Oʻzbekiston Respublikasi Prezidentining “Ichki tarmoq va tarmoqlararo sanoat kooperatsiyasini yanada kuchaytirish chora-tadbirlari toʻgʻrisida” 2007-yil 12-noyabrdagi PF-3937-son Farmonini bajarish yuzasidan hamda Respublika sanoat yarmarkasi va Kooperatsiya birjasi faoliyatini muntazam asosda tashkil etish maqsadida Vazirlar Mahkamasi qaror qiladi:

1. Oʻzbekiston Respublikasi Iqtisodiyot vazirligi, Tashqi iqtisodiy aloqalar, investitsiyalar va savdo vazirligi, Monopoliyadan chiqarish, raqobat va tadbirkorlikni qoʻllab-quvvatlash davlat qoʻmitasining “Oʻzekspomarkaz” MKK” ochiq aksiyadorlik jamiyati tuzilmasida Respublika sanoat yarmarkasi va Kooperatsiya birjasining Ijro etuvchi organini tashkil etish toʻgʻrisidagi taklifiga rozilik berilsin.

2. Quyidagilar Respublika sanoat yarmarkasi va Kooperatsiya birjasi Ijro etuvchi organining asosiy vazifalari etib belgilansin:

Respublika sanoat yarmarkasi va Kooperatsiya birjasining muntazam asosda oʻtkazilishini tashkil etish;

ishlab chiqarilayotgan, import qilinayotgan va oʻzlashtirilishi istiqbolli boʻlgan tovarlar toʻgʻrisida, buning uchun ishlab chiqarish va texnologik resurslarga ega boʻlgan mamlakatimiz korxonalari toʻgʻrisida, shuningdek bunday tovarlarni ishlab chiqarishni davlat tomonidan qoʻllab-quvvatlash chora-tadbirlari toʻgʻrisidagi maʼlumotlarning axborotlar bazasini, shu jumladan doimiy ravishda yangilab boriladigan Internet tarmogʻiga joylashtirish yoʻli bilan yuritish va xoʻjalik yurituvchi subyektlarni ulardan keng xabardor qilish;

sheriklarni izlab topishda hamda oʻzi ishlab chiqargan mahsulotni yetkazib berish yuzasidan mahalliy ishlab chiqaruvchilar oʻrtasida xoʻjalik shartnomalari tuzishda, shuningdek tarmoqlararo va ichki tarmoq ishlab chiqarish kooperatsiya aloqalarini yoʻlga qoʻyish va mustahkamlashda hamda xoʻjalik yurituvchi subyektlarning buyurtmalar portfellarini shakllantirishda koʻmaklashish;

Respublika sanoat yarmarkasi va Kooperatsiya birjasi tashkiliy qoʻmitasi qarorlarini amalga oshirish.

Respublika sanoat yarmarkasi va Kooperatsiya birjasi Ijro etuvchi organi faoliyatini tashkil etish tartibi toʻgʻrisidagi nizom 2-ilovaga muvofiq tasdiqlansin.

4. Oʻzbekiston Respublikasi Tashqi iqtisodiy aloqalar, investitsiyalar va savdo vazirligi Iqtisodiyot vazirligi, Davlat statistika qoʻmitasi, Davlat bojxona qoʻmitasi, boshqa manfaatdor tuzilmalar bilan birgalikda:

Respublika sanoat yarmarkasi va Kooperatsiya birjasining Ijro etuvchi organiga uning faoliyatini samarali tashkil etish uchun zarur boʻlgan axborot materiallarni muntazam asosda taqdim etsin;

bir oy muddatda Respublika sanoat yarmarkasi va Kooperatsiya birjasi Ijro etuvchi organining samarali faoliyatini taʼminlovchi maʼlumotlarning axborot bazalarini shakllantirishda va doimiy ravishda yangilab borishda oʻzaro hamkorlik qilish tartibi toʻgʻrisidagi Nizomni tasdiqlasin.

