Arxitektura va shaharsozlik sohasidagi munosabatlar ushbu Qonun va boshqa qonunlar bilan tartibga solinadi.

Qoraqalpog‘iston Respublikasida arxitektura va shaharsozlik sohasidagi munosabatlar Qoraqalpog‘iston Respublikasining qonun hujjatlari bilan ham tartibga solinadi.

Arxitektura va shaharsozlik sohasidagi huquqiy munosabatlarning mavzui:

aholini joylashtirishni hududiy tashkil etish, ishlab chiqaruvchi kuchlarni joylashtirish, shaharlar, aholi yashaydigan boshqa manzilgohlarni hamda ularning ijtimoiy, muhandislik va transport infrastrukturalarini atrof muhitning holatini hisobga olgan holda barqaror rivojlantirish;

aholi punktlarini, ularning tizimlari, funksional zonalari va hududlarini rejalash, qurish hamda qayta qurish, tarixiy-madaniy merosni, qo‘riqlanadigan zonalarni, shaharsozlik, arxitektura, monumental san’at yodgorliklarini, tabiiy-landshaft majmuilari va shaharsozlik jihatidan ahamiyatli boshqa hududlarni saqlash, qayta tiklash va muhofaza qilish;

ishlab chiqarish obyekti binolari, uy-joylar va fuqarolik hamda qishloq xo‘jalik ahamiyatidagi binolar qurilishini loyihalash va muhandislik-texnik izlanishlarini olib borish uchun litsenziyalar berish;

loyihalash-qidiruv, qurilish ishlarining sifati, binokorlik materiallarining ishlab chiqarilishi, arxitektura-shaharsozlik yechimlarining ro‘yobga chiqarilishi ustidan arxitektura-qurilish nazoratini amalga oshirish;

normalar, qoidalar, standartlarni ishlab chiqish va ilmiy tadqiqotlar o‘tkazish;

hududlarni xavfli tabiiy va texnogen jarayonlardan himoyalash;

arxitektura va shaharsozlik vositalari asosida yashash muhitini yaratish hamda uni o‘zgartirish bilan bog‘liq boshqa faoliyatdan iboratdir.

Arxitektura-shaharsozlik faoliyati quyidagi tamoyillar asosida amalga oshiriladi:

insonning yashash muhitini mintaqaviy, milliy, tabiiy-iqlimiy va boshqa xususiyatlarni, ekologik, texnik, sanitariya-gigiyenik va estetik talablarni hisobga olgan holda o‘zgartirish;

fuqarolarning va arxitektura-shaharsozlik faoliyati boshqa subyektlarining manfaatlarini hisobga olish hamda huquqlariga rioya etish, qarorlar qabul qilishda oshkoralik va jamoatchilik fikrini hisobga olish;

aholi punktini, hududni ijtimoiy va makon jihatidan yaxlit holda rivojlantirish manfaatlarining ustuvorligi;

hududiy va boshqa arxitektura-shaharsozlik resurslaridan oqilona foydalanish, aholini xavfli texnogen va geologik jarayonlar, boshqa tabiiy ofatlar ehtimol tutilgan yuz berishidan himoya qilish va bunday falokatlar keltiradigan zararni kamaytirish;

arxitektura-shaharsozlikka oid qimmatli merosni asrash, arxitektura va shaharsozlikda milliy hamda madaniy an’analarni rivojlantirish.

Quyidagilar:

O‘zbekiston Respublikasining, Qoraqalpog‘iston Respublikasining, viloyatlarning, aholi punktlarining hududi, ularning tizimlari va qismlari;

umumrespublika va mintaqaviy aholi joylashuvi tizimlari, yer uchastkalari, binolar va inshootlar, hududiy-ishlab chiqarish, shaharsozlik va landshaft majmuilari, tabiatni muhofaza qilish va sanoat rekreatsiya zonalari, arxitektura-shaharsozlik, arxeologiya yodgorliklari va ularning qo‘riqlanadigan zonalari, muhandislik-transport kommunikatsiyalarining suvdagi va quruqlikdagi hududlari arxitektura-shaharsozlik faoliyatining obyektlaridir.

