Oʻzbekiston Respublikasi Korrupsiyaga qarshi kurashish agentligi direktorining
buyrugʻi
Davlat organlari va tashkilotlarining komplayens va korrupsiyaga qarshi ichki nazorat tuzilmalari tomonidan korrupsiya holatlari hamda ularning oldini olish yuzasidan tekshiruvlarni tashkil etish tartibi toʻgʻrisidagi nizomni tasdiqlash haqida
[Oʻzbekiston Respublikasi Adliya vazirligi tomonidan 2026-yil 18-noyabrda roʻyxatdan oʻtkazildi, roʻyxat raqami 3978]
Oʻzbekiston Respublikasining “Korrupsiyaga qarshi kurashish toʻgʻrisida”gi Qonuniga muvofiq buyuraman:
1. Davlat organlari va tashkilotlarining komplayens va korrupsiyaga qarshi ichki nazorat tuzilmalari tomonidan korrupsiya holatlari hamda ularning oldini olish yuzasidan tekshiruvlarni tashkil etish tartibi toʻgʻrisidagi nizom ilovaga muvofiq tasdiqlansin.
2. Mazkur buyruq Oʻzbekiston Respublikasi Bosh prokuraturasi, Iqtisodiyot va moliya vazirligi, Ichki ishlar vazirligi, Raqamli texnologiyalar vazirligi hamda Sanoat kooperatsiyasi va davlat xaridlari agentligi bilan kelishilgan.
3. Ushbu buyruq rasmiy eʼlon qilingan kundan eʼtiboran kuchga kiradi.
Direktor А. BURXANOV
Toshkent sh.,
2026-yil 17-noyabr,
101-son
Kelishildi:
Iqtisodiyot va moliya vaziri J. KUCHKAROV
2026-yil 28-oktabr
Raqamli texnologiyalar vaziri SH. SHERMATOV
2026-yil 28-oktabr
Bosh prokuror birinchi oʻrinbosari B. VALIYEV
2026-yil 23-oktabr
Ichki ishlar vaziri A. TASHPULATOV
2026-yil 22-oktabr
Sanoat kooperatsiyasi va davlat xaridlari agentligi direktori B. XAYDAROV
2026-yil 11-oktabr
Oʻzbekiston Respublikasi Korrupsiyaga qarshi kurashish agentligi direktorining 2026-yil 17-noyabrdagi 101-son buyrugʻiga
ILOVA
ILOVA
Davlat organlari va tashkilotlarining komplayens va korrupsiyaga qarshi ichki nazorat tuzilmalari tomonidan korrupsiya holatlari hamda ularning oldini olish yuzasidan tekshiruvlarni tashkil etish tartibi toʻgʻrisidagi
NIZOM
Mazkur Nizom komplayens va korrupsiyaga qarshi ichki nazorat tuzilmalari (bundan buyon matnda ichki nazorat tuzilmalari deb yuritiladi) tomonidan davlat organlari va tashkilotlari, davlat ishtirokidagi korxonalarda (bundan buyon matnda davlat organlari va tashkilotlari deb yuritiladi) korrupsiya holatlarini keltirib chiqaruvchi omillarni aniqlash va ularning oldini olish yuzasidan tekshiruvlarni (bundan buyon matnda tekshiruv deb yuritiladi) tashkil etish tartibini belgilaydi.
Ushbu Nizom talablari Oʻzbekiston Respublikasi Prezidenti Administratsiyasi, Oʻzbekiston Respublikasi Oliy Majlisi Qonunchilik palatasi va Senati, Qoraqalpogʻiston Respublikasi Joʻqorgʻi Kengesi, Oʻzbekiston Respublikasi Vazirlar Mahkamasi, Oʻzbekiston Respublikasi Markaziy saylov komissiyasi, sud, prokuratura, ichki ishlar, mudofaa ishlari, favqulodda vaziyatlar, bojxona, Oʻzbekiston Respublikasi Milliy gvardiyasi, Davlat xavfsizlik xizmati va Oʻzbekiston Respublikasi Prezidenti Davlat xavfsizlik xizmati organlariga nisbatan tatbiq etilmaydi.
