Oʻzbekiston Respublikasi Hukumati va Serbiya Respublikasi Hukumati, keyingi oʻrinlarda alohida “Ishtirokchi” va birgalikda “Ishtirokchilar” deb ataluvchilar,

ikki davlat oʻrtasida mavjud boʻlgan doʻstona munosabatlar va oʻzaro manfaatli iqtisodiy hamkorlikni yanada mustahkamlashni istab,

ikki tomonlama munosabatlarni chuqurlashtirish uchun asos sifatida savdo-iqtisodiy aloqalarning muhimligini eʼtirof etib,

oʻzaro savdoni liberallashtirish, jumladan, tarif va notarif toʻsiqlarni qisqartirish va bartaraf etish ikki davlat oʻrtasidagi savdo-iqtisodiy hamkorlikning kengayishiga hissa qoʻshishiga ishonch hosil qilib,

Oʻzbekiston Respublikasi va Serbiya Respublikasi oʻrtasida erkin savdo rejimini oʻrnatish imkoniyatini oʻrganishni istab, quyidagi anglashuvga erishdilar:

Ishtirokchilar Oʻzbekiston Respublikasi Hukumati va Serbiya Respublikasi Hukumati oʻrtasida Erkin savdo bitimi (keyingi oʻrinlarda “Bitim” deb ataluvchi) boʻyicha muzokaralar oʻtkazish imkoniyatini koʻrib chiqish va oʻrganish maqsadida Qoʻshma ishchi guruh (keyingi oʻrinlarda “Ishchi guruh” deb ataluvchi) tuzish niyatni bildiradilar.

Bitim, xususan, quyidagi sohalarni qamrab olishi koʻzda tutadi:

tovarlar savdosi, shu jumladan, tariflarni liberallashtirish;

kelib chiqish qoidalari va bojxona tartib-taomillari;

savdodagi texnik toʻsiqlar hamda sanitariya va fitosanitariya choralari;

savdo himoya choralari;

oʻzaro kelishilgan hollarda xizmatlar savdosi va investitsiyalar; hamda

institutsional, maʼmuriy va nizolarni hal etish qoidalari.

Yuqoridagi sohalar roʻyxati toʻliq hisoblanmaydi hamda Ishchi guruh faoliyati davomida Ishtirokchilarning oʻzaro roziligi bilan toʻldirilishi yoki oʻzgartirilishi mumkin.

1) Har bir Ishtirokchi mazkur Qoʻshma ahdlashuv deklaratsiyasi imzolangan sanadan boshlab oʻttiz (30) kun ichida diplomatik kanallar orqali Ishchi guruhdagi oʻz vakillarini tayinlaydi.

2) Ishchi guruh Ishtirokchilar tomonidan oʻzaro kelishiladigan vaqt va joyda, navbatma-navbat Oʻzbekiston Respublikasi va Serbiya Respublikasida yoki oʻzaro kelishuvga koʻra videokonferensaloqa orqali muntazam ravishda yigʻiladi.

3) Ishchi guruh zarur boʻlganda ikki davlatning boshqa tegishli davlat idoralari va muassasalari vakillarini oʻz majlislarida ishtirok etishga taklif qilishi mumkin.

Mazkur Qoʻshma ahdlashuv deklaratsiyasi maqsadlarini amalga oshirish uchun Ishchi guruh:

tovarlar va xizmatlar boʻyicha muzokaralar tartibini muhokama qiladi va kelishib oladi; hamda

Ishtirokchilar tomonidan koʻrib chiqilishi va maʼqullanishi uchun Bitim matnining qamrovi va koʻlamini kelishib oladi;

keyingi aloqa uchun masʼul shaxslarni belgilash orqali muzokaralarni tashkil etishni kelishib oladi; hamda

mazkur Qoʻshma ahdlashuv deklaratsiyasi maqsadiga oid axborot, tajriba va ilgʻor amaliyotlar bilan almashadi.

Basharti Ishtirokchilar tomonidan boshqacha qaror qabul qilinmasa, Ishtirokchilar muloqot tili sifatida ingliz tilidan foydalanadilar.

Basharti Ishtirokchilar tomonidan har bir aniq holatda boshqacha kelishilmagan boʻlsa, har bir Ishtirokchi mazkur Qoʻshma ahdlashuv deklaratsiyasi doirasida amalga oshiriladigan faoliyatdan kelib chiqadigan oʻz xarajatlarini oʻzi qoplaydi.

Ishchi guruh faoliyati davomida Ishtirokchi tomonidan olingan tijorat jihatdan nozik yoki maxfiy tavsifdagi har qanday axborot uni taqdim etgan Ishtirokchining oldindan yozma roziligisiz uchinchi tomonlarga oshkor qilinmaydi va qabul qiluvchi Ishtirokchi davlatining milliy qonunchiligiga muvofiq koʻrib chiqiladi.

Mazkur Qoʻshma ahdlashuv deklaratsiyasini talqin qilish yoki qoʻllash bilan bogʻliq har qanday nizo Ishtirokchilar oʻrtasida maslahatlashuvlar va muzokaralar orqali hal etiladi.

1) Mazkur Qoʻshma ahdlashuv deklaratsiyasi imzolangan sanadan boshlab kuchga kiradi.

2) Mazkur Qoʻshma ahdlashuv deklaratsiyasiga Ishtirokchilarning oʻzaro yozma roziligi bilan oʻzgartirishlar kiritilishi mumkin. Oʻzgartirishlar mazkur paragrafning 1-bandida nazarda tutilgan tartibda kuchga kiradi.

3) Mazkur Qoʻshma ahdlashuv deklaratsiyasi har qanday Ishtirokchi tarafidan, koʻzda tutilgan tugatish sanasidan kamida olti (6) oy oldin boshqa Ishtirokchiga diplomatik kanallar orqali yozma xabarnoma yuborish yoʻli bilan istalgan vaqtda tugatilishi mumkin.

4) Mazkur Qoʻshma ahdlashuv deklaratsiyasi xalqaro shartnoma hisoblanmaydi va xalqaro huquqqa muvofiq hech qanday huquq yoki majburiyatlar yuzaga keltirmaydi.

Belgrad shahrida, 2026-yil 8-sentabrda, ikki asl nusxada, oʻzbek, serb va ingliz tillarida imzolandi, bunda barcha matnlar teng autentikdir. Talqin qilishda har qanday tafovut yuzaga kelgan taqdirda, ingliz tilidagi matndan foydalaniladi.