Oʻzbekiston Respublikasi Hukumati bilan Ukraina Vazirlar Mahkamasi, bundan keyin “Tomonlar” deb ataluvchilar,

giyohvandlik koʻlami va giyohvandlik vositalari, psixotrop moddalar (bundan keyin giyohvandlik vositalari deb ataladi) hamda prekursorlarning noqonuniy yurgizilishi tamoyilining kuchayib borayotganligidan tashvishlanib,

giyohvandlik vositalari va prekursorlarning noqonuniy yurgizilishi milliy xavfsizlikka, ular xalqlarining salomatligi va farovonligiga jiddiy tahdid solishini hamda jamiyatning siyosiy va iqtisodiy tuzilmalariga, ijtimoiy va madaniy sohalariga daxldor muammo ekanligini anglab,

Giyohvandlik vositalari toʻgʻrisida 1961-yildagi Yagona konvensiyaning, Psixotrop moddalar toʻgʻrisida 1971-yildagi konvensiyaning va BMTning Giyohvandlik vositalari va psixotrop moddalarning noqonuniy yurgizilishiga qarshi kurash toʻgʻrisida 1988-yildagi konvensiyasi maqsadlaridan kelib chiqib,

giyohvandlik vositalari va prekursorlarning noqonuniy aylanmasiga qarshi kurash ikki tomonlama hamkorlik doirasida muvofiqlashtirilgan harakatni talab qilishini hisobga olib, hamda bir-birlariga zarur koʻmak berishga qatʼiy ahd qilib,

xalqaro huquqning umumeʼtirof etilgan prinsiplari va meʼyorlariga amal qilib,

1. Ushbu Bitimni amalga oshirishda quyidagilar Tomonlarning vakolatli organlari hisoblanadi:

Oʻzbekiston Respublikasidan:

Vazirlar Mahkamasi huzuridagi Giyohvandlik vositalarini nazorat qilish milliy markazi,

Prokuratura,

Milliy xavfsizlik xizmati,

Ichki ishlar vazirligi,

Davlat bojxona qoʻmitasi,

Adliya vazirligi,

Sogʻliqni saqlash vazirligi,

Davlat chegaralarini qoʻriqlash qoʻmitasi,

Tashqi ishlar vazirligi,

Xalq taʼlimi vazirligi,

Davlat soliq qoʻmitasi,

Ukrainadan:

Ichki ishlar vazirligi,

Ukraina davlat chegaralarini qoʻriqlash Davlat qoʻmitasi,

Xavfsizlik xizmati,

Davlat bojxona xizmati,

Sogʻliqni saqlash vazirligi.

2. Tomonlardan har biri oʻzining vakolatli organlari roʻyxatiga oʻzgartishlar kiritilganligi toʻgʻrisida boshqa Tomonni darhol xabardor qiladi.

3. Tomonlarning vakolatli organlari ushbu Bitimni bajarish maqsadida bir-birlari bilan bevosita aloqa qilishlari mumkin.

Tomonlar oʻz davlatlarining qonunlariga muvofiq giyohvandlik vositalarini suiisteʼmol qilishni bartaraf etish, giyohvand bemorlarni davolash va reabilitatsiya qilish, giyohvandlik vositalari va prekursorlarning qonuniy yurgizilishi ustidan nazorat, shuningdek ularning noqonuniy yurgizilishiga qarshi kurash sohalarida muvofiqlashtirilgan dasturlarni amalga oshiradilar.

Tomonlar ushbu Bitimdan kelib chiqadigan majburiyatlarni xalqaro huquq prinsiplari va meʼyorlariga muvofiq bajaradilar.

Tomonlar oʻz vakolatli organlari orqali giyohvandlik vositalarining noqonuniy yurgizilishi, ularni suiisteʼmol qilishga qarshi kurash sohasida, shuningdek quyidagi ustuvor yoʻnalishlarda prekursorlarni noqonuniy yurgizishga qarshi kurashda hamkorlik qiladilar:

maʼmuriy va tezkor darajalarda hamkorlikni muvofiqlashtirish mexanizmini tashkil etish;

giyohvandlik vositalarini nazorat qilish sohasidagi milliy qonunlarni yaqinlashtirish;

giyohvandlik vositalarining noqonuniy ishlab chiqarilishi va tarqatilishiga barham berishda, ular kontrabandasi harakat yoʻnalishlarini aniqlashda, jumladan uchinchi davlatlardan kelishini fosh etishda muvofiqlashtirilgan harakatlarni amalga oshirish;

oʻz mamlakatlarida giyohvandlik vositalariga boʻlgan talabni va giyohvandlik koʻlamlarini qisqartirish;

giyohvandlik vositalarining noqonuniy yurgizilishini yoʻq qilish va giyohvandlikning oldini olish boʻyicha tajriba almashish.

