Birja savdolari oʻtkazishni yanada takomillashtirish hamda mulkchilik shakllaridan qatʼi nazar, barcha xoʻjalik yurituvchi subyektlarning moddiy-texnika resurslari olishlari uchun teng shart-sharoitlarni taʼminlash maqsadida Vazirlar Mahkamasi qaror qiladi:

1. Vazirlar Mahkamasining “Mahsulotlar, xomashyo va materiallarning yuqori likvidli turlarini sotishning bozor mexanizmlarini joriy etishni davom ettirish toʻgʻrisida” 2004-yil 5-fevraldagi 57-son qaroriga (Oʻzbekiston Respublikasi QT, 2004-y., 2-son, 10-modda) ilovaga muvofiq oʻzgartirish va qoʻshimchalar kiritilsin.

2. Oʻzbekiston Respublikasi Iqtisodiyot vazirligi, Oʻzbekiston respublika tovar-xomashyo birjasi, “Oʻzbekneftgaz” milliy xolding kompaniyasi, “Oʻzqurilishmateriallari” aksiyadorlik kompaniyasi ishlab chiqaruvchi korxonalar bilan birgalikda polietilen, suyultirilgan gaz, sement va shiferni birja savdolariga qoʻyish va sotish tartibi toʻgʻrisidagi nizomni bir oy muddatda ishlab chiqsinlar va belgilangan tartibda tasdiqlasinlar.

3. Belgilab qoʻyilsinki, polietilen, suyultirilgan gaz, sement va shiferni birja savdolariga qoʻyish va sotish tartibi tasdiqlangunga qadar mahsulotlarning ushbu turlari umumiy belgilangan tartibda sotiladi.

4. Vazirliklar va idoralar bir oy muddatda oʻz idoraviy normativ hujjatlarini mazkur qarorga muvofiqlashtirsinlar.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Azimov zimmasiga yuklansin.

1. 2-bandda:

ikkinchi xatboshiga “belgilangan tartibda tasdiqlanadigan” soʻzlaridan keyin “korxonalar tomonidan Oʻzbekiston Respublikasi Iqtisodiyot vazirligi hamda Monopoliyadan chiqarish, raqobat va tadbirkorlikni qoʻllab-quvvatlash davlat qoʻmitasi bilan kelishgan holda tasdiqlanadigan jadvallarga muvofiq” soʻzlari qoʻshilsin”;

toʻrtinchi xatboshi quyidagi mazmundagi toʻrtinchi va beshinchi xatboshi bilan almashtirilsin:

“monopolist korxonalarning 1 va 2-ilovaga kiritilgan mahsulotlari ichki bozorda toʻgʻridan-toʻgʻri shartnomalar boʻyicha, shuningdek birja (kimoshdi) savdolarida sotilishi mumkin. Bunda mahsulotlar (davlat ehtiyojlari, davlat strategik zaxiralarini toʻldirish va yangilash, davlat buyurtmasi boʻyicha mahsulot ishlab chiqarish, ishlab chiqaruvchilarning ichki tarmoq ehtiyojlari uchun, limitlar boʻyicha isteʼmolchilarning alohida toifalariga sotiladigan mahsulotlar, elektr energiyasi, tabiiy gaz va aviakerosin bundan mustasno) toʻgʻridan-toʻgʻri shartnomalar boʻyicha oxirgi sanada eʼlon qilingan birja (kimoshdi) savdolari kotirovkalarining oʻrtacha narxlari boʻyicha sotiladi;

moddiy balanslarga muvofiq birja (kimoshdi) savdolarida sotishga moʻljallangan mahsulotlar toʻgʻridan-toʻgʻri shartnomalar boʻyicha faqat birja (kimoshdi) savdolariga qoʻyilgan vaqtdan boshlab bir oy mobaynida sotilmagan hajmlarda oldingi haftadagi birja savdolarida vujudga kelgan birja savdolari oʻrtacha narxlari boʻyicha sotilishi mumkin”;

beshinchi va oltinchi xatboshi tegishli ravishda oltinchi va yettinchi xatboshi deb hisoblansin;

yettinchi xatboshiga quyidagi mazmundagi jumla qoʻshilsin:

“Bunda birja bitishuvlari sotuvchi va xaridor tomonidan tegishli ravishda birja savdosiga qoʻyilgan tovar umumiy qiymatining va moʻljallanayotgan bitishuv hajmining 2 foizigacha miqdorda garov taʼminoti toʻlangan holda, hisob-kitoblarni hisob-kitob-kliring palatasi orqali oʻtkazib amalga oshiriladi”.

2. Maxsus belgilanadigan tartib boʻyicha sotiladigan moddiy-texnika resurslarining strategik turlari roʻyxatiga (2-ilova) quyidagi bandlar qoʻshilsin:

“11. Polietilen

12. Suyultirilgan gaz

13. Sement

14. Shifer”.

3. Moddiy-texnika resurslari strategik turlarini sotishning maxsus tartibi toʻgʻrisidagi nizomning (3-ilova) 6-bandi quyidagi tahrirda bayon qilinsin:

“Monopolist korxonalarning mahsulotlari toʻgʻridan-toʻgʻri shartnomalar boʻyicha, shuningdek birja (kimoshdi) savdolarida sotiladi. Bunda mahsulotlar toʻgʻridan-toʻgʻri shartnomalar boʻyicha oxirgi sanada eʼlon qilingan birja (kimoshdi) savdolari kotirovkalarining oʻrtacha narxlari boʻyicha sotiladi, mazkur Nizomning 4-bandiga muvofiq sotiladigan mahsulotlar bundan mustasno.

Moddiy balanslarga muvofiq birja (kimoshdi) savdolarida sotishga moʻljallangan mahsulotlar toʻgʻridan-toʻgʻri shartnomalar boʻyicha faqat birja (kimoshdi) savdolariga qoʻyilgan vaqtdan boshlab bir oy mobaynida sotilmagan hajmlarda oldingi haftadagi birja savdolarida vujudga kelgan birja savdolari oʻrtacha narxlari boʻyicha sotilishi mumkin”.