1-bob. Tekshiruvlarni tashkil etish
1. Tekshiruv ichki nazorat tuzilmalari tomonidan davlat organi va (yoki) tashkilotining markaziy apparati, hududiy boʻlinmalari, davlat organi va (yoki) tashkiloti huzuridagi tashkilotlar (bundan buyon matnda tarkibiy boʻlinmalar deb yuritiladi) tomonidan amalga oshiriladigan funksiyalar doirasida korrupsiyaviy omillarni aniqlash hamda ularning oldini olish choralarini belgilash maqsadida oʻtkaziladi.
2. Tekshiruvlar rejali va rejadan tashqari oʻtkaziladi.
3. Rejali tekshiruvlar tarkibiy boʻlinmalar tomonidan amalga oshiriladigan funksiyalardagi korrupsiyaviy xavf-xatarlar darajasidan kelib chiqib, quyidagi davriylikda tashkil etiladi:
korrupsiyaviy xavf-xatarlar darajasi “past” boʻlgan funksiyalarda — ikki yilda bir marta;
korrupsiyaviy xavf-xatarlar darajasi “oʻrta” boʻlgan funksiyalarda — bir yilda bir marta;
korrupsiyaviy xavf-xatarlar darajasi “yuqori” boʻlgan funksiyalarda — bir yilda ikki marta.
4. Rejadan tashqari tekshiruvlar ichki va tashqi manbalardan korrupsiyaviy omillar haqida kelib tushgan axborot, maʼlumot va topshiriqlarga asosan oʻtkaziladi.
5. Tekshiruvlar davlat organi va tashkilotining birinchi rahbari yoki uning komplayens va korrupsiyaga qarshi ichki nazorat boʻyicha oʻrinbosari (maslahatchisi) (ushbu lavozim mavjud boʻlgan taqdirda) tomonidan har yili tasdiqlanadigan korrupsiya holatlari hamda ularning oldini olish yuzasidan tekshiruvlarni tashkil etish chora-tadbirlariga (bundan buyon matnda tekshiruvlarni tashkil etish tadbirlari deb yuritiladi) muvofiq oʻtkaziladi.
6. Tekshiruv muddati tekshiruvlarni tashkil etish tadbirlarida belgilanadi va yigirma besh ish kunidan oshmasligi lozim. Tekshiruv muddati tekshiruvlarni tashkil etish tadbirlarida koʻrsatilgan boshlanish sanasidan eʼtiboran hisoblanadi. Tekshiruvlarni tashkil etish tadbirlarida belgilangan muddatning oxirgi kuni yoki undan oldin tekshiruv harakatlari tugallangan kun tekshiruv yakunlangan kun hisoblanadi.
Tekshiruv davomida qoʻshimcha oʻrganishlar talab etiladigan taqdirda, ichki nazorat tuzilmasining asoslantirilgan bildirgisi asosida davlat organi va tashkilotining birinchi rahbarining yoki uning komplayens va korrupsiyaga qarshi ichki nazorat boʻyicha oʻrinbosarining (maslahatchisining) (ushbu lavozim mavjud boʻlgan taqdirda) topshirigʻi bilan tekshiruv muddati bir marta, koʻpi bilan yigirma besh ish kuniga uzaytirilishi mumkin.
2-bob. Tekshiruvlarni oʻtkazish va ularning natijalarini rasmiylashtirish
7. Tekshiruv ichki nazorat tuzilmasi rahbari tomonidan shakllantiriladigan ishchi guruh tomonidan oʻtkaziladi. Ishchi guruh tarkibi va uning rahbari ichki nazorat tuzilmasi rahbari tomonidan belgilanadi.
Ishchi guruhga ichki nazorat tuzilmasi rahbari yoki ichki nazorat tuzilmasining boshqa xodimi rahbarlik qiladi.
Ishchi guruh tarkibi kamida uch nafar aʼzodan iborat boʻladi. Ishchi guruh tarkibiga boshqa tarkibiy boʻlinmalar, shuningdek, boshqa davlat organlari va tashkilotlarining mutaxassislari jalb etilishi mumkin.
