Sotib olinayotgan moddiy-texnika va yoqilgʻi-energetika resurslariga qishloq xoʻjaligining xarajatlari ortib borayotganligi munosabati bilan hamda ovqatbop qishloq xoʻjalik mahsulotlari yetishtirishni koʻpaytirishda jamoa xoʻjaliklari, davlat xoʻjaliklarini, ijara, fermer va boshqa xoʻjaliklarni ragʻbatlantirish maqsadida Vazirlar Mahkamasi qaror qiladi:

1. 1993-yilning 20-aprelidan boshlab chorva va sutning chegaralangan xarid narxlarini 1-ilovaga muvofiq, kartoshka va meva-sabzavot mahsulotlari asosiy turlarining chegaralangan xarid narxlarini 2-ilovaga muvofiq oshirish hamda quruq meva va mayizning xarid narxlarini shartnomaviy (erkin) narxlar toifasiga oʻtkazish toʻgʻrisida Oʻzbekiston Respublikasi Qishloq xoʻjalik vazirligining Moliya vazirligi bilan kelishilgan taklifi qabul qilinsin.

2. Qishloq xoʻjalik mahsulotlarini respublikadan tashqariga olib chiqib ketishning Vazirlar Mahkamasi 1992-yil 21-yanvarda 23-son qarori bilan tasdiqlagan tartibi asosan saqlab qolinsin.

1993-yil 20-apreldan boshlab korxonalar, xoʻjaliklar, tayyorlov tashkilotlari, kooperativlar dehqon (fermer) xoʻjaliklari, ijarachilar, shaxsiy yordamchi xoʻjaliklarning egalari va fuqarolar uchun respublikadan tashqariga olib chiqib ketadigan qishloq xoʻjalik mahsulotlaridan olinadigan boj miqdorlari 3-ilovaga muvofiq tasdiqlansin.

“Kartoshka, meva-sabzavot mahsulotlari va quruq mevaning xarid narxlarini oʻzgartirish toʻgʻrisida” Vazirlar Mahkamasi 1992-yil 14-aprelda qabul qilgan 188-son qarori 2-bandining uchinchi xatboshisi amal qilishi saqlab qolinsin. Unda hukumatlararo bitimlar va toʻgʻridan toʻgʻrixoʻjalik aloqalari boʻyicha respublikadan tashqariga meva-sabzavot mahsulotlari yetkazib beruvchi korxonalar, xoʻjaliklar va tashkilotlar boj toʻlashdan ozod qilinishi belgilangan.

3. 1993-yil 20-apreldan boshlab ayrim oziq-ovqat mollari chegaralangan chakana narxlarining yangi darajasi 4-ilovaga muvofiq belgilansin.

4. Oʻzbekiston Respublikasining Moliya vazirligi:

ushbu qarorga berilgan ilovalarga muvofiq yangi xarid narxlari va chakana narxlar, shuningdek qaytadan baholash toʻgʻrisidagi koʻrsatmalar manfaatdor vazirliklarga, idoralar, korxonalar va tashkilotlarga, Qoraqalpogʻiston Respublikasining Vazirlar Kengashiga, viloyatlar va Toshkent shahar hokimliklariga oʻz vaqtida yetkazilishini taʼminlasin;

“Oʻzgoʻshtsutsanoat” uyushmasi bilan birgalikda chorva va sutning ushbu qarorda belgilangan yangi chegaralangan xarid narxlari asosida chegaralangan chakana narxlarda sotiladigan goʻsht, qaymogʻi olinmagan sut va bolalar ovqatining ulgurji narxlarini bir hafta muddat ichida qayta koʻrib chiqsin.

5. Barcha mulkchilik shaklidagi korxonalar va tashkilotlar ushbu qarorning 4-ilovasidagi roʻyxat boʻyicha mahsulotning qoldiqlarini 1993-yil 20-aprelgacha boʻlgan holatiga koʻra qaytadan baholab, qoʻshimcha narxlar summasini teng ulushlarda budjetdan tashqari 746-hisob raqamiga va oʻzlarining muomaladagi mablagʻlarini toʻldirishga oʻtkazsinlar.

6. Vazirlar Mahkamasining 1993-yil 16-yanvardagi 34-son qarori, 1992-yil 3-avgustdagi 358-son qarori, Vazirlar Mahkamasining 1993-yil 5-fevraldagi 62-son qaroriga berilgan ilovadagi goʻsht chakana narxlarining chegaralangan miqdorlari hamda Vazirlar Mahkamasining 1992-yil 16-oktabrdagi 475-son qarori 1-ilovasidagi makaron mahsulotlari, oʻsimlik yogʻi va qaymogʻi olinmagan sut chakana narxlarining chegaralangan miqdorlari oʻz kuchini yoʻqotgan deb topilsin.