Ҳужжат кучини йўқотган " " 19.11.2021
Ўзбекистон Республикаси молия вазирининг
буйруғи
Аудитор малака сертификатини бериш тартиби тўғрисидаги низомни тасдиқлаш ҳақида
[Ўзбекистон Республикаси Адлия вазирлиги томонидан 2018 йил 21 декабрда рўйхатдан ўтказилди, рўйхат рақами 3105]
 LexUZ шарҳи
Мазкур буйруқ Ўзбекистон Республикаси молия вазирининг 2021 йил 2 ноябрдаги 67-сонли ««Аудитор малака сертификатини бериш тартиби тўғрисидаги низомни тасдиқлаш ҳақида»ги буйруқ, шунингдек унга ўзгартириш ва қўшимчаларни ўз кучини йўқотган деб топиш тўғрисида»ги буйруғига (рўйхат рақами 3105-2, 19.11.2021 й.) асосан ўз кучини йўқотган.
Ўзбекистон Республикасининг «Аудиторлик фаолияти тўғрисида»ги Қонунига ва Ўзбекистон Республикаси Президентининг 2018 йил 19 сентябрдаги ПҚ-3946-сон «Ўзбекистон Республикасида аудиторлик фаолиятини янада ривожлантириш чора-тадбирлари тўғрисида»ги қарорига мувофиқ буюраман:
1. Аудитор малака сертификатини бериш тартиби тўғрисидаги низом 1-иловага мувофиқ тасдиқлансин.
2. Айрим идоравий норматив-ҳуқуқий ҳужжатлар 2-иловага мувофиқ ўз кучини йўқотган деб топилсин.
3. Мазкур буйруқ расмий эълон қилинган кундан эътиборан уч ой ўтгач кучга киради.
Вазир Д. КУЧКАРОВ
Тошкент ш.,
2018 йил 14 ноябрь,
144-сон
Ўзбекистон Республикаси молия вазирининг 2018 йил 14 ноябрдаги 144-сон буйруғига
1-ИЛОВА
Аудитор малака сертификатини бериш тартиби тўғрисидаги
НИЗОМ
Мазкур Низом Ўзбекистон Республикасининг «Аудиторлик фаолияти тўғрисида»ги Қонуни ва Ўзбекистон Республикаси Президентининг 2018 йил 19 сентябрдаги ПҚ-3946-сон «Ўзбекистон Республикасида аудиторлик фаолиятини янада ривожлантириш чора-тадбирлари тўғрисида»ги қарорига мувофиқ аудитор малака сертификатини (бундан буён матнда малака сертификати деб юритилади) бериш, қайта расмийлаштириш, бекор қилиш, амал қилишини узайтириш ва тугатиш тартибини белгилайди.
1-боб. Умумий қоидалар
1. Мазкур Низомда қуйидаги тушунчалар ишлатилади:
аудитор ― малака сертификати эга бўлган жисмоний шахс;
талабгор ― малака сертификатини олишга талабгор бўлган жисмоний шахс;
малака имтиҳони ― аудиторга қуйилган талабларга талабгорнинг мос келишини текширишга йўналтирилган, малака имтиҳони комиссияси томонидан ўтказиладиган имтиҳон;
малака сертификати ― аудиторнинг малакасини тасдиқловчи ва аудиторлик ташкилоти номидан аудиторлик хизматлари кўрсатиш ҳуқуқини берувчи ҳужжат;
халқаро бухгалтер сертификати ― «Сертификатланган халқаро профессионал бухгалтер (CIPA)» ёки «Сертификатланган қасамёд қилган бухгалтер (АССА)» ёхуд «Сертификатланган жамоатчи бухгалтер (СРА)» сертификати.
2. Аудитор малака сертификатини олган йилнинг кейинги йилидан бошлаб ҳар йили 40 соатлик малака ошириш дастури бўйича малака ошириш курсларини ўтиши шарт.
3. Талабгор (аудитор) халқаро бухгалтер сертификатига эга бўлганда малака сертификатини олиш ва амал қилиш муддатини узайтириш малака имтиҳонини топширмасдан амалга оширилади.
2-боб. Талабгорга қўйиладиган малака талаблари
4. Малака имтиҳонини топшириш учун талабгор қуйидаги талаблардан бирига жавоб бериши керак:
олий маълумотга, олий таълим муассасини битирганидан сўнг охирги ўн йил ичида камида уч йиллик аудит ва бухгалтерия ҳисоби соҳасида ёхуд шу соҳаларда олий таълим муассасаларида дарс бериш бўйича амалий иш стажига (шу жумладан, ўриндошлик асосида) эга бўлиши;
«бухгалтерия ҳисоби» ва «аудит» мутахассисликлари бўйича магистр дипломига ва аудиторлик ташкилотида бир йилдан кам бўлмаган амалий иш стажига (шу жумладан, ўриндошлик асосида) эга бўлиши;
фаннинг иқтисодий тармоқлари соҳасида илмий даражага эга бўлиши.
Бунда хорижий давлатларда олинган олий маълумот ёки илмий даража белгиланган тартибда Ўзбекистон Республикасидаги маълумотга эквивалент деб топилган тақдирда эътиборга олинади.
3-боб. Малака имтиҳонини топшириш тартиби
5. Малака имтиҳонини ўтказиш учун Ўзбекистон Республикаси Молия вазирлиги (бундан буён матнда Вазирлик деб юритилади) томонидан комиссия раисини ҳисобга олган ҳолда тўрт кишидан кам бўлмаган таркибда малака имтиҳони комиссияси ташкил қилинади.
Малака имтиҳони комиссияси таркибига Вазирлик ходимлари ва аудиторларнинг республика жамоат бирлашмаси вакиллари киритилади.
