Oʻzbekiston Respublikasi Vazirlar Mahkamasining 2011-yil 26-dekabrdagi “Oʻzbekiston Respublikasi hududidagi avtomobil yoʻllarida xavfsizlikni taʼminlash va tashkil etish chora-tadbirlari toʻgʻrisida”gi 342-son qarori, Oʻzbekiston Respublikasi Vazirlar Mahkamasining 2022-yil 12-apreldagi “Yoʻl harakati qoidalarini tasdiqlash toʻgʻrisida”gi 172-son qarori ijrosi yuzasidan Jarqoʻrgʻon tumanida fuqarolarning xavfsizligi va avtotransport vositalarining harakatini tartibga solish maqsadida, tuman Ichki ishlar boʻlimi yoʻl harakati xavfsizligi boʻlimining 2026-yil 5-iyundagi 53/24-83-sonli xatini koʻrib chiqib, “Yoʻl harakati toʻgʻrisida”gi Oʻzbekiston Respublikasi Qonunining 8-moddasi, Oʻzbekiston Respublikasi “Mahalliy davlat hokimiyati toʻgʻrisida”gi Qonunining 6 va 21¹- moddalariga asosan qaror qilaman:

1. Jarqoʻrgʻon tuman Ichki ishlar boʻlimi yoʻl harakati xavfsizligi boʻlimining 2026-yil 5-iyundagi 53/24-83-sonli xati inobatga olinsin.

2. Jarqoʻrgʻon tumanida fuqarolarning xavfsizligi va avtotransport vositalarining harakatini tartibga solish maqsadida:

tumanning Surxon sohil mahallasi Navbahor koʻchasiga 3.27 (toʻxtash taqiqlanadi) yoʻl belgisi oʻrnatilishiga ruxsat berilsin.

3. Jarqoʻrgʻon tumani Ichki ishlar boʻlimi yoʻl harakati xavfsizligi boʻlimi (Sh. Sharipov) mazkur qarorda belgilangan joylarga yoʻl belgilarining oʻrnatilishini taʼminlasin hamda ushbu hududlarda avtomobillar harakatini nazorat qilib borsin.

4. Tuman hokimligi axborot xizmati (D. Choriyeva) va “Janub gavhari” gazetasi ushbu qarorni matbuotda, ijtimoiy tarmoqlarda va hokimlik veb saytida eʼlon qilsin.

5. Mazkur qaror rasmiy eʼlon qilingan kundan eʼtiboran kuchga kiradi.

6. Mazkur qaror ijrosini nazorat qilish tuman hokimining oʻrinbosari O. Xamrayev hamda tuman Ichki ishlar boʻlimi boshligʻi M. Qoʻngratov zimmasiga yuklansin.