Oʻzbekiston Respublikasining “Oʻzbekiston Respublikasining Markaziy banki toʻgʻrisida”, “Banklar va bank faoliyati toʻgʻrisida”gi qonunlari, Oʻzbekiston Respublikasi Prezidentining 2005-yil 16-fevraldagi PQ-10-son “Uy-joy qurilishi va uy-joy bozorini yanada rivojlantirish chora-tadbirlari toʻgʻrisida”gi qarori (Oʻzbekiston Respublikasi qonun hujjatlari toʻplami, 2005-yil, 7-son, 54-modda), 2007-yil 18-maydagi PF-3878-son “Yosh oilalarni moddiy va maʼnaviy qoʻllab-quvvatlashga doir qoʻshimcha chora-tadbirlari toʻgʻrisida”gi Farmoniga (Oʻzbekiston Respublikasi qonun hujjatlari toʻplami, 2007-yil, 19-20-son, 192-modda) muvofiq Markaziy bank Boshqaruvi qaror qiladi:

1. Aholining keng qatlami, shu jumladan yosh oilalar uchun uy-joy qurilishini va rekonstruksiya qilishni moliyalashtirish va kreditlash tartibi toʻgʻrisida nizom ilovaga muvofiq tasdiqlansin.

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilgan kundan oʻn kundan keyin amalga kiritilsin.

Mazkur Nizom Oʻzbekiston Respublikasining “Oʻzbekiston Respublikasining Markaziy banki toʻgʻrisida”, “Banklar va bank faoliyati toʻgʻrisida”gi qonunlari, Oʻzbekiston Respublikasi Prezidentining 2005-yil 16-fevraldagi PQ-10-son “Uy-joy qurilishi va uy-joy bozorini yanada rivojlantirish chora-tadbirlari toʻgʻrisida”gi qarori (Oʻzbekiston Respublikasi qonun hujjatlari toʻplami, 2005-yil, 7-son, 54-modda), 2007-yil 18-maydagi PF-3878-son “Yosh oilalarni moddiy va maʼnaviy qoʻllab-quvvatlashga doir qoʻshimcha chora-tadbirlari toʻgʻrisida”gi Farmoniga (Oʻzbekiston Respublikasi qonun hujjatlari toʻplami, 2007-yil, 19-20-son, 192-modda) muvofiq tijorat banklari (keyingi oʻrinlarda bank deb yuritiladi) tomonidan pudrat qurilish tashkilotlariga koʻp kvartirali uylarni qurilishini va rekonstruksiyasini moliyalashtirish va kreditlash tartibini belgilaydi.

1. Ushbu Nizomga asosan banklar tomonidan kreditlar pudrat qurilish tashkilotlariga qaytarishlik, toʻlovlilik, taʼminlanganlik, muddatlilik va ulardan maqsadli foydalanish shartlarida qonun hujjatlarida belgilangan tartibda kelishilgan yakka tartibdagi va namunaviy loyihalar boʻyicha, qurilishning belgilangan normalari va qoidalariga rioya qilgan holda koʻp kvartirali uylarni foydalanishga tayyor holda (“kaliti bilan”) qurish yoki rekonstruksiya qilish sharti bilan beriladi.

Bunda, agar qonun hujjatlarida boshqacha qoida belgilanmagan boʻlsa, pudrat qurilish tashkiloti bir vaqtning oʻzida ham buyurtmachi ham pudratchi sifatida faoliyat koʻrsatadi.

2. Pudrat qurilish tashkilotlariga koʻp kvartirali uylarni qurish yoki rekonstruksiya qilish uchun kreditlar berish, ushbu qurilish tashkilotining asosiy yoki ikkilamchi hisobvaragʻiga xizmat koʻrsatuvchi bank tomonidan amalga oshiriladi.