6. Малака имтиҳони комиссияси таркиби ҳар бир малака имтиҳони учун алоҳида тузилади ва доимий ҳисобланмайди.
7. Малака имтиҳони комиссияси қарорлари баённомалар билан расмийлаштирилади ва малака имтиҳон комиссияси раиси ҳамда барча аъзолари томонидан имзоланади.
8. Талабгор малака имтиҳонини топшириш учун қуйидаги ҳужжатларни Вазирликка тақдим этади:
а) мазкур Низомнинг 1-иловасига мувофиқ малака имтиҳонини топширишга рухсат бериш тўғрисидаги ариза;
б) паспорт нусхаси (чет эл фуқаролари ва фуқаролиги бўлмаган шахслар учун — яшаш учун гувоҳномасининг нусхаси);
в) олий маълумот тўғрисидаги диплом ёки илмий даражаси тўғрисидаги ҳужжат ёхуд ваколатли давлат органининг хорижий таълим муассасасида олинган олий маълумот ёки илмий даражаси тўғрисидаги ҳужжатни тан олиш гувоҳномаси (нусхаси олиниб, асли қайтарилади);
(8-банднинг «в» кичик банди Ўзбекистон Республикаси молия вазирининг 2019 йил 11 сентябрдаги 97-сонли буйруғи (рўйхат рақами 3105-1, 30.09.2019 й.) таҳририда — Қонун ҳужжатлари маълумотлари миллий базаси, 30.09.2019 й., 10/19/3105-1/3838-сон)
г) халқаро бухгалтер сертификати мавжуд бўлганда (нусхаси олиниб, асли қайтарилади) ёхуд ушбу ҳужжатни берган муассаса томонидан тасдиқланган нусхаси;
д) меҳнат дафтарчаси (меҳнат стажини тасдиқловчи «Электрон меҳнат дафтарчаси тизимидан кўчирма) (нусхаси олиниб, асли қайтарилади), (ўриндошлик бўйича меҳнат стажи мавжуд бўлган тақдирда бу ҳақда меҳнат дафтарчасига ёзув киритилган бўлиши лозим);
(8-банднинг «д» кичик банди Ўзбекистон Республикаси молия вазирининг 2019 йил 11 сентябрдаги 97-сонли буйруғи (рўйхат рақами 3105-1, 30.09.2019 й.) таҳририда — Қонун ҳужжатлари маълумотлари миллий базаси, 30.09.2019 й., 10/19/3105-1/3838-сон)
е) 3 х 4 ҳажмдаги 2 дона фотосурат;
ж) малака имтиҳонини топширишга рухсат бериш тўғрисидаги аризани кўриб чиқиш учун базавий ҳисоблаш миқдорининг 50 фоизи миқдорида йиғим тўланганлиги тўғрисидаги тўлов ҳужжати нусхаси.
(8-банднинг «ж» кичик банди Ўзбекистон Республикаси молия вазирининг 2019 йил 11 сентябрдаги 97-сонли буйруғи (рўйхат рақами 3105-1, 30.09.2019 й.) таҳририда — Қонун ҳужжатлари маълумотлари миллий базаси, 30.09.2019 й., 10/19/3105-1/3838-сон)
Талабгордан мазкур Низомда назарда тутилмаган ҳужжатларни тақдим этилишини талаб қилишга йўл қўйилмайди.
9. Мазкур Низомнинг 8-бандида кўрсатилган ҳужжатлар талабгор томонидан Вазирликка шахсан, почта ёки электрон алоқа воситалари орқали уларни олинганлигини тасдиқловчи хабарнома билан бирга топширилади.
10. Вазирлик ариза тушган кундан бошлаб уч иш куни мобайнида талабгорнинг малака имтиҳонини топширишга рухсат бериш ёки рад этиш ҳақида қарор қабул қилади.
11. Вазирлик қуйидаги асосларга кўра малака имтиҳонини топширишга рухсат беришни рад этади:
а) талабгор мазкур Низомнинг 4-банди талабларига жавоб бермаганда;
б) мазкур Низомнинг 8-бандида кўрсатилган ҳужжатларни тўлиқ бўлмаган ҳолда тақдим этганда.
Талабгорни бошқа асосларга кўра малака имтиҳонини топширишни рад этишга йўл қўйилмайди.
12. Талабгорнинг малака имтиҳонини топшириши рад этилган тақдирда Вазирлик томонидан тегишли қарор қабул қилинади ва талабгорга рад этиш сабаблари кўрсатилган ҳолда, қабул қилинган қарор ҳақида уч иш куни ичида ёзма ёки электрон шаклда хабардор қилинади.
13. Малака имтиҳонини топширишга рухсат бериш рад этилган талабгор рад этишга сабабчи бўлган камчиликларни бартараф этгандан кейингина қайта ариза бериши мумкин.
Малака имтиҳонини топширишга рухсат бериш рад этилишига асос бўлиб хизмат қилган камчиликларни бартараф этиш учун талабгорга 15 кундан кўп бўлмаган муддат берилади.
Ҳужжатларни қайта кўриб чиқиш уч кун мобайнида амалга оширилади. Талабгорнинг аризаси қайта кўриб чиқилганлиги учун йиғим ундирилмайди.
Агар малака имтиҳонини топширишга рухсат бериш рад этилишига асос бўлиб хизмат қилган камчиликлар 15 кун мобайнида бартараф этилмаса, бунда талабгорнинг аризаси янгидан тақдим этилган деб ҳисобланади.