Davlat hokimiyati va boshqaruv organlari, korxonalar, muassasalar, tashkilotlar, fuqarolarning o‘zini o‘zi boshqarish organlari, yuridik va jismoniy shaxslar, shu jumladan chet ellik yuridik va jismoniy shaxslar arxitektura-shaharsozlik faoliyatining subyektlaridir.

Arxitektura-shaharsozlik faoliyatining subyektlari:

buyurtmachilar (investorlar);

arxitektura-shaharsozlik, qurilish loyihalarini ishlab chiquvchilar;

obyektlarni qurish (qayta qurish, ta’mirlash va obodonlashtirish) bo‘yicha pudratchilar;

arxitektura-shaharsozlik faoliyati obyektlaridan foydalanuvchilar sifatida ish ko‘rishlari mumkin.

Quyidagilar:

O‘zbekiston Respublikasi Davlat arxitektura va qurilish qo‘mitasi (bundan buyon matnda “O‘zdavarxitektqurilish” deb yuritiladi);

viloyatlar hamda Toshkent shahar arxitektura va shaharsozlik bosh boshqarmalari;

tumanlar (shaharlar) arxitektura va shaharsozlik bo‘limlari (boshqarmalari) arxitektura va shaharsozlik bo‘yicha davlat boshqaruv organlaridir.

Viloyatlar hamda Toshkent shahar arxitektura va shaharsozlik bosh boshqarmalariga, tumanlar (shaharlar) arxitektura va shaharsozlik bo‘limlariga (boshqarmalariga) bosh arxitektorlar rahbarlik qiladilar.

Arxitektura va shaharsozlik bo‘yicha davlat boshqaruv organlari o‘z vakolatlarini ushbu Qonunning 3-moddasida bayon etilgan arxitektura-shaharsozlik faoliyatining asosiy tamoyillariga asoslangan holda amalga oshiradi.

Viloyatlar va Toshkent shahrining, tumanlarning (shaharlarning) arxitektura va shaharsozlik bo‘yicha davlat boshqaruv organlari o‘z vakolatlariga kiradigan masalalarda tegishli hokimlarga va yuqori turuvchi organlarga bo‘ysunadilar.

Arxitektura va shaharsozlik sohasida Vazirlar Mahkamasi tasarrufiga:

kompleks davlat dasturlarini tasdiqlash va ularning ro‘yobga chiqarilishiga ko‘maklashish;

umumdavlat yoki mintaqalararo ahamiyatga molik arxitektura-shaharsozlik va loyiha hujjatlarining asosiy qoidalarini tasdiqlash;

davlatlararo dasturlar ro‘yobga chiqarilishida qatnashish;

arxitektura va shaharsozlik bo‘yicha hukumatlararo shartnomalar hamda bitimlar tuzish;

loyiha-tadqiqot hujjatlarining davlat ekspertizasini tashkil etish va o‘tkazish hamda litsenziya berish tartibini belgilash;

davlat shaharsozlik kadastrini yuritish tartibini, arxitektura va shaharsozlik bo‘yicha davlat boshqaruv organlarining tashkiliy tuzilishini, vakolatlarini belgilash;

qonun hujjatlariga muvofiq boshqa masalalarni hal etish kiradi.

Mahalliy davlat hokimiyati organlari tasarrufiga:

o‘ziga qarashli hududlarda arxitektura-shaharsozlik faoliyatiga daxldor masalalarni hal etish;

chegaradosh aholi punktlari hamda hududlarning manfaatlarini hisobga olgan holda dasturlar, rejalar, loyihalar va ilmiy tadqiqotlarni ishlab chiqish, tasdiqlash va ro‘yobga chiqarish;

o‘ziga qarashli hududda joylashgan shahar va qishloq aholi punktlarini loyiha-rejalash hujjatlari bilan ta’minlash;

aholini oqilona joylashtirish, hududni tashkil etish, transport tizimlari, ijtimoiy va muhandislik infrastrukturalarini rivojlantirish masalalarini hal etish;

arxitektura-shaharsozlik hujjatlarining loyihalarini ishlab chiqish va muhokama qilishda fuqarolarning ishtirokini ta’minlash;

mahalliy davlat hokimiyati organlari obyektlarining loyiha-smeta hujjatlarini ishlab chiqish hamda bunday obyektlarni qurish bo‘yicha buyurtmachi vazifasini bajarish, ularni mablag‘ bilan ta’minlash;

agar ushbu Qonun talablariga, tasdiqlangan arxitektura-shaharsozlik hujjatlari va aholi punktini qurish qoidalariga muvofiq bo‘lmasa, qurilishning barcha turlarini man etish, to‘xtatib turish yoki cheklab qo‘yish;

qonun hujjatlariga muvofiq boshqa masalalarni hal etish kiradi.

