Oʻzbekiston Respublikasi Vazirlar Mahkamasining
qarori
Davlat ekologik nazorati hamda moddiy madaniy meros obyektlarini muhofaza qilish va ulardan foydalanish sohasida nazoratning zamonaviy mexanizmlarini joriy etish chora-tadbirlari toʻgʻrisida
Oʻzbekiston Respublikasi Prezidentining “Respublikada koʻkalamzorlashtirish ishlarini jadallashtirish, daraxtlar muhofazasini yanada samarali tashkil etish chora-tadbirlari toʻgʻrisida” 2021-yil 30-dekabrdagi PF-46-son Farmoni hamda “Maishiy va qurilish chiqindilari bilan bogʻliq ishlarni boshqarish tizimini yanada takomillashtirish chora-tadbirlari toʻgʻrisida” 2020-yil 29-sentabrdagi PQ-4845-son qarori ijrosini taʼminlash, atrof muhitni va moddiy madaniy meros obyektlarini muhofaza qilish hamda ulardan foydalanish sohasida davlat nazoratini yanada takomillashtirish, shuningdek, ushbu jarayonga zamonaviy axborot-kommunikatsiya texnologiyalarini joriy etish maqsadida Vazirlar Mahkamasi qaror qiladi:
1. Oʻzbekiston Respublikasi Ekologiya va atrof muhitni muhofaza qilish davlat qoʻmitasi (keyingi oʻrinlarda — Davlat ekologiya qoʻmitasi), Bosh prokuratura hamda Turizm va madaniy meros vazirligi tomonidan ekologiya, atrof muhitni muhofaza qilish va tabiatdan foydalanish, shuningdek, moddiy madaniy meros obyektlarini muhofaza qilish va ulardan foydalanish sohasida fuqarolarning ishtirokini taʼminlashga qaratilgan “Ekonazorat” va “Madaniy meros nazorati” axborot tizimlari (keyingi oʻrinlarda — axborot tizimlari) ishlab chiqilganligi maʼlumot uchun qabul qilinsin.
Oldingi tahrirga qarang.
2. Oʻzbekiston Respublikasi Madaniy meros agentligi, Bosh prokuraturaning moddiy madaniy meros obyektlarini muhofaza qilish va ulardan foydalanish sohasida huquqbuzarlik holatlari boʻyicha fotosuratlar va (yoki) videoyozuvlarni yuborgan shaxslarni:
(2-bandning birinchi xatboshisi Oʻzbekiston Respublikasi Vazirlar Mahkamasining 2025-yil 15-dekabrdagi 791-sonli qarori tahririda — Qonunchilik maʼlumotlari milliy bazasi, 16.12.2025-y., 09/25/791/1167-son)
har bir tasdiqlangan holat boʻyicha huquqbuzardan undirilgan mablagʻlar hisobidan bazaviy hisoblash miqdorining bir baravariga teng miqdordagi pul mukofoti bilan ragʻbatlantirish;
jarima, shu jumladan, maʼmuriy jarima bilan bogʻliq boʻlmagan boshqa jazo chorasi qoʻllangan hollarda Vazirlar Mahkamasining “Fuqarolar va jamoat tashkilotlarini huquqbuzarliklar profilaktikasi va jinoyatchilikka qarshi kurashishdagi faol ishtiroki uchun ragʻbatlantirish tartibi toʻgʻrisida nizomni tasdiqlash haqida” 2018-yil 8-yanvardagi 15-son qaroriga muvofiq ragʻbatlantirish toʻgʻrisidagi taklifiga rozilik berilsin.
3. Belgilab qoʻyilsinki:
Oldingi tahrirga qarang.
a) Davlat ekologiya qoʻmitasi hamda Madaniy meros agentligi (keyingi oʻrinlarda — Madaniy meros agentligi) axborot tizimlarining samarali ishlashini taʼminlash boʻyicha masʼul organlar hisoblanadi;
(3-bandning “a” kichik bandi Oʻzbekiston Respublikasi Vazirlar Mahkamasining 2025-yil 15-dekabrdagi 791-sonli qarori tahririda — Qonunchilik maʼlumotlari milliy bazasi, 16.12.2025-y., 09/25/791/1167-son)
b) axborot tizimlaridagi mobil ilovalar quyidagi imkoniyatlarni nazarda tutadi:
davlat ekologik nazorati obyektlari, shuningdek, muhofaza etiladigan tabiiy hududlar faoliyati hamda chiqindilar va moddiy madaniy meros obyektlari bilan bogʻliq ishlarni amalga oshirish boʻyicha samarali jamoatchilik nazoratini oʻrnatish;