(13-банд Ўзбекистон Республикаси молия вазирининг 2019 йил 11 сентябрдаги 97-сонли буйруғига (рўйхат рақами 3105-1, 30.09.2019 й.) асосан хатбошилар билан тўлдрилган — Қонун ҳужжатлари маълумотлари миллий базаси, 30.09.2019 й., 10/19/3105-1/3838-сон)
14. Талабгорнинг малака имтиҳонини топширишига рухсат бериш юзасидан қарор қабул қилинганида у малака имтиҳонини топширишга рухсат берилган шахслар рўйхатига киритилади ва рўйхат малака имтиҳони бошланишидан олдин имтиҳон комиссиясига топширилади. Бунда малака имтиҳони гуруҳлар шаклланишига қараб, лекин ҳар чоракда камида бир маротаба ўтказилади.
15. Малака имтиҳонини ўтказиш тўғрисидаги маълумот, уни ўтказиш ҳақидаги қарор қабул қилинган кундан бошлаб икки кундан кечиктирмай Вазирликнинг ва аудиторлар республика жамоат бирлашмасининг веб-сайтларида жойлаштирилади.
16. Малака имтиҳонини топширишга рухсат берилган талабгорлар уни ўтказиш санаси, вақти ва жойи ҳақида малака имтиҳони ўтказиладиган кундан камида ўн кун олдин почта ёки электрон алоқа воситалари орқали хабардор қилинади.
17. Малака имтиҳони комиссиясининг сони ва шахсий таркиби, шунингдек иш регламенти Вазирлик томонидан тасдиқланади.
18. Малака имтиҳонини топширишда талабгорлар паспорт ёки шахсини тасдиқловчи бошқа ҳужжатни тақдим этади.
(18-банд Ўзбекистон Республикаси молия вазирининг 2019 йил 11 сентябрдаги 97-сонли буйруғи (рўйхат рақами 3105-1, 30.09.2019 й.) таҳририда — Қонун ҳужжатлари маълумотлари миллий базаси, 30.09.2019 й., 10/19/3105-1/3838-сон)
19. Талабгор паспорти ёки шахсини тасдиқловчи бошқа ҳужжатни тақдим қилмаганда ёхуд малака имтиҳонига кечиккан тақдирда малака имтиҳонига қўйилмайди ва малака имтиҳонига келмаган ҳисобланади.
(19-банднинг биринчи хатбошиси Ўзбекистон Республикаси молия вазирининг 2019 йил 11 сентябрдаги 97-сонли буйруғи (рўйхат рақами 3105-1, 30.09.2019 й.) таҳририда — Қонун ҳужжатлари маълумотлари миллий базаси, 30.09.2019 й., 10/19/3105-1/3838-сон)
Бунда талабгор навбатдаги малака имтиҳонидан ўтадиган талабгорлар рўйхатига киритилади.
20. Агарда талабгор, уни мазкур Низомда назарда тутилган тартибда хабардор қилинганидан сўнг, икки маротаба малака имтиҳонини топширишга келмаса, тақдим этилган ҳужжатлар талабгорга қайтарилади. Бунда аризани кўриб чиқиш учун тўланган йиғим қайтариб берилмайди.
(20-банд Ўзбекистон Республикаси молия вазирининг 2019 йил 11 сентябрдаги 97-сонли буйруғи (рўйхат рақами 3105-1, 30.09.2019 й.) таҳририда — Қонун ҳужжатлари маълумотлари миллий базаси, 30.09.2019 й., 10/19/3105-1/3838-сон)
21. Талабгор томонидан ҳужжатларни қайта топшириш мазкур Низомнинг 8-бандида белгиланган тартибда амалга оширилади.
22. Малака имтиҳони тест синови усулида компьютер техникасидан фойдаланган ҳолда ўтказилади.
Малака имтиҳонининг шаффофлиги ва холислигини таъминлаш мақсадида малака имтиҳонини ўтказиш жараёни узлуксиз равишда видеоёзувга (овозли) туширилади.
23. Тест саволлари Вазирлик томонидан аудиторларнинг республика жамоат бирлашмаси билан биргаликда ишлаб чиқилади.
Тест саволларига киритилган фанлар бўйича мавзулар Вазирликнинг веб-сайтига жойлаштирилади.
Тест саволлари норматив-ҳуқуқий ҳужжатларга киритилган ўзгартириш ва қўшимчаларни ҳисобга олган ҳолда янгилаб борилади.
24. Тест синови қуйидаги бўлимлар бўйича 80 та саволдан иборат бўлади:
молиявий ҳисоб;
бошқарув ҳисоби ва молиявий таҳлил;
аудит;
солиқ солиш ва тадбиркорлик фаолиятини ҳуқуқий тартибга солиш.
Талабгорга малака имтиҳонини топшириш учун тўрт соат вақт тақдим этилади.
Талабгорнинг тўғри жавоблар бўйича якуний натижаси 75 фоиз ва ундан юқори кўрсаткични ташкил қилган бўлса, у малака имтиҳонини муваффақиятли топширган ҳисобланади.
(24-банд Ўзбекистон Республикаси молия вазирининг 2019 йил 11 сентябрдаги 97-сонли буйруғи (рўйхат рақами 3105-1, 30.09.2019 й.) таҳририда — Қонун ҳужжатлари маълумотлари миллий базаси, 30.09.2019 й., 10/19/3105-1/3838-сон)
Олдинги таҳрирга қаранг.
