Давлат тасарруфидан чиқариш ва хусусийлаштиришдан тушадиган маблағлардан самарали ва оқилона фойдаланиш устидан назорат қилишни таъминлаш мақсадида Вазирлар Маҳкамаси қарор қилади:

1. Давлат мулкини давлат тасарруфидан чиқариш, хусусийлаштиришдан тушган маблағларни ҳисобга олиш, тақсимлаш ва улардан фойдаланишни назорат қилиш тартиби иловага мувофиқ тасдиқлансин.

2. Қуйидагилар:

Ўзбекистон Республикаси Вазирлар Маҳкамасининг 1995 йил 31 июлдаги 273-ф-сон фармойиши;

Ўзбекистон Республикаси Вазирлар Маҳкамасининг «Республика кўчмас мулк биржасининг самарали фаолият кўрсатишини таъминлаш чора-тадбирлари тўғрисида» 1994 йил 29 апрелдаги 228-сон қарори (Ўзбекистон Республикаси ҚТ, 1994 йил, 4-сон, 25-модда) билан тасдиқланган кимошди савдосида ва танловларда сотиладиган давлат мулкига ҳақ тўлаш, уларни тақсимлаш ва улардан фойдаланиш тартиби тўғрисида Вақтинчалик низомга 1-илованинг 2, 3, 4 ва 5-бандлари ўз кучини йўқотган деб ҳисоблансин.

4. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосарлари Б. С. Ҳамидов ва В. А. Чжен зиммасига юклансин.

1. Мазкур Тартиб Вазирлар Маҳкамасининг «давлат мулкини давлат тасарруфидан чиқариш ва хусусийлаштиришдан тушган маблағлардан фойдаланишни тартибга солиш чора-тадбирлари тўғрисида» 1997 йил 20 октябрдаги 481-сон қарорига мувофиқ ишлаб чиқилган.

2. Давлат тасарруфидан чиқариш ва хусусийлаштиришдан тушган маблағ Ўзбекистон Республикаси бирлаштирилган бюджетининг бир қисми ҳисобланади ва улар:

акциядорлик жамиятларига айлантирилган давлат корхоналари бирламчи эмиссияси акцияларини сотишдан олинган даромадлар;

давлат мулки объектларни кимошди савдолари, танловлар, биржа савдолари ва биржадан ташқари савдоларда сотишдан тушган даромадлар;

ер участкаларини фуқароларга мерос қилиб қолдириладиган умрбод эгалик қилиш учун ким ошди савдоларида сотишдан ва қонун ҳужжатларида назарда тутилган ҳолларда ер участкаларини хусусийлаштиришдан тушган маблағлар;

давлат мулки ижарага берилганда ижара тўловидан тушган даромадлар;

давлат мулки қўмитаси томонидан илгари қарз олувчиларга улар томонидан олинган кредитларни қайтариш тарзида берилган кредитлар ва қарзлар бўйича улардан олинган даромадлардан ҳамда улар бўйича ҳисобланган фоизлар;

вақтинча бўш маблағларни давлат мулки қўмитасининг талаб қилиб олинадиган депозит счётидан тижорат банкларининг депозитларига жойлаштиришдан олинган даромадлар;

Давлат мулки қўмитаси ва унинг ҳудудий бошқармаларининг талаб қилиб олинадиган депозит счётларига тушувчи бошқа даромадлар ҳисобига шаклланади.

3. Давлат тасарруфидан чиқариш ва хусусийлаштиришдан тушган маблағлар, алоҳида тартибда тақсимланадиган хорижий валютадаги тушумлардан ташқари, Ўзбекистон Республикаси давлат мулки қўмитаси томонидан қуйидаги нисбатда тақсимланади:

50 фоизи — давлат бюджетига йўналтирилади ва инвестиция лойиҳаларини маблағ билан таъминлаш учун фойдаланилади;

20 фоизи — Хусусий тадбиркорлик ва кичик бизнесни қўллаб-қувватлаш фондига («Бизнес-фонд»га) ўтказилади;

20 фоизи — ижтимоий-иқтисодий ривожлантириш лойиҳаларини маблағ билан таъминлаш, бозор инфратузилмаси ташкилотларини шакллантириш учун Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларига;