jismoniy shaxslar tomonidan aniqlangan ekologiya, atrof muhitni muhofaza qilish va tabiatdan foydalanish, shuningdek, moddiy madaniy meros obyektlarini muhofaza qilish va ulardan foydalanish sohasida huquqbuzarlik (keyingi oʻrinlarda — sohaga oid huquqbuzarliklar) toʻgʻrisidagi fotosuratlar va (yoki) videoyozuvlarni Davlat ekologiya qoʻmitasi hamda Madaniy meros agentligiga manzil (geografik) belgilari boʻyicha yuborish;
sohaga oid huquqbuzarliklar haqida xabar bergan jismoniy shaxslarni pul mukofotlari bilan ragʻbatlantirish;
sohaga oid huquqbuzarliklar, normativ-huquqiy hujjatlar va statistik maʼlumotlar bazasi bilan tanishish;
sodir etilgan maʼmuriy huquqbuzarliklar yuzasidan maʼmuriy huquqbuzarlik hujjatlarini (bayonnoma va qarorlarni) elektron shaklda tuzish orqali ushbu huquqbuzarliklar haqidagi maʼlumotlarni Ichki ishlar vazirligining “E-maʼmuriy ish” tizimiga kiritish;
2022-yil 1-maydan boshlab hayvonot va oʻsimlik dunyosi obyektlari hamda muhofaza etiladigan tabiiy hududlarning joylashuvi boʻyicha davlat kadastri va ularning monitoringi toʻgʻrisidagi maʼlumotlardan ochiq foydalanish;
mobil ilovalar orqali taqdim etilgan fotosuratlar va (yoki) videoyozuvlar boʻyicha masʼul organlar tomonidan amalga oshirilgan ishlar holatini monitoring qilish, shuningdek, qonunchilik hujjatlari ijrosini taʼminlash yuzasidan avval berilgan majburiy koʻrsatmalar va talabnomalar boʻyicha amalga oshirilgan boshqa zarur chora-tadbirlardan xabardor boʻlish;
hududlar va tumanlar (shaharlar) kesimida aniqlangan sohaga oid huquqbuzarliklar toʻgʻrisida maʼlumotlarni joriy etish hamda yuritish.
Oldingi tahrirga qarang.
4. Oʻzbekiston Respublikasi Ichki ishlar vazirligi, Madaniy meros agentligi, Davlat ekologiya qoʻmitasi:
(4-bandning birinchi xatboshisi Oʻzbekiston Respublikasi Vazirlar Mahkamasining 2025-yil 15-dekabrdagi 791-sonli qarori tahririda — Qonunchilik maʼlumotlari milliy bazasi, 16.12.2025-y., 09/25/791/1167-son)
bir oy muddatda fotosuratlar va (yoki) videoyozuvlardagi shaxsning yuz qiyofasi boʻyicha biometrik maʼlumotlar bazasidan shaxsini aniqlashga ixtisoslashgan apparat-dasturiy kompleksni xarid qilishni moliyalashtirish manbai toʻgʻrisida Vazirlar Mahkamasiga taklif kiritsin;
kelgusida biometrik maʼlumotlar bazasiga texnik talablar asosida qoʻshimcha apparat-dasturiy kompleksni joylashtirish va “Papilon-Polifeys” tizimiga integratsiya qilish boʻyicha zarur chora-tadbirlarni amalga oshirsin.
5. Davlat ekologiya qoʻmitasi hamda Turizm va madaniy meros vazirligi, Axborot texnologiyalari va kommunikatsiyalarini rivojlantirish vazirligi, Ichki ishlar vazirligi, Davlat soliq qoʻmitasi hamda boshqa manfaatdor vazirlik va idoralar bilan birgalikda 2022-yil 1-mayga qadar axborot tizimlarining mazkur qaror 3-bandida nazarda tutilgan vazifalarni bajarish uchun integratsiya qilinishi bilan bogʻliq zarur ishlarni amalga oshirsin.
Bunda quyidagi faoliyat turlarini amalga oshirish uchun ruxsatnomalar berishga masʼul tashkilotlar berilgan ruxsatnomalarni ularning amal qilish joylashuvini koʻrsatgan holda axborot tizimiga mustaqil kiritish choralarini koʻrsin:
madaniy meros obyektlarida tadqiqotlar, qidiruvlar oʻtkazish, madaniy meros obyektlarida ilmiy-konservatsiya va restavratsiya ishlarini amalga oshirish;