3. Oʻzbekiston Respublikasi Vazirlar Mahkamasining 2003-yil 12-sentabrdagi 395-son qarori bilan tasdiqlangan “Markazlashtirilgan manbalar hisobiga qurilishni tashkil etish, moliyalashtirish va kreditlash tartibi toʻgʻrisida nizom”ning (Oʻzbekiston Respublikasi qonun hujjatlari toʻplami, 2003-yil, 17-son, 146-modda) 40-bandiga muvofiq koʻp kvartirali uylarni foydalanishga tayyor holda qurishda tugallanmagan ishlab chiqarish xarajatlari obyekt foydalanishga topshirilgunga qadar pudratchining balansida boʻladi va uning soliq solinadigan bazasiga kiritilmaydi. Qurilish yakunlangandan keyin koʻp kvartirali uylar qonun hujjatlariga muvofiq foydalanishga topshiriladi.

4. Pudrat qurilish tashkiloti qurilayotgan yoki rekonstruksiya qilinayotgan koʻp kvartirali uy qiymatining 20 foizidan kam boʻlmagan miqdordagi oʻz aylanma mablagʻlariga hamda qurilish sohasida koʻp yillik tajribaga, yetarli moddiy-texnika bazasi va tajribali mutaxassislarga ega boʻlishi lozim.

5. Bank tomonidan koʻp kvartirali uylarni qurish yoki rekonstruksiya qilish uchun ajratiladigan kredit miqdori uning, yaʼni tayyor holda qurilayotgan yoki rekonstruksiya qilinayotgan koʻp kvartirali uyning qiymatidan qurilish tashkilotining oʻz aylanma mablagʻlari va biznes-rejasida olinishi rejalashtirilgan foyda miqdori chegirilgan holda, ammo qurilish obyektining 70 foizidan koʻp boʻlmagan miqdorda belgilanadi.

Agar pudrat qurilish tashkiloti quriladigan yoki rekonstruksiya qilinadigan koʻp kvartirali uy qiymatining 20 foizi miqdoridagi oʻz aylanma mablagʻiga ega boʻlmasa, bank kredit qoʻmitasi uning ijobiy kredit tarixini hisobga olib (qonun hujjatlarida belgilangan hollar bundan mustasno), oʻz qarori bilan quriladigan yoki rekonstruksiya qilinadigan koʻp kvartirali uy qiymatining shu miqdordagi qismiga ham kredit ajratishi mumkin. Bunda bank tomonidan ajratiladigan kreditning umumiy summasi qurilayotgan yoki rekonstruksiya qilinayotgan koʻp kvartirali uy qiymatining 90 foizigacha miqdorini tashkil etishi mumkin.

6. Koʻp kvartirali uylarni foydalanishga tayyor holda qurish sharti bilan uylarni qurayotgan yoki rekonstruksiya ishlarini amalga oshirayotgan, shuningdek Oʻzbekiston Respublikasi Vazirlar Mahkamasining 1999-yil 20-dekabrdagi 532-son qarori (Oʻzbekiston Respublikasi Hukumatining qarorlari toʻplami, 1999-y., 12-son, 70-modda) bilan tasdiqlangan “Obyektlarni davlat mablagʻlari va Hukumat kafolati ostidagi kreditlar hisobiga barpo etishda qurilish tavakkalchiliklarini majburiy sugʻurta qilish toʻgʻrisida nizom”ga muvofiq, sugʻurta kompaniyalari bilan qurilish obyektini sugʻurtalash shartnomasini tuzgan pudrat qurilish tashkilotlari kreditlanadi. Bunda sugʻurta shartnomasi kreditlovchi bank foydasiga tuziladi.

7. Kreditdan foydalanish muddati qurilish yoki rekonstruksiya qilish ishlarini amalga oshirish muddatlaridan kelib chiqqan holda, ammo 2 yildan koʻp boʻlmagan muddatga beriladi. Bunda 18 oydan oshmagan muddatga imtiyozli davr berilishi mumkin.

