hisobda turgan mablag‘lar summasidan oshib ketsa, ushbu oshgan summa 140 “Muassasa xarajatlariga doir hisob-kitoblar” yoki 230 “Budjet tomonidan muassasa xarajatlarini va boshqa tadbirlarni moliyalashtirish” subhisobvaraqlariga (G‘aznachilik xizmatiga o‘tkazilgan tashkilotlar bo‘yicha 237 “G‘aznachilik orqali tashkilotni saqlash va boshqa tadbirlarga amalga oshirilgan to‘lovlar” subhisobvarag‘i) o‘tkaziladi.

56. Tibbiyot muassasalarini moddiy rag‘batlantirish va rivojlantirish jamg‘armasi mablag‘larining shakllanishi va sarflanishi Tibbiyot muassasasini moddiy rag‘batlantirish va rivojlantirish jamg‘armasi bo‘yicha daromad va xarajatlar to‘g‘risidagi hisobot (2-TMMRRJ shakl)da belgilangan tartibda aks ettiriladi.

57. Ta’lim muassasalarida o‘qitishning to‘lov-kontrakt shaklidan tushgan mablag‘lar hisobidan amalga oshiriladigan xarajatlar qonun hujjatlariga muvofiq amalga oshiriladi.

58. O‘qitishning to‘lov-kontrakt shakli bo‘yicha mablag‘lar kelib tushganda quyidagi buxgalteriya o‘tkazmalari amalga oshiriladi:

110 “Ta’lim muassasalarida o‘qitishning to‘lov-kontrakt shaklidan tushgan tushumlar bo‘yicha talab qilib olinguncha depozit hisobvarag‘i va topshiriqqa asosan ishlatiladigan summalarning joriy hisobvarag‘i” subhisobvarag‘i debeti bo‘yicha;

402 “Ta’lim muassasalarida o‘qitishning to‘lov-kontrakt shaklidan tushgan tushumlar” subhisobvarag‘i krediti bo‘yicha.

59. Ushbu mablag‘lar hisobidan haqiqiy xarajatlar amalga oshirilganda:

212 “Ta’lim muassasalarida o‘qitishning to‘lov-kontrakt shaklidan tushgan tushumlar bo‘yicha xarajatlar” subhisobvarag‘i debeti bo‘yicha;

178 “Turli debitor va kreditorlar bilan hisob-kitoblar” subhisobvarag‘i va boshqa tegishli subhisobvaraqlar krediti bo‘yicha;

60. Mazkur xarajatlar uchun to‘lovlar amalga oshirilganda:

178 “Turli debitor va kreditorlar bilan hisob-kitoblar” subhisobvarag‘i va boshqa tegishli subhisobvaraqlar debeti bo‘yicha;

110 “Ta’lim muassasalarida o‘qitishning to‘lov-kontrakt shaklidan tushgan tushumlar bo‘yicha talab qilib olinguncha depozit hisobvarag‘i va topshiriqqa asosan ishlatiladigan summalarning joriy hisobvarag‘i” subhisobvarag‘i debeti bo‘yicha;

61. O‘qitishning to‘lov-kontrakt shaklidan tushgan tushumlar hisobidan amalga oshirilgan haqiqiy xarajatlar yil mobaynida 212 “Ta’lim muassasalarida o‘qitishning to‘lov-kontrakt shaklidan tushgan tushumlar bo‘yicha xarajatlar” subhisobvarag‘i debetiga yig‘ilib, hisobot yili oxirida 402 “Ta’lim muassasalarida o‘qitishning to‘lov-kontrakt shaklidan tushgan tushumlar” subhisobvarag‘i debetiga o‘tkazish yo‘li bilan yopiladi. Bunda quyidagi buxgalteriya o‘tkazmasi amalga oshiriladi:

402 “Ta’lim muassasalarida o‘qitishning to‘lov-kontrakt shaklidan tushgan tushumlar” subhisobvarag‘i debeti bo‘yicha;

212 “Ta’lim muassasalarida o‘qitishning to‘lov-kontrakt shaklidan tushgan tushumlar bo‘yicha xarajatlar” subhisobvarag‘i krediti bo‘yicha.

