«Ўзбекистон — 2030» стратегиясини «Атроф-муҳитни асраш ва «яшил иқтисодиёт» йилида амалга оширишга оид давлат дастурининг (бундан буён матнда давлат дастури деб юритилади) 2025 йилда бажарилиши юзасидан Ўзбекистон Республикаси Вазирлар Маҳкамасининг ҳисоботини кўриб чиқиб, Ўзбекистон Республикаси Олий Мажлисининг Қонунчилик палатаси таъкидлайдики, давлат дастурининг ҳар бир йўналиши бўйича кенг қамровли ишлар амалга оширилган, уларнинг натижалари эса халқимизнинг кундалик ҳаётида акс этган.

Ўтган йил бошида бешта асосий йўналиш ва юзта мақсадни қамраб олган давлат дастури давлатимиз раҳбарининг парламент палаталарида сўзлаган нутқларида илгари сурилган ташаббуслар ва вазифалар асосида ишлаб чиқилган бўлиб, ушбу давлат дастури ҳамда уни тасдиқлаш юзасидан мамлакатимиз Президенти фармонининг лойиҳаси кенг жамоатчилик муҳокамасидан ўтказилган.

Давлат дастурида белгиланган вазифаларнинг ижросини таъминлаш мақсадида жами 226 та норматив-ҳуқуқий ҳужжат қабул қилинган.

Мамлакатимиз Президенти томонидан давлат дастурининг ижросини тизимли ташкил этишга қаратилган алоҳида эътибор, ундаги тадбирларни амалга ошириш бўйича ўз вақтида қабул қилинган фармонлар ва қарорлар ҳамда ўтказиб борилган қатор муҳокамалар ушбу муҳим ҳужжатнинг самарали бажарилишида асосий омил бўлган.

Давлат дастурида белгиланган мақсадлар ва устувор вазифаларнинг ижросини сўзсиз таъминлаш, бу борада доимий ва қатъий мониторинг олиб бориш мақсадида ҳукумат томонидан барча зарур чора-тадбирлар кўрилган. Давлат дастурида белгиланган вазифаларнинг ўз вақтида ва сифатли бажарилиши Ўзбекистон Республикаси Вазирлар Маҳкамасининг Раёсати мажлисларида танқидий-таҳлилий жиҳатдан муҳокама қилиб борилган.

Давлат дастури доирасида олиб борилган ислоҳотларни ҳуқуқий жиҳатдан мустаҳкамлаш мақсадида тегишли норматив-ҳуқуқий ҳужжатлар лойиҳаларини сифатли ишлаб чиқишда парламент ва ҳукумат ўртасида йўлга қўйилган самарали ҳамкорлик ҳам муҳим аҳамият касб этган.

Ўзбекистон Республикаси Олий Мажлисининг Қонунчилик палатаси (бундан буён матнда Қонунчилик палатаси деб юритилади) ва ундаги сиёсий партиялар фракцияларида давлат дастури доирасида қилинган ишларнинг ҳолати юзасидан мансабдор шахсларнинг ахбороти эшитиб борилган. Қуйи палата қўмиталари давлат дастурида белгиланган вазифаларнинг жойларда ижро этилиш ҳолатини мунтазам равишда назорат-таҳлил тартибида ўрганган.

Жумладан, Қонунчилик палатасининг мажлисларида ҳукумат аъзоларининг ўз фаолиятига доир масалалар юзасидан ахбороти 11 маротаба эшитилган, 9 маротаба «ҳукумат соати» ўтказилган, мансабдор шахсларга 15 та парламент сўрови ва 160 та депутат сўрови юборилган. Шунингдек Қонунчилик палатаси қўмиталарининг мажлисларида давлат органлари раҳбарларининг ахбороти 111 маротаба эшитилган.

Ҳар бир инсонга ўз салоҳиятини рўёбга чиқариши учун муносиб шароитлар яратиш борасида белгиланган устувор йўналишлар доирасида муайян ишлар бажарилган. Жумладан, 135 та янги давлат мактабгача таълим ташкилоти ташкил этилган. Бундан ташқари, 134 та давлат-хусусий шериклик асосидаги мактабгача таълим ташкилоти фаолияти йўлга қўйилиб, болаларнинг мактабгача таълим билан қамраб олиниш даражаси 78 фоизга етказилган.

Хотин-қизларни қўллаб-қувватлаш мақсадида уларнинг 331 минг нафари касб-ҳунар ва тадбиркорликка ўқитилган. «Аёллар дафтари»га киритилган 634,6 минг нафардан зиёд фуқаронинг бандлиги таъминланган.

