Oʻzbekiston Respublikasi Soliq kodeksi, Oʻzbekiston Respublikasi “Davlat soliq xizmati toʻgʻrisida”gi Qonunining 7-moddasi va Oʻzbekiston Respublikasi Prezidentining 2005-yil 27-dekabrdagi “Oʻzbekiston Respublikasining 2006-yilgi asosiy makroiqtisodiy koʻrsatkichlari prognozi va Davlat budjeti parametrlari toʻgʻrisida”gi PQ-244-son qaroriga (Oʻzbekiston Respublikasi qonun hujjatlari toʻplami, 2005-y., 52-son, 386-modda) muvofiq qaror qilamiz:

1. Oʻzbekiston Respublikasi Moliya vazirligi va Davlat soliq qoʻmitasining 2003-yil 7-iyuldagi 76, 2003-62-son qarori bilan tasdiqlangan Savdo va umumiy ovqatlanish korxonalari tomonidan yalpi daromad soligʻini hisoblab chiqarish va toʻlash tartibi toʻgʻrisidagi nizomga (2003-yil 21-iyul, roʻyxat raqami 1260 — Meʼyoriy hujjatlar axborotnomasi, 2003-y., 13-14-son; Oʻzbekiston Respublikasi Qonun hujjatlari toʻplami, 2005-y., 5-6-son, 52-modda; 41-42-son, 322-modda) ilovaga muvofiq oʻzgartirish va qoʻshimchalar kiritilsin.

2. Mazkur qaror Oʻzbekiston Respublikasi Adliya vazirligida davlat roʻyxatiga olingan kundan boshlab oʻn kun oʻtgach kuchga kiradi.

1. 2-bandda:

oʻninchi bandda “chakana va (yoki) ulgurji savdo faoliyatini amalga oshirish huquqi uchun ruxsat guvohnomasiga ega boʻlishlari lozim” soʻzlari “olingan” soʻzi bilan almashtirilsin;

quyidagi tahrirdagi xatboshlari bilan toʻldirilsin:

alkagolli ichimliklar hamda qimmatbaho metallardan va qimmatbaho toshlardan yasalgan buyumlar bilan chakana savdoni amalga oshirganda — chakana savdo qilish huquqi uchun ruxsat guvohnomasiga;

ulgurji savdo bilan shugʻullanganda — ulgurji savdo qilish huquqi uchun litsenziyaga ega boʻlishlari lozim.”.

2. 3-bandning toʻrtinchi xatboshi quyidagi tahrirda bayon etilsin:

“ayrim turlardagi tovarlar bilan chakana savdo qilish huquqi uchun yigʻim;”.

3. 7-bandda:

quyidagi tahrirdagi uchinchi xatboshi bilan toʻldirilsin:

“Tovarlarni xarid qiymatidan past narxlarda sotilganda, shuningdek, tovarlarni begʻaraz berishda soliq solish maqsadlarida sotish qiymati tovarlarning xarid qiymatidan kelib chiqqan holda aniqlanadi;”.

uchinchi—beshinchi xatboshlari tegishlicha toʻrtinchi—oltinchi xatboshlar deb hisoblansin.

4. 8-bandda:

quyidagi tahrirdagi ikkinchi xatboshi bilan toʻldirilsin:

“davlat subsidiyalari summasi;”

quyidagi tahrirdagi beshinchi xatboshi bilan toʻldirilsin:

“dividendlar shaklida olingan va mazkur dividendlar olingan korxonalar ustav kapitaliga (fondiga) yoʻnaltirilgan daromadlar;”.

5. 13-banddagi “15 kunidan” soʻzlaridan keyin “yil yakuni boʻyicha esa — yillik moliyaviy hisobotni taqdim etish muddatidan kechiktirmay” soʻzlari bilan toʻldirilsin.

6. 4-son ilova mazkur oʻzgartirish va qoʻshimchalarga ilovaga muvofiq tahrirda bayon etilsin.