(25-банд Ўзбекистон Республикаси молия вазирининг 2019 йил 11 сентябрдаги 97-сонли буйруғига (рўйхат рақами 3105-1, 30.09.2019 й.) асосан ўз кучини йўқотган — Қонун ҳужжатлари маълумотлари миллий базаси, 30.09.2019 й., 10/19/3105-1/3838-сон)
26. Малака имтиҳони ўтказилаётган пайтда қонун ҳужжатлари, йўриқнома материаллари, ахборотномалар ва махсус адабиётлардан, уяли телефондан ёки бошқа ахборот технология воситаларидан (шу жумладан калькулятор сифатида) фойдаланиш, бошқа талабгорлар билан мулоқот қилиш тақиқланади.
(26-банднинг биринчи хатбошиси Ўзбекистон Республикаси молия вазирининг 2019 йил 11 сентябрдаги 97-сонли буйруғи (рўйхат рақами 3105-1, 30.09.2019 й.) таҳририда — Қонун ҳужжатлари маълумотлари миллий базаси, 30.09.2019 й., 10/19/3105-1/3838-сон)
Ушбу талабларни бузган талабгорлар аудиториядан чиқариб юборилади ва малака имтиҳонидан ўтмаган деб ҳисобланади.
Ўзи билан бирга ичимлик суви, дори ва малака имтиҳонини топшириш учун зарур бўлган бошқа воситалар (кўзойнак, линзалар) бўлишига рухсат этилади. Талабгорнинг барча шахсий буюмлари, шу жумладан уяли телефон ёки бошқа ахборот технология воситалари (ўчирилган ҳолатда) махсус ажратилган жойда сақланади.
(26-банднинг учинчи хатбошиси Ўзбекистон Республикаси молия вазирининг 2019 йил 11 сентябрдаги 97-сонли буйруғи (рўйхат рақами 3105-1, 30.09.2019 й.) таҳририда — Қонун ҳужжатлари маълумотлари миллий базаси, 30.09.2019 й., 10/19/3105-1/3838-сон)
27. Бегона шахсларни тест синовлари ўтказилаётган хонага киритилишига йўл қўйилмайди.
28. Малака имтиҳонидан ўта олмаган талабгор, малака имтиҳонини топширган санадан камида бир ой ўтгандан сўнг малака имтиҳонини қайта топшириш учун мазкур Низомнинг 8-бандида назарда тутилган ҳужжатларни тақдим қилиши мумкин.
(28-банднинг биринчи хатбошиси Ўзбекистон Республикаси молия вазирининг 2019 йил 11 сентябрдаги 97-сонли буйруғи (рўйхат рақами 3105-1, 30.09.2019 й.) таҳририда — Қонун ҳужжатлари маълумотлари миллий базаси, 30.09.2019 й., 10/19/3105-1/3838-сон)
Малака имтиҳонини топшира олмаган талабгорларга йиғим қайтарилмайди.
29. Малака имтиҳони натижалари малака имтиҳони ўтказилган куни малака имтиҳони комиссиясининг баённомаси билан расмийлаштирилади.
30. Малака имтиҳон натижалари Вазирликнинг расмий веб-сайтида малака имтиҳони ўтказилганидан сўнг икки кундан кечикмай эълон қилинади.
31. Малака имтиҳони комиссиясининг баённомалари қонун ҳужжатларида белгиланган тартибда Вазирликда сақланади.
4-боб. Малака сертификатини расмийлаштириш ва бериш
32. Малака сертификати аудиторнинг фотосурати ёпиштирилган махсус бланкда мазкур Низомнинг 2-иловасига мувофиқ шаклда расмийлаштирилади ва Ўзбекистон Республикаси ҳудудида юридик кучга эга бўлади.
(32-банд Ўзбекистон Республикаси молия вазирининг 2019 йил 11 сентябрдаги 97-сонли буйруғи (рўйхат рақами 3105-1, 30.09.2019 й.) таҳририда — Қонун ҳужжатлари маълумотлари миллий базаси, 30.09.2019 й., 10/19/3105-1/3838-сон)
33. Малака сертификатининг бланкалари Вазирлик буюртманомасига кўра «Давлат белгиси» давлат ишлаб чиқариш бирлашмасида босма усулда тайёрланади.
34. Малака сертификати Вазирлик томонидан малака имтиҳони комиссияси баённомалари олингандан кейин 10 кун муддатда расмийлаштирилади ва аудиторга ёки ишончнома асосида унинг вакилига аудиторлар реестрига имзо қўйилгач берилади.
35. Агар аудитор малака сертификатини расмийлаштирилган кунидан бошлаб уч ой давомида уни олишга келмаса ёки уни олишдан ёзма равишда ихтиёрий тартибда бош тортса Вазирлик малака сертификатининг амал қилишини тугатиш тўғрисида қарор қабул қилиши мумкин. Бунда аудитор томонидан тўланган йиғим қайтарилмайди.
(35-банд Ўзбекистон Республикаси молия вазирининг 2019 йил 11 сентябрдаги 97-сонли буйруғи (рўйхат рақами 3105-1, 30.09.2019 й.) таҳририда — Қонун ҳужжатлари маълумотлари миллий базаси, 30.09.2019 й., 10/19/3105-1/3838-сон)
36. Малака сертификати дастлаб беш йиллик муддатга, талабгор малака имтиҳонини муваффақиятли топширганда, ёхуд халқаро бухгалтер сертификатига эга бўлган талабгорларга малака имтиҳонини топширмасдан берилади.
Дастлабки беш йиллик муддат тугагандан сўнг унинг амал қилиш муддатини навбатдаги ўн йилга узайтириш, аудитор малака имтиҳони муваффақиятли топширганда ёхуд аудитор халқаро бухгалтер сертификатига эга бўлганда малака имтиҳонини топширмасдан амалга оширилади.