“O‘zdavarxitektqurilish” arxitektura va shaharsozlik sohasida yagona davlat siyosatini amalga oshiruvchi maxsus vakolat berilgan davlat boshqaruv organidir.

“O‘zdavarxitektqurilish”ning vakolati uning Vazirlar Mahkamasi tasdiqlaydigan Nizomida belgilab qo‘yiladi.

“O‘zdavarxitektqurilish”ning o‘z vakolati doirasida qabul qilgan qarorlari barcha vazirliklar, davlat qo‘mitalari, idoralar, jamoat birlashmalari, shuningdek yuridik va jismoniy shaxslar, shu jumladan chet ellik yuridik va jismoniy shaxslar uchun majburiydir.

Viloyatlar hamda Toshkent shahar arxitektura va shaharsozlik bosh boshqarmalarining vakolati, Vazirlar Mahkamasi tasdiqlaydigan namunaviy nizomga muvofiq, “O‘zdavarxitektqurilish” mahalliy davlat hokimiyati organlari bilan kelishgan holda tasdiqlaydigan nizomlar bilan belgilanadi.

Tumanlar (shaharlar) arxitektura va shaharsozlik bo‘limlarining (boshqarmalarining) vakolati, Vazirlar Mahkamasi tasdiqlaydigan namunaviy nizomga muvofiq, viloyatlar va Toshkent shahar arxitektura va shaharsozlik bosh boshqarmalari mahalliy davlat hokimiyati organlari bilan kelishgan holda tasdiqlaydigan nizomlar bilan belgilanadi.

Arxitektura va shaharsozlik bosh boshqarmalarining, bo‘limlarining (boshqarmalarining) o‘zlariga berilgan vakolat doirasida qabul qilgan qarorlari ularga qarashli hududda korxonalar, muassasalar, tashkilotlar, shuningdek yuridik va jismoniy shaxslar, shu jumladan chet ellik yuridik va jismoniy shaxslar uchun majburiydir.

Arxitektura-shaharsozlik faoliyatining subyektlari:

arxitektura-shaharsozlik faoliyatini amalga oshirish vaqtida aholi punktlarini, ularning tizimlari va hududlarini o‘z faoliyatlariga ta’sir ko‘rsatishi mumkin bo‘lgan tarzda rejalash, qurish hamda qayta qurishga doir qarorlar tayyorlanishi va qabul qilinishi haqida, shuningdek yashash muhitining ekologik va sanitariya-gigiyena holati to‘g‘risida hokimiyatning mahalliy vakillik hamda ijroiya organlaridan axborot olish;

mansabdor, yuridik va jismoniy shaxslarning arxitektura-shaharsozlik faoliyati sohasidagi o‘z huquqlari hamda qonuniy manfaatlarini cheklab qo‘yadigan xatti-harakatlari ustidan sudga shikoyat qilish huquqiga egadirlar.

Arxitektura-shaharsozlik faoliyatining subyektlari:

ushbu Qonun va arxitektura-shaharsozlik faoliyati sohasidagi boshqa normativ hujjatlarning talablariga rioya etishlari;

tarixiy va madaniy boyliklarga, arxitektura yodgorliklariga, tabiiy va sun’iy landshaftlarga zarar yetkazmasliklari, aholining yashash muhiti sifatini yomonlashtiradigan, arxitektura-shaharsozlik faoliyati boshqa subyektlarining huquqlari va qonuniy manfaatlarini cheklab qo‘yadigan xatti-harakatlarga yo‘l qo‘ymasliklari;

o‘zlariga mulk qilib berilgan, egalik qilish yoki foydalanish uchun berilgan yer uchastkalaridan belgilangan maqsadda arxitektura-shaharsozlik faoliyati sohasidagi normativ hujjatlarga, mazkur hududni rejalash va qurish shart-sharoitlariga zid bo‘lmagan doirada foydalanishlari;

arxitektura-shaharsozlik faoliyati bo‘yicha davlat boshqaruv organlarining ko‘rsatmalari va buyruq-farmoyishlarini bajarishlari shart.