1. Tomonlarning vakolatli organlari oʻz davlatlarining qonunlariga muvofiq quyidagilar toʻgʻrisida oʻzaro qiziqish uygʻotuvchi axborotni almashadilar:

a) giyohvandlik vositalari va prekursorlarning noqonuniy yurgizilishga kelib tushish manbalarini aniqlashning shakllari va metodlari hamda ularning tarqatilishini bartaraf qilish choralari;

b) giyohvandlik vositalari va prekursorlarning noqonuniy yurgizilishidan iborat jinoyatlarni aniqlash, ularning oldini olish va tekshirish usullari;

v) Tomonlardan birining davlati hududida giyohvandlik vositalari va prekursorlarning noqonuniy yurgizilishi va ularni yashirish;

g) giyohvandlik vositalari va prekursorlarning noqonuniy yurgizilishiga qarshi kurashish yuzasidan ilmiy tadqiqotlar;

d) Tomonlar davlatlarining tegishli qonunlari va ularni tatbiq etish amaliyoti;

e) giyohvandlik vositalari va prekursorlarning noqonuniy yurgizilishidan olingan daromadni qonuniylashtirish usullari;

yo) noqonuniy yurgizilishdan tortib olingan yangi va nomaʼlum giyohvandlik vositalarining namunalari;

j) davlat chegarasini kesib oʻtishda qoʻllanadigan noqonuniy giyohvandlik vositalari va prekursorlar turkumini yashirish yoʻllari, shuningdek ularni aniqlash usullari;

z) giyohvandlik vositalari va prekursorlarni noqonuniy tashuvchilar deb topilgan shaxslar, ularni tashishning aniqlangan yoʻnalishlari;

i) giyohvandlik vositalarini tayyorlovchi jinoiy guruhlar, giyohvandlik vositalari va prekursorlar operatsiyalari bilan noqonuniy shugʻullanuvchi yoki bunday jinoiy faoliyatda shubhalanilayotgan alohida shaxslar, tijoriy va boshqa tuzilmalar.

1. Ushbu Bitim doirasida hamkorlik qilish Tomonlar vakolatli organlarining koʻmaklashish toʻgʻrisidagi soʻrovi asosida amalga oshiriladi.

2. Koʻmaklashish toʻgʻrisidagi soʻrov yozma ravishda yuboriladi. Shoshilinch hollarda ogʻzaki taqdim qilinishi mumkin, biroq ular uch kundan kechiktirmasdan yozma tasdiqlanishi lozim.

Koʻmaklashish toʻgʻrisidagi soʻrovning haqiqiy ekanligi yoki mazmuniga shubha tugʻilsa, uning tasdigʻi soʻrab olinishi mumkin.

3. Koʻmaklashish toʻgʻrisidagi soʻrovda quyidagilar aks ettirilishi lozim:

a) koʻmak soʻrayotgan vakolatli organning nomi hamda koʻmak soʻrab murojaat qilingan vakolatli organning nomi;

b) ish mohiyatining qisqa bayoni;

v) maqsadning koʻrsatilishi va soʻrovning asoslanishi;

g) soʻralayotgan koʻmakning mazmuni.

4. Lozim topilsa va imkon boʻlsa, soʻrovnomada quyidagilar ham aks ettirilishi lozim:

a) ism va familiyalar, shuningdek boshqa zarur maʼlumotlar;

b) ishga daxldor yuridik shaxslarning nomlanishi va joylashgan oʻrni toʻgʻrisida axborot;

v) qilmish yoki voqea tafsiloti, jinoiy ishlar boʻyicha esa qilmishning soʻrayotgan Tomon davlatining qonunlariga koʻra toifasi va qoʻllanadigan qonun tegishli moddasi matni;

g) javob olinishi zarur boʻlgan savollar;

d) soʻrovni bajarishda amal qilinishi lozim boʻlgan alohida tartib va bu zaruratning asoslanishi;

e) soʻrovni bajarishda asqotishi mumkin boʻlgan har qanday boshqa axborot;

5. Koʻmaklashish toʻgʻrisida berilgan va yozma ravishda tasdiqlangan soʻrovnoma soʻrayotgan vakolatli organning rahbari yoki uning oʻrinbosari tomonidan imzolanadi.