Малака сертификатини кейинги муддатсиз даврга узайтириш аудитор малака имтиҳонини муваффақиятли топширганда ёхуд аудитор халқаро бухгалтер сертификатига эга бўлганда ёки ўн йилдан кам бўлмаган узлуксиз аудитор иш стажи мавжуд бўлганда малака имтиҳонини топширмасдан амалга оширилади.
Малака сертификатининг амал қилиш муддатини узайтириш учун ҳужжатлар мазкур Низомнинг 37-бандига мувофиқ тақдим этилганда, малака сертификатининг амал қилиш муддатини узайтириш тўғрисидаги ариза тақдим этилган санадан бошлаб малака сертификатининг амал қилиш муддати тугаши санасигача бўлган вақт оралиғи аудитор сифатида узлуксиз иш стажини ҳисоблашда инобатга олинади.
Аудитор лавозимига тайинлашлар оралиғидаги вақт бир ойдан ошмаган бўлса, ушбу давр аудитор сифатидаги узлуксиз иш стажини аниқлашда узилиш деб ҳисобланмайди.
(36-банд Ўзбекистон Республикаси молия вазирининг 2019 йил 11 сентябрдаги 97-сонли буйруғи (рўйхат рақами 3105-1, 30.09.2019 й.) таҳририда — Қонун ҳужжатлари маълумотлари миллий базаси, 30.09.2019 й., 10/19/3105-1/3838-сон)
5-боб. Малака сертификатининг амал қилиш муддатини узайтириш, қайта расмийлаштириш ва дубликат бериш тартиби
37. Аудитор, малака сертификатининг амал қилиш муддати тугашидан 3 ой олдин, бироқ малака сертификатининг амал қилиш муддати тугашидан 6 ойдан кўп бўлмаган муддатда Вазирликка малака сертификатининг муддатини узайтириш тўғрисида мазкур Низомнинг 1-иловасига мувофиқ ариза билан мурожаат қилади.
Аризага қуйидаги ҳужжатлар илова қилиниши лозим:
а) малака сертификатининг асл нусхаси;
б) малака ошириш курсларини тамомлаганлиги ҳақидаги гувоҳнома (нусхаси олиниб, асли қайтарилади) ёхуд ушбу ҳужжатни берган муассаса томонидан тасдиқланган нусхаси;
в) аризани кўриб чиқиш учун базавий ҳисоблаш миқдорининг 50 фоизи миқдорида йиғим тўланганлиги тўғрисидаги тўлов ҳужжати нусхаси;
(37-банднинг «в» кичик банди Ўзбекистон Республикаси молия вазирининг 2019 йил 11 сентябрдаги 97-сонли буйруғи (рўйхат рақами 3105-1, 30.09.2019 й.) таҳририда — Қонун ҳужжатлари маълумотлари миллий базаси, 30.09.2019 й., 10/19/3105-1/3838-сон)
г) халқаро бухгалтер сертификати мавжуд бўлганда (нусхаси олиниб, асли қайтарилади) ёхуд ушбу ҳужжатни берган муассаса томонидан тасдиқланган нусхаси;
д) меҳнат дафтарчаси (меҳнат стажини тасдиқловчи «Электрон меҳнат дафтарчаси» тизимидан кўчирма) (нусхаси олиниб, асли қайтарилади).
(37-банднинг «д» кичик банди Ўзбекистон Республикаси молия вазирининг 2019 йил 11 сентябрдаги 97-сонли буйруғи (рўйхат рақами 3105-1, 30.09.2019 й.) таҳририда — Қонун ҳужжатлари маълумотлари миллий базаси, 30.09.2019 й., 10/19/3105-1/3838-сон)
38. Малака сертификати муддатини узайтириш мазкур Низомнинг 36 ва 37-бандларида белгиланган талабларга риоя этилганда амалга оширилади.
Малака сертификатининг амал қилиш муддати малака сертификатининг бланкасида кўрсатилган амал қилиш муддати тугаган пайтдан бошлаб узайтирилади.
39. Аудитор малака сертификатининг амал қилиш муддатини узайтириш учун малака имтиҳонидан ўта олмаган тақдирда, малака сертификатини қайтадан бериш мазкур Низом асосида амалга оширилади.
Агарда аудитор, уни мазкур Низомда назарда тутилган тартибда хабардор қилинганидан сўнг, малака сертификатининг амал қилиш муддатини узайтириш учун малака имтиҳонини топширишга келмаса, малака сертификатининг амал қилиш муддати тугагандан кейин, тақдим этилган ҳужжатлар (малака сертификатининг асл нусхасидан ташқари) қайтарилади. Бунда аризани кўриб чиқиш учун тўланган йиғим қайтариб берилмайди.
(39-банд Ўзбекистон Республикаси молия вазирининг 2019 йил 11 сентябрдаги 97-сонли буйруғига (рўйхат рақами 3105-1, 30.09.2019 й.) асосан хатбоши билан тўлдирилган — Қонун ҳужжатлари маълумотлари миллий базаси, 30.09.2019 й., 10/19/3105-1/3838-сон)
40. Малака сертификатининг амал қилиш муддатининг узайтирилиши белгиланган тартибда мазкур малака сертификатининг бланкасида махсус белгини (ёзув) қайд этиш орқали амалга оширилади.
Малака сертификати бланкасида унинг муддатини узайтиришга тааллуқли тўлдирилмаган қаторлар мавжуд бўлмаган тақдирда, аудиторга аввалги рўйхатга олиш рақами қўйилган янги малака сертификати берилади. Илгари берилган малака сертификати бланкаси Вазирлик томонидан қонун ҳужжатларида белгиланган тартибда йўқ қилинади.