Davlat hokimiyati va boshqaruv organlari, yuridik va jismoniy shaxslar, shu jumladan chet ellik yuridik va jismoniy shaxslar arxitektura-shaharsozlik hujjatlarini ishlab chiqish hamda ro‘yobga chiqarish bo‘yicha buyurtmachilar bo‘lishlari mumkin.

Buyurtmachilar:

arxitektura-shaharsozlik hujjatlarini ishlab chiquvchini, obyektlar va imoratlar majmuilarini qurish uchun pudratchini erkin tanlash;

ishlab chiquvchi loyiha hujjatlarini tayyorlashi uchun bevosita yoki vositachi orqali buyurtma berish;

loyiha hujjatlarini tayyorlash uchun va qurilishni olib borish uchun shartnomalar tuzish hamda oldindan kelishilgan shartlarga muvofiq ularni bekor qilish;

qonun hujjatlarida nazarda tutilgan boshqa harakatlarni amalga oshirish huquqiga egadir.

Buyurtmachilar:

ushbu Qonun hamda arxitektura va shaharsozlikka oid boshqa qonunlarning talablariga rioya etishlari;

loyihalashtirishning borishi ustidan nazoratni amalga oshirishlari va loyiha hujjatlari belgilangan tartibda ekspertiza qilinishini ta’minlashlari;

qurilish sifati ustidan nazoratni amalga oshirishlari va arxitektura-shaharsozlik hujjatlari ro‘yobga chiqarilishi yuzasidan mualliflik nazorati olib borilishini ta’minlashlari shart.

Respublika hududida arxitektura-shaharsozlik hujjatlarini ishlab chiqish huquqini beruvchi tegishli litsenziyaga ega bo‘lgan yuridik va jismoniy shaxslar arxitektura-shaharsozlik hujjatlarini ishlab chiquvchilar bo‘lishlari mumkin.

Arxitektura-shaharsozlik hujjatlarini ishlab chiquvchilar:

buyurtmachilar hamda arxitektura va shaharsozlik bo‘yicha davlat boshqaruv organlari bilan kelishilgan holda, belgilangan tartib doirasida ishlab chiqiladigan hujjatlarning tarkibi va hajmini belgilash;

buyurtma olish uchun tanlovlarda qatnashish;

qabul qilingan loyiha yechimlarining bajarilishi ustidan mualliflik nazoratini amalga oshirish;

qurilish, montaj qilish ishlari va maxsus ishlar tasdiqlangan loyiha hujjatlarini, normativ talablarni buzgan holda va odamlar hayoti hamda sog‘lig‘iga, tarixiy va madaniy boyliklarga, shu jumladan arxitektura va shaharsozlik yodgorliklariga, tabiiy landshaftlarga zarar yetkazishga va ularning yo‘qolib ketishiga xavf tug‘diradigan, shuningdek yuridik va jismoniy shaxslarning mulkiga, huquqlari hamda manfaatlariga, davlat manfaatlariga zarar yetkazadigan tarzda bajarilgani taqdirda, bunday ishlarni to‘xtatib qo‘yish yoki to‘xtatib turish;

zarurat bo‘lgan taqdirda arxitektura-shaharsozlik hujjatlariga belgilangan tartibda o‘zgartish va qo‘shimchalar kiritish huquqiga egadirlar.

Arxitektura-shaharsozlik hujjatlarini ishlab chiquvchilar ushbu Qonun hamda arxitektura va shaharsozlik sohasidagi boshqa qonunlarning talablariga rioya etishlari shart.

Qurilish uchun loyihalash va muhandislik-texnik izlanish ishlarini olib borish, qurilish, montaj qilish ishlari va boshqa maxsus ishlar bajarish huquqini beruvchi tegishli litsenziyalari bo‘lgan yuridik va jismoniy shaxslar pudratchi bo‘lishlari mumkin.