8. Kredit boʻyicha foiz stavkasi miqdori tomonlar kelishuviga asosan belgilanadi.

9. Zarar koʻrib ishlayotgan, nolikvid balansga ega boʻlgan, qurilish xatarlarini sugʻurtalash boʻyicha sugʻurta toʻlovlarini toʻliq hajmda toʻlamagan pudrat qurilish tashkilotlariga, shuningdek, ulardan foydalanishga topshirish muddatlari kechiktirilgan, qurilishi tugallanmagan kreditlanadigan obyektlar yoki ilgari berilgan kreditlar boʻyicha muddatida toʻlanmagan qarz yoki boshqa moliyaviy majburiyatlar mavjud boʻlganida, koʻp kvartirali uylarni foydalanishga tayyor holda qurilishiga kreditlar berilmaydi.

10. Pudrat qurilish tashkiloti tomonidan kredit olish uchun bankka quyidagi hujjatlar taqdim etiladi:

a) kredit maqsadi, taʼminoti, muddati va summasi koʻrsatilgan kredit olishga buyurtmanoma;

b) koʻp kvartirali uy qurilishi uchun yer uchastkasi ajratilganligi va ushbu yer uchastkasiga boʻlgan huquqni yoki rekonstruksiya qilinadigan obyektga boʻlgan huquqni tasdiqlovchi hujjatlar;

v) belgilangan tartibda tasdiqlangan loyiha-smeta hujjatlari;

g) Qurilish vazirligining hududiy boshqarmalari tomonidan berilgan ekspertiza xulosalari, qurilish-montaj ishlarini bajarishga ruxsati;

d) elektr energiya, gaz, issiqlik energiyasi, suv va kanalizatsiyaga ulashning texnik shartlari;

e) belgilangan tartibda tasdiqlangan qurilishning aniq moʻljalli roʻyxati, titul roʻyxati va qurilish-montaj ishlarini bajarish jadvallari;

j) pudrat qurilish tashkilotining qurilish tavakkalchiliklarini sugʻurtalash yuzasidan tuzgan shartnoma nusxasi va sugʻurta polisi;

z) biznes-reja;

i) pudrat qurilish tashkilotining kreditga layoqatlilik darajasini aniqlash uchun uning oxirgi hisobot sanasiga boʻlgan moliyaviy hisobotlari (1, 2, 4 va 5-sonli shakllar);

k) kredit boʻyicha taʼminot turi va ushbu taʼminot boʻyicha belgilangan tartibda rasmiylashtirilgan tegishli hujjatlar;

l) boshqa tashkilot va muassasalar oldidagi qarzdorliklari va boshqa banklardagi mavjud mablagʻlari boʻyicha maʼlumotnomalar (maʼlumotlar moliyaviy hisobotlarga mos boʻlishi lozim) hamda boshqa tashkilot va muassasalar ustav kapitallaridagi ishtiroki toʻgʻrisidagi maʼlumotnoma;

m) qurilayotgan yoki rekonstruksiya qilinayotgan koʻp kvartirali uydagi qavatlar soni, har bir kvartiraning umumiy va yashash maydonlari hajmi, 1 kv.m. oʻrtacha qiymati hamda har bir kvartirani aniq qiymati koʻrsatilgan maʼlumotnoma.

11. Bank pudrat qurilish tashkiloti tomonidan taqdim etilgan maʼlumotlarni loyiha hujjatlariga mos ravishda tuzilganligini tekshiradi va ular asosida beriladigan kredit miqdorini aniqlaydi.

12. Beriladigan kredit miqdori aniqlangandan keyin bank qarz oluvchining moliyaviy holatini tahlil qiladi va uning kreditga layoqatlilik darajasini aniqlaydi.

Barcha tahlillar amalga oshirilganidan keyin bank kredit boʻlimi xodimi va kredit boʻlimi boshligʻi tomonidan imzolangan xulosa tuziladi va bank kredit qoʻmitasiga taqdim etiladi.

13. Bank kredit qoʻmitasi kredit buyurtmanomasi, unga ilova qilingan barcha hujjatlarni va ushbu kredit buyurtmanomasi boʻyicha bankning kredit boʻlimi xulosasini koʻrib chiqib arizani qanoatlantirish yoki rad etish toʻgʻrisida qaror qabul qiladi. Kredit buyurtmanomasini koʻrib chiqish muddati ushbu buyurtmanoma va unga ilova qilingan barcha hujjatlar taqdim etilgan sanadan eʼtiboran 3 bank ish kunidan oshmasligi kerak.

