Oʻzbekiston Respublikasi Vazirlar Mahkamasining “Davlat daromadiga oʻtkaziladigan mol-mulkni olib qoʻyish, sotish yoki yoʻq qilib tashlash tartibi toʻgʻrisidagi nizomni tasdiqlash haqida” 2004-yil 25-martdagi 140-son qaroriga (Oʻzbekiston Respublikasi qonun hujjatlari toʻplami, 2004-y., 12-son, 144-modda) muvofiq Oʻzbekiston Respublikasi Adliya vazirligi, Davlat bojxona qoʻmitasi va Iqtisodiyot vazirligi qaror qiladi:

1. Zaxiralarni shakllantirish uchun zarur boʻlgan oziq-ovqat tovarlarini sotish tartibi toʻgʻrisidagi nizom ilovaga muvofiq tasdiqlansin.

2. Mazkur qaror Oʻzbekiston Respublikasi Adliya vazirligida davlat roʻyxatiga olingan kundan boshlab oʻn kun oʻtgach kuchga kiradi.

Ushbu Nizom Oʻzbekiston Respublikasi Vazirlar Mahkamasining “Davlat daromadiga oʻtkaziladigan mol-mulkni olib qoʻyish, sotish yoki yoʻq qilib tashlash tartibi toʻgʻrisidagi nizomni tasdiqlash haqida” 2004-yil 25-martdagi 140-son qaroriga (Oʻzbekiston Respublikasi qonun hujjatlari toʻplami, 2004-y., 12-son, 144-modda) muvofiq zaxiralarni shakllantirish uchun zarur boʻlgan va davlat daromadiga oʻtkaziladigan oziq-ovqat tovarlarini sotish mexanizmini belgilaydi.

1. Zaxiralarni shakllantirish uchun zarur boʻlgan va davlat daromadiga oʻtkaziladigan oziq-ovqat tovarlari (bundan buyon matnda oziq-ovqat tovarlari deb yuritiladi) pulli asosda Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklariga beriladi hamda savdo tashkilotlarining ixtisoslashtirilgan omborxonalarida saqlanadi. Ushbu tovarlar faqat Qoraqalpogʻiston Respublikasi Vazirlar Kengashi, viloyatlar va Toshkent shahar hokimlari qaroriga koʻra sotiladi.

Olingan oziq-ovqat tovarlaridan savdo chegirmasini chiqarib tashlagan holda tushgan toʻlov Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining budjetdan tashqari manbai hisobidan amalga oshiriladi. Pul mablagʻlari sud ijrochilarining tegishli boʻlimlaridagi maxsus hisob raqamiga oziq-ovqat tovarlari savdo tashkilotlari tomonidan olingan kundan boshlab oʻn kundan kechiktirmay ijro hujjatining tartib raqami va sanasi koʻrsatilgan holda oʻtkaziladi.

2. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari har oyda, mazkur Nizomning ilovasida keltirilgan roʻyxatdan kelib chiqib, Sud qarorlarini ijro etish, sudlar faoliyatini moddiy-texnika jihatidan va moliyaviy taʼminlash departamentining hududiy boshqarmalariga yuboriladigan oziq-ovqat tovarlari nomenklaturasini tasdiqlaydi.

3. Oziq-ovqat tovarlarini sotish bilan faqat Sud qarorlarini ijro etish, sudlar faoliyatini moddiy-texnika jihatidan va moliyaviy taʼminlash departamentining hududiy boshqarmalari bilan oziq-ovqatni sotish boʻyicha xizmatlar koʻrsatish shartnomalarini tuzgan Qoraqalpogʻiston Respublikasi Vazirlar Kengashi, viloyatlar va Toshkent shahar hokimlari qarori bilan tanlov asosida belgilangan savdo tashkilotlari shugʻullanadi.

4. Savdo tashkilotlari tomonidan oziq-ovqat tovarlarini sotish tovarlarning saqlanish muddatlaridan va bozordagi ehtiyojdan kelib chiqqan holda amalga oshiriladi.

Qoraqalpogʻiston Respublikasi Vazirlar Kengashi, viloyatlar va Toshkent shahar hokimlari qarorlari narxlarning asossiz oʻsishini oldini olish, shuningdek aholini vujudga kelayotgan (oʻsayotgan) isteʼmolini qoniqtirish maqsadida oziq-ovqat bozorlarida (dehqon bozorlarida) oziq-ovqatning asosiy turlariga shakllanadigan chakana narxlarni oʻrganish va tahlili asosida qabul qilinadi.