Pudratchilar:

buyurtmachilar, loyihalash va ilmiy-tadqiqot institutlari, loyiha muallifi bilan birgalikda binolar va inshootlarning yangi konstruktiv yechimlarini ishlab chiqishda ishtirok etish;

loyiha muallifi, arxitektura va shaharsozlik bo‘yicha davlat boshqaruv organlari hamda buyurtmachi bilan kelishuvga binoan loyiha hujjatlariga ularning arxitekturaviy-badiiy qiyofasi va konstruktiv yechimiga putur yetkazmagan holda, texnik-iqtisodiy ko‘rsatkichlarini yaxshilaydigan o‘zgartishlar kiritish;

loyiha muallifidan zarur texnikaviy maslahatlar olish;

qonun hujjatlarida nazarda tutilgan boshqa harakatlarni amalga oshirish huquqiga egadir.

Pudratchilar turar joy, jamoat, ishlab chiqarish binolari va inshootlari qurishni, muhandislik kommunikatsiyalari va inshootlari qurilishini, obodonlashtirishni tasdiqlangan loyiha hujjatlariga muvofiq, imoratlarning zilzilabardoshligi, uzoqqa chidamliligi va sifatliligini ta’minlagan, amaldagi respublika qurilish normalari va qoidalari talablariga rioya etgan holda bajarishlari shart.

Arxitektura-shaharsozlik loyihalari va asarlariga mualliflik huquqi fuqarolik qonun hujjatlari bilan tartibga solinadi.

Yangi aholi punktlarini joylashtirish va mavjudlarini rivojlantirish aholi punktlarining (shaharlar, shahar posyolkalari, qishloqlar, ovullar va boshqa yashash joylarining) normativ jihatdan farqlanishiga, reja-iqtisodiy va shaharsozlik istiqbollariga, O‘zbekiston Respublikasining hududiy tashkil etilishi chizmasiga, hududiy rejalashtirish chizmalari va loyihalari, bosh rejalarga, shuningdek shahar va qishloq aholi punktlarini rejalash va qurish loyihalariga muvofiq amalga oshiriladi.

Shahar va qishloq aholi punktlarini tashkil etish hamda qayta tashkil etish, ularning maqomi va chegaralarini o‘zgartirish qonun hujjatlarida belgilangan tartibda hamda tasdiqlangan shaharsozlik loyiha hujjatlari asosida amalga oshiriladi.

Aholi punktlari chegaralari doirasidagi barcha yerlar, ularning funksional maqsadi va idoraviy bo‘ysunuvidan qat’i nazar, ulardan foydalanishni tasdiqlangan bosh rejaga muvofiq tartibga solib turadigan mahalliy davlat hokimiyati organlari tasarrufida bo‘ladi.

Shaharlarning (posyolkalarning) hududiy rejalashtirish loyihalari va bosh rejalariga muvofiq, hududiy rivojlantirish hisobga olingan holda aholi punktlarining chegaralari aniqlab qo‘yilgan shahar (posyolka) doirasi belgilanadi.

Davlat shaharsozlik kadastri — shaharsozlik jihatidan tartibga solinadigan hududlardan foydalanishning tabiiy, xo‘jalik va ijtimoiy-huquqiy tartiboti, hayot va faoliyat muhiti holati to‘g‘risidagi butun mamlakat uchun yagona axborot tizimidir.

Kadastr aholi punktlarining yerlari va obyektlari ro‘yxatini, tasnifini belgilaydi hamda hududni iqtisodiy, ijtimoiy va ekologik jihatdan kompleks baholash uchun asos bo‘ladi.

Davlat shaharsozlik kadastrini yuritish tartibi Vazirlar Mahkamasi tomonidan belgilanadi.

Har bir aholi punkti mahalliy davlat hokimiyati organlari tomonidan shaharsozlik faoliyati va tabiiy omillarning o‘zaro ta’sirini tartibga soluvchi, xavfli tabiiy jarayonlar va ifloslanishning oldini oluvchi atrof muhit ekologik muvozanatining kompleks dasturi bilan ta’minlanadi.

Tarixan shakllangan aholi punktlarini shaharsozlik jihatidan muhofaza qilish maxsus vakolat berilgan davlat organi zimmasiga yuklatiladi. Shaharsozlik jihatidan muhofaza qilish arxitektura, landshaft san’ati va arxeologiya yodgorliklarini, aholi punktlarining bosh rejalari tarkibida ishlab chiqiladigan an’anaviy turar joy muhitidagi arxitektura-etnografiya zonalarini, tarixiy, muhofaza, qo‘riqxona zonalarini tadqiq etib borish hamda kompleks qayta qurish va qayta tiklash yo‘li bilan amalga oshiriladi.

