O‘zbekiston Respublikasi Vazirlar Mahkamasining
qarori
Shahar yo‘lovchilar transportida ayrim toifadagi fuqarolarga bepul yurish huquqini beruvchi imtiyozli transport kartalarini berish yuzasidan davlat xizmatlari ko‘rsatishning ma’muriy reglamentini tasdiqlash to‘g‘risida
O‘zbekiston Respublikasi Prezidentining “Aholi va tadbirkorlik subyektlariga davlat xizmatlaridan foydalanishda yanada qulay sharoitlar yaratish, bu borada byurokratik to‘siqlarni qisqartirish bo‘yicha qo‘shimcha chora-tadbirlar to‘g‘risida” 2021-yil 23-martdagi PF-6191-son Farmoniga muvofiq, shahar yo‘lovchilar transportidan bepul foydalanishni yanada takomillashtirish hamda shahar yo‘lovchilar transportida (yo‘nalishli va yo‘nalishsiz taksidan tashqari) (keyingi o‘rinlarda — shahar yo‘lovchilar transporti) bepul yurish huquqini beruvchi imtiyozli transport kartalarini joriy qilish maqsadida Vazirlar Mahkamasi qaror qiladi:
1. Quyidagilar:
a) O‘zbekiston Respublikasining “Shahar yo‘lovchilar transportidan bepul foydalanishni tartibga solish to‘g‘risida” Qonuniga muvofiq quyidagi toifadagi fuqarolarga shahar yo‘lovchilar transportidan (taksidan tashqari) bepul foydalanish huquqi berilganligi:
1941 — 1945-yillardagi urush qatnashchilari jumlasidan bo‘lmish harbiy xizmatchilar;
1941 — 1945-yillardagi urush nogironlari va urushning I guruh nogironiga hamrohlik qiluvchi shaxs;
1941 — 1945-yillardagi urush davrida front ortida fidokorona mehnati va benuqson harbiy xizmati uchun orden va medallar bilan taqdirlangan shaxslar;
Afg‘oniston Respublikasida va boshqa mamlakatlarning hududidagi jangovar harakatlarda qatnashgan sobiq baynalminalchi jangchilar jumlasidan bo‘lmish fuqarolar;
haqiqiy muddatli harbiy xizmatni o‘tayotgan harbiy xizmatchilar va kontrakt bo‘yicha oddiy askarlar hamda serjantlar tarkibidagi harbiy xizmatchilar;
Chernobil AES halokati oqibatida nurlanish kasalligiga chalingan va uni boshdan kechirgan shaxslar;
nogironligi bo‘lgan ko‘zi ojiz shaxslar va nogironligi bo‘lgan ko‘zi ojiz shaxsga safarlarda hamrohlik qiluvchi shaxs;
Oldingi tahrirga qarang.
o‘zgalar parvarishiga muhtoj keksalar va nogironligi bo‘lgan shaxslar, shuningdek ularni kuzatuvchi shaxs;
(1-bandning “a” kichik bandi O‘zbekiston Respublikasi Vazirlar Mahkamasining 2024-yil 11-martdagi 123-sonli qaroriga asosan to‘qqizinchi xatboshi bilan to‘ldirilgan — Qonunchilik ma’lumotlari milliy bazasi, 12.03.2024-y., 09/24/123/0201-son)
b) Vazirlar Mahkamasining “Umumiy foydalaniladigan transportda yo‘lovchi tashishda yo‘lkira haqini to‘lashning avtomatlashtirilgan tizimini joriy etish to‘g‘risida” 2019-yil 25-noyabrdagi 948-son qaroriga muvofiq:
umumiy foydalaniladigan transportda yo‘lovchi tashish uchun yo‘lkira haqini to‘lashning avtomatlashtirilgan tizimi joriy etilganligi;
Toshkent, Samarqand, Urganch va Qarshi shaharlaridagi jamoat transporti harakat tarkibi 3 107 dona statsionar validatorlar bilan jihozlanganligi va 555 ming dona transport kartalari muomalaga chiqarilganligi;