5. Belgilansinki:

“Oʻzekspomarkaz” MKK” ochiq aksiyadorlik jamiyati mablagʻlari, tuzilgan shartnomalardan olinadigan vositachilik haqi, xalqaro moliya institutlari va donor tashkilotlarning grant mablagʻlari, homiylik yordami va qonun hujjatlarida taqiqlanmagan boshqa manbalar Respublika sanoat yarmarkasi va Kooperatsiya birjasi Ijro etuvchi organi faoliyatini moliyalashtirish manbalari hisoblanadi;

“Oʻzekspormarkaz” MKK” ochiq aksiyadorlik jamiyatining koʻrgazma maydonlari kichik biznes korxonalariga — Respublika sanoat yarmarkasi va Kooperatsiya birjasi qatnashchilariga imtiyozli tariflar boʻyicha beriladi.

6. 2008-yilda Respublika sanoat yarmarkasi va Kooperatsiya birjasini tayyorlash va oʻtkazish boʻyicha Kompleks tadbirlar 3-ilovaga muvofiq tasdiqlansin.

Respublika sanoat yarmarkasi va Kooperatsiya birjasining doimiy faoliyat koʻrsatuvchi tashkiliy qoʻmitasi (R. Azimov) davlat va xoʻjalik boshqaruvi organlari, korxonalarning 2008-yil oktyabr oyida Respublika sanoat yarmarkasi va Kooperatsiya birjasini sifatli tayyorlash va oʻtkazish boʻyicha faoliyatini muvofiqlashtirishni taʼminlasin.

7. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari R.S. Azimov zimmasiga yuklansin.

1. Ushbu Nizom Oʻzbekiston Respublikasi Prezidentining “Ichki tarmoq va tarmoqlararo sanoat kooperatsiyasini yanada kuchaytirish chora-tadbirlari toʻgʻrisida” 2007-yil 12-noyabrdagi PF-3937-son Farmoniga muvofiq ishlab chiqilgan va Respublika sanoat yarmarkasi va Kooperatsiya birjasi hamda uning Ijro etuvchi organi faoliyatini tashkil etish tartibini belgilaydi.

2. Respublika sanoat yarmarkasi va Kooperatsiya birjasi xoʻjalik yurituvchi subyektlarni respublikada ishlab chiqarilayotgan mahsulotlar toʻgʻrisida keng xabardor qilish, sheriklarni izlab topishda hamda oʻzi ishlab chiqargan mahsulotlarni yetkazib berish yuzasidan mamlakatimiz ishlab chiqaruvchilari oʻrtasida xoʻjalik shartnomalari tuzishda yordam koʻrsatish maqsadida muntazam asosda oʻtkaziladi.

3. Respublika sanoat yarmarkasi va Kooperatsiya birjasi “Oʻzekspomarkaz” MMK” ochiq aksiyadorlik jamiyati koʻrgazma maydonlarida oʻtkaziladi.

4. Respublika sanoat yarmarkasi va Kooperatsiya birjasi faoliyatini tashkil etishda davlat va xoʻjalik boshqaruvi organlarining oʻzaro hamkorligi bilan bogʻliq masalalarni muvofiqlashtirish Respublika sanoat yarmarkasi va Kooperatsiya birjasining doimiy faoliyat koʻrsatuvchi tashkiliy qoʻmitasi (keyingi oʻrinlarda tashkiliy qoʻmita deb ataladi) tomonidan amalga oshiriladi.

Respublika sanoat yarmarkasi va Kooperatsiya birjasini tayyorlash va oʻtkazish tashkiliy qoʻmita tomonidan tasdiqlanadigan Kompleks tadbirlar asosida amalga oshiriladi.

5. Respublika sanoat yarmarkasi va Kooperatsiya birjasining Ijro etuvchi organi (keyingi oʻrinlarda Ijro etuvchi organ deb ataladi) “Oʻzekspomarkaz” MMK” ochiq aksiyadorlik jamiyatining tarkibiy boʻlinmasi hamda Respublika sanoat yarmarkasi va Kooperatsiya birjasi tashkiliy qoʻmitasining ishchi organi hisoblanadi.