Arxitektura va arxeologiya yodgorliklarini ta’mirlash-qayta tiklash ishlarini olib borish, ularning tarixiy-badiiy qimmatiga putur yetkazmagan holda hozirgi zamon maqsadlarida foydalanish hamda ularni muhofaza qilish tartibi qonun hujjatlari bilan belgilanadi.

Qo‘riqxona zonalari (arxeologik, arxitektura-etnografik, landshaft, tarixiy-ko‘rgazmali va boshqa zonalar), ularning chegaralari va ularni qo‘riqlash hamda ulardan foydalanishning alohida shartlari mahalliy davlat hokimiyati organlarining taqdimnomasi bo‘yicha Vazirlar Mahkamasi tomonidan tasdiqlanishi lozim.

Qo‘riqxona-shaharlarda va arxitektura yodgorliklari mavjud bo‘lgan joylarda shaharsozlik ishlari ularning arxitektura-shaharsozlik hujjatlarida belgilab qo‘yiladigan nazorat ostidagi chegaralari doirasida tarixan shakllangan muhandislik-geologik, gidrogeologik va geoekologik sharoitlariga putur yetkazmasligi lozim.

Qo‘riqlanadigan zonalar, arxitektura yodgorliklari doirasidagi barcha qurilish, obodonlashtirish va qayta qurish ishlari, ularni umumiy tartibda, shuningdek tarix va madaniyat yodgorliklarini muhofaza qilish organlari bilan kelishib olinganidan so‘ng belgilanadi.

Arxitektura-shaharsozlik dasturlari va loyihalari (muayyan joyni rejalashga doir ma’lumotlar, chizmalar va loyihalar, shahar va qishloq aholi punktlarining bosh rejalari, turar joy obyektlarining, ijtimoiy, madaniy-maishiy, sanoat binolari va inshootlarining texnik-iqtisodiy asoslari, loyiha-smeta hujjatlari) arxitektura va shaharsozlikka oid qonun hujjatlari talablariga muvofiq ishlab chiqiladi.

Arxitektura-shaharsozlikka doir dasturlar, rejalar va loyihalarning tarkibi hamda ularni ishlab chiqish tartibi “O‘zdavarxitektqurilish” tomonidan belgilanadi.

Belgilangan tartibda tasdiqlangan loyiha-rejalash hujjatlari tegishli hududda arxitektura-shaharsozlik faoliyatining barcha qatnashchilari tomonidan bajarilishi majburiydir.

Qurilishni olib borishga doir loyiha-smeta hujjatlari arxitektura va shaharsozlik bo‘yicha davlat boshqaruv organlari beradigan arxitektura-rejalash topshirig‘i asosida ishlab chiqiladi.

Qurilishni olib borishga doir loyiha-smeta hujjatlari, uni takroran kelishib olmasdan va tasdiqlamasdan turib, buyurtmachilar, loyihani ro‘yobga chiqarayotgan organlar yoki loyiha mualliflari tomonidan o‘zgartirilishi mumkin emas.

Arxitektura-shaharsozlik normalari, qoidalari hamda standartlari aholi hayot va faoliyat muhiti sifatining asosiy ko‘rsatkichlarini, ijtimoiy-iqtisodiy, tabiiy-iqlimiy va boshqa sharoitlarni hisobga olgan holda hududlarni shaharsozlik jihatidan o‘zlashtirish, aholi punktlarini rejalash va qurish borasida qo‘yiladigan sanitariya-gigiyena talablarini, texnikaviy talablarni, foydalanishga oid, yong‘indan saqlashga qaratilgan va boshqa talablarni tartibga soladi.

Davlat arxitektura-shaharsozlik normalari, qoidalari hamda standartlari Vazirlar Mahkamasi belgilagan tartibda tasdiqlanadi.

Arxitektura-shaharsozlik hujjatlarining ekspertizasi shu hujjatlarni ishlab chiquvchilar qonun hujjatlari talablariga qanchalik rioya etganligini aniqlash maqsadida o‘tkaziladi.