yo‘lkira haqini to‘lashning avtomatlashtirilgan tizimi mobil ilovasi foydalanuvchilari soni 320 ming nafarga yetganligi ma’lumot uchun qabul qilinsin.
2. Transport vazirligi, Adliya vazirligi va Moliya vazirligining shahar yo‘lovchilar transportida (yo‘nalishli va yo‘nalishsiz taksidan tashqari) ayrim toifadagi fuqarolarga bepul yurish huquqini beruvchi imtiyozli transport kartalarini joriy etish to‘g‘risidagi taklifi ma’qullansin.
3. Shahar yo‘lovchilar transportida (yo‘nalishli va yo‘nalishsiz taksidan tashqari) ayrim toifadagi fuqarolarga bepul yurish huquqini beruvchi imtiyozli transport kartalarini berish yuzasidan davlat xizmatlari ko‘rsatishning ma’muriy reglamenti ilovaga muvofiq tasdiqlansin.
4. Shunday tartib o‘rnatilsinki, unga ko‘ra:
a) shahar yo‘lovchilar transportida ayrim toifadagi fuqarolarga bepul yurish huquqini beruvchi imtiyozli transport kartalari berilishi Qoraqalpog‘iston Respublikasi Transport vazirligi, viloyatlar va Toshkent shahar transport boshqarmalari hamda Yagona interaktiv davlat xizmatlari portali (keyingi o‘rinlarda — YIDXP) orqali amalga oshiriladi;
b) shahar yo‘lovchilar transportida ayrim toifadagi fuqarolarga bepul yurish huquqini beruvchi imtiyozli transport kartalarini berish bosqichma-bosqich:
Toshkent va Samarqand shaharlarida — 2023-yil 1-yanvardan boshlab;
respublikaning barcha shaharlarida — 2023-yil 1-maydan boshlab amalga oshiriladi;
v) eski namunada berilgan shahar yo‘lovchilar transportida (taksidan tashqari) ayrim toifadagi fuqarolarga bepul yurish huquqini beruvchi yagona guvohnomalar 2023-yil 1-sentabrga qadar o‘z kuchini saqlab qoladi.
5. Moliya vazirligi huzuridagi budjetdan tashqari Pensiya jamg‘armasi, Mudofaa vazirligi, Ichki ishlar vazirligi, Favqulodda vaziyatlar vazirligi, Davlat xavfsizlik xizmati 2022-yil 1-noyabrga qadar ushbu qaror 1-bandining “a” kichik bandida ko‘rsatilgan toifadagi shaxslar bo‘yicha ma’lumotlar bazasini yaratsin.
6. Axborot texnologiyalari va kommunikatsiyalarini rivojlantirish vazirligi:
a) Adliya vazirligi va Transport vazirligi bilan birgalikda 2023-yil 1-yanvardan:
ushbu qarorga muvofiq davlat xizmatlari YIDXP orqali joriy etilishini ta’minlasin;
YIDXPda davlat xizmatlari ko‘rsatilishining har bir bosqichida murojaatlar ko‘rib chiqilishini kuzatib borish tartibini joriy etsin;
Oldingi tahrirga qarang.
b) 2022-yil 1-dekabrga qadar Moliya vazirligi huzuridagi budjetdan tashqari Pensiya jamg‘armasi, Mudofaa vazirligi, Ichki ishlar vazirligi, Favqulodda vaziyatlar vazirligi, Davlat xavfsizlik xizmati hamda O‘zbekiston Respublikasi Prezidenti huzuridagi Ijtimoiy himoya milliy agentligining tegishli axborot tizimlari Yagona interaktiv davlat xizmatlari portaliga hamda Transport vazirligi axborot tizimiga integratsiya qilinishini ta’minlasin.
(6-bandning “b” kichik bandi O‘zbekiston Respublikasi Vazirlar Mahkamasining 2025-yil 27-fevraldagi 125-sonli qarori tahririda — Qonunchilik ma’lumotlari milliy bazasi, 01.03.2025-y., 09/25/125/0203-son)
7. Transport vazirligi:
Toshkent va Samarqand shaharlarida — 2023-yil 1-yanvardan, respublikaning barcha shaharlarida — 2023-yil 1-maydan bosqichma-bosqich shahar yo‘lovchilar transportida ayrim toifadagi fuqarolarga bepul yurish huquqini beruvchi imtiyozli transport kartalarini o‘rnatilgan tartibda rasmiylashtirib, egalariga topshirishni ta’minlasin;
imtiyozli transport kartalarini tayyorlash va egasiga yetkazib berish bilan bog‘liq xarajatlarni Transport vazirligi huzuridagi Transport va logistikani rivojlantirish jamg‘armasi mablag‘lari hisobidan amalga oshirsin;
Moliya vazirligi, Xalq ta’limi vazirligi hamda Oliy va o‘rta-maxsus ta’lim vazirligi bilan birgalikda uch oy muddatda imtiyozli yurish huquqiga ega bo‘lgan yo‘lovchilarga (pensionerlar, nogironligi bo‘lgan shaxslar, o‘quvchilar va talabalar) shahar yo‘lovchilar transportida (yo‘nalishli va yo‘nalishsiz taksidan tashqari) imtiyozli yurish huquqini beruvchi imtiyozli transport kartalarini berish tartibini takomillashtirish yuzasidan Vazirlar Mahkamasiga taklif kiritsin.
8. Adliya vazirligi va uning hududiy boshqarmalari ushbu qaror talablari ijrosi bo‘yicha davlat organlari va boshqa tashkilotlarning faoliyati ustidan, shu jumladan, YIDXP orqali doimiy nazorat o‘rnatsin va monitoring olib borsin.
9. Transport vazirligi boshqa manfaatdor vazirlik va idoralar bilan birgalikda o‘zlari qabul qilgan normativ-huquqiy hujjatlarni ikki oy muddatda ushbu qarorga muvofiqlashtirsin.
10. Mazkur qarorning ijrosini nazorat qilish O‘zbekiston Respublikasi Bosh vazirining birinchi o‘rinbosari A.J. Ramatov, O‘zbekiston Respublikasi transport vaziri I.R. Maxkamov hamda O‘zbekiston Respublikasi adliya vaziri R.Q. Davletov zimmasiga yuklansin.
O‘zbekiston Respublikasining Bosh vaziri A. ARIPOV
Toshkent sh.,
2022-yil 16-sentabr,
507-son
Vazirlar Mahkamasining 2022-yil 16-sentabrdagi 507-son qaroriga
ILOVA
Shahar yo‘lovchilar transportida (yo‘nalishli va yo‘nalishsiz taksidan tashqari) ayrim toifadagi fuqarolarga bepul yurish huquqini beruvchi imtiyozli transport kartalarini berish yuzasidan davlat xizmatlari ko‘rsatishning
MA’MURIY REGLAMENTI
1-bob. Umumiy qoidalar
1. Mazkur Reglament shahar yo‘lovchilar transportida (yo‘nalishli va yo‘nalishsiz taksidan tashqari) (keyingi o‘rinlarda — shahar yo‘lovchilar transporti) ayrim toifadagi fuqarolarga bepul yurish huquqini beruvchi imtiyozli transport kartalarini berish yuzasidan davlat xizmatlari ko‘rsatish tartibini belgilaydi.
2. Ushbu Reglamentda quyidagi tushunchalardan foydalaniladi:
murojaat qiluvchi — imtiyozli transport kartasini olish uchun murojaat etgan jismoniy shaxs;
imtiyozli transport kartasi — shahar yo‘lovchilar transportda (yo‘nalishli va yo‘nalishsiz taksidan tashqari) avtomatlashtirilgan to‘lov tizimi operatori ma’lumotlar bazasida ro‘yxatga olingan yo‘lovchiga bepul yurish huquqini kafolatlaydigan, transportdan foydalanish soni va bir transportdan boshqasiga chiqish soni cheklanmaydigan shaxsiylashtirilgan transport kartasi;
imtiyozli transport kartalari reyestri — imtiyozli transport kartalarini berish bo‘yicha ma’lumotlar elektron tarzda shakllantiriladigan baza.