5. Tez buziladigan oziq-ovqat tovarlarini sotish Oʻzbekiston Respublikasi Vazirlar Mahkamasining 2004-yil 25-martdagi 140-son qarori bilan tasdiqlangan Davlat daromadiga oʻtkaziladigan mol-mulkni olib qoʻyish, sotish yoki yoʻq qilib tashlash tartibi toʻgʻrisidagi nizomning (Oʻzbekiston Respublikasi Qonun hujjatlari toʻplami, 2004-y., 12-son, 144-modda) 38-bandi bilan belgilangan tartibga muvofiq amalga oshiriladi.

6. Oziq-ovqat tovarlari ijro ishini yurituvchi sud ijrochilari tomonidan ixtisoslashtirilgan omborxonalarga Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari vakillari ishtirokida qabul qilish-topshirish dalolatnomasi asosida ilova qilinadigan yukxati bilan birgalikda saqlash uchun topshiriladi.

7. Oziq-ovqat tovarlari roʻyxatga olish dalolatnomasida yoki qabul qilish-topshirish dalolatnomasida nazarda tutilgan tartib raqamlari, shuningdek qonun hujjatlariga muvofiq boshqa maʼlumotlar koʻrsatilgan holda muvofiqlik sertifikatlari (majburiy sertifikatlanishi shart boʻlgan tovarlar boʻyicha) va savdo tashkilotining tovar yorliqlari bilan taʼminlanishi kerak.

8. Oziq-ovqat tovarlari tegishli mahsulot turiga qarab normativ hujjatlar talablariga muvofiq saqlanishi lozim.

9. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari saqlash uchun topshirilgan oziq-ovqat tovarlarining hajmini qabul qilish-topshirish dalolatnomasi asosida koʻrib chiqadi. Koʻrib chiqish natijasiga koʻra hamda tovarlarning saqlanish muddatlaridan va bozordagi ehtiyojdan kelib chiqib, oziq-ovqat tovarlarini sotish toʻgʻrisida qaror qabul qilinadi.

10. Qoraqalpogʻiston Respublikasi Vazirlar Kengashi, viloyatlar va Toshkent shahar hokimlari tomonidan oziq-ovqat tovarlarini sotish toʻgʻrisida qaror qabul qilingandan soʻng mazkur qarorning nusxasi bunday tovarlar saqlanishi uchun topshirilgan tegishli savdo tashkilotiga ijro uchun yuboriladi.

11. Oziq-ovqat tovarlarini sotish Oʻzbekiston Respublikasi Vazirlar Mahkamasining 2003-yil 13-fevraldagi 75-son qarori (Oʻzbekiston Respublikasi qonun hujjatlari toʻplami, 2003-y., 3-son, 27-modda) bilan tasdiqlangan Oʻzbekiston Respublikasida chakana savdo qoidalariga muvofiq amalga oshiriladi.

12. Oziq-ovqat tovarlari sotilishidan tushadigan tushim savdo tashkilotlari tomonidan uch kun muddat ichida Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining maxsus hisob raqamiga savdo chegirmasini chiqarib tashlagan holda oʻtkaziladi.

Tushgan summani oʻtkazish muddati kechiktirilgan taqdirda savdo tashkiloti kechiktirilgan har bir kun uchun toʻlanadigan summaning 0,5 foizi miqdorida davlat budjeti daromadiga penya toʻlaydi.

13. Oziq-ovqat tovarlarini sotadigan savdo tashkilotlari har oyning 10 sanasigacha Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklariga sotish uchun olingan oziq-ovqat tovarlarining miqdori (hajmi), narxi va qoldigʻi koʻrsatilgan oziq-ovqat tovarlarining sotilishi holati toʻgʻrisidagi maʼlumotni berib boradi.

14. Mazkur Nizom talablarini buzganlikda aybdor boʻlgan shaxslar qonun hujjatlarida belgilangan tartibda javobgar boʻladilar.

15. Ushbu Nizom Oʻzbekiston Respublikasi Moliya vazirligi va Davlat mulki qoʻmitasi bilan kelishilgan.

1. Goʻsht

2. Shakar

3. Un

4. Krupa, shu jumladan guruch

5. Makaron mahsulotlari

6. Oʻsimlik yogʻi

7. Choy

8. Hayvon yogʻi

9. Margarin

10. Bolalar va parhez taomi