Davlat oʻrmon fondiga kirmaydigan daraxtlar va butalarni kesish;
suvdan maxsus foydalanish yoki suvni maxsus isteʼmol qilish.
6. Quyidagilarni nazarda tutuvchi Jismoniy shaxslar tomonidan qayd etilgan huquqbuzarliklar toʻgʻrisidagi fotosuratlar va (yoki) videoyozuvlarni qabul qilish, koʻrib chiqish hamda ularni taqdim etgan shaxslarni ragʻbatlantirish tartibi haqidagi nizom 1-ilovaga muvofiq tasdiqlansin:
jismoniy shaxslar tomonidan yuborilgan sohaga oid huquqbuzarliklar toʻgʻrisidagi fotosuratlar va (yoki) videoyozuvlarni qabul qilish hamda qayd etish tartibi va shartlari;
videotexnika vositalari orqali qayd etilgan huquqbuzarliklarni koʻrib chiqish hamda koʻrib chiqishni rad etish tartibi;
sohaga oid huquqbuzarliklar qayd etilgan fotosuratlar va (yoki) videoyozuvlarni yuborgan shaxslarni ragʻbatlantirish tartibi hamda shartlari.
7. Davlat ekologiya qoʻmitasi 2023-yil 1-dekabrga qadar qoʻmitaning budjetdan tashqari mablagʻlari hisobidan Davlat ekologiya qoʻmitasining davlat inspektorlarini, shuningdek, faoliyati atrof muhitni muhofaza qilish va yerlardan noqonuniy foydalanishni bartaraf etish toʻgʻrisidagi qonunchilik hujjatlari ijrosini nazorat qilishga ixtisoslashtirilgan prokuratura organlari xodimlarini zarur uskunalar (planshetlar, bodikameralar va boshqalar) bilan taʼminlasin hamda “Ekonazorat” axborot tizimining toʻliq ishlashi uchun server uskunalarini xarid qilsin.
8. Davlat ekologiya qoʻmitasi hamda Turizm va madaniy meros vazirligi:
a) bir oy muddatda:
Ichki ishlar vazirligi bilan birgalikda sohaga oid huquqbuzarliklarni sodir etgan shaxslarning yuz qiyofasini aniqlash tartibini ishlab chiqsin va tasdiqlasin;
axborot tizimlarida huquqbuzarliklar aks etgan fotosuratlar va (yoki) videoyozuvlarni tahlil qilish, huquqbuzarlar shaxsini aniqlash va ularning harakatiga huquqiy baho berish bilan shugʻullanuvchi masʼul xodimlarni belgilasin;
b) Oʻzbekiston Milliy teleradiokompaniyasi, Oʻzbekiston Milliy axborot agentligi bilan birgalikda ushbu qarorning mazmun-mohiyati ommaviy axborot vositalarida keng yoritilishini taʼminlasin.
9. Vazirlar Mahkamasining “Oʻzbekiston Respublikasi Madaniyat vazirligi huzuridagi Madaniy meros departamenti faoliyatini tashkil etish hamda moddiy madaniy meros obyektlarini muhofaza qilish va ulardan foydalanishga oid ayrim normativ-huquqiy hujjatlarni tasdiqlash toʻgʻrisida” 2019-yil 30-martdagi 265-son qaroriga 2-ilovaga muvofiq oʻzgartirishlar va qoʻshimcha kiritilsin.
10. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari A.J. Ramatov hamda Oʻzbekiston Respublikasi Bosh vazirining oʻrinbosari — turizm va madaniy meros vaziri A.A. Abduxakimov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2022-yil 7-aprel,
165-son
Vazirlar Mahkamasining 2022-yil 7-apreldagi 165-son qaroriga
1-ILOVA
Jismoniy shaxslar tomonidan qayd etilgan huquqbuzarliklar toʻgʻrisidagi fotosuratlar va (yoki) videoyozuvlarni qabul qilish, koʻrib chiqish hamda ularni taqdim etgan shaxslarni ragʻbatlantirish tartibi haqida
NIZOM
1-bob. Umumiy qoidalar