3. Imtiyozli transport kartasi egasi O‘zbekiston Respublikasining barcha hududlarida shahar yo‘lovchilar transportida bepul yurish huquqiga ega.
4. Quyidagi shaxslarga imtiyozli transport kartasi taqdim etiladi:
1941 — 1945-yillardagi urush qatnashchilari jumlasidan bo‘lmish harbiy xizmatchilar;
1941 — 1945-yillardagi urush nogironlari;
1941 — 1945-yillardagi urush davrida front ortida fidokorona mehnati va benuqson harbiy xizmati uchun orden va medallar bilan taqdirlangan shaxslar;
Afg‘oniston Respublikasida va boshqa mamlakatlarning hududidagi jangovar harakatlarda qatnashgan sobiq baynalminalchi jangchilar jumlasidan bo‘lmish fuqarolar;
haqiqiy muddatli harbiy xizmatni o‘tayotgan harbiy xizmatchilar va kontrakt bo‘yicha oddiy askarlar hamda serjantlar tarkibidagi harbiy xizmatchilar;
Chernobil AES halokati oqibatida nurlanish kasalligiga chalingan va uni boshdan kechirgan shaxslar;
nogironligi bo‘lgan ko‘zi ojiz shaxslar;
Oldingi tahrirga qarang.
o‘zgalar parvarishiga muhtoj keksalar va nogironligi bo‘lgan shaxslar, shuningdek ularni kuzatuvchi shaxs.
(4-band O‘zbekiston Respublikasi Vazirlar Mahkamasining 2024-yil 11-martdagi 123-sonli qaroriga asosan to‘qqizinchi xatboshi bilan to‘ldirilgan — Qonunchilik ma’lumotlari milliy bazasi, 12.03.2024-y., 09/24/123/0201-son)
5. Haqiqiy muddatli harbiy xizmatni o‘tayotgan harbiy xizmatchilarga va kontrakt bo‘yicha oddiy askarlar hamda serjantlar tarkibidagi harbiy xizmatchilarga imtiyozli transport kartalari berilmaydi. Ular harbiy guvohnomasi yoki kontrakt asosida xizmat qiluvchining shaxsiy guvohnomasini ko‘rsatgan taqdirda shahar yo‘lovchilar transportida bepul yurish huquqidan foydalanadi.
6. 1941 — 1945-yillardagi urush I guruh nogironlariga va nogironligi bo‘lgan ko‘zi ojiz shaxslarga beriladigan imtiyozli transport kartasi ularga safarlarda hamrohlik qiluvchi bir shaxsga ham shahar yo‘lovchilar transportidan bepul foydalanish huquqini beradi.
7. Davlat xizmatlari Qoraqalpog‘iston Respublikasi Transport vazirligi, viloyatlar va Toshkent shahar transport boshqarmalari (keyingi o‘rinlarda — vakolatli organ) tomonidan yoki O‘zbekiston Respublikasi Yagona interaktiv davlat xizmatlari portali (keyingi o‘rinlarda — YIDXP) orqali ko‘rsatiladi.
8. Shahar yo‘lovchilar transportida ayrim toifadagi fuqarolarga bepul yurish huquqini beruvchi imtiyozli transport kartalarini berish yuzasidan davlat xizmatlari ko‘rsatilganligi uchun yig‘im undirilmaydi.
9. Imtiyozli transport kartasi cheklanmagan muddatga beriladi.
10. Imtiyozli transport kartasini boshqa shaxslarga berish taqiqlanadi.
2-bob. Davlat xizmati ko‘rsatish tartibi
11. Davlat xizmatlari ko‘rsatish ushbu Reglamentga 1-ilovaga muvofiq sxema bo‘yicha amalga oshiriladi.
12. Murojaat qiluvchi davlat xizmatlaridan foydalanish uchun vakolatli organga o‘zi yoki u vakolat bergan shaxs kelib murojaat etadi yoxud davlat xizmatidan elektron tarzda foydalanish uchun YIDXPda ro‘yxatdan o‘tadi.