Bankning kredit qoʻmitasi tomonidan kredit berishni rad etish toʻgʻrisida qaror qabul qilingan taqdirda, bank tomonidan qaror qabul qilingan kundan keyingi bank ish kunidan kechiktirilmagan muddatda qarz oluvchiga, kredit berishning rad etilishi sabablari koʻrsatilgan yozma xulosa joʻnatiladi.

14. Bankka pudrat qurilish tashkiloti tomonidan quyidagi taʼminot turlaridan biri yoki bir nechtasi taqdim etiladi:

koʻchmas va koʻchar mulk garovi;

bank yoki sugʻurta tashkiloti kafolati;

uchinchi shaxs kafilligi;

kreditni qaytarilmaslik xatarining sugʻurtasi.

pudrat qurilish tashkiloti tomonidan qurilayotgan yoki rekonstruksiya qilinayotgan koʻp kvartirali uydagi kvartiralarning kelajakda sotilishidan tushadigan mablagʻlar garovi.

15. Koʻp kvartirali uyni qurish yoki rekonstruksiya qilish uchun berilgan kreditlarni qaytarilish taʼminoti sifatida ushbu uydagi kvartiralarni kelajakda sotishdan tushadigan tushumlar garovga olingan taqdirda bu borada alohida garov shartnomasi tuziladi.

Garov shartnomasida bank krediti hisobidan qurilayotgan yoki rekonstruksiya qilinayotgan koʻp kvartirali uydagi kvartiralarni sotishdan tushgan barcha tushum bevosita kredit uchun hisoblangan foizlar toʻloviga va kreditni qaytarishga yoʻnaltirilishi belgilab qoʻyiladi. Ushbu shart kredit shartnomasida ham belgilab qoʻyilishi lozim.

16. Kredit shartnomasi imzolangan paytdan boshlab olingan kreditlar toʻliq soʻndirilguniga, komissiyalar, foizlar va ularga doir penyalar toʻlanguniga qadar amal qiladi.

17. Koʻp kvartirali uylarni qurish, rekonstruksiya qilish uchun bank tomonidan kredit berish, qarz oluvchi nomiga har bir obyekt nomi va raqami aks ettirilgan alohida ssuda hisobvaragʻi ochish hamda ushbu hisobvaraqdan pudrat qurilish tashkilotining toʻlov topshiriqnomasi asosida quyidagi maqsadlar uchun pul mablagʻlarini naqd pulsiz shaklda oʻtkazish yoʻli bilan amalga oshiriladi:

qurilish materiallarini xarid qilish uchun;

qurilish montaj ishlarini bajarish jadvallariga muvofiq yordamchi pudrat tashkilotlariga bajariladigan va bajarilgan ishlar, avtotransport xizmatlari va mexanizm xizmatlari uchun toʻlovlarni amalga oshirish uchun;

toʻgʻridan toʻgʻri ishlab chiqarish xarajatlari (yoqilgʻi-moylash materiallari, tabiiy gaz, elektroenergiya, suv va boshqalar) uchun;

kreditlanayotgan qurilish obyektida band boʻlgan xodimlarga ish haqi toʻlash bilan bogʻliq xarajatlar uchun.

18. Ssuda hisobvaragʻidan qurilishning titul roʻyxatiga va kapital mablagʻlardan foydalanishning unda koʻrsatilgan yoʻnalishlariga muvofiq kelmaydigan toʻlovlarni amalga oshirishga yoʻl qoʻyilmaydi.