62. O‘qitishning to‘lov-kontrakt shaklidan tushgan tushumlarining analitik hisobi talabalarning kurslari (bosqichlari), fakultetlar (dekanatlar, o‘qish yo‘nalishlari), guruhlar, shuningdek talabalar (familiyasi, ismi, otasining ismi) bo‘yicha alohida tarzda yuritiladi.

63. Budjet tashkilotlarining maxsus mablag‘lari bo‘yicha boshqa tushumlarga quyidagilar kiradi:

ikkilamchi xomashyoni topshirishdan tushgan tushumlar;

keraksiz va eskirgan moddiy qiymatliklarni (budjetdan tashqari mablag‘lar hisobiga olinganlarini) sotishdan tushgan tushumlar;

qonun hujjatlari bilan taqiqlanmagan boshqa tushumlar.

64. Budjet tashkilotining budjetdan tashqari mablag‘lar bo‘yicha maxsus hisobvarag‘iga boshqa maxsus mablag‘lar kelib tushganda quyidagi buxgalteriya o‘tkazmasi amalga oshiriladi:

111 “Budjet tashkilotining boshqa budjetdan tashqari maxsus mablag‘lar bo‘yicha depozit hisobvarag‘i” subhisobvarag‘i debeti bo‘yicha;

240 “Budjetdan tashqari maxsus mablag‘lar jamg‘armasi” subhisobvarag‘i krediti bo‘yicha.

65. Ushbu mablag‘lar hisobidan haqiqiy xarajatlar amalga oshirilganda:

211 “Budjetdan tashqari maxsus mablag‘lar bo‘yicha xarajatlar” subhisobvarag‘i debeti bo‘yicha;

178 “Turli debitor va kreditorlar bilan hisob-kitoblar” subhisobvarag‘i va boshqa tegishli subhisobvaraqlar krediti bo‘yicha.

66. Ushbu xarajatlar budjetdan tashqari mablag‘lar bo‘yicha maxsus depozit hisobvarag‘i hisobidan to‘langanda:

178 “Turli debitor va kreditorlar bilan hisob-kitoblar” subhisobvarag‘i va boshqa tegishli subhisobvaraqlar debeti bo‘yicha;

111 “Budjet tashkilotining boshqa budjetdan tashqari maxsus mablag‘lar bo‘yicha depozit hisobvarag‘i” subhisobvarag‘i krediti bo‘yicha.

67. Kelib tushgan boshqa maxsus mablag‘lar hisobiga amalga oshirilgan haqiqiy xarajatlar hisobot yilining oxirida hisobdan chiqarilganda:

240 “Budjetdan tashqari maxsus mablag‘lar jamg‘armasi” subhisobvarag‘i debeti bo‘yicha.

211 “Budjetdan tashqari maxsus mablag‘lar bo‘yicha xarajatlar” subhisobvarag‘i krediti bo‘yicha.

68. Boshqa tushumlar bo‘yicha analitik hisob har bir tushum turi bo‘yicha alohida tarzda yuritiladi.

69. Chet el valyutasidagi operatsiyalar, jumladan kassadagi, banklardagi depozit hisobvaraqlardagi valyuta mablag‘lari, akkreditivlar, debitorlik va kreditorlik qarzlar, tuzilgan shartnomalar bo‘yicha chetdan keltirilgan tovar-moddiy boyliklar va boshqa aktivlarni Bojxona yuk deklaratsiyasini rasmiylashtirish sanasida kirim qilish, chet el valyutasida bojxona to‘lovlarini amalga oshirish hamda chet el valyutasidagi pul hujjatlari bo‘yicha operatsiyalar buxgalteriya hisobida ular amalga oshirilgan sanadagi O‘zbekiston Respublikasi Markaziy banki kursi bo‘yicha so‘m ekvivalentida aks ettiriladi.

70. Budjet tashkilotlari balans moddalari bo‘yicha chet el valyutasini har hisobot choragining oxirgi sanasi va operatsiyalarni amalga oshirish sanasida O‘zbekiston Respublikasi Markaziy banki kursi bo‘yicha qayta baholashni amalga oshiradilar.

71. Naqd pul ko‘rinishidagi chet el valyutasidagi operatsiyalar budjet tashkilotlari tomonidan alohida “Kassa daftari” (KO-4 yoki 440-shakl)da yuritiladi.