13. Murojaat qiluvchi o‘zi yoki u vakolat bergan shaxs kelib murojaat qilgan taqdirda, vakolatli organ xodimi murojaat qiluvchining nomidan YIDXP orqali murojaat etgan taqdirda mustaqil ravishda ushbu Reglamentga 2-ilovaga muvofiq shakldagi so‘rovnomani elektron tarzda to‘ldiradi.
14. So‘rovnoma to‘ldirilgandan so‘ng murojaat qiluvchi ma’lumotlarning to‘g‘riligini tekshirib, so‘rovnomani tasdiqlaydi.
Murojaat qiluvchi tomonidan so‘rovnomani ERI bilan tasdiqlash talab etilmaydi.
15. Murojaat qiluvchi tomonidan so‘rovnomada noto‘g‘ri ma’lumotlarning ko‘rsatilishi yoki uni tasdiqlashning rad etilishi davlat xizmatlari ko‘rsatishni rad etish uchun asos hisoblanadi.
16. Murojaat qiluvchi davlat xizmatlarini ko‘rsatishning har qanday bosqichida ulardan foydalanishdan bosh tortish huquqiga ega. Murojaat qiluvchi davlat xizmatidan foydalanishdan bosh tortganda uning so‘rovnomasi ko‘rib chiqilmasdan qoldiriladi.
Oldingi tahrirga qarang.
17. Vakolatli organ so‘rovnoma olinganidan so‘ng shahar yo‘lovchilar transportida bepul yurish huquqini beruvchi imtiyozli transport kartasini olish uchun murojaat qilgan shaxs mazkur Reglamentning 4-bandida nazarda tutilgan toifaga kirishini Moliya vazirligi huzuridagi budjetdan tashqari Pensiya jamg‘armasi, Mudofaa vazirligi, Ichki ishlar vazirligi, Favqulodda vaziyatlar vazirligi, Davlat xavfsizlik xizmati hamda O‘zbekiston Respublikasi Prezidenti huzuridagi Ijtimoiy himoya milliy agentligining axborot tizimlari orqali o‘rganadi.
(17-band O‘zbekiston Respublikasi Vazirlar Mahkamasining 2025-yil 27-fevraldagi 125-sonli qarori tahririda — Qonunchilik ma’lumotlari milliy bazasi, 01.03.2025-y., 09/25/125/0203-son)
18. Vakolatli organ tomonidan ikki ish kuni mobaynida murojaat qilgan shaxsning ma’lumotlarini o‘rganish natijasiga ko‘ra imtiyozli transport kartasini berish yoki uning berilishini rad etish haqida qaror qabul qilinadi hamda bu haqidagi ma’lumot murojaat qiluvchiga yoki YIDXPga yuboriladi. Imtiyozli transport kartasini berish rad etilgan taqdirda ma’lumotda rad etish sabablari ko‘rsatiladi.
19. Vakolatli organ imtiyozli transport kartasini berish haqida qaror qabul qilganidan so‘ng bir ish kuni ichida imtiyozli transport kartasini rasmiylashtiradi hamda uni vakolatli shaxsning ERIsi bilan tasdiqlab, murojaat qiluvchiga topshirilganligi ma’lum qilinadigan buyurtma xat orqali yuboradi.
3-bob. Imtiyozli transport kartasining dublikatini berish, almashtirish va uni bekor qilish
20. Imtiyozli transport kartasi egasi imtiyozli transport kartasi yo‘qolgan taqdirda, uni avtomatlashtirilgan to‘lov tizimi operatori ma’lumotlar bazasidan ro‘yxatdan chiqarish uchun darhol imtiyozli transport kartasini bergan vakolatli organga, shu jumladan YIDXP orqali murojaat qilishi lozim.
21. Imtiyozli transport kartasi yo‘qolgan yoki yaroqsiz holga kelgan taqdirda, murojaat qiluvchiga bepul asosda boshqa imtiyozli transport kartasi beriladi. Bunda, imtiyozli transport kartasi yaroqsiz holga kelgan taqdirda, imtiyozli transport kartasi egasi uni vakolatli organga topshirishi lozim.