Bunda tekshirilayotgan tarkibiy boʻlinmada tekshiruv doirasidagi funksiyalarni amalga oshiruvchi xodimlarning ishchi guruh tarkibiga kiritilishiga yoʻl qoʻyilmaydi.
8. Ishchi guruh aʼzosida tekshirilayotgan tarkibiy boʻlinmada tekshiruv doirasidagi funksiyalarni amalga oshiruvchi xodimlar bilan yaqin qarindoshlik munosabatlari mavjud boʻlsa yoki tekshiruv natijalaridan bevosita manfaatdor boʻlsa yoxud uning xolisligiga shubha tugʻdiruvchi boshqa holatlar mavjud boʻlsa, u oʻzini oʻzi rad etishi shart.
Ishchi guruh aʼzosi oʻzini oʻzi rad etish uchun asos boʻluvchi holatlar yuzaga kelgan yoki unga maʼlum boʻlgan paytdan eʼtiboran bu haqda ishchi guruh rahbarini shu vaqtning oʻzida yozma ravishda xabardor qilishi shart.
Ishchi guruh rahbari oʻzini oʻzi rad etish toʻgʻrisidagi xabarnomani olgan kundan eʼtiboran tegishli ishchi guruh aʼzosini tekshiruvda ishtirok etishdan chetlashtirish hamda uning oʻrniga boshqa shaxsni ishchi guruh tarkibiga kiritish choralarini koʻradi.
9. Tekshiruv davomida ichki nazorat tuzilmasi quyidagilarga haqli:
davlat organi va tashkiloti tizimidagi oʻz zimmasiga yuklatilgan vazifalarni amalga oshirish uchun zarur boʻlgan axborot hamda maʼlumotlar bazalaridan foydalanish;
oʻz zimmasiga yuklatilgan vazifalarni amalga oshirish uchun davlat organlaridan va boshqa tashkilotlardan, fuqarolardan maʼlumotlarni hamda boshqa zarur hujjatlarni va materiallarni soʻrash va olish;
vakolatini amalga oshirish doirasida zarurat tugʻilganda tegishli hujjat va materiallar bilan tanishish maqsadida davlat organi va tashkilotining obyektlariga toʻsqinliksiz kirish.
10. Tekshiruv davomida ichki nazorat tuzilmasi quyidagilarga majburdir:
tekshiruvni xolisona, begʻaraz, oʻz vaqtida va sifatli oʻtkazishga;
tekshiruv doirasidan chetga chiqmaslikka;
kasb etikasi va odob-axloq qoidalariga qatʼiy rioya etishga;
tekshiruv yakunlari boʻyicha tuzilgan maʼlumotnomada koʻrsatilgan faktlarni asoslantirishga;
tekshiruv davomida oʻzlariga maʼlum boʻlgan xizmat sirini va qonun bilan qoʻriqlanadigan boshqa sirlarni tashkil etuvchi maʼlumotlarni uchinchi shaxslarga oshkor etmaslikka.
11. Tekshiruv davomida tekshirilayotgan tarkibiy boʻlinma tomonidan amalga oshiriladigan funksiyalar doirasida korrupsiyaviy omillarning mavjudligi, shuningdek, korrupsiyaviy xavf-xatarlarni kamaytirish yoki bartaraf etishga qaratilgan chora-tadbirlarning amalga oshirilishi va ularga rioya etilishi oʻrganiladi.
12. Ichki nazorat tuzilmasi tekshiruv davomida aniqlangan korrupsiyaga oid huquqbuzarlik faktlari boʻyicha toʻplangan materiallarni qonuniy chora koʻrish uchun tegishli huquqni muhofaza qiluvchi organlarga yoki bevosita ularning ichki nazorat tuzilmalariga taqdim etadi.
13. Davlat organlari va tashkilotlari mansabdor shaxslari, boshqaruv xodimlari va boshqa mutaxassislar tekshiruv doirasida ichki nazorat tuzilmasi tomonidan soʻralgan maʼlumot, axborot va hujjatlarni, ular soʻralgan kundan boshlab uch ish kuni ichida ichki nazorat tuzilmasiga taqdim etishlari lozim.
