Oʻzbekiston Respublikasi Prezidentining 2006-yil 27-sentabrdagi “Qimmatli qogʻozlar bozorini yanada rivojlantirish chora-tadbirlari toʻgʻrisida”gi PQ-475-sonli qarorining (Oʻzbekiston Respublikasi qonun hujjatlari toʻplami, 2006-y., 39-son, 387-modda) 3-bandiga muvofiq Oʻzbekiston Respublikasining Xususiylashtirish, monopoliyadan chiqarish va raqobatni rivojlantirish davlat qoʻmitasi va Moliya vazirligi qaror qiladi:

1. Ustav kapitalida davlat aksiyalari paketi (ulushlari) 50 foizdan ortiq boʻlgan korxonalarda tashqi auditni oʻtkazadigan auditorlik tashkilotlari roʻyxatiga auditorlik tashkilotlarini kiritish tartibi toʻgʻrisidagi nizom ilovaga muvofiq tasdiqlansin.

2. Mazkur qaror Oʻzbekiston Respublikasi Adliya vazirligida davlat roʻyxatidan oʻtkazilganidan soʻng oʻn kundan keyin kuchga kiradi.

Mazkur Nizom Oʻzbekiston Respublikasining “Auditorlik faoliyati toʻgʻrisida”gi Qonuni (Oʻzbekiston Respublikasi Oliy Majlisining Axborotnomasi, 2000-y., 5-6-son, 149-modda), Oʻzbekiston Respublikasi Prezidentining 2012-yil 13-noyabrdagi PF-4483-sonli “Oʻzbekiston Respublikasining Xususiylashtirish, monopoliyadan chiqarish va raqobatni rivojlantirish davlat qoʻmitasini tashkil etish toʻgʻrisida”gi Farmoni (Oʻzbekiston Respublikasi qonun hujjatlari toʻplami, 2012-y., 46-47-son, 521-modda), Oʻzbekiston Respublikasi Prezidentining 2006-yil 27-sentabrdagi PQ-475-sonli “Qimmatli qogʻozlar bozorini yanada rivojlantirish chora-tadbirlari toʻgʻrisida”gi qarori (Oʻzbekiston Respublikasi qonun hujjatlari toʻplami, 2006-y., 39-son, 387-modda), Oʻzbekiston Respublikasi Vazirlar Mahkamasining 2012-yil 14-noyabrdagi 322-sonli “Oʻzbekiston Respublikasining Xususiylashtirish, monopoliyadan chiqarish va raqobatni rivojlantirish davlat qoʻmitasi faoliyatini tashkil etish toʻgʻrisida”gi (Oʻzbekiston Respublikasi qonun hujjatlari toʻplami, 2012-y., 46-47-son, 523-modda), 2012-yil 30-dekabrdagi 374-sonli “Oʻzbekiston Respublikasining Xususiylashtirish, monopoliyadan chiqarish va raqobatni rivojlantirish davlat qoʻmitasi faoliyatini tashkil etish chora-tadbirlari toʻgʻrisida”gi (Oʻzbekiston Respublikasi qonun hujjatlari toʻplami, 2013-y., 2-son, 19-modda), 2013-yil 11-iyundagi 165-sonli “Oʻzbekiston Respublikasining Xususiylashtirish, monopoliyadan chiqarish va raqobatni rivojlantirish davlat qoʻmitasi huzuridagi Davlat aktivlarini boshqarish markazi faoliyatini tashkil etish chora-tadbirlari toʻgʻrisida”gi (Oʻzbekiston Respublikasi qonun hujjatlari toʻplami, 2013-y., 24-son, 314-modda) qarorlariga muvofiq, auditorlik tashkilotlarini ustav kapitalida davlat aksiyalari paketi (ulushlari) 50 foizdan ortiq boʻlgan korxonalarda tashqi auditni oʻtkazadigan auditorlik tashkilotlari roʻyxatiga kiritish tartibini belgilaydi.