5 фоизи — хусусийлаштириш бўйича Давлат дастурини амалга ошириш, инвестиция ва бозор тузилмаларини ташкил этиш ва ривожлантириш юзасидан Ўзбекистон Республикаси давлат мулки қўмитаси харажатларига;

5 фоизи — идора қилиш ва бошқарув функцияларини амалга ошириш билан боғлиқ харажатларни қоплаш учун Ўзбекистон Республикаси давлат мулки қўмитаси счётига

4. Давлат тасарруфидан чиқариш ва хусусийлаштиришдан хорижий валюта тушадиган маблағлар қуйидаги нисбатда тақсимланади:

95 фоизи — Ўзбекистон Республикаси Молия вазирлигининг хорижий валютадаги талаб қилиб олинадиган депозит счётига;

5 фоизи — Қўмитани техника билан жиҳозлаш ва республика ташқарисида халқаро семинарлар ташкил этиш учун давлат мулки қўмитаси ихтиёрига.

5. Агар Ўзбекистон Республикаси Президентининг фармонлари ёки Ҳукуматнинг алоҳида қарорлари билан хусусийлаштиришдан тушган маблағлар ёки уларнинг бир қисми бошқа мақсадларга йўналтирилган тақдирда мазкур Тартиб уларнинг қолган қисмига жорий этилади.

6. Мазкур Тартибнинг 3 ва 4-бандларига мувофиқ маблағларни тақсимлашда:

Ўзбекистон Республикаси Ҳукуматининг қарорларига кўра давлат тасарруфидан чиқариш ва хусусийлаштиришдан умумий маблағлардан бир марталик тўловлар;

белгиланган тартибда бекор қилинган битирувлар бўйича давлат мулки қўмитаси томонидан инвесторларга қайтариладиган акцияларни фонд бозорида сотишдан тушган маблағлар;

битишув тузиш учун инвесторлар томонидан депонентга қўйилган, улар бўйича битишувлар тузилмаган ва эгаларига қайтарилиши керак бўлган маблағлар;

амалдаги қонун ҳужжатларига мувофиқ мажбурий тусга эга бўлган мулки объектларини сотиш бўйича тендерлар ўтказиш харажатлари;

эмиссия проспектлари ва давлат мулкининг сотиладиган объектлари рўйхати мажбурий эълон қилиниши харажатлари;

банк, маблағни тўловчилар томонидан янглишиб ўтказилган, шунингдек давлат мулки қўмитасининг талаб қилиб олинадиган депозит счётига ҳамда унинг ҳудудий бошқармаларнинг талаб қилиб олинадиган иккиламчи депозит счётларига тушган маблағлар аниқлагунгача ҳисобга олинмайди.

7. Акцияларни сотишдан тушган маблағлар Ўзбекистон Республикаси Президентининг 1998 йил 4 мартдаги 1939-сон Фармонига мувофиқ фонд биржаси, брокерлар, давлатга тегишли акцияларни ҳисобга олиш, сақлаш бўйича депозитарийлар хизматларига ҳақ тўлаш бўйича операция харажатлари чиқариб ташланган ҳолда эмитентга тўлиқ миқдорда ўтказилади ҳамда мазкур Тартибнинг 3-бандига мувофиқ тақсимлашда ҳисобга олинмайди.

8. Мазкур Тартибнинг 2-бандида кўрсатиб ўтилган маблағлар давлат мулки қўмитасининг талаб қилиб олинадиган депозит счётида Ўзбекистон Республикаси Марказий банкининг Тошкент шаҳар бош бошқармасининг ҳисоб-китоб-касса марказида (банкнинг коди 00014) ва Ўзбекистон Республикаси Марказий банкнинг бош ҳудудий бошқармаларида очилган давлат мулки қўмитасининг ҳудудий бошқармалари талаб қилиб олинадиган иккиламчи депозит счётларида жамланади.