1. Mazkur Nizom jismoniy shaxslarning videokuzatuv va tasvirga olish texnika vositalari hamda mobil qurilmalari (keyingi oʻrinlarda — videotexnika vositalari) orqali qayd etilgan ekologiya, atrof muhitni muhofaza qilish va tabiatdan foydalanish, shuningdek, moddiy madaniy meros obyektlarini muhofaza qilish va ulardan foydalanish sohasidagi huquqbuzarliklar (keyingi oʻrinlarda — huquqbuzarlik) aks ettirilgan fotosuratlar va (yoki) videoyozuvlarni (keyingi oʻrinlarda — foto va video materiallar) qabul qilish, koʻrib chiqish hamda ularni taqdim etgan shaxslarni ragʻbatlantirish tartibini belgilaydi.
2. Videotexnika vositalari orqali qayd etilgan huquqbuzarlik toʻgʻrisidagi foto va video materiallarni qabul qilish, koʻrib chiqish hamda ularni taqdim etgan shaxslarni ragʻbatlantirish ushbu Nizomga ilovaga muvofiq sxema asosida amalga oshiriladi.
2-bob. Huquqbuzarliklarni videotexnika vositalari orqali qayd etish
3. Jismoniy shaxslar huquqbuzarlikni videotexnika vositalari orqali qayd etishi hamda foto va video materiallarni:
ekologiya, atrof muhitni muhofaza qilish va tabiatdan foydalanish sohasidagi huquqbuzarlik boʻyicha — “Ekonazorat” axborot tizimi orqali Oʻzbekiston Respublikasi Ekologiya va atrof muhitni muhofaza qilish davlat qoʻmitasiga (keyingi oʻrinlarda — Davlat ekologiya qoʻmitasi);
Oldingi tahrirga qarang.
moddiy madaniy meros obyektlarini muhofaza qilish va ulardan foydalanish sohasidagi huquqbuzarlik boʻyicha — “Madaniy meros nazorati” axborot tizimi orqali Oʻzbekiston Respublikasi Madaniy meros agentligiga (keyingi oʻrinlarda — Madaniy meros agentligi) koʻrib chiqish uchun yuborishi mumkin.
(3-bandning uchinchi xatboshisi Oʻzbekiston Respublikasi Vazirlar Mahkamasining 2025-yil 15-dekabrdagi 791-sonli qarori tahririda — Qonunchilik maʼlumotlari milliy bazasi, 16.12.2025-y., 09/25/791/1167-son)
4. Videotexnika vositalari orqali qayd etilgan huquqbuzarlik toʻgʻrisidagi foto va video materiallarda quyidagilar aniq aks ettirilishi lozim:
sodir etilgan huquqbuzarlik;
huquqbuzarlik sodir etgan shaxs toʻgʻrisidagi maʼlumotlar (agar mavjud boʻlsa);
madaniy meros obyektining nomi (tegishli huquqbuzarlik boʻyicha);
huquqbuzarlik sodir etilgan manzil, sana va vaqt.
5. Huquqbuzarliklar aks ettirilgan foto va video materiallarga har qanday tarzda oʻzgartirishlar kiritish taqiqlanadi. Oʻzgartirish kiritilgan foto va video materiallar koʻrib chiqilmaydi, hajmini qisqartirish maqsadida videoyozuvning bevosita huquqbuzarlik aks ettirilgan qismini kesib olish bundan mustasno.
6. Huquqbuzarlik holati aks ettirilgan foto va video materiallarni “Ekonazorat” va “Madaniy meros nazorati” axborot tizimlariga yuborishda quyidagilar toʻliq koʻrsatilishi lozim:
fuqaroning ismi, familiyasi, otasining ismi, doimiy yashash manzili;
uyali telefon raqami, bank plastik kartasi raqami va elektron manzili;
huquqbuzarlik sodir etilgan joy, sana va vaqt;
huquqbuzarlik sodir etgan shaxs toʻgʻrisidagi maʼlumotlar (agar mavjud boʻlsa).
3-bob. Videotexnika vositalari orqali qayd etilgan huquqbuzarliklarni koʻrib chiqish
7. Videotexnika vositalari orqali qayd etilgan huquqbuzarlik toʻgʻrisidagi foto va video materiallar maxsus avtomatlashtirilgan foto va video qayd etish texnika vositalari orqali huquqbuzarliklar qayd etilgan fotosurat va videoyozuvlarga tenglashtiriladi hamda Oʻzbekiston Respublikasining Maʼmuriy javobgarlik toʻgʻrisidagi kodeksida belgilangan tartibda koʻrib chiqiladi.