41. Аудиторнинг фамилияси, исми, шарифи ўзгарган тақдирда, у тегишли ўзгартиришларни тасдиқловчи ҳужжатлар берилган санадан сўнг бир ой ичида Вазирликка мазкур Низомнинг 1-иловасига мувофиқ шаклда малака сертификатини қайта расмийлаштириш тўғрисида ариза билан мурожаат қилади.
Бунда аризага қайта расмийлаштирилиши лозим бўлган малака сертификатининг асл нусхаси билан бирга иккита фотосурат (3 х 4 ҳажмдаги) ва тегишли ўзгаришларни тасдиқловчи ҳужжатларнинг нусхалари илова қилинади.
Малака сертификатини қайта расмийлаштириш учун аудитордан базавий ҳисоблаш миқдорининг 25 фоизи миқдорида йиғим ундирилади.
(41-банднинг учинчи хатбошиси Ўзбекистон Республикаси молия вазирининг 2019 йил 11 сентябрдаги 97-сонли буйруғи (рўйхат рақами 3105-1, 30.09.2019 й.) таҳририда — Қонун ҳужжатлари маълумотлари миллий базаси, 30.09.2019 й., 10/19/3105-1/3838-сон)
42. Малака сертификатининг қайта расмийлаштирилиши аудитор томонидан ариза берилган пайтдан бошлаб беш иш куни мобайнида амалга оширилади, бунда аввалги рақам ва илгари белгиланган амал қилиш муддати кўрсатилган малака сертификатининг янги бланкаси берилади, илгари берилган малака сертификат бланкаси Вазирлик томонидан қонун ҳужжатларида белгиланган тартибда йўқ қилинади.
43. Йўқотилган ёки яроқсиз ҳолга келган малака сертификатининг ўрнига аудиторнинг мазкур Низомнинг 1-иловасига мувофиқ шаклда малака сертификатини дубликатини бериш ҳақидаги аризасига кўра малака сертификатининг дубликати берилади.
44. Малака сертификатининг дубликатида унинг аввалги қайд этилган рақами ва илгари белгиланган амал қилиш муддати ёзилади, янги бланканинг юқоридаги бурчагида «Дубликат» ёзуви кўрсатилган бўлиши керак.
Яроқсиз ҳолга келган малака сертификати Вазирликка қайтарилиши ва қонун ҳужжатларида белгиланган тартибда йўқ қилиниши лозим.
45. Дубликат беришда аудитордан базавий ҳисоблаш миқдорининг 25 фоизи миқдорида йиғим ундирилади.
(45-банд Ўзбекистон Республикаси молия вазирининг 2019 йил 11 сентябрдаги 97-сонли буйруғи (рўйхат рақами 3105-1, 30.09.2019 й.) таҳририда — Қонун ҳужжатлари маълумотлари миллий базаси, 30.09.2019 й., 10/19/3105-1/3838-сон)
6-боб. Малака сертификатининг амал қилишини тугатиш ва уни бекор қилиш тартиби
46. Малака сертификатининг амал қилишини тугатиш учун қуйидагилар асос бўлади:
аудиторнинг аризаси;
аудиторлик текшируви давомида аудитор олинган маълумотларни аудиторлик текшируви буюртмачисининг рухсатисиз учинчи шахсларга бериши, қонун ҳужжатларида назарда тутилган ҳоллар бундан мустасно;
аудиторлик фаолиятини амалга ошираётганда қонун ҳужжатлари талабларини мунтазам ёки бир марта қўпол равишда бузганлик;
аудиторлик текшируви ўтказишда аниқланган, хўжалик юритувчи субъектнинг бухгалтерия ҳисоби юритиш, шунингдек молиявий ҳисоботни тузиш бўйича белгилаб қўйилган талабларни бузиш фактларининг аудитор томонидан яширилганлиги;
аудиторлик фаолиятида уч йил давомида иштирок этмаслик;
аудиторнинг малака сертификати бошқа шахсга топширилган бўлиб, мазкур шахс ушбу ҳужжатни аудиторлик фаолиятида иштирок этиш учун ўз номидан фойдаланиш мақсадида ишлатганлик фактининг аниқланганлиги;
суднинг муайян лавозимларни эгаллаш ёки молия-хўжалик муносабатлари соҳасида муайян фаолият билан шуғулланиш ҳуқуқидан маҳрум қилиш тариқасидаги жазони назарда тутувчи ҳукмининг қонуний кучга кирганлиги;
фуқарони белгиланган тартибда муомалага лаёқатсиз ёки муомала лаёқати чекланган деб топиш тўғрисидаги суд қарори.
47. Аудиторлик фаолиятини амалга ошираётганда қуйидаги ҳолатлар қонун ҳужжатлари талабларини бир марта қўпол равишда бузиш деб топилади:
қасддан сохта аудиторлик хулосасини тузиш;
аудиторлик текширувини ўтказишдаги махфий ахборотни буюртмачининг рухсатисиз ошкор қилиш (қонун ҳужжатларида назарда тутилган ҳоллар бундан мустасно);
аудиторлик текширувини ўтказишда аниқланган хўжалик юритувчи субъект томонидан бухгалтерия ҳисобини юритиш, шунингдек молиявий ҳисоботни тузиш бўйича белгиланган талабларни бузиш фактларининг аудитор томонидан яширилиши;
малака сертификатини бошқа шахсга унинг ушбу ҳужжатдан ўз номидан аудиторлик фаолиятида иштирок этиш учун фойдаланиш мақсадида бериш фактининг аниқланиши;
аудиторнинг назорат қилувчи ёки ҳуқуқни муҳофаза қилиш органлари томонидан ўтказиладиган текширишларда аудиторлик ташкилоти ва ушбу органлар ўртасида шартнома тузмасдан мутахассис сифатида иштирок этиши;
аудиторнинг бир вақтнинг ўзида биттадан ортиқ аудиторлик ташкилотида аудиторлик фаолиятини амалга ошириши;
аудитор бир вақтнинг ўзида биттадан кўп аудиторлик ташкилотида муассис (иштирокчи) бўлиши фактининг аниқланиши;
ҳар йилги малака оширишдан ўтмаслик.