Давлат мулки қўмитаси ҳудудий бошқармаларнинг талаб қилиб олинадиган иккиламчи депозит счётларида тўпланувчи давлат тасарруфидан чиқариш ва хусусийлаштиришдан тушган маблағлар ҳар ҳафтада (ҳар сешанба кунлари) мазкур Тартибининг 3-банди охирги хатбошига мувофиқ тақсимланган сифатида ҳисобга олинадиган идора қилиш ва бошқариш функцияларини амалга ошириш билан боғлиқ сарф-харажатларни қоплаш учун Давлат мулки қўмитасининг ҳудудий бошқармалари ихтиёрида қолдириладиган маблағларнинг 5 фоизи чиқариб ташланган ҳолда Давлат мулки қўмитасининг Ўзбекистон Республикаси Марказий банкининг Тошкент шаҳар бош бошқармаси ҳисоб-китоб-касса марказидаги талаб қилиб олинадиган депозит счётига ўтказилади.

9. Тўловчилар томонидан янглишиб ўтказилган маблағлар, банк томонидан янглишиб ўтказилган маблағлар, биржалар ва брокерлар хизматларига тўланган миқдорлар ва аниқланиши керак бўлган миқдорлар ҳар ҳафтада Марказий банкнинг ҳудудий бош бошқармасига тақдим этиладиган Давлат мулки қўмитаси ҳудудий бошқармаси бошлиғининг имзоси ва гербли муҳр билан тасдиқланадиган шаклда (1-илова) акс эттириб борилади. Давлат мулки қўмитасига тақдим этилади.

10. Манбаларнинг барча турлари бўйича Давлат мулки қўмитаси ва унинг ҳудудий бошқармаларининг талаб қилиб олинадиган депозит счётларига келиб тушувчи маблағлар давлат мулки ҳисобланади ва ушбу маблағларга солиқ солинмайди.

11. Маблағларни Давлат мулки қўмитасининг Марказий банкнинг ҳудудий бош бошқармалардаги талаб қилиб олинадиган депозит счётларига ўтказиш харидор (юридик ёки жисмоний шахс)нинг топшириғига кўра тегишли тижорат банки томонидан амалга оширилади.

Банкда счётлари бўлмаган жисмоний шахслар нақд маблағларни банк орқали ўтказишлари мумкин.

12. Тўлов ҳужжатларида тўловчилар — давлат мулки объектларини ва акцияларни сотиб олувчи харидорлар:

Марказий банкнинг ҳудудий бош бошқармасининг талаб қилиб олинадиган иккиламчи депозит счётининг реквизитларини;

мазкур Тартибнинг 1-қисми 2-бандига мувофиқ тўловнинг номини;

маблағларни ўтказиш асосларини (олди-сотди шартномасининг ёки унинг ўрнини босувчи бошқа ҳужжатларнинг рўйхатдан ўтиш рақамини);

хусусийлаштириладиган объект номини кўрсатишлари шарт.

Харидор томонидан Тўлов топшириғини тўлдириш учун зарур бўлган счётлар рақами ва бошқа банклар реквизитлари хусусийлаштириладиган объектнинг олди-сотди шартномасида ёки унинг ўрнини босувчи бошқа ҳужжатда келтирилади.

13. Давлат мулки қўмитаси ва унинг ҳудудий бошқармалари хусусийлаштириладиган ҳар бир объект бўйича маблағлар келиб тушиши ва ҳаракатини тармоқлар ва келиб тушиши манбалари бўйича ҳисобга олиб борадилар, Давлат мулки қўмитаси томонидан тасдиқланган ва Молия вазирлиги билан келишилган тартибда ва шаклда улар бўйича ҳисобот тузадилар.

Давлат тасарруфидан чиқариш ва хусусийлаштиришдан тушадиган маблағлар ва уларнинг ҳаракати тўғрисидаги йиғма жадваллар ҳудудий бошқарма томонидан ҳар ойда Давлат мулки қўмитасига ҳисобот ойидан кейинги ойнинг 1-кунидаги ҳолати бўйича ойнинг 5-кунигача тақдим этилади.

14. Хусусийлаштириладиган объект бўйича ҳисоб-китоблар шакллари ва муддатлари харидор билан Давлат мулки қўмитаси ёки унинг ҳудудий бошқармалари ўртасида тузилган олди-сотди шартномаларида белгиланади. Бунда объектни қиймати бўлиб-бўлиб тўлаган ҳолда сотиб олиш муддати бир йилдан ошмаслиги керак.