6. Quyidagilar Ijro etuvchi organning asosiy vazifalari hisoblanadi:

Respublika sanoat yarmarkasi va Kooperatsiya birjasining muntazam asosda oʻtkazilishini tashkil etish;

ishlab chiqarilayotgan, import qilinayotgan va oʻzlashtirilishi istiqbolli boʻlgan tovarlar toʻgʻrisida, buning uchun ishlab chiqarish va texnologik resurslarga ega boʻlgan mamlakatimiz korxonalari toʻgʻrisida, shuningdek bunday tovarlarni ishlab chiqarishni davlat tomonidan qoʻllab-quvvatlash chora-tadbirlari toʻgʻrisidagi maʼlumotlarning axborotlar bazasini, shu jumladan doimiy ravishda yangilab boriladigan Internet tarmogʻiga joylashtirish yoʻli bilan yuritish va xoʻjalik yurituvchi subyektlarni ulardan keng xabardor qilish;

sheriklarni izlab topishda oʻzi ishlab chiqargan mahsulotni yetkazib berish yuzasidan mahalliy ishlab chiqaruvchilar oʻrtasida xoʻjalik shartnomalari tuzishda, shuningdek tarmoqlararo va ichki tarmoq ishlab chiqarish kooperatsiya aloqalarini yoʻlga qoʻyish va mustahkamlashda hamda xoʻjalik yurituvchi subyektlarning buyurtmalar portfellarini shakllantirishda koʻmaklashish;

Respublika sanoat yarmarkasi va Kooperatsiya birjasi tashkiliy qoʻmitasi qarorlarini amalga oshirish.

7. Ijro etuvchi organ oʻziga yuklangan vazifalarga muvofiq quyidagi funksiyalarni amalga oshiradi:

ishlab chiqarilayotgan, import qilinayotgan va oʻzlashtirilishi istiqbolli boʻlgan tovarlar toʻgʻrisidagi, buning uchun ishlab chiqarish va texnologik resurslarga ega boʻlgan mamlakatimiz korxonalari toʻgʻrisidagi, shuningdek bunday tovarlarni ishlab chiqarishda davlat tomonidan qoʻllab-quvvatlash chora-tadbirlari toʻgʻrisidagi (mavjud boʻlgan taqdirda) doimiy ravishda yangilab boriladigan axborotlar maʼlumotlar bazasini Internet tarmogʻiga joylashtirish;

mamlakatimiz ishlab chiqaruvchilarini ichki bozorda ularning korxonalari bazasida, shuningdek oʻzlashtirilgan mahsulotlarning potensial isteʼmolchilari boʻlgan korxonalarda ishlab chiqarish mumkin boʻlgan tovarlarga, butlovchi buyumlarga va materiallarga boʻlgan ehtiyoj toʻgʻrisida aniq manzilli xabardor qilish;

import qiluvchilarning mamlakatimizdagi potensial mahsulot ishlab chiqaruvchilar bilan, shunga oʻxshash import qilinadigan mahsulotlarni ishlab chiqaruvchilar bilan ishlab chiqarish aloqalarini yoʻlga qoʻyish uchun amaliy uchrashuvlari va muzokaralarini tashkil etish;

mamlakatimiz ishlab chiqaruvchilarining birgalikdagi ishlab chiqarish faoliyatini va kooperatsiya aloqalarini yoʻlga qoʻyish maqsadida mamlakatimizning boshqa ishlab chiqaruvchilari bilan prezentatsiyalarini tashkil etish;

mamlakatimiz xoʻjalik yurituvchi subyektlarini Respublika sanoat yarmarkasi va Kooperatsiya birjasini oʻtkazish sanalari, tartibi va ularda qatnashish shartlari toʻgʻrisida oʻz vaqtida xabardor qilish;

tashkil etilayotgan Respublika sanoat yarmarkasi va Kooperatsiya birjasida xoʻjalik yurituvchi subyektlarning — ishlab chiqaruvchilarning, birinchi navbatda mamlakatimizdagi import qilinayotganga oʻxshash mahsulotlar ishlab chiqaruvchi korxonalarning, shuningdek respublikada oʻzlashtirilishi istiqbolli boʻlgan xorijiy tovarlarni import qiluvchilarning keng taqdim etilishini taʼminlash;

milliy ishlab chiqaruvchilarga sheriklarni izlab topishda va Respublika sanoat yarmarkasi va Kooperatsiya birjasi doirasida oʻz mahsulotini mamlakatimiz korxonalariga yetkazib berish yuzasidan shartnomalar tuzishda koʻmaklashish;