22. Imtiyozli transport kartasi soxta hujjatlar taqdim etgan holda olinganligi aniqlanganda bekor qilinadi va avtomatlashtirilgan to‘lov tizimi operatori ma’lumotlar bazasidan ro‘yxatdan chiqariladi.
4-bob. Imtiyozli transport kartalari reyestri
23. Transport vazirligi belgilangan tartibda imtiyozli transport kartalari reyestrini yuritadi.
Imtiyozli transport kartalari reyestrida quyidagilar ko‘rsatilishi kerak:
fuqaroning familiyasi, ismi va otasining ismi;
fuqaroning turar joy manzili;
fuqarolik pasportining seriyasi (identifikatsiyalovchi ID-kartasining seriyasi) va raqami, jismoniy shaxsning shaxsiy identifikatsiya raqami (JSHSHIR);
berilgan imtiyozli transport kartasining seriyasi va raqami;
fuqaroning mazkur Reglamentning 4-bandida nazarda tutilgan shaxslar toifasiga kirishini tasdiqlovchi hujjat turi va raqami.
5-bob. Shahar yo‘lovchilar transportida (yo‘nalishli va yo‘nalishsiz taksidan tashqari) bepul yurish huquqiga ega bo‘lgan shaxslarning ro‘yxatini xatlovdan o‘tkazish
24. Vakolatli organ tomonidan shahar yo‘lovchilar transportida bepul yurish huquqiga ega bo‘lgan shaxslar ro‘yxati har chorakda bir marta xatlovdan o‘tkaziladi.
Oldingi tahrirga qarang.
25. Vakolatli organ imtiyozli transport kartalari reyestridan chiqib ketgan shaxslarni aniqlash maqsadida axborot tizimlari orqali Moliya vazirligi huzuridagi budjetdan tashqari Pensiya jamg‘armasi, Mudofaa vazirligi, Ichki ishlar vazirligi, Favqulodda vaziyatlar vazirligi, Davlat xavfsizlik xizmati hamda O‘zbekiston Respublikasi Prezidenti huzuridagi Ijtimoiy himoya milliy agentligining mazkur Reglamentning 4-bandida nazarda tutilgan shaxslar to‘g‘risidagi ma’lumotlarini o‘rganadi.
(25-band O‘zbekiston Respublikasi Vazirlar Mahkamasining 2025-yil 27-fevraldagi 125-sonli qarori tahririda — Qonunchilik ma’lumotlari milliy bazasi, 01.03.2025-y., 09/25/125/0203-son)
26. O‘rganish natijalari bo‘yicha imtiyozli transport kartalari reyestriga tegishli o‘zgartirishlar kiritiladi.
27. Imtiyozli transport kartalari reyestridan chiqib ketgan shaxslarning imtiyozli transport kartalari avtomatlashtirilgan to‘lov tizimi operatori ma’lumotlar bazasidan ro‘yxatdan chiqariladi.
6-bob. Yakuniy qoidalar
28. Vakolatli organ o‘z faoliyatini amalga oshirishi natijasida olingan ma’lumotlarning sir saqlanishini ta’minlaydi.
29. Murojaat qiluvchilar davlat organlari va boshqa tashkilotlar xodimlarining xatti-harakatlari yuzasidan qonunchilik hujjatlarida belgilangan tartibda shikoyat qilishi mumkin.
30. Mazkur Reglament talablari buzilishida aybdor bo‘lgan shaxslar qonunchilik hujjatlarida belgilangan tartibda javobgar bo‘ladi.
Shahar yo‘lovchilar transportida (yo‘nalishli va yo‘nalishsiz taksidan tashqari) ayrim toifadagi fuqarolarga bepul yurish huquqini beruvchi imtiyozli transport kartalarini berish yuzasidan davlat xizmatlari ko‘rsatishning ma’muriy reglamentiga
1-ILOVA
Shahar yo‘lovchilar transportida (yo‘nalishli va yo‘nalishsiz taksidan tashqari) ayrim toifadagi fuqarolarga bepul yurish huquqini beruvchi imtiyozli transport kartalarini berish bo‘yicha davlat xizmatlari ko‘rsatish
SXEMASI
Oldingi tahrirga qarang.