15. Фонд биржасида ёки бошқа инвестиция муассасалари орқали сотиладиган акциялар учун ҳақ тўлаш тартиби ва шартлари Давлат мулки қўмитаси, унинг ҳудудий бошқармалари ёки улар томонидан ваколат берилган агентлар билан махсус лицензияларга эга бўлган қимматли қоғозлар бозори қатнашчилари ўртасида тузиладиган шартнома-топшириқномаларда белгиланади.

16. Давлатга тегишли акцияларни ҳисобга олиш ва Миллий депозитарийда сақлаш, савдоларни ташкил этиш ва акцияларни сотиш харажатлари мазкур Тартибга мувофиқ уларни сотишдан тушган тушум ҳисобига қопланади.

17. Брокерлик идоралари ёки бошқа инвестиция муассасалари маблағларнинг олди-сотди шартномалари тузилган пайтда бошлаб 5-банк куни мобайнида талаб қилиб олинадиган депозит счётларга келиб тушишини таъминлашлари керак.

18. Кўчмас мулк (мол-мулк) объектларини кимошди савдосида, танловларда, биржа ва биржадан ташқари савдоларда сотишдан тушган маблағлар объектлар (мулклар)ни бевосита сотишдан тушадиган пул маблағлари ҳисобига, шунингдек кимошди савдоси қатнашчиларини савдога қўйиладиган мол-мулк билан олдиндан таништирганлик учун олинган тушумлар, савдо ғолиби мол-мулкни сотиб олишни рад этганда қайтариб берилмаган гаров суммалари ҳисобидан ташкил топади.

Кўрсатиб ўтилган маблағлар Ўзбекистон Республикаси Давлат мулки қўмитасининг талаб қилиб олинадиган депозит счётида ёки унинг ҳудудий бошқармаларнинг талаб қилиб олинадиган иккиламчи депозит счётларида тўпланади.

Мазкур Тартибда давлат мулки объектларини сотувчи деганда Ўзбекистон Республикаси Давлат мулки қўмитаси ёки унинг ҳудудий бошқармалари тушунилади.

19. Объект (мол-мулк) кимошди савдосида, танловларда, биржа ва биржадан ташқари савдоларда якуний баён (кимошди, танлов), контракт (биржа савдолари) имзоланган пайтдан бошлаб кечи билан ўн кунда, шунингдек биржадан ташқари савдоларда аҳдлашувчи томонлар битим тузганларидан сўнг уч кун муддатда амалдаги қонун ҳужжатларига мувофиқ сотувчи билан харидор ўртасида олди-сотди шартномаси имзоланади.

Давлат кўчмас мулки (мол-мулки) объектлари сотилишидан тушган барча маблағлар воситачилик йиғими чиқариб ташланган ҳолда Ўзбекистон Республикаси Давлат мулки қўмитасининг талаб қилиб олинадиган депозит счётига ёки унинг ҳудудий бошқармаларининг талаб қилиб олинадиган иккиламчи депозит счётларига йўналтирилади, улар кейинчалик мазкур Тартибга мувофиқ тақсимланади.

Давлат кўчмас мулки ва мол-мулки объектлари кимошди савдоси ёки танлов орқали сотилганда Республика кўчмас мулк биржаси томонидан ундириладиган воситачилик йиғимлари қуйидаги тартибда белгиланади:

ким ошди савдосида камида 3 та босқичдан ўтган тақдирда сотилган мол-мулк умумий суммасининг кўпи билан 5 фоизи;

танлов савдолари ўтказилган тақдирда бошланғич нархдан ошган сумманинг кўпи билан 10 фоизи;

биржа савдолари ўтказилган тақдирда (сотув қийматига кўра) кўпи билан 3 фоиз.

Воситачилик йиғимини ундириш шунингдек фақат шартнома асосида мол-мулкни сотиб олувчининг ҳисобига амалга оширилиши мумкин.