Arxitektura-shaharsozlik hujjatlarining ekspertizasi loyihalarni ekspertiza qilish uchun maxsus vakolat berilgan davlat organlari tomonidan, shuningdek Vazirlar Mahkamasi belgilagan tartibda berilgan tegishli litsenziyaga ega bo‘lgan yuridik va jismoniy shaxslar tomonidan o‘tkaziladi.

Loyihalarni ekspertiza qilish davlat organlari o‘z faoliyatini Vazirlar Mahkamasi tasdiqlaydigan Nizomga muvofiq amalga oshiradi.

Arxitektura-shaharsozlik faoliyatini investitsiyalash va mablag‘ bilan ta’minlash buyurtmachilarning — yuridik va jismoniy shaxslarning, shu jumladan chet ellik yuridik va jismoniy shaxslarning mablag‘larini jalb etish yo‘li bilan amalga oshiriladi.

Arxitektura-shaharsozlik faoliyatini mablag‘ bilan ta’minlash uchun davlat mablag‘laridan, shuningdek jamoat fondlarining mablag‘laridan foydalanish hududni shaharsozlik jihatidan o‘zlashtirish davlat, mintaqalararo manfaatlarga yoxud aholi punktlari tizimi manfaatlariga daxldor bo‘lgan hollarda amalga oshiriladi.

Arxitektura-shaharsozlik faoliyatini rivojlantirish uchun iqtisodiy rag‘batlantirish va imtiyozlar belgilash tartibi qonun hujjatlari bilan belgilab qo‘yiladi.

Davlat arxitektura-qurilish nazorati vazirliklar, idoralar, korxonalar, muassasalar va tashkilotlar, jamoat birlashmalari, shuningdek yuridik va jismoniy shaxslar, shu jumladan chet ellik yuridik va jismoniy shaxslar tomonidan arxitektura va shaharsozlik sohasidagi qonun hujjatlari, loyiha yechimlari talablariga, aholi punktlarini rejalash va qurishning, ishlar sifati va foydalanishning belgilangan normalari hamda qoidalariga rioya etilishi maqsadida amalga oshiriladi.

Davlat arxitektura-qurilish nazorati “O‘zdavarxitektqurilish”ning Davlat arxitektura-qurilish nazorati boshqarmasi (“Davarxitektqurilishnazorat”) hamda viloyatlar va Toshkent shahar davlat arxitektura-qurilish nazorati inspeksiyalari tomonidan amalga oshiriladi.

Mahalliy davlat hokimiyati va boshqaruv organlari arxitektura-qurilish nazoratining davlat inspektorlariga ular xizmat burchlarini ijro etish chog‘ida amaliy yordam ko‘rsatishlari shart.

Arxitektura-qurilish nazorati organlari o‘z faoliyatlarida qonun hujjatlariga hamda Vazirlar Mahkamasi tasdiqlaydigan Nizomga amal qiladilar.

Respublikada arxitektura-shaharsozlik obyektlari va imoratlar majmuilari tabiiy ofatlar, portlashlar, yong‘inlar hamda falokatlardan ixtiyoriy va majburiy sug‘urtalanadi.

Arxitektura-shaharsozlik obyektlarini sug‘urtalash tartibi qonun hujjatlari bilan belgilanadi.

Arxitektura-shaharsozlikka oid qonun hujjatlarini buzishda aybdor bo‘lgan shaxslar belgilangan tartibda javobgar bo‘ladilar.

Arxitektura-shaharsozlik faoliyati jarayonida kelib chiquvchi nizolar qonun hujjatlarida belgilangan tartibda hal etiladi.

Chegaradosh hududlar va aholi punktlarini kompleks tashkil etish bilan bog‘liq nizolar Vazirlar Mahkamasi tomonidan hal etiladi.

O‘zbekiston Respublikasining boshqa davlatga chegaradosh hududlari hamda aholi punktlarini kompleks tashkil etish bilan bog‘liq nizolar manfaatdor tomonlarning komissiyasi tomonidan yoki davlatlararo shartnomalar, bitimlarda belgilangan tartibda ko‘rib chiqiladi.

Agar O‘zbekiston Respublikasining xalqaro shartnomalari yoki bitimlarida ushbu Qonunda nazarda tutilganidan o‘zgacha qoidalar belgilangan bo‘lsa, xalqaro shartnoma yoki bitim qoidalari qo‘llaniladi.