72. Chet el valyutasida mahsulotlarni (bajargan ish, ko‘rsatgan xizmatlarini) sotish bo‘yicha operatsiyalarning buxgalteriya hisobi 114 “Budjet tashkilotlarini rivojlantirish jamg‘armasining budjetdan tashqari mablag‘lar bo‘yicha talab qilib olinguncha depozit hisobvarag‘i” subhisobvarag‘i o‘rniga 118 “Valyuta hisobvarag‘i” subhisobvarag‘i qo‘llagan holda ushbu Nizomning 13 — 26-bandlariga muvofiq amalga oshiriladi.

73. Chet el valyutasi kursi qiymatining O‘zbekiston Respublikasi Markaziy banki tomonidan belgilangan so‘mga nisbatan o‘zgarilishi (pasayishi yoki ko‘tarilishi)ga ko‘ra, chet el valyutasida ifodalangan operatsiyalar, aktivlar va majburiyatlarni so‘mga nisbatan qayta hisoblashda ijobiy yoki salbiy kurs farqlari yuzaga keladi.

74. Chet el valyutasi kursi qiymatining so‘mga nisbatan o‘zgarishi (ko‘tarilishi)da ijobiy kurs farqi yuzaga keladi va bu hisobda 118 yoki hisob-kitoblar hisobini yuritish bo‘yicha boshqa subhisobvaraqlar debeti bo‘yicha hamda, amalga oshirilgan operatsiyalar mazmunidan kelib chiqqan holda, 240, 400, 401, 410-subhisobvaraqlarning krediti bo‘yicha aks ettiriladi.

75. Chet el valyutasi kursi qiymatining so‘mga nisbatan o‘zgarishi (pasayishi)da salbiy kurs farqi yuzaga keladi va bu hisobda ushbu Nizomning 74-bandida ko‘rsatilgan buxgalteriya o‘tkazmasining aksi bilan aks ettiriladi.

76. Chet el valyutasidagi mablag‘larning sintetik hisobi 381 jamg‘arma (3 memorial orderda) qaydnomasida, chet el valyutasidagi operatsiyalarning analitik hisobi 292 “Joriy hisoblar va hisob-kitoblar kitobi (kartochkasi)” shaklda valyutaning har bir turi bo‘yicha alohida tarzda yuritiladi.

77. O‘zbekiston Respublikasi Vazirlar Mahkamasining 1999-yil 3-sentabrdagi “Budjet tashkilotlarini mablag‘ bilan ta’minlash tartibini takomillashtirish to‘g‘risida”gi 414-sonli qaroriga muvofiq qo‘shimcha daromadlar oladigan budjet tashkilotlari yuqorida ko‘rsatilgan O‘zbekiston Respublikasi Vazirlar Mahkamasining qarorida belgilangan muddatga soliqlarning barcha turlari hamda budjetdan tashqari Pensiya jamg‘armasiga, Respublika yo‘l jamg‘armasiga va Moliya vazirligi qoshidagi Budjetdan tashqari maktab ta’limi jamg‘armasiga majburiy ajratmalar to‘lovlaridan, bo‘shab qolgan mablag‘lar budjet tashkilotlarining moddiy texnika va ijtimoiy bazasini mustahkamlashga, shuningdek o‘z xodimlarini moddiy rag‘batlantirishga maqsadli yo‘naltirilgan tarzda, ozod qilingan.

78. Budjet tashkilotlari tomonidan qo‘shimcha olingan daromadlarga soliqlar hisoblanishi quyidagi buxgalteriya o‘tkazmasi orqali aks ettiriladi:

410 “Foyda va zararlar” subhisobvarag‘i debeti bo‘yicha;

173 “Budjet bilan hisob-kitoblar” subhisobvarag‘i krediti bo‘yicha.

79. Budjetdan tashqari Pensiya jamg‘armasiga sotilgan mahsulot (bajarilgan ish va ko‘rsatilgan xizmat)lar hajmidan ajratmalar hisoblanishida:

410 “Foyda va zararlar” subhisobvarag‘i debeti bo‘yicha;

198/2 “Budjetdan tashqari Pensiya jamg‘armasi bilan hisob-kitoblar” subhisobvarag‘i krediti bo‘yicha.