Кимошди савдоси ташкилотчисига — Республика кўчмас мулк биржаси филиалига воситачилик йиғимининг 60 фоизи Республика кўчмас мулк биржасига 40 фоизи ўтказилади.

20. Шартнома шартларига мувофиқ харидор объектни сотиб олиш счётига белгиланган тартибда маблағ тўлайди.

Объект (мол-мулк) кимошди савдосида, танловларда биржа ва биржадан ташқари савдоларда сотилганда олди-сотди шартномаси бўйича ҳақ битишув миқдорига қараб қуйидаги муддатларда тўланади:

100 минг сўмгача бўлганда — 5 кун ичида;

100 минг сўмдан ортиқдан 500 минг сўмгача бўлганда — 1 ой ичида;

500 минг сўмдан ортиқдан 2 млн сўмгача бўлганда — 3 ой ичида;

2 млн сўмдан ортиқ бўлганда — 6 ой ичида.

Воситачилик ҳақи илгари тўланган закалат ҳисобга олинган ҳолда кимошди савдоси ташкилотчисининг талаб қилиб олинадиган депозит счётига ўтказилади.

Ер участкалари мерос қилиб қолдириладиган умрбод эгалик қилиш учун кимошди савдосида сотилганда унинг қийматини бўлиб- бўлиб тўлаш бир йилдан кўп бўлмаган муддатга белгиланади.

21. Харидор объектнинг тўлиқ қийматининг тўлаганда ҳамда Давлат мулки қўмитаси ёки унинг ҳудудий бошқармаси томонидан Давлат далолатномаси берилгандан сўнг объект эгаси ҳуқуқига эга бўлади.

22. Ким ошди савдосида, танловда, биржа ва биржадан ташқари савдоларда сотилган объектлар учун ўз вақтида ҳисоб-китоб қилиши устидан назоратни Давлат мулки қўмитаси ва унинг ҳудудий бошқармалари амалга оширади.

Томонлар ўртасидаги барча низолар ўзаро келишув бўйича ёки суд тартибида ҳал этилади.

23. Давлат мулки объектлари ва акцияларни сотиб олувчилар маблағлар тўлиқ ва ўз вақтида ўтказилиши учун қонун ҳужжатларига мувофиқ жавоб берадилар.

Объектларни давлат тасарруфидан чиқариш ва хусусийлаштиришдан, давлат мулки объектларини сотишдан тушган белгиланган муддатларда тўланмаган маблағлар қонун ҳужжатларига мувофиқ, муддати ўтказиб юборилган ҳар бир кун учун пеня ҳисобланган ҳолда, харидорларнинг талаб қилиб олинадиган депозит счётларидан сўзсиз ундириб олинади.

24. Давлат мулки қўмитаси, унинг ҳудудий бошқармалари:

Олди-сотди шартномаларига ёки уларнинг ўрнини босувчи бошқа ҳужжатларга мувофиқ хусусийлаштириш объектлари харидорларидан маблағлардан тўлиқ ва ўз вақтида тушиши устидан назоратни амалга оширади;

Талаб қилиб олинадиган депозит счётларида маблағлар ҳаракати тўғрисида тегишли кўчирмаларни банкдан олган ҳолда хизмат кўрсатувчи банклар билан келишиб хусусийлаштиришдан олинган маблағларни тушиши устидан кундалик назоратни амалга оширади;

25. Мазкур Тартибнинг 3-бандида назарда тутилган маблағлардан йўналишлар бўйича фойдаланиш тартиби амалдаги қонун ҳужжатларига мувофиқ белгиланади.

Инвестиция лойиҳаларини маблағ билан таъминлаш учун мақсадли фойдаланиладиган маблағларни давлат бюджетига ўтказиш (50 фоизини) ҳар ойда Давлат мулки қўмитасининг депозит счётидан амалга оширилади.

26. Хусусий тадбиркорлик ва кичик бизнесни қўллаб-қувватлаш Фондига (Бизнес-фондга) мўлжалланган маблағлар ҳар ойда 20 фоиз миқдорида ўтказилади ва уларни назорат қилиш қуйидаги тартибда амалга оширилади:

Ўзбекистон Республикаси Давлат мулки қўмитаси қайтариб бериш асосида пул маблағларини бериш тартиби ва шартлари тўғрисида Бизнес-фонд билан шартнома тузади.

