Xotin-qizlar va erkaklar uchun teng huquq hamda imkoniyatlarni taʼminlayotgan fuqarolarning oʻzini-oʻzi boshqarish organlarini eʼtirof etish, bu borada faol ommaviy axborot vositalarini kengroq qamrab olish, shuningdek, “Gender tenglik faoli” milliy tanlovi Nizomini yanada takomillashtirish maqsadida Oʻzbekiston Respublikasi Oliy Majlisi Senatining Kengashi qaror qiladi:

1. Oʻzbekiston Respublikasi Oliy Majlisi Senati Kengashining 2025-yil 16-apreldagi KQ-156-V-sonli Qarori bilan tasdiqlangan “Gender tenglik faoli” milliy tanlovini tashkil etish va oʻtkazish tartibi toʻgʻrisidagi nizomga ilovaga muvofiq oʻzgartirish va qoʻshimchalar kiritilsin.

2. Oʻzbekiston Respublikasi Oliy Majlisi Senatining Yoshlar, xotin-qizlar, madaniyat va sport masalalari qoʻmitasi Oʻzbekiston Respublikasi Oila va xotin-qizlar qoʻmitasi bilan birgalikda:

“Gender tenglik faoli” milliy tanlovini tashkil etish va oʻtkazish tartibi toʻgʻrisidagi nizomga kiritilgan oʻzgartirish va qoʻshimchalarni tanlov ishtirokchilariga yetkazish boʻyicha zarur choralarni koʻrsin;

respublika ijro etuvchi hokimiyat organlari hamda ularning hududiy va tuman (shahar) boʻlinmalari, hokimliklar, nodavlat notijorat tashkilotlari, tadbirkorlik subyektlari hamda ommaviy axborot vositalari oʻrtasida tanlovning mazmun-mohiyati va ahamiyatini targʻib qilishga qaratilgan ishlarni kuchaytirishga alohida eʼtibor qaratsin.

3. Xalq deputatlari viloyat, tuman, shahar Kengashlariga tanlov komissiyalari tarkibiga deputatlar nomzodini berib borish tavsiya etilsin.

4. Oʻzbekiston Respublikasi Oliy Majlisi Senati devonining Axborot xizmati har yilning boshida ommaviy axborot vositalari va Internet jahon axborot tarmogʻida tanlov haqida eʼlon berib borilishini taʼminlasin.

5. Mazkur Qarorning ijrosini nazorat qilish Oʻzbekiston Respublikasi Oliy Majlisi Senati Raisining birinchi oʻrinbosari S. Safoyev zimmasiga yuklansin.

6. Mazkur Qaror qabul qilingan kundan eʼtiboran kuchga kiradi.

Oʻzbekiston Respublikasi Oliy Majlis Senati Kengashining 2025-yil 16-apreldagi KQ-156-V-sonli qarori bilan tasdiqlangan “Gender tenglik faoli” milliy tanlovini tashkil etish va oʻtkazish tartibi toʻgʻrisidagi nizomga quyidagi oʻzgartirish va qoʻshimchalar kiritilsin:

1) 7-bandning ikkinchi xatboshisidagi “respublika ijro etuvchi hokimiyat organlari” degan soʻzlar “Qoraqalpogʻiston Respublikasi Joʻqorgʻi Kengesi, viloyatlar, tumanlar va shaharlar xalq deputatlari Kengashlari deputatlari, respublika ijro etuvchi hokimiyat organlari” degan soʻzlar bilan almashtirilsin;

2) 10-bandi quyidagi tahrirda bayon etilsin:

10. Tanlov har yili avgust — dekabr oylarida quyidagi bosqichlarda oʻtkaziladi:

birinchi bosqich — avgust oyida tuman va shaharlar miqyosida;

ikkinchi bosqich — oktyabr oyida birinchi bosqich gʻoliblari hamda hududiy tashkilotlar oʻrtasida Qoraqalpogʻiston Respublikasi, viloyatlar va Toshkent shahri miqyosida;

uchinchi bosqich — dekabr oyida ikkinchi bosqich gʻoliblari hamda respublika tashkilotlari oʻrtasida respublika miqyosida.