48. Малака сертификатининг амал қилиши уни тугатиш тўғрисидаги қарор қабул қилинган санадан бошлаб тугатилади, мазкур банднинг иккинчи хатбошисида назарда тутилган ҳолат бундан мустасно.
Аудиторлик ташкилоти лицензиясининг амал қилишини тугатишга сабаб бўлган қоидабузарликларга йўл қўйган аудиторлик ташкилоти раҳбарининг, шунингдек аудиторнинг малака сертификати амал қилиши лицензиянинг амал қилишини тугатиш тўғрисидаги қарор қабул қилинган санадан эътиборан тугатилади.
49. Малака сертификати қуйидаги ҳолларда бекор қилинади:
Вазирликнинг малака сертификатини бериш тўғрисидаги қарори ноқонуний эканлиги аниқланганда;
малака сертификати сохта ҳужжатлардан фойдаланган ҳолда олинганлиги факти аниқланганда.
50. Малака сертификатини бекор қилиш тўғрисидаги қарор малака сертификати берилган санадан бошлаб амал қилади.
51. Қонун ҳужжатларини бузганлик учун малака сертификати бекор қилинган ёки малака сертификатининг амал қилиши тугатилган аудиторлар, малака сертификати бекор қилинган ёхуд амал қилиши тугатилган санадан бошлаб уч йил мобайнида малака сертификатини такроран олиш учун мурожаат қилиш ҳуқуқига эга эмас.
52. Малака сертификатини бекор қилиш ёки унинг амал қилишини тугатиш тўғрисидаги қарор оммавий ахборот воситаларида эълон қилинади.
53. Малака сертификатини бекор қилиш ёки унинг амал қилишини тугатиш тўғрисидаги қарори беш кунлик муддатда аудиторга ва ушбу аудитор хизмат кўрсатаётган аудиторлик ташкилотига юборилади.
54. Аудитор малака сертификатини бекор қилиш ёки амал қилишини тугатиш тўғрисидаги қарорни олган кундан бошлаб 10 кун мобайнида ўз малака сертификатини Вазирликка белгиланган тартибда йўқ қилиш учун қайтариши шарт.
55. Вазирликнинг малака сертификатини амал қилишини тугатиш ёки уни бекор қилиш тўғрисидаги қарори устидан қонун ҳужжатларида белгиланган тартибда судга шикоят қилиниши мумкин.
7-боб. Аудиторлар реестри
56. Вазирлик томонидан аудиторлар реестри юритилади ва унда қуйидаги маълумотлар қайд этилади:
малака сертификатини олиш санаси, олган шахснинг фамилияси, исми, отасининг исми ва имзоси;
жисмоний шахснинг шахсий идентификация рақами (ЖШ ШИР);
малака сертификатининг рақами, берилган санаси;
ҳар йили малака ошириш курсларидан ўтганлиги тўғрисидаги маълумот;
халқаро бухгалтер сертификатининг номи ва берилган санаси;
малака сертификатининг амал қилиш муддати узайтирилганлиги, амал қилиши тугатилганлиги, бекор қилинганлиги, қайта расмийлаштирилганлиги ҳамда дубликат берилганлиги тўғрисида маълумотлар.
57. Вазирликнинг веб-сайтида аудиторлар реестр билан танишиш учун очиқ бўлган маълумотлар жойлаштирилади ва унда қуйидагилар кўрсатилади:
аудиторнинг фамилияси, исми, отасининг исми;
малака сертификатининг рақами, берилган санаси;
малака сертификатининг амал қилиш муддати;
аудиторларнинг малака оширганлиги тўғрисидаги маълумот (йил якуни бўйича);
малака сертификатининг амал қилишини тугатиш, бекор қилиш ва дубликатини бериш тўғрисидаги маълумотлар.
8-боб. Якуний қоидалар
58. Мазкур Низомни бажариш жараёнида келиб чиқадиган низолар қонун ҳужжатларига мувофиқ ҳал этилади
59. Мазкур Низом талаблари бузилишида айбдор бўлган шахслар қонун ҳужжатларида белгиланган тартибда жавобгар бўлади.
60. Мазкур Низом Ўзбекистон бухгалтерлар ва аудиторлар миллий ассоциацияси ҳамда Ўзбекистон аудиторлар палатаси билан келишилган.
Ўзбекистон бухгалтерлар ва аудиторлар миллий ассоциацияси Кенгаши раиси М. ТУЛАХОДЖАЕВА
2018 йил 13 ноябрь,
Ўзбекистон аудиторлар палатаси Кенгаши раиси Н. КАРИМОВ
2018 йил 13 ноябрь,
Аудитор малака сертификатини бериш тартиби тўғрисидаги низомга
1-ИЛОВА
* Керакли сўзларни тагига чизинг.
Аудитор малака сертификатини бериш тартиби тўғрисидаги низомга
2-ИЛОВА


Н А М У Н А


Ўзбекистон Республикасининг герби

Ўзбекистон Республикаси Молия вазирлиги

АУДИТОРНИНГ МАЛАКА СЕРТИФИКАТИ

____________-сон


Расм
учун жой


20__йил «___» ___________
____Аудитор малака сертификати Ўзбекистон Республикаси Молия вазирлиги томонидан

______________________________________________________________________ га
(кимга — аудитор малака сертификатини олган шахснинг Ф.И.О.)