1. Ustav kapitalida davlat aksiyalari paketi (ulushlari) 50 foizdan ortiq boʻlgan korxonalarda tashqi auditni oʻtkazadigan auditorlik tashkilotlari roʻyxatiga (keyingi oʻrinlarda — Roʻyxat) auditorlik tashkilotlarini kiritish uchun tanlov mazkur Nizom bilan belgilangan talablarga javob beruvchi va barcha xoʻjalik yurituvchi subyektlarda auditorlik tekshiruvini oʻtkazish yoki tashabbus tarzdagi va banklar, sugʻurta tashkilotlari va ochiq aksiyadorlik jamiyatlaridan tashqari xoʻjalik yurituvchi subyektlarda majburiy auditorlik tekshiruvini oʻtkazish boʻyicha auditorlik faoliyatini amalga oshirish uchun litsenziyaga ega boʻlgan auditorlik tashkilotlarining arizalari asosida amalga oshiriladi.

2. Tanlovda ishtirok etish uchun talablar tanlovda ishtirok etadigan barcha auditorlik tashkilotlari uchun yagona hisoblanadi.

3. Tanlovda qatnashadigan auditorlik tashkilotlari har yili 1-fevraldan 25-fevralgacha Oʻzbekiston Respublikasining Xususiylashtirish, monopoliyadan chiqarish va raqobatni rivojlantirish davlat qoʻmitasi huzuridagi Davlat aktivlarini boshqarish markazi (bundan buyon matnda Markaz deb yuritiladi)ga ushbu Nizomning 13-bandi talablariga muvofiq tegishli hujjatlarni taqdim etadi.

Belgilangan muddatda taqdim etilmagan hujjatlar koʻrib chiqilmaydi.

4. Auditorlik tashkilotlarining hujjatlarini koʻrib chiqish uchun Markaz va Moliya vazirligi xodimlaridan iborat tarkibda ishchi guruhi tuziladi. Ishchi guruhning tarkibi va ish reglamenti Oʻzbekiston Respublikasining Xususiylashtirish, monopoliyadan chiqarish va raqobatni rivojlantirish davlat qoʻmitasi (bundan buyon matnda Davlat raqobat qoʻmitasi deb yuritiladi) va Moliya vazirligi tomonidan tasdiqlanadi.

5. Ishchi guruh har yili 1-martga qadar auditorlik tashkilotlari tomonidan taqdim etilgan hujjatlarni koʻrib chiqadi, mazkur Nizom talablariga javob beruvchi auditorlik tashkilotlarini aniqlaydi va har yili Davlat raqobat qoʻmitasi va Moliya vazirligining qoʻshma qarori bilan tasdiqlanadigan Roʻyxatni tuzadi.

6. Har yili tasdiqlanadigan auditorlik tashkilotlarining roʻyxati ommaviy axborot vositalari, shuningdek, Davlat raqobat qoʻmitasi, Markaz va Moliya vazirligining rasmiy internet-saytlarida eʼlon qilinadi.

7. Ustav kapitalida davlat aksiyalari paketi (ulushlari) 50 foizdan ortiq boʻlgan korxonalarning boshqaruv organlari auditorlik tashkilotini tanlov asosida tasdiqlangan Roʻyxatdan tanlab oladilar.

8. Roʻyxatga kiritilmagan yoki Roʻyxatga kiritilgandan keyin mazkur Nizom talablariga nomuvofiq boʻlgan auditorlik tashkilotlari tomonidan ustav kapitalida davlat aksiyalari paketi (ulushlari) 50 foizdan ortiq boʻlgan korxonalarda auditorlik tekshiruvlarini oʻtkazishga yoʻl qoʻyilmaydi.

9. Auditorlik tashkiloti mazkur Nizom talablariga nomuvofiq boʻlgan hollarda auditorlik tashkiloti nomuvofiqlik yuzaga kelgan paytdan boshlab 10 kunlik muddat ichida Markazga uni Roʻyxatdan chiqarish toʻgʻrisida ariza taqdim etadi.