3) 11-bandi quyidagi tahrirda bayon etilsin:

“11. Tanlov quyidagi nominatsiyalar boʻyicha oʻtkaziladi:

“Gender tenglikni taʼminlashda eng faol hududiy tashkilot”;

“Gender tenglikni taʼminlashda eng faol respublika tashkiloti”;

“Gender tenglikni taʼminlashda eng faol hokimlik”;

“Gender tenglikni taʼminlashda eng faol nodavlat notijorat tashkiloti”;

“Gender tenglikni taʼminlashda eng faol tadbirkorlik subyekti”;

“Gender tenglikni targʻib qilishda eng faol teleradiokanal”;

“Gender tenglikni targʻib qilishda eng faol bosma nashr”;

“Gender tenglikni targʻib qilishda eng faol internet nashri”;

4) 12-bandi chiqarib tashlansin;

5) 13 — 28-bandlari tegishincha 12 — 27-bandlari deb hisoblansin;

6) 12 va 14-bandlaridagi “1 — 5-ilovalaridagi” degan soʻzlar “1 — 7-ilovalaridagi” degan soʻzlar bilan almashtirilsin;

7) 1-ilovaning nomidan “Gender tenglikni taʼminlashda eng faol tuman (shahar) tashkiloti” degan soʻzlar chiqarib tashlansin;

8) 5-ilova quyidagi tahrirdagi 5 — 7-ilovalar bilan almashtirilsin:

1. Teleradiokanal tomonidan gender tenglik, xotin-qizlar huquqlari va imkoniyatlari mavzusida tayyorlangan maxsus koʻrsatuv, eshittirish, reportaj va boshqa media mahsulotlar hamda ularning efir vaqtidagi ulushi.

2. Materiallarning dolzarbligi, tahliliy yondashuv mavjudligi, xolislik, jurnalistik standartlarga rioya qilinishi, ekspertlar ishtirokining taʼminlanganligi.

3. Koʻrsatuv va eshittirishlarning tomoshabin va tinglovchilar orasidagi qamrov darajasi, ijtimoiy fikrga taʼsiri, auditoriya faolligi (fikrlar, mulohazalar, muhokamalar).

4. Gender tenglikni targʻib qilishga qaratilgan milliy va xalqaro targʻibot kampaniyalarida (aksiya va loyihalarda) ishtirok etilganligi.

5. Tegishli davlat organlari, nodavlat notijorat tashkilotlar, xalqaro tashkilotlar bilan hamkorlikda loyiha va koʻrsatuvlar tayyorlanganligi.

6. Muayyan materiallar, koʻrsatuv yoki chiqish natijasida ijtimoiy fikrning shakllanishiga yoki muammolarning hal etilishiga taʼsir darajasi”.

1. Bosma nashrda xotin-qizlar huquqlari, gender tenglik va teng imkoniyatlar mavzusida maqola, intervyu va boshqa tahliliy materiallar chop etilganligi.

2. Maqolalarning dolzarbligi, muammolarning chuqur tahlil qilinganligi, xolislik, dalillarga asoslanganligi va jurnalistik standartlarga muvofiqligi.

3. Materiallarda soha mutaxassislari, huquqshunoslar, olimlar, psixologlar fikrlari va izohlaridan samarali foydalanilganligi.

4. Jamiyatdagi salbiy stereotiplarni yoʻqotish, tenglik gʻoyalarini shakllantirishga xizmat qiluvchi materiallar mavjudligi.

5. Xotin-qizlar, yoshlar, ijtimoiy himoyaga muhtoj qatlamlar muammolarining yoritilganligi va ularga yechim taklif etilganligi.

6. Tegishli davlat organlari, nodavlat notijorat tashkilotlar va xalqaro tashkilotlar bilan hamkorlikda materiallar tayyorlanganligi.

7. Materiallar orqali aholi xabardorligining oshirilganligi va jamoatchilikda ijobiy fikr shakllanishiga xizmat qilganligi”.

1. Internet nashrda xotin-qizlar huquqlari, gender tenglik va teng imkoniyatlar masalalariga oid maqola, yangilik, tahliliy materiallar berib borilganligi.

2. Materiallarning chuqur tahlilga asoslanganligi, xolisligi, ishonchli manbalarga tayanilganligi hamda jurnalistik standartlarga muvofiqligi.

3. Gender tenglikka oid voqea va jarayonlarning tezkor hamda doimiy ravishda yoritib borilganligi.

4. Obunachilar va ular tomonidan saytdagi materiallarning koʻrilganligi soni.

5. Kontentning ijtimoiy tarmoqlarda tarqalishi, yoqtirish, munosabat, izoh va repostlar soni.

6. Jamiyatdagi salbiy qarashlarni bartaraf etish, tenglik madaniyatini shakllantirishga xizmat qiluvchi kontentlar mavjudligi.

7. Izohlar, soʻrovnomalar, jonli muhokamalar, munosabatlar orqali oʻquvchilar bilan muloqot mexanizmining yoʻlga qoʻyilganligi.

8. Tegishli tashkilotlar bilan hamkorlikda loyihalar, materiallar va axborot kampaniyalarini amalga oshirganligi”.