Tomonlarning vakolatli organlari ushbu Bitim doirasida bir-birlaridan olinadigan axborotning maxfiyligini taʼminlaydilar.

Ushbu Bitim doirasida olingan axborot uchinchi tomonga berilishi zarur boʻlsa, uni taqdim qilgan vakolatli organning yozma roziligini olish lozim.

Tomonlar ushbu Bitim maqsadlariga muvofiq ravishda kadrlar malakasini oshirish sohasida oʻzaro manfaatdorlik asosida hamkorlik qiladilar.

Vakolatli organlar oʻz davlatlarining qonunlariga muvofiq “nazorat qilinadigan yetkazib berish” usulini oʻzaro qoʻllash imkoniyatlarini koʻrib chiqadilar.

Ushbu Bitimni bajarish boʻyicha vakolatli organlarning faoliyatini muvofiqlashtirish tegishli ravishda Oʻzbekiston Respublikasi Vazirlar Mahkamasi huzuridagi Giyohvandlik vositalarini nazorat qilish Milliy markazi va Ukraina Vazirlar Mahkamasi huzuridagi Giyohvandlikka qarshi kurash boʻyicha Milliy muvofiqlashtiruvchi kengash tomonidan amalga oshiriladi.

Oʻzaro kelishuv boʻyicha ushbu Bitimda koʻzda tutilgan vakolatli organlar oʻrtasidagi hamkorlik samaradorligini oshirish maqsadida Tomonlar muvofiqlashtiruvchi organlarining rahbarlari zarur hollarda maslahatlashuvlar oʻtkazadilar.

Tomonlar oʻz davlatlarining qonunlariga muvofiq nazorat qilinadigan giyohvandlik vositalari va prekursorlarning milliy roʻyxatlarini almashadilar hamda ularga kiritilgan oʻzgartishlar toʻgʻrisida bir-birlarini xabardor qiladilar.

Tomonlar ushbu Bitim doirasida hamkorlikni amalga oshirishda rus tilidan foydalanadilar.

Ushbu Bitim Tomonlarning ular ishtirokchilari boʻlgan boshqa xalqaro shartnomalar boʻyicha huquq va majburiyatlariga daxl qilmaydi.

Ushbu Bitimni qoʻllash va talqin qilish boʻyicha bahs va kelishmovchiliklar yuzaga kelgan holda Tomonlar ularni muzokara va maslahatlashuvlar orqali hal etadilar.

Tomonlarning roziligi bilan ushbu Bitimga oʻzgartish va qoʻshimchalar kiritilishi mumkin. Ular alohida bayonnomalar tarzida rasmiylashtiriladi va ushbu Bitim 15-moddasining qoidalariga muvofiq kuchga kirgach, ushbu Bitimning tarkibiy qismi hisoblanadi.

Ushbu Bitim Tomonlar uni kuchga kiritish uchun zarur boʻlgan davlat ichki protseduralarini bajarganliklari toʻgʻrisida diplomatik kanallar orqali olingan oxirgi bildirishnoma sanasidan boshlab kuchga kiradi.

Ushbu Bitim Tomonlardan biri uning amal qilishini toʻxtatish niyati toʻgʻrisida boshqa Tomonni diplomatik kanallar orqali yozma ravishda xabardor qilmagunicha oʻz kuchida qoladi. Bu holda boshqa Tomon bunday bildirishnomani olganidan soʻng olti oy oʻtgach, ushbu Bitim oʻz faoliyatini toʻxtatadi.

Toshkent shahrida 2000-yil 12-oktabrda ikki nusxada, har biri oʻzbek, ukrain va rus tillarida tuzildi, bunda barcha matnlar bir xil kuchga ega.

Ushbu Bitimni talqin qilishda rus tilidagi matndan foydalanadi.