14. Tekshiruv yakunlari boʻyicha ishchi guruh tomonidan tekshiruv yakunlangan kundan boshlab uch ish kuni ichida maʼlumotnoma tuziladi.
Maʼlumotnomada quyidagilar aks ettiriladi:
tekshiruv oʻtkazilgan tarkibiy boʻlinma nomi;
tekshiruv oʻtkazilgan davr;
ishchi guruh tarkibi;
aniqlangan holatlarni tasdiqlovchi hujjatlar va boshqa dalillar;
aniqlangan kamchiliklarni bartaraf etish hamda kelgusida ularning oldini olish yuzasidan takliflar.
15. Maʼlumotnoma ishchi guruh aʼzolari tomonidan imzolanadi. Ishchi guruh aʼzolaridan biri maʼlumotnomada aks ettirilgan xulosalarga rozi boʻlmagan taqdirda, oʻzining alohida fikrini yozma ravishda bayon etishga haqli hamda ushbu yozma fikr maʼlumotnomaga ilova qilinadi.
Maʼlumotnoma imzolangan kundan boshlab bir ish kuni ichida tekshirilgan tarkibiy boʻlinma rahbariga tanishish va imzolash uchun taqdim etiladi.
Tekshirilgan tarkibiy boʻlinma rahbari maʼlumotnomani imzolashdan bosh tortgan taqdirda, bu haqda ishchi guruh tomonidan dalolatnoma rasmiylashtiriladi. Dalolatnomada imzolashdan bosh tortish holati va uning sabablari koʻrsatiladi.
Tekshirilgan tarkibiy boʻlinma rahbari maʼlumotnoma bilan tanishgan kundan boshlab ikki ish kuni ichida maʼlumotnomaga nisbatan eʼtirozlarini yozma ravishda taqdim etishga haqli. Eʼtirozlar maʼlumotnomaga ilova qilinadi.
16. Tekshiruv yakunlari boʻyicha tuzilgan maʼlumotnoma eʼtirozlar (ular mavjud boʻlganda) bilan birga tekshirilgan tarkibiy boʻlinma rahbarining eʼtiroz bildirish muddati tugagan kundan boshlab bir ish kuni ichida ichki nazorat tuzilmasi tomonidan davlat organi va tashkilotining birinchi rahbariga yoki uning komplayens va korrupsiyaga qarshi ichki nazorat boʻyicha oʻrinbosariga (maslahatchisiga) (ushbu lavozim mavjud boʻlgan taqdirda) koʻrib chiqish uchun kiritiladi.
Maʼlumotnoma u kiritilgan kundan boshlab ikki ish kuni ichida davlat organi va tashkilotining birinchi rahbari yoki uning komplayens va korrupsiyaga qarshi ichki nazorat boʻyicha oʻrinbosari (maslahatchisi) (ushbu lavozim mavjud boʻlgan taqdirda) tomonidan koʻrib chiqiladi hamda maʼlumotnomada qayd etilgan kamchiliklarni bartaraf etish uchun korrupsiyaviy omillarni aniqlash hamda ularning oldini olish boʻyicha chora-tadbirlar dasturini (bundan buyon matnda chora-tadbirlar dasturi deb yuritiladi) ishlab chiqish yuzasidan tekshirilgan tarkibiy boʻlinmaga topshiriq beriladi.
Tekshirilgan tarkibiy boʻlinma topshiriq berilgan kundan boshlab uch ish kuni ichida chora-tadbirlar dasturini ishlab chiqadi va uni ichki nazorat tuzilmasi bilan kelishgan holda tasdiqlash uchun davlat organi va tashkilotining birinchi rahbariga yoki uning komplayens va korrupsiyaga qarshi ichki nazorat boʻyicha oʻrinbosariga (maslahatchisiga) kiritadi. Tasdiqlangan chora-tadbirlar dasturining ijrosi ichki nazorat tuzilmasi tomonidan nazorat qilinadi.
3-bob. Yakuniy qoida
17. Mazkur Nizom talablarining buzilishida aybdor boʻlgan shaxslar belgilangan tartibda javobgar boʻladilar.
(Qonunchilik maʼlumotlari milliy bazasi, 19.11.2026 y., 10/26/3978/1142-son)