8. “Ekonazorat” va “Madaniy meros nazorati” axborot tizimlariga kelib tushgan huquqbuzarlik qayd etilgan foto va video materiallar tegishliligi boʻyicha Davlat ekologiya qoʻmitasi yoki Madaniy meros agentligining masʼul xodimi tomonidan oʻn besh ish kuni mobaynida koʻrib chiqiladi, huquqbuzarlik holatlari oʻrganiladi va huquqbuzarning shaxsini aniqlash maqsadida foto va video materiallar Oʻzbekiston Respublikasi Ichki ishlar vazirligiga yuboriladi.
9. Huquqbuzarlik haqidagi foto va video materiallar Ichki ishlar vazirligi tomonidan qabul qilinadi, foto va video materiallar sifati va materiallarda aks etgan shaxsning tashqi yuz qiyofasi shaxsni aniqlashga yaroqliligi tekshiriladi, shundan soʻng huquqbuzarning shaxsi aniqlanadi va tegishliligi boʻyicha oʻn ish kuni mobaynida Davlat ekologiya qoʻmitasi yoki Madaniy meros agentligiga yuboriladi.
Foto va video materiallarni qabul qilish va huquqbuzarning shaxsi aniqlanganligi natijalarini tegishliligi boʻyicha yuborish avtomatik va elektron tarzda amalga oshirilishi mumkin.
10. Davlat ekologiya qoʻmitasining masʼul xodimi besh ish kuni mobaynida:
maʼmuriy huquqbuzarlik sodir etgan shaxsga nisbatan belgilangan tartibda maʼmuriy bayonnoma va jazo choralarini qoʻllash yuzasidan hujjatlarni elektron shaklda rasmiylashtiradi hamda Ichki ishlar vazirligining “E-maʼmuriy ish” tizimiga kiritadi;
jarima solish toʻgʻrisidagi tegishli qaror va tayinlangan jarimani toʻlash uchun toʻlov varaqasi (kvitansiya)ni huquqbuzarning elektron pochta manziliga elektron shaklda, telefon raqamiga “sms” xabarnoma shaklida yoki yashash manziliga pochta orqali yuboradi. Bunda tegishli qaror va toʻlov varaqasi (kvitansiya) huquqbuzarga bevosita taqdim etilishi ham mumkin.
Sodir etilgan huquqbuzarlik boʻyicha koʻrib chiqish vakolati mavjud boʻlmasa, hujjatlar bir ish kuni mobaynida qonunchilikda belgilangan tartibda tegishli sudga yoki boshqa vakolatli organga yuboriladi.
11. Madaniy meros agentligining masʼul xodimi besh ish kuni mobaynida Ichki ishlar vazirligining idoralararo maʼlumotlarni uzatish tarmogʻi “E-ma'muriy ish” tizimi orqali huquqbuzarlik sodir etgan shaxsga nisbatan toʻplangan maʼmuriy huquqbuzarlik toʻgʻrisidagi ishni jinoyat ishlari boʻyicha tuman (shahar) sudlariga koʻrib chiqish uchun taqdim etadi.
12. Agar sodir etilgan huquqbuzarlikda jinoyat alomatlari aniqlansa, foto va video materiallar bir kun ichida vakolatli huquqni muhofaza qilish organiga yuboriladi.
13. Quyidagi hollarda videotexnika vositalari orqali qayd etilgan huquqbuzarlik toʻgʻrisidagi foto va video materiallar asosida ish yuritish tugatiladi hamda bu haqda tegishli qaror qabul qilinadi:
foto va video materiallar mazkur Nizomning 4-bandida belgilangan talablarga javob bermaganda yoki sifatsiz boʻlganda;
foto va video materiallar “Ekonazorat” va “Madaniy meros nazorati” axborot tizimlariga mazkur Nizomning 6-bandida belgilangan talablarga rioya etilmagan holda yuklanganda;
foto va video materiallarga oʻzgartirishlar kiritilgan boʻlsa, mazkur Nizomning 5-bandida nazarda tutilgan hollar bundan mustasno;
ichki ishlar organlari tomonidan foto va video materiallarda aks ettirilgan huquqbuzarning shaxsini aniqlash imkoni boʻlmaganda;
foto va video materiallarda qayd etilgan huquqbuzarlik boʻyicha qaror qabul qilingan yoki maʼmuriy ish (jinoyat ishi) yuritilayotgan taqdirda.