Bosqichlar

Subyektlar

Mexanizm

Muddatlar

1-bosqich

Murojaat qiluvchi yoki u vakolat bergan shaxs

1. Imtiyozli transport kartasini olish uchun Qoraqalpog‘iston Respublikasi Transport vazirligi, viloyatlar va Toshkent shahar transport boshqarmalariga (keyingi o‘rinlarda — vakolatli organ) kelib murojaat qiladi.

1. Xohishiga ko‘ra

2. YIDXPda ro‘yxatdan o‘tadi va so‘rovnoma shaklini to‘ldiradi.

2. Murojaat qilinganda

2-bosqich

Vakolatli organ

1. Imtiyozli transport kartasini olish uchun murojaat qilgan shaxs tegishli toifaga kirishi to‘g‘risidagi ma’lumotlarni Moliya vazirligi huzuridagi budjetdan tashqari Pensiya jamg‘armasi, Mudofaa vazirligi, Ichki ishlar vazirligi, Favqulodda vaziyatlar vazirligi, Davlat xavfsizlik xizmati hamda O‘zbekiston Respublikasi Prezidenti huzuridagi Ijtimoiy himoya milliy agentligining axborot tizimlari orqali o‘rganadi.

2. O‘rganish natijasiga asosan imtiyozli transport kartasini berish yoki uni rad etish haqida qaror qabul qiladi hamda bu haqidagi ma’lumotni murojaat qiluvchiga yoki YIDXPga elektron tarzda yuboradi.

Imtiyozli transport kartasini berish rad etilgan taqdirda, ma’lumotda rad etish sabablarini ko‘rsatadi.

So‘rovnoma tushganidan so‘ng 2 ish kuni mobaynida

3-bosqich

Vakolatli organ

Imtiyozli transport kartasini rasmiylashtiradi hamda uni murojaat qiluvchiga topshirilganligi ma’lum qilinadigan buyurtma xat orqali yuboradi.

Qaror qabul qilinganidan so‘ng 1 ish kuni mobaynida

(1-ilova O‘zbekiston Respublikasi Vazirlar Mahkamasining 2025-yil 27-fevraldagi 125-sonli qarori tahririda — Qonunchilik ma’lumotlari milliy bazasi, 01.03.2025-y., 09/25/125/0203-son)
Shahar yo‘lovchilar transportida (yo‘nalishli va yo‘nalishsiz taksidan tashqari) ayrim toifadagi fuqarolarga bepul yurish huquqini beruvchi imtiyozli transport kartalarini berish yuzasidan davlat xizmatlari ko‘rsatishning ma’muriy reglamentiga
2-ILOVA
Shahar yo‘lovchilar transportida (yo‘nalishli va yo‘nalishsiz taksidan tashqari) ayrim toifadagi fuqarolarga bepul yurish huquqini beruvchi imtiyozli transport kartalarini berish bo‘yicha
SO‘ROVNOMA

I. Murojaat qiluvchi to‘g‘risidagi ma’lumotlar

1. Shahar yo‘lovchilar transportidan (yo‘nalishli va yo‘nalishsiz taksidan tashqari) bepul foydalanish huquqiga ega bo‘lgan shaxslar toifalari

1941 — 1945-yillardagi urush qatnashchilari jumlasidan bo‘lmish harbiy xizmatchilar

1941 — 1945-yillardagi urush nogironlari va urushning I guruh nogironiga hamrohlik qiluvchi shaxs

1941 — 1945-yillardagi urush davrida front ortida fidokorona mehnati va benuqson harbiy xizmati uchun orden va medallar bilan taqdirlangan shaxslar

Afg‘oniston Respublikasida va boshqa mamlakatlarning hududidagi jangovar harakatlarda qatnashgan sobiq baynalmilalchi jangchilar jumlasidan bo‘lmish fuqarolar

Chernobil AES halokati oqibatida nurlanish kasalligiga chalingan va uni boshdan kechirgan shaxslar

nogironligi bo‘lgan ko‘zi ojiz shaxslar va nogironligi bo‘lgan ko‘zi ojiz shaxsga safarlarda hamrohlik qiluvchi shaxs

2. Familiyasi:

3. Ismi:

4. Otasining ismi:

(mavjud bo‘lsa)

5. Tug‘ilgan sanasi:

6. Pasport yoki identifikatsiyalovchi ID-kartasi seriyasi va raqami:

7. Jismoniy shaxsning identifikatsion raqami (JSHSHIR)

8. Manzil:

9. Telefon raqami:

10. Elektron pochta manzili (mavjud bo‘lsa):

II. Murojaat vakolatli shaxs tomonidan berilganida to‘ldiriladi

1. Familiyasi:

2. Ismi:

3. Otasining ismi:

(mavjud bo‘lsa)

4. Tug‘ilgan sanasi:

5. Pasport yoki identifikatsiyalovchi ID-kartasi seriyasi va raqami:

6. Telefon raqami:

7. Elektron pochta manzili (mavjud bo‘lsa):

(Qonunchilik ma’lumotlari milliy bazasi, 16.09.2022-y., 09/22/507/0829-son; 12.03.2024-y., 09/24/123/0201-son; 01.03.2025-y., 09/25/125/0203-son)