10. Markaz va Moliya vazirligining monitoringi davomida auditorlik tashkilotining mazkur Nizom talablariga nomuvofiqligi aniqlangan taqdirda ushbu auditorlik tashkiloti Roʻyxatdan chiqariladi va nomuvofiqlik aniqlangan kundan boshlab keyingi Roʻyxat tasdiqlanadigan kunga qadar takroran Roʻyxatga kiritish uchun hujjatlarni taqdim etish huquqiga ega boʻlmaydi.

11. Ishchi guruh xulosasiga koʻra auditorlik tashkilotini Roʻyxatdan chiqarish toʻgʻrisidagi qaror Oʻzbekiston Respublikasi Davlat raqobat qoʻmitasi va Moliya vazirligining qoʻshma qarori bilan tasdiqlanadi va ommaviy axborot vositalarida eʼlon qilinadi.

12. Tanlovda ishtirok etish uchun auditorlik tashkilotiga quyiladigan talablar:

a) barcha xoʻjalik yurituvchi subyektlarda auditorlik tekshiruvini oʻtkazish yoki tashabbus tarzdagi va banklar, sugʻurta tashkilotlari va ochiq aksiyadorlik jamiyatlaridan tashqari xoʻjalik yurituvchi subyektlarda majburiy auditorlik tekshiruvini oʻtkazish boʻyicha auditorlik faoliyatini amalga oshirish uchun litsenziyaning mavjudligi;

b) auditorlik tashkiloti rahbari va shtatdagi auditorlarda amalda boʻlgan auditorlik sertifikatlarining (ariza berilgan paytda) mavjudligi;

v) auditorlik faoliyati sohasida kamida 2 yillik tajribaga ega boʻlishi;

g) auditorlik tashkilotida qimmatli qogʻozlar bozori sohasida malakaga ega boʻlgan kamida bitta mutaxassisning mavjudligi (malaka mazkur ixtisoslik boʻyicha maʼlumotga ega boʻlishi yoki qimmatli qogʻozlar bozori mutaxassisi malaka attestatining mavjudligi yoki ushbu sohada ish tajribasiga ega boʻlishi bilan tasdiqlanadi);

d) fuqarolik javobgarligi sugʻurta polisining mavjudligi;

e) Oʻzbekiston Respublikasi moliya vazirining 2006-yil 21-avgustdagi 76-sonli buyrugʻi bilan tasdiqlangan 4-sonli auditorlik faoliyatining milliy standarti “Auditorlik tashkilotlarining ichki standartlariga qoʻyiladigan talablar”ga (2006-yil 25-sentabr, roʻyxat raqami 1624 — Oʻzbekiston Respublikasi qonun hujjatlari toʻplami, 2006-y., 39-son, 392-modda) muvofiq ichki standartlarning mavjudligi.

13. Tanlovda ishtirok etish uchun auditorlik tashkiloti ishonchli tasdiqlangan holda quyidagi hujjatlarni taqdim etadi:

a) barcha xoʻjalik yurituvchi subyektlarda auditorlik tekshiruvini oʻtkazish yoki tashabbus tarzdagi va banklar, sugʻurta tashkilotlari va ochiq aksiyadorlik jamiyatlaridan tashqari xoʻjalik yurituvchi subyektlarda majburiy auditorlik tekshiruvini oʻtkazish boʻyicha auditorlik faoliyatini amalga oshirish uchun litsenziyaning nusxasi;

b) auditorlik tashkiloti rahbari va shtatdagi auditorlarning auditorlik sertifikatlarining nusxalari;

g) qimmatli qogʻozlar bozori sohasida malakaga ega ekanligini tasdiqlovchi maʼlumoti toʻgʻrisida diplom yoki qimmatli qogʻozlar bozori mutaxassisi malaka attestati yoki mehnat daftarchasidan nusxalar;

d) fuqarolik javobgarligi sugʻurta polisining nusxasi;

e) auditorlik tashkiloti rahbari tomonidan tasdiqlangan ichki standartlar roʻyxati.

14. Mazkur Nizom Oʻzbekiston Respublikasi Monopoliyadan chiqarish, raqobat va tadbirkorlikni qoʻllab-quvvatlash davlat qoʻmitasi bilan kelishilgan.