14. Videotexnika vositalari orqali qayd etilgan huquqbuzarlik toʻgʻrisidagi foto va video materiallarni koʻrib chiqish natijasi yuzasidan uni yuborgan shaxsga huquqbuzarlik (jinoyat) boʻyicha jarima undirilgan paytdan eʼtiboran oʻn besh kun muddatda elektron shaklda javob yuboriladi.
4-bob. Huquqbuzarliklar qayd etilgan videoyozuvlarni yuborgan shaxslarni ragʻbatlantirish
15. Huquqbuzarlik aks ettirilgan foto va video materiallarni yuborgan shaxslar:
daraxtlar, butalar, boshqa oʻsimliklar va nihollarni qonunga xilof ravishda kesish, kundakov qilish, shikastlantirish, yoʻq qilish yoki boshqa joyga koʻchirib oʻtkazish boʻyicha — huquqbuzardan undirilgan mablagʻlar hisobidan bazaviy hisoblash miqdorining 1 baravari miqdorida;
ekologiya, atrof muhitni muhofaza qilish va tabiatdan foydalanish sohasidagi boshqa huquqbuzarlik boʻyicha — huquqbuzardan undirilgan jarima miqdorining oʻn besh foizi miqdorida;
moddiy madaniy meros obyektlarini muhofaza qilish va ulardan foydalanish sohasida huquqbuzarlik boʻyicha — huquqbuzardan undirilgan mablagʻlar hisobidan bazaviy hisoblash miqdorining 1 baravari miqdorida pul mukofoti bilan ragʻbatlantiriladi.
Huquqbuzarlik boʻyicha sud tomonidan jarima, shu jumladan, maʼmuriy jarima bilan bogʻliq boʻlmagan boshqa jazo chorasi qoʻllangan hollarda, foto va video materiallarni yuborgan shaxs Vazirlar Mahkamasining “Fuqarolar va jamoat tashkilotlarini huquqbuzarliklar profilaktikasi va jinoyatchilikka qarshi kurashishdagi faol ishtiroki uchun ragʻbatlantirish tartibi toʻgʻrisida nizomni tasdiqlash haqida” 2018-yil 8-yanvardagi 15-son qaroriga muvofiq ragʻbatlantiriladi.
16. Huquqbuzarlik aks ettirilgan foto va video materiallarni yuborgan shaxslar uyali telefon raqamini yoki bank plastik kartasi raqamini koʻrsatish orqali ragʻbatlantirish puli qanday usulda qabul qilib olinishini koʻrsatib oʻtadi.
17. Ragʻbatlantirish:
huquqbuzarlik boʻyicha birinchi xabar bergan shaxsga nisbatan qoʻllaniladi;
huquqbuzarlik tegishli organlar tomonidan bevosita aniqlangandan soʻng kelib tushgan xabarlar boʻyicha amalga oshirilmaydi;
jarima undirilgan paytdan eʼtiboran oʻn besh kun muddatda uning tegishli organlar hisobida qoldiriladigan qismidan amalga oshiriladi.
18. Ragʻbatlantirish huquqbuzardan jarima undirilgandan soʻng fuqaroning uyali telefon raqami hisobiga yoki bank plastik kartasiga tegishliligi boʻyicha Ekologiya, atrof muhitni muhofaza qilish va chiqindilar bilan bogʻliq ishlarni amalga oshirish jamgʻarmasi yoki Madaniy meros jamgʻarmasi hisobvaragʻiga oʻtkazilgan mablagʻlar hisobidan avtomatik tarzda pul oʻtkazish yoʻli bilan amalga oshiriladi.
5-bob. Yakunlovchi qoidalar
19. Huquqbuzarlik toʻgʻrisidagi foto va video materiallarni taqdim etgan shaxslar haqdagi maʼlumotlarning oshkor etilishiga yoʻl qoʻyilmaydi.
20. Ushbu Nizomni bajarish jarayonida kelib chiqadigan nizolar qonunchilik hujjatlariga muvofiq hal etiladi.
21. Mazkur Nizom talablarining buzilishida aybdor boʻlgan shaxslar qonunchilik hujjatlariga muvofiq javob beradilar.
Jismoniy shaxslar tomonidan qayd etilgan huquqbuzarliklar toʻgʻrisidagi fotosuratlar va (yoki) videoyozuvlarni qabul qilish, koʻrib chiqish hamda ularni taqdim etgan shaxslarni ragʻbatlantirish tartibi haqidagi nizomga
 ILOVA
Videotexnika vositalari orqali qayd etilgan huquqbuzarlik toʻgʻrisidagi foto va video materiallarni qabul qilish, koʻrib chiqish hamda ularni taqdim etgan shaxslarni ragʻbatlantirish
SXEMASI