80. Budjetdan tashqari boshqa maqsadli jamg‘armalarga (Respublika yo‘l jamg‘armasi, budjetdan tashqari Maktab ta’limi jamg‘armasi va boshqalarga) ajratmalar hisoblanishida:

410 “Foyda va zararlar” subhisobvarag‘i debeti bo‘yicha;

199 “Budjetdan tashqari boshqa maqsadli jamg‘armalar bilan hisob-kitoblar” subhisobvarag‘i krediti bo‘yicha.

81. Budjetga va budjetdan tashqari jamg‘armalarga hisoblangan soliq va boshqa majburiy to‘lovlar bo‘yicha imtiyozlar summalari quyidagi buxgalteriya o‘tkazmasi bilan aks ettiriladi:

173 “Budjet bilan hisob-kitoblar” subhisobvarag‘i debeti bo‘yicha;

198/2 “Budjetdan tashqari Pensiya jamg‘armasi bilan hisob-kitoblar” subhisobvaraqlari;

199 “Budjetdan tashqari boshqa maqsadli jamg‘armalar bilan hisob-kitoblar” subhisobvaraqlari debeti;

420 “Budjetga va budjetdan tashqari jamg‘armalarga hisoblangan soliq va boshqa to‘lovlar bo‘yicha imtiyozlar” subhisobvarag‘i krediti bo‘yicha.

82. Berilgan imtiyozlar summalari hisobiga yil mobaynida amalga oshirilgan haqiqiy xarajatlar 218 “Soliq va boshqa to‘lovlar bo‘yicha imtiyoz summalari hisobiga xarajatlar” subhisobvarag‘i debetiga yil mobaynida yig‘ilib, yilning oxirida quyidagi buxgalteriya o‘tkazmasi orqali hisobdan chiqariladi:

420 “Budjetga va budjetdan tashqari maqsadli jamg‘armalarga hisoblangan soliq va boshqa to‘lovlar bo‘yicha imtiyozlar” subhisobvarag‘i debeti bo‘yicha;

218 “Soliq va boshqa to‘lovlar bo‘yicha imtiyoz summalari hisobiga xarajatlar” subhisobvarag‘i krediti bo‘yicha.

83. 420 “Budjetga va budjetdan tashqari maqsadli jamg‘armalarga hisoblangan soliq va boshqa to‘lovlar bo‘yicha imtiyozlar” subhisobvarag‘i kreditida aks ettirilgan summalar 2-RJ hisobotida daromad sifatida ko‘rsatiladi, shuningdek hisobot yilining oxirida qolgan qoldiq miqdori kelasi yil uchun berilgan imtiyozlar summalari hisobiga ishlatilishi mumkin bo‘lgan summani bildiradi.

84. Budjet tashkilotlari O‘zbekiston Respublikasi Moliya vazirligi tomonidan belgilangan tartibda budjet va budjetdan tashqari mablag‘lar bo‘yicha yagona balans tuzadilar.

85. Budjetdan tashqari mablag‘lar bo‘yicha hisobotlarni tuzish, tasdiqlash va taqdim etish tartibi O‘zbekiston Respublikasi Moliya vazirligi tomonidan o‘rnatiladi.

86. Budjet tashkilotining rahbari budjetdan tashqari mablag‘larning taqsimlovchisi hisoblanadi hamda mazkur mablag‘lardan maqsadli va oqilona foydalanish uchun javobgardir.

87. Budjet mablag‘lari hisobiga amalga oshiriladigan haqiqiy xarajatlar tasdiqlangan budjet limiti summasidan oshib ketishi uchun javobgarlik budjet tashkiloti rahbari va bosh hisobchisi zimmalariga yuklatiladi.

88. Budjetdan tashqari mablag‘lardan maqsadli foydalanish ustidan nazorat O‘zbekiston Respublikasi Moliya vazirligining Nazorat-taftish bosh boshqarmasi, uning hududiy boshqarmalari va joylardagi moliya organlari tomonidan qonunchilikka muvofiq amalga oshiriladi.

89. Ushbu Nizom O‘zbekiston Respublikasi Markaziy banki Boshqaruvi va Davlat soliq qo‘mitasi bilan kelishilgan.