Ишсиз бўлган ва ўз бизнесини бошлаш истагидаги ёшларни қўллаб-қувватлашга қаратилган «Ёшлар бандлиги дастури» қабул қилиниб, 414,6 минг нафар шахснинг бандлиги таъминланган.

Ишсизлик даражаси 5,5 фоиздан 4,9 фоизгача камайган. Қарийб 1,5 млн. эҳтиёжманд фуқаро камбағалликдан чиққан ва камбағаллик даражаси 2025 йил бошидаги 8,9 фоиздан 5,8 фоизгача тушган.

Барқарор иқтисодий ўсиш орқали аҳоли фаровонлигини таъминлаш йўналишидаги устувор мақсадларга эришиш бўйича зарур чора-тадбирлар кўрилган. Жаҳон миқёсида ишлаб чиқариш ва транспорт-логистика занжирлари узилган, хомашё ва молиявий ресурслар нархи ошган шароитда ҳам мамлакатимиз иқтисодиёти ишончли ва барқарор тарзда ривожланиб, макроиқтисодий ўсишни таъминлашга эришилган.

Хусусан, ялпи ички маҳсулот ҳажми 107,7 фоизга, шу жумладан саноат маҳсулотларини ишлаб чиқариш 106,8 фоизга, қурилиш ишлари 114,0 фоизга, хизматлар кўрсатиш 108,5 фоизга, қишлоқ хўжалиги маҳсулотларини етиштириш 104,4 фоизга ўсган. Экспорт ҳажми илк бор 33,8 млрд. долларга етган. Жами қиймати 43,1 млрд. АҚШ доллари бўлган хорижий инвестициялар ўзлаштирилиб, бу кўрсаткич ўтган йилдагига нисбатан 124 фоизга ўсган. Олтин-валюта захиралари илк бор 60 млрд. АҚШ долларидан ошган.

Ўзбекистоннинг халқаро рейтинглардаги ўрни тобора мустаҳкамланиб, етакчи халқаро рейтинг агентликлари мамлакатимизнинг суверен рейтингини «ББ-»дан «ББ» поғонасига кўтарган.

Сув ресурсларини тежаш ва атроф-муҳитни муҳофаза қилишнинг устувор йўналишлари доирасида табиий ресурслардан оқилона фойдаланиш, иқлим ўзгаришининг салбий таъсирини юмшатиш, «яшил энергия» технологияларини кенг жорий этиш борасида қатор ишлар қилинган.

Жумладан, 14 та ҳудудда ичимлик сув сифатини мониторинг қилувчи марказий лабораториялар ташкил этилиб, намуна олиш пунктлари сони 220 мингтага етказилган.

«Яшил макон» умуммиллий лойиҳаси доирасида 155 та туман ҳамда шаҳарда «яшил боғлар» ва «яшил жамоат парклари» ташкил қилинган, 251 минг гектар «яшил қоплама» ҳимоя ўрмонзорлари барпо этилган.

Қонун устуворлигини таъминлаш, халқ хизматидаги давлат бошқарувини ташкил этиш борасида ҳам муайян ишлар бажарилган. Хусусан, қонунчиликдаги бўшлиқларни бартараф этиш ҳамда идоравий ҳужжатларни юқорироқ юридик кучга эга бўлган қонунчилик ҳужжатларига тезкор равишда ва тўлиқ мувофиқлаштириш мақсадида Ўзбекистон Республикаси Президентининг тегишли Фармони билан «Айрим қонунчилик ҳужжатларини амалга ошириш механизмлари билан таъминлаш бўйича норматив-ҳуқуқий ҳужжатларни қабул қилишнинг 2025-2026 йилларга мўлжалланган дастури» тасдиқланган.

Ҳокимликлар ва вазирликлар бўлинмаларининг бир-бирини такрорловчи 7 та вазифасини бажариш Ўзбекистон Республикаси Президентининг тегишли фармонлари билан туман (шаҳар) ҳокимликларига ўтказилган, ҳокимлар фаолиятига хос бўлмаган 15 та вазифа бекор қилинган.

Маҳаллий ҳокимликларнинг фаолиятини трансформация қилиб, ҳудудий бошқарувни «аҳоли манфаатларига хизмат қилиш» принципи асосида йўлга қўйиш йўналишида «Индикаторлар тўплами»ни шакллантириш, унинг ижросини мониторинг ва назорат қилиш мақсадида «digitaloffice.uz» электрон платформаси ишга туширилган.

Ўтган даврда Ягона интерактив давлат хизматлари портали орқали 100 та янги хизмат кўрсатилиши йўлга қўйилган ҳамда жами хизматлар сони 800 тага етказилган.