Bosqichlar

Subyektlar

Tadbirlar

Amalga oshirish muddatlari

1-bosqich

Jismoniy shaxslar

Ekologiya, atrof muhitni muhofaza qilish va tabiatdan foydalanish, shuningdek, moddiy madaniy meros obyektlarini muhofaza qilish va ulardan foydalanish sohasida huquqbuzarliklar (keyingi oʻrinlarda — huquqbuzarlik) toʻgʻrisidagi fotosuratlar va (yoki) videoyozuvlarni (keyingi oʻrinlarda — foto va video materiallar) yuborish.

Huquqbuzarlik aniqlangan paytda

2-bosqich

Davlat ekologiya qoʻmitasi, Madaniy meros agentligi

1. Jismoniy shaxs tomonidan yuborilgan huquqbuzarlik haqidagi foto va video materiallarni qabul qilish.

2. Huquqbuzarlik holatlarini oʻrganish.

3. Huquqbuzarning shaxsini aniqlash maqsadida Ichki ishlar vazirligiga foto va video materiallarni yuborish.

Oʻn besh ish kunida

3-bosqich

Ichki ishlar vazirligi

1. Huquqbuzarlik haqidagi foto va video materiallarni qabul qilish.

2. Foto va video materiallarning sifati va materiallarda aks etgan shaxsning tashqi yuz qiyofasi shaxsni aniqlashga yaroqliligini tekshirish.

3. Foto va video materiallardagi huquqbuzarning shaxsini aniqlash.

4. Huquqbuzar shaxsi toʻgʻrisidagi maʼlumotlarni tegishliligi boʻyicha Davlat ekologiya qoʻmitasi va Madaniy meros agentligiga yuborish.