19. Pudrat qurilish tashkilotini kreditlash bosqichma-bosqich moliyalashtirish va qurilish-montaj ishlarni bajarish jadvallari asosida quyidagi tartibda amalga oshiriladi:

a) qarz oluvchining ssuda hisobvaragʻidan uning toʻlov topshiriqnomasiga asosan kredit shartnomasi umumiy summasining 50 foizigacha miqdorda avans toʻlovlari boʻyicha;

b) qarz oluvchi tomonidan avans mablagʻlari hisobiga bajarilgan ishlar dalolatnomasi taqdim etilgandan soʻng (avans miqdoridan kam boʻlmagan miqdorda), kredit shartnomasi umumiy summasining qolgan 50 foizi bajarilgan ishlardan kelib chiqqan holda. Bunda bankning masʼul xodimlari joyiga chiqqan holda berilgan kredit mablagʻlarini maqsadli ishlatilganini oʻrgangan holda dalolatnoma tuzadi.

20. Berilgan kreditlarga foizlar kredit qoldigʻiga har kuni hisoblab boriladi va kredit shartnomasida belgilangan muddatlarda undiriladi.

21. Berilgan kreditlarga hisoblangan foizlar va kredit boʻyicha asosiy qarzni qaytarish, pudrat qurilish tashkiloti tomonidan bank krediti hisobiga qurilayotgan yoki rekonstruksiya qilinayotgan koʻp kvartirali uydagi kvartiralarni sotishdan tushgan mablagʻlarni jamlash maqsadida ochiladigan maxsus moliyalashtirish depozit hisobvaraqdagi (22626 — korxona va tashkilotlarning maqsadli mablagʻlari) mablagʻlar hisobidan amalga oshiriladi.

22. Koʻp kvartirali uyni qurish uchun bankdan kredit olgan pudrat qurilish tashkiloti kredit bergan bankka unga qurilayotgan koʻp kvartirali uylarni sotishdan tushgan mablagʻlarni jamlash uchun alohida maxsus moliyalashtirish depozit hisobvaragʻi ochishni soʻrab ariza taqdim etadi.

Bank pudrat qurilish tashkilotining ushbu arizasi asosida unga belgilangan tartibda 22626-sonli “Korxona va tashkilotlarning maqsadli mablagʻlari” maxsus moliyalashtirish depozit hisobvaragʻini ochadi.

23. Ushbu maxsus moliyalashtirish depozit hisobvaragʻiga faqat bank krediti hisobiga qurilayotgan koʻp kvartirali uydagi kvartiralarni sotishdan tushgan pul mablagʻlari kirim qilinadi.

24. Pudrat qurilish tashkiloti tomonidan koʻp kvartirali uylardagi kvartiralar ushbu turar joylarning loyiha-smeta hujjatlarida belgilangan narxlarda, tijorat banklarining ipoteka kreditlari orqali aholi, shu jumladan yosh oilalarga Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari qoshidagi ishchi guruhlarining tavsiyalariga binoan qonun hujjatlarida belgilangan tartibda sotiladi.

Koʻp kvartirali uydagi kvartiralarning bir qismini bank bilan kelishilgan holda korxona va tashkilotlar tomonidan belgilangan tartibda oldindan pul oʻtkazish orqali sotib olib ularda ishlab turgan yosh oilalar aʼzolari va boshqa xodimlariga berishlari mumkin.

25. Qurilish pudrat tashkilotiga koʻp kvartirali uyni qurish yoki rekonstruksiya qilish uchun kredit bergan bank tomonidan koʻp kvartirali uydagi kvartirani sotib olish uchun kredit berish borasida ijobiy qaror qabul qilinganidan keyin qarz oluvchi har bir jismoniy shaxsga ularning arizalariga muvofiq kvartira qiymatining 25 foizidan kam boʻlmagan dastlabki badalni kiritib qoʻyish uchun jamgʻarma omonat hisobvaraqlari ochiladi va dastlabki badal kirim qilinadi hamda unga Markaziy bankning amaldagi qayta moliyalash stavkasining 75 foizidan kam boʻlmagan stavkada foiz hisoblab boriladi.

26. Banklar jamgʻarma omonat hisobvaragʻiga sotib olinadigan kvartira qiymatining 25 foizidan kam boʻlmagan miqdorda badal kirim qilinganligi toʻgʻrisida pudrat qurilish tashkilotiga badal kiritgan jismoniy shaxslar roʻyxatini ilova qilgan holda maʼlumotnomani taqdim etadi.