Шартномада қуйидаги шартлар тартибда олдиндан келишиб олиниши керак:

Хусусийлаштириш ва давлат тасарруфидан чиқаришдан тушадиган маблағлар тўғрисидаги Ўзбекистон Республикаси Давлат мулки қўмитаси бўйича бир йилга белгиланган прогнозга мувофиқ Бизнес-фондга ажратиладиган пул маблағларининг энг юқори миқдори кўрсатилади;

Бизнес-фонд томонидан қарзни узиш жадвалини тақдим этиш муддатлари;

давлат маблағлари ҳисобидан Бизнес-фондга берилган кредитлар ва унга ажратилган кредитлар бўйича фоизлардан унинг фойдаланиши йўналишлари ва муддатлари;

муддати ўтиб кетган қарзларни ва жазо жарималарни ҳисоблаб чиқиш тартиби;

Бизнес-фонд томонидан молиявий ҳисоботни тақдим этиш тартиби;

тўловлар бўйича ўзаро солиштириб чиқишларни ўтказиш тартиби;

Бизнес-фонднинг Давлат мулки қўмитаси олдидаги моддий жавобгарлиги чора-тадбирлари;

томонларнинг банк реквизитлари ва бошқалар.

Шартнома шартларига ҳар қандай ўзгартиришлар фақат томонларнинг ёзма аҳдлашувига кўра киритилади.

Бизнес-фонд томонидан қайтариладиган маблағлар Давлат мулки қўмитасининг талаб қилиб олинадиган депозит счётига ўтказилади. Тузилган шартномалар бўйича Бизнес-фонд томонидан тўлов тўхтатилган ҳолларда Давлат мулки қўмитаси муддати ўтказиб юборилган қарз миқдорларидаги маблағларни Бизнес-фонднинг «Ўзтадбиркорбанк» муассасаларидаги счётларидан сўзсиз тартибда ҳисобдан чиқариб ташлашга ҳақлидир.

27. Ҳудудларни ижтимоий-иқтисодий ривожлантириш эҳтиёжлари учун маблағларни Қорақалпоғистон Республикаси Вазирлар Кенгашига, вилоятлар ва Тошкент шаҳар ҳокимликларига ўтказиш (20 фоиз) ва улардан мақсадли фойдаланиш устидан назорат қилиш қуйидаги тартибда амалга оширилади:

Ҳар ойда жорий ойнинг 15-кунигача Ўзбекистон Республикаси Давлат мулки қўмитаси тўлов топшириғи билан талаб қилиб олинадиган депозит счётидаги 20 фоиз маблағни Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларининг жорий счётларига ўтказилади.

Кўрсатилган счётдан олинган маблағлар Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари томонидан қуйидаги устувор йўналишлар бўйича фойдаланилади:

а) Маблағларнинг камида 50 фоизи аҳолининг ижтимоий ҳимояланмаган қатлами учун уй-жой қурилишини маблағ билан йўналтирилади;

б) қолган маблағлар:

қишлоқ жойларда кичик бизнес ва хусусий тадбиркорликни, сув қувурлари, оқова сув тизими ва иншоотларини, газ ва электр таъминоти тармоқларини, йўллар, ҳудудларни ободонлаштиришни ривожлантириш учун зарур бўлган муҳандислик ва ишлаб чиқариш инфратузилмаси объектларини, шунингдек ижтимоий инфратузилма-таълим, соғлиқни сақлаш, маданият ва спорт объектлари қурилишини маблағ билан таъминлаш учун;

Кичик бизнес ва хусусий тадбиркорликни қўллаб-қувватлаш давлат дастурига мувофиқ Миллий депозитарийнинг вилоятлардаги филиалларини, республика фонд биржаларини, кўчмас мулк биржалари, товар-хом ашё биржаси, товар ишлаб чиқарувчилар ва тадбиркорлар палатасини, бизнес-инкубаторларни қисман маблағ билан таъминлаш учун ва бизнес-марказлар ташкил этишга йўналтирилади.

Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари счётларидаги маблағларидан фойдаланиш йўналишлари тўғрисидаги қарор Қорақалпоғистон Республикаси Вазирлар Кенгаши Раиси, вилоятлар ва Тошкент шаҳар ҳокимликлари томонидан фармойиш (қарор) шаклида, улардан фойдаланишнинг юқорида кўрсатилган йўналишларига мувофиқ қабул қилинади. Қорақалпоғистон Республикаси Молия вазирлиги, ҳокимликлар молия бошқармаси жорий счёт эгалари ҳисобланади.

Маблағларни ўтказиш учун тўлов топшириқлари қабул қилинган қарор асосида Қорақалпоғистон Республикаси Молия вазирлиги, ҳокимлик молия бошқармаси томонидан тайёрланади ва банкка берилади.

Йўналишлар бўйича маблағларнинг ўз вақтида ўтишини хизмат кўрсатиш шартномасига мувофиқ банк таъминлайди.

Давлат мулки қўмитасининг ҳудудий бошқармалари ҳар ойда ҳисобот ойидан кейинги ойнинг 10-кунигача Ўзбекистон Республикаси Давлат мулки қўмитасига, илова қилинаётган шаклга мувофиқ (2-илова) ҳокимликлар томонидан маблағлардан фойдаланиш йўналишлари тўғрисида ҳисоботни тақдим этадилар.

28. Хусусийлаштириш давлат дастурини амалга ошириш, инвестиция, молия ва бозор тузилмаларини ташкил этиш, ривожлантириш бўйича харажатлар учун назарда тутилган маблағларни ўтказиш (5-фоиз) улардан мақсадли фойдаланиш устидан назорат қуйидаги тартибда амалга оширилади:

Давлат мулки қўмитасининг Марказий банкнинг Тошкент шаҳар бош бошқармаси ҳисоб-китоб-касса марказидаги талаб қилиб олинадиган депозит счётидан маблағларни сарфлаш қуйидаги йўналишлар бўйича амалга оширилади:

республика вилоятларида (минтақаларида) бизнес-инкубаторлар, бизнес-марказлар, Миллий депозитарийнинг филиалларини, республика фонд биржаси, кўчмас мулк биржаси, товар-хом ашё биржасини ривожлантиришга молиявий кўмаклашиш;

санация қилиш жамғармасини тўлдиришга;

Кичик бизнесни ва хусусий тадбиркорликни ривожлантиришни қўллаб-қувватлаш давлат дастурига мувофиқ меъёрий-ҳуқуқий, ихтисослаштирилган адабиётларни тайёрлаш ва нашр этиш;

Давлат мулкини хусусийлаштириш ва давлат тасарруфидан чиқариш давлат дастурини амалга ошириш билан боғлиқ бошқа харажатлар.

Марказий банкнинг Тошкент шаҳар бош бошқармаси ҳисоб-китоб-касса маркази маблағларини хизмат кўрсатиш шартномасига мувофиқ ўз вақтида ўтказилишини таъминлайди.

29. Мазкур Тартибга мувофиқ тақсимланиши керак бўлган маблағлардан мақсадли ва самарали фойдаланиш устидан назорат Молия вазирлиги томонидан амалга оширилади.

30. Давлат мулки қўмитаси ҳар чоракда, чорак тамом бўлгандан кейинги ойнинг 20 кунидан кечикмасдан талаб қилиб олинадиган депозит счётидан амалга оширилган сарф-харажатлар тўғрисида Мазкур Тартибнинг 25 — 28-бандларига мувофиқ харажатларнинг мақсадлари кўрсатилган ҳолда Молия вазирлигига ахборот тақдим этади.

31. Мазкур Тартибнинг 26 — 28-бандларига мувофиқ маблағларнинг келиб тушиши ва сарфланиши бўйича бирламчи ҳужжатларни текшириш бир йилда камида бир марта Молия вазирлиги томонидан амалга оширилади.

32. Мазкур Тартибнинг қўлланилиши юзасидан тушунтиришлар Ўзбекистон Республикаси Молия вазирлиги ва Давлат мулки қўмитаси томонидан берилади.