Respublika sanoat yarmarkasi va Kooperatsiya birjasi doirasida xoʻjalik yurituvchi subyektlar bilan tuzilgan shartnomalarni roʻyxatdan oʻtkazish va ularning reyestrini yuritish, shuningdek bunday shartnomalar qatnashchilariga ushbu reyestrdan koʻchirmalar berish;

tarmoqlararo Respublika sanoat yarmarkasi va Kooperatsiya birjasi doirasida tuzilgan shartnomalarning bajarilishini tahlil qilish;

tarmoq va mintaqaviy sanoat yarmarkalari tashkilotchilariga ularni oʻtkazishda metodik yordam koʻrsatish;

sanoat kooperatsiya aloqalarini chuqurlashtirishga va mahalliy xomashyoni qayta ishlash hamda zamonaviy texnologiyalarni oʻzlashtirish asosida mahsulotlar ishlab chiqarishni mahalliylashtirishni kengaytirishga yoʻnaltirilgan tadbirlar boʻyicha axborotlarni tadbirkorlar va aholi oʻrtasida keng targʻib qilishni taʼminlash uchun ommaviy axborot vositalarida materiallar va tahliliy sharhlar eʼlon qilish;

Respublika sanoat yarmarkasi va Kooperatsiya birjasining doimiy ishlaydigan tashkiliy qoʻmitasiga hamda Iqtisodiyot vazirligiga Ijro etuvchi organ faoliyatini, shuningdek Respublika sanoat yarmarkasi va Kooperatsiya birjasini tayyorlash va oʻtkazish jarayonini maqbullashtirish boʻyicha takliflar kiritish.

8. Ijro etuvchi organ oʻz vazifalari va funksiyalarini amalga oshirishda Savdo-sanoat palatasi, davlat va xoʻjalik boshqaruvi organlari, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, korxonalar bilan oʻzaro hamkorlik qiladi.

9. Respublika sanoat yarmarkasi va Kooperatsiya birjasi faoliyatini samarali tashkil etish maqsadida Oʻzbekiston Respublikasi Tashqi iqtisodiy aloqalar, investitsiyalar va savdo vazirligi Iqtisodiyot vazirligi, Davlat statistika qoʻmitasi, Davlat bojxona qoʻmitasi, Savdo-sanoat palatasi, Oʻzbekiston respublika tovar-xomashyo birjasi bilan birgalikda Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarini, xoʻjalik boshqaruvi organlarini va korxonalarni jalb etgan holda Ijro etuvchi organga zarur axborot materiallarni muntazam asosda taqdim etadi.

10. Axborot materiallarni shakllantirish va doimiy ravishda yangilab borishda, boshlangʻich axborotlarni toʻplash va tahlil qilishda, shuningdek keyinchalik maʼlumotlar bazasiga taqdim etishda vazirliklar, idoralar va tashkilotlar bilan oʻzaro hamkorlik qilish tartibi Oʻzbekiston Respublikasi Vazirlar Mahkamasi tomonidan tasdiqlanadi.

11. Ijro etuvchi organ oʻziga yuklangan vazifalar va funksiyalarni bajarish uchun oʻz vakolatlari doirasida quyidagi huquqlarga ega:

Respublika sanoat yarmarkasi va Kooperatsiya birjasining doimiy ishlaydigan tashkiliy qoʻmitasiga hamda Oʻzbekiston Respublikasi Iqtisodiyot vazirligiga Ijro etuvchi organ faoliyatini, shuningdek Respublika sanoat yarmarkasi va Kooperatsiya birjasini tayyorlash va oʻtkazish jarayonini maqbullashtirish boʻyicha takliflar kiritish;

Oʻzbekiston Respublikasi Iqtisodiyot vazirligidan ushbu Nizomda belgilangan maʼlumotlarning elektron bazalarini olish.

