O‘zbekiston Respublikasining “O‘zbekiston Respublikasining Markaziy banki to‘g‘risida”gi, “Banklar va bank faoliyati to‘g‘risida”gi hamda 2026-yil 27-martdagi O‘RQ-1126-son “O‘zbekiston Respublikasining ayrim qonun hujjatlariga O‘zbekistonda islomiy bank faoliyatini joriy etishga qaratilgan qo‘shimcha va o‘zgartirishlar kiritish to‘g‘risida”gi qonunlariga muvofiq O‘zbekiston Respublikasi Markaziy banki boshqaruvi qaror qiladi:

1. O‘zbekiston Respublikasi Markaziy banki boshqaruvi tomonidan qabul qilingan ayrim idoraviy normativ-huquqiy hujjatlarga ilovaga muvofiq qo‘shimchalar kiritilsin.

2. Mazkur qaror rasmiy e’lon qilingan kundan e’tiboran kuchga kiradi.

1. O‘zbekiston Respublikasi Markaziy banki boshqaruvining 2021-yil 16-apreldagi 3/2-son qarori (ro‘yxat raqami 3302, 2021-yil 7-may) (Qonunchilik ma’lumotlari milliy bazasi, 07.05.2021-y., 10/21/3302/0486-son) bilan tasdiqlangan Tijorat banklarining ichki auditiga qo‘yiladigan talablar to‘g‘risidagi nizomning muqaddimasi “mikromoliya banklarida” degan so‘zlardan keyin “, shuningdek islomiy bank faoliyatini amalga oshiruvchi banklar va mikromoliya banklarida” degan so‘zlar bilan to‘ldirilsin.

2. O‘zbekiston Respublikasi Markaziy banki boshqaruvining 2023-yil 31-martdagi 8/9-son qarori (ro‘yxat raqami 3432, 2023-yil 8-may) (Qonunchilik ma’lumotlari milliy bazasi, 10.05.2023-y., 10/23/3432/0266-son) bilan tasdiqlangan Bank va banklar guruhida auditorlik tekshiruvlarini o‘tkazishning o‘ziga xos xususiyatlari hamda banklarning auditorlik tekshiruvlarini o‘tkazish huquqi uchun auditorning malaka sertifikatini berish tartibi to‘g‘risidagi nizomning muqaddimasi “mikromoliya banklari” degan so‘zlardan keyin “, shuningdek islomiy bank faoliyatini amalga oshiruvchi banklar va mikromoliya banklari” degan so‘zlar bilan to‘ldirilsin.

3. O‘zbekiston Respublikasi Markaziy banki boshqaruvining 2025-yil 2-oktabrdagi 21/6-son qarori (ro‘yxat raqami 3697, 2025-yil 28-oktabr) (Qonunchilik ma’lumotlari milliy bazasi, 28.10.2025-y., № 10/25/3697/0992) bilan tasdiqlangan Banklar kapitalining monandligiga qo‘yiladigan talablar to‘g‘risidagi nizomning muqaddimasi “mikromoliya banklari” degan so‘zlardan keyin “, shuningdek islomiy bank faoliyatini amalga oshiruvchi banklar va mikromoliya banklari” degan so‘zlar bilan to‘ldirilsin.