Ushbu maʼlumotnoma pudrat qurilish tashkiloti uchun jismoniy shaxs bilan koʻp kvartirali uydagi kvartirani sotish borasida shartnoma tuzish uchun asos boʻlib xizmat qiladi.

27. Pudrat qurilish tashkilotidan koʻp kvartirali uydagi kvartirani sotib olayotgan jismoniy shaxs bankdan kredit olmasdan toʻliqligicha oʻz mablagʻlari hisobiga sotib olmoqchi boʻlgani taqdirda birinchi badalni kiritish uchun jamgʻarma omonat hisobvaragʻini qurilish pudrat tashkilotiga koʻp kvartirali uyni qurish yoki rekonstruksiya qilish uchun kredit bergan bankda ochadi. Jismoniy shaxs va pudrat qurilish tashkiloti oʻrtasida koʻp kvartirali uydagi kvartirani sotib olish borasida shartnoma tuzilgandan keyin jismoniy shaxs kvartira qiymatining qolgan 75 foizini oʻzining nomiga ochilgan jamgʻarma omonat hisobvaragʻiga birdaniga yoki qismlarga boʻlib oʻtkazishi mumkin.

28. Dastlabki badalning bir qismini yoki barcha summasini yosh oila aʼzolari (er yoki xotin)ning ish beruvchisi boʻlgan yuridik shaxslar tomonidan pul oʻtkazish orqali ipoteka krediti oluvchi yosh oila aʼzosi nomiga ochilgan jamgʻarma omonat hisobvaragʻiga oʻtkazib berilishi mumkin.

29. Jismoniy shaxsga koʻp kvartirali uydagi kvartirani sotib olish uchun qurilish pudrat tashkilotiga koʻp kvartirali uyni qurish yoki rekonstruksiya qilish uchun kredit bergan bank tomonidan unga Oʻzbekiston Respublikasi Vazirlar Mahkamasining 2007-yil 3-yanvardagi 2-sonli qarori bilan tasdiqlangan “Uy-joy qurilishiga, uni rekonstruksiya qilishga va sotib olishga ipoteka krediti berish toʻgʻrisida nizom”da (Oʻzbekiston Respublikasi qonun hujjatlari toʻplami, 2007-yil, 1-2-son, 9-modda) belgilangan tartibda ipoteka krediti beriladi.

Yosh oilalarga ipoteka krediti berilishida “Tijorat banklari tomonidan yosh oilalarga imtiyozli asosda kreditlar berish tartibi toʻgʻrisida nizom”da (roʻyxat raqami 1697, 2007-yil 18-iyul) (Oʻzbekiston Respublikasi qonun hujjatlari toʻplami, 2007-y., 29-30-son, 308-modda) belgilangan imtiyozlar hisobga olinadi.

30. Jismoniy shaxslarning jamgʻarma omonat hisobvaraqlarida sotib olinayotgan koʻp kvartirali uydagi kvartira qiymatiga teng miqdorda toʻplangan mablagʻlar yoki kamida 25 foiz boshlangʻich badali kiritilgan va qolgan qismiga rasmiylashtirilgan ipoteka krediti mablagʻlari jismoniy shaxs va pudrat qurilish tashkiloti oʻrtasida kvartirani oldi-sotdi shartnomasi imzolanganidan hamda koʻp kvartirali uy qonun hujjatlarida belgilangan tartibda foydalanishga (ekspluatatsiyaga) qabul qilingandan keyin pudrat qurilish tashkilotining 22626-sonli “Korxona va tashkilotlarning maqsadli mablagʻlari” maxsus moliyalashtirish depozit hisobvaragʻiga oʻtkazib beriladi.

Yuridik shaxslar tomonidan ushbu koʻp kvartirali uydagi kvartirani oʻz xodimlariga, shu jumladan yosh oilalar toifasiga kiruvchi xodimlariga qonun hujjatlarida belgilangan tartibda sotib olish uchun oʻtkazib berilgan mablagʻlari ham ushbu 22626-sonli “Korxona va tashkilotlarning maqsadli mablagʻlari” maxsus moliyalashtirish depozit hisobvaragʻiga kirim qilinadi.