12. Ijro etuvchi organ:

maʼlumotlarning doimiy ravishda yangilab boriladigan axborot bazalarining tizimli yuritilishi va Internet tarmogʻiga joylashtirilishi hamda tarmoqlararo va ichki tarmoq ishlab chiqarish aloqalarini yoʻlga qoʻyishda va mustahkamlashda va ushbu Nizomda belgilangan tartibda xoʻjalik yurituvchi subyektlarning buyurtmalar portfellarini shakllantirishda koʻmaklashish boʻyicha chora-tadbirlarning samarali amalga oshirilishi;

ishlab chiqariladigan, import qilinadigan va oʻzlashtirilishi istiqbolli boʻlgan tovarlar toʻgʻrisida, shuningdek buning uchun ishlab chiqarish va texnologik resurslarga ega boʻlgan korxonalar toʻgʻrisida, bunday tovarlarni (mavjud boʻlgan taqdirda) ishlab chiqarishda davlat tomonidan qoʻllab-quvvatlash chora-tadbirlari toʻgʻrisida;

Respublika sanoat yarmarkasi va Kooperatsiya birjasining doimiy ishlaydigan tashkiliy qoʻmitasi bilan Kompleks tadbirlarni oʻz vaqtida kelishilishi va tasdiqlanishi;

vazirliklar, idoralar va xoʻjalik yurituvchi subyektlarning, Savdo-sanoat palatasi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining, korxonalarning Respublika sanoat yarmarkasi va Kooperatsiya birjasining oʻtkazilish muddatlari toʻgʻrisida oʻz vaqtida xabardor qilinishi;

Respublika sanoat yarmarkasi va Kooperatsiya birjasi doirasida xoʻjalik yurituvchi subyektlar bilan tuzilgan shartnomalar reyestrining sifatli yuritilishi uchun javob beradi.

Ijro etuvchi organ ushbu Nizomga muvofiq oʻziga yuklangan boshqa vazifalar va funksiyalarning samarali bajarilishi uchun javob beradi.

13. Ijro etuvchi organga ayni bir vaqtda “Oʻzekspormarkaz” MMK” ochiq aksiyadorlik jamiyati bosh direktorining oʻrinbosari hisoblanadigan boshliq boshchilik qiladi.

14. Ijro etuvchi organning rahbari Respublika sanoat yarmarkasi va Kooperatsiya birjasining tashkiliy qoʻmitasi bilan kelishilgan holda, belgilangan tartibda lavozimga tayinlanadi va lavozimdan ozod qilinadi.

15. Ijro etuvchi organ rahbari:

Ijro etuvchi organning samarali faoliyat koʻrsatishini taʼminlaydi, Ijro etuvchi organga yuklangan vazifalar va funksiyalarning bajarilishi uchun shaxsan javob beradi;

Respublika sanoat yarmarkasi va Kooperatsiya birjasini oʻtkazish bilan bogʻliq boʻlgan tadbirlarning oʻz vaqtida va sifatli bajarilishi ustidan nazoratni taʼminlaydi.

16. Ijro etuvchi organ quyidagi uchta boʻlimdan iborat boʻladi:

Respublika sanoat yarmarkasi va Kooperatsiya birjasini oʻtkazishni tashkil etish boʻlimi;

axborot-tahliliy taʼminlash va maʼlumotlar bazasini yuritish boʻlimi;

xoʻjalik yurituvchi subyektlar bilan ishlash va ishlab chiqarish-kooperatsiya aloqalarini yoʻlga qoʻyishga koʻmaklashish boʻlimi.

17. Ijro etuvchi organning xodimlari Respublika sanoat yarmarkasi va Kooperatsiya birjasining tashkiliy qoʻmitasi bilan kelishilgan holda, belgilangan tartibda lavozimga tayinlanadi va lavozimdan ozod qilinadi.

18. Respublika sanoat yarmarkasi va Kooperatsiya birjasining tashkiliy qoʻmitasi Ijro etuvchi organning tuzilmasiga va xodimlari soniga oʻzgartirishlar kiritishi mumkin.

19. Ijro etuvchi organni qayta tashkil etish va uning faoliyatini toʻxtatish Oʻzbekiston Respublikasi Vazirlar Mahkamasi tomonidan amalga oshiriladi.