Oʻzbekiston Respublikasi Prezidentining “Shaxsiy yordamchi, dehqon va fermer xoʻjaliklarida chorva mollar koʻpaytirishni ragʻbatlantirishni kuchaytirish hamda chorvachilik mahsulotlari ishlab chiqarishni kengaytirish borasidagi qoʻshimcha chora-tadbirlar toʻgʻrisida” 2008-yil 21-apreldagi PQ-842-son qarorini bajarish va shaxsiy yordamchi, dehqon va fermer xoʻjaliklariga ushbu sohada xususiy tadbirkorlikni rivojlantirish yoʻli bilan zooveterinariya xizmatlari koʻrsatish sifatini oshirish yuzasidan Vazirlar Mahkamasi qaror qiladi:

1. Oʻzbekiston Respublikasi Davlat mulki qoʻmitasi hamda Qishloq va suv xoʻjaligi vazirligining ilovaga* muvofiq tumanlar (shaharlar) davlat veterinariya boʻlimlari balansida boʻlgan zooveterinariya shoxobchalari binolarini xususiylashtirish toʻgʻrisidagi taklifi qabul qilinsin.

2. Belgilab qoʻyilsinki, ilovada koʻrsatilgan zooveterinariya shoxobchalari binolarini xususiylashtirish veterinariya faoliyati bilan shugʻullanib kelayotgan tadbirkorlik subyektlari oʻrtasida, ular tomonidan zooveterinariya xizmatlari koʻrsatish faoliyati kamida 10 yil mobaynida saqlanishi sharti bilan yopiq kimoshdi savdolarida amalga oshiriladi.

Zooveterinariya shoxobchalarining zooveterinariya xizmatlari koʻrsatish, shu jumladan mintaqaning epizootik barqarorligini taʼminlash boʻyicha faoliyatini muvofiqlashtirish tuman (shahar) davlat veterinariya boʻlimlariga yuklansin.

3. Oʻzbekiston Respublikasi Davlat mulki qoʻmitasi Qishloq va suv xoʻjaligi vazirligi, Davlat veterinariya bosh boshqarmasi bilan birgalikda savdolarni oʻtkazishda kimoshdi savdolarini tashkil etish tartiblariga rioya qilinishini, shuningdek savdolarda ishtirok etish uchun tadbirkorlik subyektlari tomonidan taqdim etilgan hujjatlarning muvofiqligi va ishonchliligi ustidan nazoratni taʼminlasin.

4. Mazkur qarorning bajarilishini nazorat qilish Oʻzbekiston Respublikasi Vazirlar Mahkamasining Qishloq va suv xoʻjaligi, qishloq xoʻjaligi mahsulotlarini qayta ishlash hamda isteʼmol tovarlari axborot-tahlil departamentiga yuklansin.