31. Pudrat qurilish tashkilotining 22626-sonli “Korxona va tashkilotlarning maqsadli mablagʻlari” maxsus moliyalashtirish depozit hisobvaragʻiga koʻp kvartirali uylardagi kvartiralarni sotish natijasida kelib tushgan mablagʻlar, birinchi navbatda koʻp kvartirali uylarni qurish yoki rekonstruksiya qilish uchun olingan kreditlarga hisoblangan foizlar toʻloviga va kreditlarni qaytarishga yoʻnaltiriladi.

Koʻp kvartirali uy qiymatining 5 foizi miqdoridagi qismi davlat qabul qilish hayʼati dalolatnomasi rasmiylashtirilgan sanadan shartnomada qayd etilgan pudrat qurilish tashkilotining kafolatli muddati tamom boʻlgunga qadar, biroq moliyaviy yil tugashidan kechikmay 22626-sonli “Korxona va tashkilotlarning maqsadli mablagʻlari” maxsus moliyalashtirish depozit hisobvaragʻida saqlab turiladi va qolgan ortiqcha mablagʻlar belgilangan tartibda bank tomonidan memorial order bilan pudrat qurilish tashkilotining asosiy hisobvaragʻiga oʻtkazib beriladi.

32. Pudrat qurilish tashkiloti kredit boʻyicha qarz qoldigʻini qaytarishni va unga hisoblangan foiz toʻlovlarini muddatidan oldin bank bilan kelishgan tartibda amalga oshirishi mumkin.

33. Banklar kreditdan foydalanishning butun davri davomida doimiy monitoringni amalga oshiradi. Monitoring davomida bank koʻp kvartirali uylarni qurish yoki rekonstruksiya qilish jadvaliga rioya qilinishini, ssuda hisobvaragʻidan toʻlovlarni amalga oshirish vaqtida ularning loyihaga muvofiqligini va kreditdan maqsadli foydalanilishini, kreditni qaytarilishini hamda uning boʻyicha foizlar toʻlanishini va kredit taʼminoti holati boʻyicha nazoratini amalga oshiradi.

Bank monitoring davomida berilgan kreditni maqsadga muvofiq ishlatilayotganligini bevosita joyiga chiqqan holda oʻrganadi, shuningdek, zaruriyat vujudga kelganda nazorat oʻlchovlarini ham amalga oshiradi. Monitoring vaqtida berilgan kreditlar boshqa maqsadlarda ishlatilganligi yoki hisobotlarda qayd etilgan hajmlarda qurilish-montaj ishlari bajarilmaganligi aniqlangan taqdirda bank boshqa maqsadlarga ishlatilgan kreditlarni va hisoblangan penyalarni undirib olish choralarini koʻradi.

Bank tomonidan kreditdan boshqa maqsadlarda foydalanganlik uchun qarz oluvchiga nisbatan qoʻllaniladigan javobgarlik choralari kredit shartnomasida belgilangan boʻlishi kerak.

34. Asosiy qarz va u boʻyicha hisoblangan foizlar kredit shartnomasida belgilangan muddatlarda qaytarilmagan taqdirda, bank qarz oluvchining majburiyatlarini bajarilmayotgani sabablarini aniqlaydi va muddatida qaytarilmagan kreditni qaytarishni taʼminlash choralarini koʻrishni talab qiladi.

35. Agar kreditni oʻz vaqtida undirish boʻyicha koʻrilgan choralar zarur natijani bermasa va kreditning qarz oluvchi tomonidan oʻz vaqtida va toʻliq qaytarilmaslik xavfi vujudga kelsa, berilgan kreditni va u boʻyicha hisoblangan foizlarni muddatidan oldin undirib oladi. Ushbu shartlar kredit shartnomasida belgilangan boʻlishi kerak.

36. Mazkur Nizom talablarining buzilishida aybdor shaxslar qonun hujjatlarida belgilangan tartibda javobgarlikka tortiladilar.