Oʻn ish kunida

4-bosqich

Davlat ekologiya qoʻmitasi

1. Huquqbuzarga nisbatan belgilangan tartibda maʼmuriy bayonnoma va jazo choralarini qoʻllash yuzasidan hujjatlarni elektron shaklda rasmiylashtirish va Ichki ishlar vazirligining yagona maʼlumotlar bazasiga kiritish yoki tegishliligi boʻyicha koʻrib chiqish uchun taalluqli sudga yuborish.

Besh ish kunida

2. Jarima solish toʻgʻrisidagi tegishli qaror va tayinlangan jarimani toʻlash uchun toʻlov varaqasi (kvitansiya)ni huquqbuzarning elektron pochta manziliga elektron shaklda, telefon raqamiga sms xabarnoma shaklida yoki yashash manziliga pochta orqali yuborish.

Besh ish kunida

3. Sodir etilgan huquqbuzarlik holati boʻyicha koʻrib chiqish vakolati mavjud boʻlmagan taqdirda hujjatlarni tegishli sudga yoki boshqa vakolatli organga yuborish.

Bir ish kunida

Madaniy meros agentligi

Ichki ishlar vazirligining idoralararo maʼlumotlarni uzatish tarmogʻi “E-maʼmuriy ish” tizimi orqali huquqbuzarlik sodir etgan shaxsga nisbatan toʻplangan maʼmuriy huquqbuzarlik toʻgʻrisidagi ishni jinoyat ishlari boʻyicha tuman (shahar) sudlariga koʻrib chiqish uchun taqdim etish.

Besh ish kunida

5-bosqich

Davlat ekologiya qoʻmitasi,

Madaniy meros agentligi

1. Huquqbuzarlik toʻgʻrisidagi fotosuratlar va videoyozuvlarni yuborgan shaxslarni pul mukofoti bilan ragʻbatlantirish.

2. Huquqbuzarlik toʻgʻrisidagi fotosuratlar va videoyozuvlarni yuborgan shaxsga murojaati natijalari yuzasidan maʼlumotlarni yuborish.

Huquqbuzarlik boʻyicha jarima undirilgan paytdan eʼtiboran oʻn besh kun muddatda

Vazirlar Mahkamasining 2022-yil 7-apreldagi 165-son qaroriga
2-ILOVA
Vazirlar Mahkamasining “Oʻzbekiston Respublikasi Madaniyat vazirligi huzuridagi Madaniy meros departamenti faoliyatini tashkil etish hamda moddiy madaniy meros obyektlarini muhofaza qilish va ulardan foydalanishga oid ayrim normativ-huquqiy hujjatlarni tasdiqlash toʻgʻrisida” 2019-yil 30-martdagi 265-son qaroriga kiritilayotgan oʻzgartirish va qoʻshimchalar
1. Qarorga 7-ilovada:
4-bandga quyidagi mazmundagi yettinchi xatboshi qoʻshilsin:
“moddiy madaniy meros obyektlarini muhofaza qilish va ulardan foydalanish toʻgʻrisidagi qonun buzilishi holatlari haqidagi fotosuratlar va videoyozuvlarni yuborgan shaxslarni ushbu huquqbuzarliklarni sodir etgan shaxslardan undirilgan mablagʻlar hisobidan bazaviy hisoblash miqdorining bir baravariga teng miqdordagi pul mukofoti bilan ragʻbatlantirish”;
yettinchi xatboshi sakkizinchi xatboshi deb hisoblansin.
2. Qarorga 12-ilovaning 21-bandida:
ikkinchi xatboshidagi “mehnatga haq toʻlashning eng kam miqdorining 35,2 foizi” soʻzlari “bazaviy hisoblash miqdorining 1 baravari” soʻzlari bilan almashtirilsin;
uchinchi xatboshidagi “mehnatga haq toʻlashning eng kam miqdorining 1,06 baravari” soʻzlari “bazaviy hisoblash miqdorining 3 baravari” soʻzlari bilan almashtirilsin.
(Qonunchilik maʼlumotlari milliy bazasi, 08.04.2022-y., 09/22/165/0283-son; 16.12.2025-y., 09/25/791/1167-son)