|
Hujjat kuchini yo‘qotgan " " 22.02.2021
|
Oʻzbekiston Respublikasi Vazirlar Mahkamasining
qarori
“AVTOMOBIL YOʻLLARINI REKONSTRUKSIYA QILISH” LOYIHASINI AMALGA OSHIRISH CHORA-TADBIRLARI TOʻGʻRISIDA
LexUZ sharhiMazkur qaror Oʻzbekistan Respublikasi Vazirlar Mahkamasining 2021-yil 22-fevraldagi 87-sonli “Oʻzbekiston Respublikasi Hukumatining oʻz ahamiyatini yoʻqotgan ayrim qarorlarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Oʻz ahamiyatini yoʻqotgan qonunchilik hujjatlarini qayta koʻrib chiqish tizimini joriy etish orqali mamlakatda ishbilarmonlik muhitini yaxshilash chora-tadbirlari toʻgʻrisida” 2020-yil 27-sentabrdagi PF-6075-son Farmoni)”gi qaroriga asosan oʻz kuchini yoʻqotgan.
Osiyo taraqqiyot banki bilan hamkorlik qilishning muhimligini eʼtiborga olib, Yoʻl sektorida institutsional islohotlarni amalga oshirish va avtomobil yoʻllarining eng ustuvor uchastkalarini rekonstruksiya qilish maqsadida Vazirlar Mahkamasi qaror qiladi:
1. Osiyo taraqqiyot banki Direktorlar Kengashining Oʻzbekiston Respublikasiga:
“Avtomobil yoʻllarini rekonstruksiya qilish” loyihasini amalga oshirish uchun oʻzgaruvchan protsent stavkasi va toʻrt yillik imtiyozli davrni qoʻshgan holda uzish muddati 24 yil boʻlgan 50 mln. AQSH dollari summasida qarz berilishi;
institutsional tarkibiy oʻzgartirishlarni qoʻllab-quvvatlash va yoʻl sektorida islohotlarni amalga oshirish uchun 1 mln. AQSH dollari summasida grant asosida texnik yordam koʻrsatilishini maʼqullaganligi maʼlumot uchun qabul qilinsin.
2. Belgilab qoʻyilsinki, qarz mablagʻlarini, foizlar va ular boʻyicha vositachilik haqlarini uzish Respublika yoʻl jamgʻarmasi mablagʻlari hisobidan amalga oshiriladi.
3. Qarzni uzish jadvali 1-ilovaga* muvofiq tasdiqlansin.
*1-ilova berilmaydi.
4. Moliya vaziri Oʻzbekiston Respublikasi nomidan Qarz bitimini imzolashga vakil qilinsin.
5. Oʻzbekiston Respublikasi Adliya vazirligi Qarz bitimi imzolangandan soʻng ikki hafta muddatda tegishli yuridik xulosani ishlab chiqsin va uni Osiyo taraqqiyot bankiga taqdim etsin.
6. “Avtomobil yoʻllarini rekonstruksiya qilish” loyihasi uchun asbob-uskunalar, materiallar xarid qilish, ishlar bajarish va xizmatlar koʻrsatish yuzasidan tanlov savdolarini oʻtkazish tender komissiyasi tarkibi 2-ilovaga* muvofiq tasdiqlansin.
* 2-ilova berilmaydi.
7. Yoʻl xoʻjaligi kengashi (R.R. Yunusov) “Avtomobil yoʻllarini rekonstruksiya qilish” loyihasini amalga oshirishda Osiyo taraqqiyot banki ekspertlari bilan birgalikda moliyalashtirish doirasida respublika iqtisodiyoti uchun eng muhim boʻlgan Kattaqoʻrgʻon—Navoiy—Buxoro—Olot bojxona posti avtoyoʻllari uchastkalarini rekonstruksiya qilishni nazarda tutsin.
8. Maʼlumot uchun qabul qilinsinki:
Qarz bitimi va Oʻzbekiston Respublikasining Bojxona kodeksiga muvofiq loyiha mablagʻlari hisobiga sotib olinadigan tovarlar, ishlar yoki xizmatlar boj toʻlovlari toʻlashdan ozod qilinadi (bojxonada rasmiylashtirilishi uchun undiriladigan bojxona yigʻimlari bundan mustasno);
Qarz bitimi va Oʻzbekiston Respublikasining Soliq kodeksiga muvofiq mahalliy xarajatlarni qoplash uchun ajratilgan qarz mablagʻlari sotib olinadigan tovarlar, ishlar va xizmatlar soliq toʻlovlaridan ozod qilinadi.
9. Oʻzbekiston Respublikasi Tashqi ishlar vazirligi Yoʻl xoʻjaligi kengashining buyurtmanomasiga koʻra loyihani tayyorlash va uni amalga oshirishda qatnashuvchi xorijiy mutaxassislarga kirish vizalarini rasmiylashtirish masalalarini, konsullik yigʻimlari undirmasdan, belgilangan tartibda koʻrib chiqsin.
10. Oʻzbekiston Respublikasi Ichki ishlar vazirligi Yoʻl xoʻjaligi kengashining buyurtmanomasiga koʻra loyihani ishlab chiqish va uni amalga oshirishda qatnashuvchi xorijiy mutaxassislarning vizalarini roʻyxatdan oʻtkazish, muddatini uzaytirish, ularni Oʻzbekiston Respublikasida yashash joylarida roʻyxatdan oʻtkazish davlat poshlinalari undirmasdan amalga oshirilishini taʼminlasin.
11. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.R. Yunusov zimmasiga yuklansin.
Vazirlar Mahkamasining Raisi I. KARIMOV
Toshkent sh.,
1999-yil 25-fevral,
83-son
