O‘zbekiston Respublikasi Oliy Kengashining “O‘zbekiston Respublikasining “O‘zbekiston Respublikasining Davlat bayrog‘i haqida”gi Qonunini amalda joriy etish to‘g‘risida” 1991-yil 18-noyabrdagi qaroriga muvofiq Vazirlar Mahkamasi qaror qiladi;

1. Ilova qilingan O‘zbekiston Respublikasining Davlat bayrog‘ini tayyorlash, saqlash va yo‘q qilish tartibi tasdiqlansin.

2. Quyidagilar o‘z kuchini yo‘qotgan deb hisoblansin:

O‘zbekiston SSR Ministrlar Sovetining “O‘zbekiston SSR Davlat bayrog‘i to‘g‘risida”gi Nizomni qo‘llanish yuzasidan Instruksiyani tasdiqlash to‘g‘risida” 1974-yil 14-oktabrdagi 475 son qarori (O‘zSSR QT, 1974-y., 10-son, 57-modda);

O‘zbekiston SSR Davlat bayrog‘i to‘g‘risidagi nizomni qo‘llanish yuzasidan O‘zbekiston SSR Ministrlar Sovetining 1974-yil 14-oktabrdagi 475-son qarori bilan tasdiqlangan Instruksiyaga o‘zgartish va qo‘shimchalar kiritish haqida” O‘zbekiston SSR Ministrlar Sovetining 1978-yil 11-iyuldagi 384-son qarori (O‘zSSR QT, 1978-y.( 7-son, 27-modda);

O‘zbekiston SSR Ministrlar Sovetining “O‘zbekiston SSR Davlat bayrog‘i to‘g‘risidagi nizomni qo‘llanish haqidagi Instruksiyaga o‘zgartish va qo‘shimchalar kiritish haqida” 1981-yil 21-avgustdagi 684-son qarori (O‘zSSR QT, 1981-y., 8-Son, 24-modda);

O‘zbekiston SSR Ministrlar Sovetining “O‘zbekiston SSR Davlat bayrog‘i to‘g‘risidagi nizomni qo‘llanish bo‘yicha Instruksiyaga qo‘shimchalar kiritish haqida” 1984-yil 27-sentabrdagi 498-son qarori (O‘zSSR QT, 1984-y., 9-son, 48-modda).

O‘zbekiston Respublikasining Davlat bayrog‘i va uning tasviri, ularning hajmlaridan tashqari, har doim O‘zbekiston Respublikasining “O‘zbekiston Respublikasining Davlat bayrog‘i haqida”gi Qonuniga ilova qilingan sxematik va rangli tasvirga mos bo‘lishi kerak.

O‘zbekiston Respublikasi Davlat bayrog‘ining eni 125 sm, uzunligi — 250 sm bo‘ladi. Bayroqning hajmi boshqacha bo‘lishi ham mumkin. Lekin hamma hollarda bayroqning eni uzunligiga nisbatan 1:2 bo‘lishi kerak.

O‘zbekiston Respublikasining Davlat bayrog‘ini tayyorlash mahalliy sanoat korxonalari zimmasiga yuklanadi, Ular bayroqlar tayyorlash bo‘yicha buyurtmani birinchi navbatda bajarishlari kerak, Tayyorlangan bayroqlar sifati bo‘yicha korxonalarning texnikaviy nazorat bo‘limi xizmatlari va rahbarlari (direktor yoki bosh muhandis) tomonidan qabul qilinadi. Bayroqlarning sifati va aniq bajarilganligini tekshirayotganda mahalliy sanoat korxonalarining rahbarlari va texnikaviy nazorat bo‘limi xizmati qonunga ilova qilingan tasvirga amal qiladilar.

O‘zbekiston Respublikasining Davlat bayrog‘ini saqlash korxonalar, muassasalar, tashkilotlar, uy-joylardan foydalanish uchun javob beruvchi mansabdor shaxslar, (xususiy mulk huquqi asosidagi) uy egalari tomonidan ta’minlanadi.

Davlat bayroqlari but-butun, rangi buzilmagan holda ko‘tariladi.

Davlat bayrog‘ining saqlanishi uchun javob beruvchi shaxslar dastlabki rangini yo‘qotgan bayroqlarni xalq deputatlari mahalliy Kengashlarining ijroiya qo‘mitasiga akt bo‘yicha topshiradilar,

Xalq deputatlari nohiya, shahar, shaharlardagi nohiya, ovul, posyolka, qishloq Kengashlari ijroiya qo‘mitalarida komissiyalar tuzilib, ular bundan keyin foydalanib bo‘lmaydigan bayroqlarni utilizatsiya qilish haqida qarorlar qabul qiladilar va bu haqda tegishli akt tuziladi.