«Хавфсиз ва тинчликпарвар давлат» тамойилига асосланган сиёсатни изчил давом эттириш бўйича белгиланган устувор вазифалар доирасида мамлакатимизнинг халқаро муносабатлардаги ўрнини янада мустаҳкамлаш ва ҳамкорлик алоқаларини кенгайтириш юзасидан зарур чоралар кўрилган. Жумладан, Президентимиз ташаббуси билан Марказий Осиё минтақасида илк бор Самарқанд шаҳрида БМТнинг Давлат хизмати бўйича форуми, ЮНEСКО Бош конференциясининг 43-сессияси, Тошкент шаҳрида Парламентлараро иттифоқнинг 150-юбилей Ассамблеяси тадбирлари муваффақиятли ўтказилган.

Шунингдек Ўзбекистоннинг Жаҳон савдо ташкилотига (ЖСТ) тўлақонли аъзо бўлиши йўналишида Женева шаҳрида Ўзбекистон ишчи гуруҳининг ўнинчи ва ўн биринчи йиғилишлари ўтказилган.

Кўрилган чора-тадбирлар натижасида давлат дастури доирасида бажарилиши белгиланган жами 818 та топшириқдан 710 тасининг ижроси тўлиқ таъминланган, 5 таси белгиланган тартибда назоратдан олинган, 47 тасининг ижро этиш муддати узайтирилган, 56 тасининг ижросини таъминлаш бўйича ишлар давом эттирилмоқда.

Давлат дастури доирасида ишлаб чиқилган «Махсус иқтисодий зоналар тўғрисида»ги, «Улуш киритиш асосида уй-жой қуриш тўғрисида»ги, «Атроф-муҳит мониторинги тўғрисида»ги, «Иқлим ўзгариши тўғрисида»ги, «Дипломатик хизмат тўғрисида»ги каби қонун лойиҳаларининг Қонунчилик палатасига қисқа муддатларда киритилишини таъминлаш зарур.

Давлат дастуридаги тадбирларни молиялаштириш учун Ўзбекистон Республикасининг Давлат буджетида кўзда тутилган маблағларнинг ўзлаштирилишини ва мақсадли сарфланишини таъминлаш муҳим аҳамият касб этади.

Бундан ташқари Қонунчилик палатасидаги сиёсий партиялар фракциялари томонидан кўтарилган инвесторларга давлат хизматларини кўрсатишда янада қулайликлар яратиш, рақамли иқтисодиётни фаол ривожлантириш, банк ва тўлов тизимларида киберхавфсизликни кучайтириш, аҳоли бандлигини таъминлаш, эҳтиёжманд хотин-қизларни ва ногиронлиги бўлган шахсларни ижтимоий қўллаб-қувватлаш, умумтаълим мактабларини қуриш (таъмирлаш), дарсликлар таъминотини яхшилаш, инклюзив таълимни такомиллаштириш, чиқинди полигонларини рекултивация қилиш, сув ресурсларидан оқилона фойдаланиш каби масалалар юзасидан зарур чора-тадбирлар кўрилиши мақсадга мувофиқ.

Юқорида баён этилганлардан келиб чиқиб, «Парламент назорати тўғрисида»ги Ўзбекистон Республикаси Қонунининг 8¹-моддасига мувофиқ Ўзбекистон Республикаси Олий Мажлисининг Қонунчилик палатаси қарор қилади:

1. «Ўзбекистон — 2030» стратегиясини «Атроф-муҳитни асраш ва «яшил иқтисодиёт» йилида амалга оширишга оид давлат дастурининг 2025 йилда бажарилиши юзасидан Ўзбекистон Республикаси Вазирлар Маҳкамасининг ҳисоботи маълумот учун қабул қилинсин.

2. Ўзбекистон Республикаси Вазирлар Маҳкамасига:

давлат дастуридаги муддати узайтирилган ва бажарилиши давом этаётган вазифаларнинг ижросини таъминлаш чораларини кўриш;

давлат дастурида назарда тутилган тадбирларни амалга ошириш учун ажратилган буджет маблағларининг, айниқса, халқаро молия институтлари маблағларининг мақсадли ўзлаштирилишини таъминлаш;

давлат дастурига мувофиқ ишлаб чиқилган «Махсус иқтисодий зоналар тўғрисида»ги, «Улуш киритиш асосида уй-жой қуриш тўғрисида»ги, «Атроф-муҳит мониторинги тўғрисида»ги, «Иқлим ўзгариши тўғрисида»ги, «Дипломатик хизмат тўғрисида»ги каби қонун лойиҳаларининг Қонунчилик палатасига киритилишини таъминлаш бўйича қўшимча чоралар кўриш тавсия этилсин.

3. Ушбу Қарор Ўзбекистон Республикаси Вазирлар Маҳкамасига юборилсин.

4. Ушбу Қарор қабул қилинган кундан эътиборан кучга киради.