________________________________________________________________________
(жисмоний шахснинг шахсий идентификация рақами)

____20__ йил «__»_______ даги малака имтиҳон комиссиясининг қарорига асосан аудитор малака сертификати 20__ йил «__» _________ дан 20__ йил «__» _________ гача муддатга берилди.
____________________________________________________М.Ў.
_ҒҒҒ(ваколатли шахснинг Ф.И.О.)_ҒҒҒҒҒҒҒҒ__________(имзо)

____Аудитор малака сертификатининг амал қилиш муддати ___________________________________

20___ йил «___» ____________ дан 20___ йил «___» ____________гача узайтирилди.
_____________________________________________М.Ў.
___(ваколатли шахснинг Ф.И.О.)_________________Ғ___(имзо)
____Аудитор малака сертификатининг амал қилиш муддати ___________________________________
20___ йил «___» ____________ дан _________________________га узайтирилди.
_____________________________________________М.Ў.
___(ваколатли шахснинг Ф.И.О.)_____________________(имзо)_
Ўзбекистон Республикаси молия вазирининг 2018 йил 14 ноябрдаги 144-сон буйруғига
2-ИЛОВА
Ўз кучини йўқотган деб топилаётган идоравий норматив-ҳуқуқий ҳужжатлар
РЎЙХАТИ
1. Ўзбекистон Республикаси Молия вазирлиги томонидан 2000 йил 25 сентябрда 68-сон билан тасдиқланган Аудитор малака сертификатини бериш тартиби тўғрисидаги низом (рўйхат рақами 977, 2000 йил 13 октябрь) (Ўзбекистон Республикаси вазирликлари, давлат қўмиталари ва идораларининг меъёрий ҳужжатлари ахборотномаси, 2000 й., 19-сон, 37-модда),.
2. Ўзбекистон Республикаси молия вазирининг 2004 йил 26 февралдаги 34-сон «Аудитор малака сертификатини бериш тартиби тўғрисидаги низомга ўзгартириш ва қўшимчалар киритиш ҳақида»ги буйруғи (рўйхат рақами 977-1, 2004 йил 19 апрель) (Ўзбекистон Республикаси қонун ҳужжатлари тўплами, 2004 й., 16-сон, 190-модда).
3. Ўзбекистон Республикаси молия вазирининг 2005 йил 23 сентябрдаги 93-сон «Аудитор малака сертификатини бериш тартиби тўғрисидаги низомга ўзгартириш ва қўшимчалар киритиш ҳақида»ги буйруғи (рўйхат рақами 977-2, 2005 йил 18 октябрь) (Ўзбекистон Республикаси қонун ҳужжатлари тўплами, 2005 й., 41-42-сон, 323-модда).
4. Ўзбекистон Республикаси молия вазирининг 2007 йил 15 июндаги 65-сон «Аудитор малака сертификатини бериш тартиби тўғрисидаги низомга ўзгартириш ва қўшимчалар киритиш ҳақида»ги буйруғи (рўйхат рақами 977-3, 2007 йил 18 июль) (Ўзбекистон Республикаси қонун ҳужжатлари тўплами, 2007 й., 29-30-сон, 310-модда).
5. Ўзбекистон Республикаси молия вазирининг 2008 йил 9 декабрдаги 112-сон «Аудитор малака сертификатини бериш тартиби тўғрисидаги низомга ўзгартириш ва қўшимчалар киритиш ҳақида»ги буйруғи (рўйхат рақами 977-4, 2008 йил 23 декабрь) (Ўзбекистон Республикаси қонун ҳужжатлари тўплами, 2008 й., 52-сон, 533-модда).
6. Ўзбекистон Республикаси молия вазирининг 2013 йил 13 августдаги 76-сон «Аудитор малака сертификатини бериш тартиби тўғрисидаги низомга ўзгартириш ва қўшимчалар киритиш ҳақида»ги буйруғи (рўйхат рақами 977-5, 2013 йил 27 август) (Ўзбекистон Республикаси қонун ҳужжатлари тўплами, 2013 й., 35-сон, 472-модда).
7. Ўзбекистон Республикаси молия вазирининг 2016 йил 17 майдаги 34-сон «Аудитор малака сертификатини бериш тартиби тўғрисидаги низомга ўзгартиришлар киритиш ҳақида»ги буйруғи (рўйхат рақами 977-6, 2016 йил 6 июнь) (Ўзбекистон Республикаси қонун ҳужжатлари тўплами, 2016 й., 23-сон, 271-модда).
8. Ўзбекистон Республикаси молия вазирининг 2017 йил 8 августдаги 119-сон «Аудитор малака сертификатини бериш тартиби тўғрисидаги низомга ўзгартириш ва қўшимчалар киритиш ҳақида»ги буйруғи (рўйхат рақами 977-7, 2017 йил 15 сентябрь) (Ўзбекистон Республикаси қонун ҳужжатлари тўплами, 2017 й., 37-сон, 1023-модда).
9. Ўзбекистон Республикаси молия вазирининг 2018 йил 1 февралдаги 15-сон «Аудитор малака сертификатини бериш тартиби тўғрисидаги низомга ўзгартиришлар киритиш ҳақида»ги буйруғи (рўйхат рақами 977-8, 2018 йил 27 февраль) (Ўзбекистон Республикаси қонун ҳужжатлари тўплами, 2018 й., 9-сон, 158-модда).

(Қонун ҳужжатлари маълумотлари миллий базаси, 22.12.2018 й., 10/18/3105/2363-сон, 30.09.2019 й., 10/19/3105-1/3838-сон)